Genesis 1:1-31
1 Hodeeyáádą́ą́ʼ Diyin God yótʼááh hiníláii índa nahasdzáán áyiilaa.
2 Nahasdzáán tʼáadoo ánoolniní da, índa tʼáadoo bikááʼ siláhí da; bikáaʼgi tʼáá átʼéé nítʼééʼ chahałheełgo Diyin God biNíłchʼi Diyinii tó yikááʼgóó nahazleʼ.
3 Áádóó Diyin God ádííniid, Adinídíin leʼ. Tʼáá áko adinídíín hazlı̨́ı̨́ʼ.
4 Áko Diyin God éí adinídínígíí yinééłʼı̨́įʼgo bił yáʼíítʼééh, áádóó adinídínígíí chahałheeł yił ałtsʼáyíínil.
5 Áko Diyin God éí adinídínígíí Jı̨́ yee yiyíízhiʼ; chahałheełígíí éí Tłʼééʼ yee yiyíízhiʼ. Áko tłʼééʼ hazlı̨́ı̨́ʼ áádóó jı̨́ hazlı̨́įʼjįʼ áłtsé łaʼa jı̨́ azlı̨́ı̨́ʼ.
6 Nááʼákóneʼ Diyin God ánáádooʼniid, Tá ałnííʼ góneʼ hazʼą́ wóleʼgo tó ałtsʼą́ą́hjí hólǫ́ǫ leʼ.
7 Áko Diyin God éí wódahdi tóhígíí áádóó wóyahdi tóhígíí bitaʼgi hazʼą́ągo éí yee ałtsʼáyíínil; éí tʼáá ákótʼé silı̨́ı̨́ʼ.
8 Diyin God éí hazʼánígíí Yádiłhił yee yiyíízhiʼ. Áko tłʼééʼ hazlı̨́ı̨́ʼ áádóó jı̨́ hazlı̨́įʼjįʼ naaki jı̨́ azlı̨́ı̨́ʼ.
9 Nááʼákóneʼ Diyin God ánáádooʼniid, Yádiłhił biyaagi tóhígíí éí tʼáá łáhájįʼ ahandahohgeeh, áádóó niʼ yíłtseígíí yitʼı̨́į doo; éí tʼáá ákótʼé silı̨́ı̨́ʼ.
10 Diyin God éí niʼ yíłtseígíí Nahasdzáán yee yiyíízhiʼ; tó ahaneheezgoʼígíí éí Tónteel yee yiyíízhiʼ. Áko Diyin God éí yinééłʼı̨́įʼgo bił yáʼíítʼééh.
11 Nááʼákóneʼ Diyin God ánáádooʼniid, Nahasdzáán bitsʼą́ą́dóó tłʼoh índa chʼil bílástsiiʼ dahólónígíí, áádóó tsin tʼáá ałʼąą ádaatʼéii bineestʼąʼ dahólónígíí éí bineestʼąʼ bílástsiiʼ dahólónígíí nahasdzáán bikáaʼgi hááhinootʼı̨́įł doo, áko éí tʼáá ákótʼé silı̨́ı̨́ʼ.
12 Áko nahasdzáán bikáaʼgi tłʼoh índa chʼil ałʼąą ádaatʼéii bílástsiiʼ dahólónígíí áádóó tsin tʼáá ałʼąą ádaatʼéii bineestʼąʼ dahólóonii éí bineestʼąʼ biiʼ bílástsiiʼ dahólónígíí hainííłtʼą́. Áko Diyin God éí yinééłʼı̨́įʼgo bił yáʼíítʼééh.
13 Áko tłʼééʼ hazlı̨́ı̨́ʼ áádóó jı̨́ hazlı̨́įʼjįʼ tágí jı̨́ azlı̨́ı̨́ʼ.
14 Nááʼákóneʼ Diyin God ánáádooʼniid, Yádiłhił biyiʼdi bee daʼdinídíinii dahólǫ́ǫ doo, áko éí jı̨́ índa tłʼééʼ ałtsʼánéiʼnił doo; éidí bee ééhózinii átʼée doo; éidí bikʼehgo ahééhwiidáah doo áádóó niyiiłkaah doo, índa nináháháah dooleeł,
15 áádóó yádiłhił biyiʼdę́ę́ʼ adinídíin doo, áko nahasdzáán bikáaʼjįʼ adinídíin doo; éí tʼáá ákótʼé silı̨́ı̨́ʼ.
16 Áádóó Diyin God éí bee adinídíinii naaki ayóó átʼéego áyiilaa; aláahgo bee adinídínígíí éí jı̨́įgo yee bóhólníih doo; aʼohgo bee adinídínígíí éí tłʼéeʼgo yee bóhólníih doo; sǫʼ ałdóʼ eelʼáago áyiilaa.
17 Áko Diyin God díí nahasdzáán bikáaʼjįʼ bee adinídíin doo biniyé yádiłhił biyiʼdi niyiiznil,
18 índa éí jı̨́ áádóó tłʼééʼ yee bóhólníih doo; adinídínígíí chahałheeł yił ałtsʼánéíʼnił doo ałdóʼ biniyé. Áko Diyin God éí yinééłʼı̨́įʼgo bił yáʼíítʼééh.
19 Áko tłʼééʼ hazlı̨́ı̨́ʼ áádóó jı̨́ hazlı̨́įʼjįʼ dı̨́ʼí jı̨́ azlı̨́ı̨́ʼ.
20 Nááʼákóneʼ Diyin God ánáádooʼniid, Dahináago táyiʼ naaldeehii tʼóó adahayói leʼ, índa nahasdzáán bikááʼ wódahgo tsídii nidaatʼaʼ doo.
21 Áko Diyin God éí táyiʼ naaldeehii ayóó ádaníldíilii áyiilaa; táyiʼ naaldeehii tʼóó ahayóí tʼáá ałʼąą ádaatʼéii binídaałtʼéego daʼahílchíihgo áyiilaa, áádóó nidaatʼaʼii ałʼąą ádaatʼéii binídaałtʼéego daʼahílchíihgo áyiilaa. Áko Diyin God éí yinééłʼı̨́įʼgo bił yáʼíítʼééh.
22 Áádóó Diyin God éí yikʼijisdliʼgo ání, Nihiyázhí nídahoodleeł doo, áádóó kʼeeʼąą noohtʼı̨́įł dooleeł, áko tónteel biiʼ nihinołtʼeeh, índa nahasdzáán bikáaʼgi nidaohtʼaʼii kʼeeʼąą noohtʼı̨́įł dooleeł.
23 Áko tłʼééʼ hazlı̨́ı̨́ʼ áádóó jı̨́ hazlı̨́įʼjįʼ ashdlaʼa jı̨́ azlı̨́ı̨́ʼ.
24 Nááʼákóneʼ Diyin God ánáádooʼniid, Nahasdzáán bikáaʼgi dahináanii ałʼąą ádaatʼéii binídaałtʼéego daʼahílchíihii dahóleʼ; éí alı̨́ı̨́ʼ áádóó nidaaʼnaʼii índa naaldlooshii binídaałtʼéego daʼahílchíih doo; éí tʼáá ákótʼé silı̨́ı̨́ʼ.
25 Áádóó Diyin God éí nahasdzáán bikáaʼgi naaldlooshii binídaałtʼéego daʼahílchíihgo, índa alı̨́ı̨́ʼ binídaałtʼéego daʼahílchíihgo, índa nihokááʼgóó nidaaʼnaʼii tʼáá ałtso binídaałtʼéego daʼahílchíihgo áyiilaa. Áko Diyin God éí yinééłʼı̨́įʼgo bił yáʼíítʼééh.
26 Nááʼákóneʼ Diyin God ánáádooʼniid, Haaʼíshąʼ diné tʼáá nihináłtʼéego, ádaniitʼéhígi átʼéego ádadiilnííł, áko tónteel biyiʼdi łóʼígíí áádóó wódahdi nidaatʼaʼígíí áádóó alı̨́ı̨́ʼ áádóó nahasdzáán bikááʼgóó tʼáá átʼéé nítʼééʼ, índa niʼ bikáaʼgi nidaaʼnaʼii éí tʼáá ałtso bee hódahólníih doo.
27 Áko Diyin God nilíinii diné tʼáá bí bináłtʼéego áyiilaa; Diyin God biníjíłtʼéego áhoolaa, bikąʼii índa biʼáadii áyiilaa.
28 Áádóó Diyin God hakʼijisdliʼgo áhodííniid, Nihaʼáłchíní hooleełgo kʼeeʼąą noohtʼı̨́įł doo, áádóó nahasdzáán bikááʼgóó nihinołtʼeehgo kʼeeʼąą dínóhtʼįįh, áko tónteel yiiʼ naaldeehii, wódahgo nidaatʼaʼii índa nahasdzáán bikáaʼgi dahináago naaldeehii tʼáá ałtso bee nihídahólníih doo.
29 Áádóó Diyin God ánáádooʼniid, Jóʼakon, naniseʼ bílástsiiʼ dahólónígíí ałʼąą ádaatʼéii nihaa diníʼą́, índa tsin ałʼąą ádaatʼéii bineestʼąʼ bílástsiiʼ dahólónígíí ałdóʼ nihichʼiyąʼ dooleeł.
30 Áádóó nahasdzáán bikáaʼgi naaldlooshii tʼáá ałtso áádóó wódahdi nidaatʼaʼii tʼáá ałtso áádóó nidaaʼnaʼii tʼáá ałtso índa nídídzihii nináneelʼą́ąjįʼ éí chʼil daditłéeʼii bichʼiyąʼ dooleełgo baa diníʼą́; éí tʼáá ákótʼé silı̨́ı̨́ʼ.
31 Áko Diyin God éí áyiilaaígíí tʼáá ałtso yinééłʼı̨́įʼgo éí tʼáá íiyisí bił yáʼíítʼééh, jóʼakon. Áko tłʼééʼ hazlı̨́ı̨́ʼ áádóó jı̨́ hazlı̨́įʼjįʼ hastą́ą́h jı̨́ azlı̨́ı̨́ʼ.
