Joel 2:1-32
2 Dził Záiyangi deenástsʼaaʼ bideeʼ bee íʼdísooł áádóó shidził diyinii bighą́ą́ʼgóó bee iʼdoolnihgo didootsʼı̨́ı̨́ł. Hániʼ kéyahgóó kéédahojitʼíinii tʼáá ádzíłtso hatah dahoditłid, háálá Bóhólníihii nídoodáłígíí baa hodoolzhish. Tʼáá aaníí, kʼadę́ę baa hoolzhíísh.
2 Éí jínígíí bił chahodoołhiłgo chahałheeł nídoodleeł; kʼos bee chadahałheełgo hodoolzhish. Dziłghą́ą́ʼgóó hoosʼįįdígi átʼéego diné tʼóó ahayóigo índa ayóó ádabóodziilii nídoosééł. Yoołkááłdę́ę́ʼ tsʼídá doo ákóhánéeh da nítʼééʼ, doodaiiʼ nináháhááhgóó náás ahoolchíiłii bitahgóó nidi, tsʼídá doo ákónááhodooʼníił da.
3 Bilą́ąjįʼ kǫʼ óʼoołdįįł índa bikéédę́ę́ʼ kǫʼ naanídoonałígíí iʼdiiłkʼą́ą́h. Bidáahgi éí Ííden dáʼákʼeh yę́ę honoolnin, nidi bikéédę́ę́ʼ honoojíígóó tʼáá átʼé tʼáá ádzaaí silı̨́įʼii nahalin, áádóó tsʼídá doo yisdáhóótʼiʼ da hazlı̨́ı̨́ʼ.
4 Ádanóolninígíí łı̨́ı̨́ʼ nidahalin, índa łı̨́ı̨́ʼ bee naʼabaahii nidahalingo dadilwoʼ.
5 Tsindaabąąs bijáád naakiígíí dadiitsʼaʼ nahalingo áádóó ehégod dadéekʼą́ą́h yitsʼaʼ nahalingo índa siláo dabidziilii akʼiijeeh nahalingo dził yáhátis aheezhjééʼ.
6 Bidááhgóó diné bichʼįʼ nidahwiiʼnáago tʼáá ałtso biniiʼjįʼ deitsoi.
7 Diné ayóó ádaatʼéii nidahalingo deíjeeh; nidaabaahii nahalingo tsé ahénátłʼinii yitis dahaʼnééh; tʼááłáʼí nítínígo tʼáá kʼéhézdon ałkééʼ nítʼiʼgo doo nahjįʼ háádaalwoʼ da.
8 Doo nidi nahjįʼ anídaʼahilgoh da, tʼáá ałtso tʼáá bá hazʼą́ą́ góneʼ deíkááh índa bee naʼabaahii yił chʼéhéjeeh, nidi doo niʼ kódabiléeh da.
9 Kin haalʼáhígíí yichʼįʼ ałnánájahgo ditą́ągo binaa ahééʼítłʼinii yikááʼgóó hidijeeh áádóó kin yiih hiʼnéehgo aniʼįįhii nahalingo tsésǫʼ góneʼ yah ahidoojah.
10 Áko bidááhgóó nahasdzáán nahaasnááʼ áádóó yótʼááh biiʼ hiníláii nidahaasnááʼ; jı̨́honaaʼéí índa tłʼééhonaaʼéí bił chahóółhéél áádóó sǫʼ doo dadiʼníłdíin da silı̨́ı̨́ʼ.
11 Bóhólníihii éí bisiláo yichʼįʼ haadzííʼ, áko bitsʼą́ą́dóó dah yinéełii ayóó ádaatʼé áádóó bizaad yikʼeh hółʼíinii ayóó ábóodziil. Bóhólníihii beidoołkáłígíí ayóó átʼéego ádoonííł índa tʼóó hóyéʼígi áhodoonííł. Háishąʼ yichʼįʼ haʼólníi doo?
Bóhólníihii bibee ajoobaʼ
12 Kʼad Bóhólníihii kóní, Tʼáadoo daʼohsání daohchago índa yínííł danohłı̨́įgo nihijéí tʼáá átʼé bee shichʼįʼ ninánóhkááh.
13 Áko nihijéí nidahohsǫ́ǫ́s; nihiʼééʼ éí dooda. Bóhólníihii nihiDiyin God bichʼįʼ nináhóhkááh, háálá joobaʼ áádóó aa aʼááh nízinii nilı̨́; tąądee bánáháchįįhii nilı̨́ áádóó ayóóʼóʼóʼní yee tʼáá yitʼéhí yitʼéii nilı̨́ índa doo yáʼátʼéehii łahgo átʼéego yąąh tsíńdíkos.
14 Bóhólníihii nídooyisgo łahgo átʼéego daatsʼí tsíńdookos áádóó nihikʼizhdoodliiłgo daʼátʼé. Éí akʼáán índa yanáadziʼgo Bóhólníihii nihiDiyin God bichʼįʼ nááhidoonihii daatsʼí nihaididooʼááł.
15 Záíyan kin haalʼáagi deenástsʼaaʼ bideeʼ bee íʼdílzoołí bee ídaʼdohsooł; hodílzingo doo adą́ atsʼánóʼaah.
16 Dílzingo áłah doohłeeł biniyé bíká ádadohní. Diné áłah ádaahłééh; diyingo ádaohłééh; hastóí aląąjįʼ naazíinii áłah ádaohłééh, áłchíní áádóó tʼah daʼałtʼoʼii áłah ádaohłééh. Bíniʼ diné adooyehii bikindóó chʼéghááh áádóó báʼdoogehii ałdóʼ bíniʼ bighandóó chʼéghááh.
17 Náádaʼiiłniihii éí Bóhólníihii yá nidaalʼaʼí danilíinii bíniʼ chahaʼoh áádóó bikááʼ nááʼiiniihí bitaʼgi daachago kódaaníi leʼ, Bóhólníihii, nidineʼé yisdánínííł; nííʼ nilíinii tʼááká baa yáhásinii baa dóóʼáałgo anaʼí danilíinii bee ádidahólnííh lágo! Áko haʼátʼíísh biniyé, Háájíshąʼ biDiyin God? dabidiʼníi doo.
18 Áko Bóhólníihii bikéyah yíneedlı̨́į doo índa bidineʼé yaa aʼááh dínóozįįł.
19 Bóhólníihii éí bidineʼé yichʼįʼ tʼą́ą́ʼ háádoodzihgo ádidooniił, Tłʼoh naadą́ą́ʼ ániidíii áádóó wáin ániidíii índa akʼah ániidíii nihichʼįʼ kónídeeshdlííł, jóʼakon. Áko éí bee hwiih danohłı̨́į doo. Áko anaʼí danilíinii bitahgi nihá nahatʼiʼgo doo ánáánihideeshdlíił da.
20 Náhookǫsdę́ę́ʼ siláo dah yinéełii nihitsʼą́ąjįʼ nízaadgóó kóhodeeshłííł índa kéyah biiʼ doo naagháhígóó hóółtseiijįʼ ahodínéeshkał; alą́ąjįʼ yikahígíí éí haʼaʼaahjigo tónteel biiʼjįʼ índa akéédę́ę́ʼ yikahígíí éí eʼeʼaahjigo tónteel biiʼjįʼ ahodínéeshkał; hatsʼá dahoníłchxonígíí háátsxaaz doo, háálá doo yáʼáshǫʼ ayóó átʼéii yaa naayá.
21 Tʼáadoo náníldzidí, kéyah nílíinii, nił hózhǫ́ áádóó tʼáá íiyisí nił nihoozhǫǫh, háálá Bóhólníihii ayóó átʼéego áyiilaa.
22 Halgaigóó naaldlooshii danohłíinii, tʼáadoo nihił daayéʼí, háálá honoojíígóó nídahootsoi, tsin bineestʼąʼ nídahasdlı̨́ı̨́ʼ, tsin fig sikaadii áádóó chʼil naʼatłʼoʼii bąąh nídaʼneestʼą́.
23 Záíyan baʼáłchíní* danohłíinii, nihił dahózhǫ́ǫgo Bóhólníihii nihiDiyin God bee nihił nidahoozhǫǫh, háálá aakʼeego nahałtinígíí nihichʼįʼ kónááyiidlaa; tʼáá nááháłtı̨́ı̨́h yę́ęgi átʼéego aakʼeego índa dąągo nahałtinígíí nihichʼįʼ kónááyiidlaa.
24 Nídaʼoolchʼihgóó tłʼoh naadą́ą́ʼ hadadeezbin doo; biiʼ daʼaljizhí biyiʼdę́ę́ʼ wáin ániidíii áádóó akʼah ániidíii wóʼądaazlı̨́į doo.
25 Nahachagiitsoh naanááséłígíí áádóó nidaaʼnaʼígíí áádóó naniseʼ yaa nahodikaígíí índa daʼagháazhii éí dah yinéełii ayóó ádaatʼéii shíhígíí nihichʼįʼ yíłʼaadígíí nináháhááh bíighahgo nihitsʼą́ą́ʼ daʼííyą́ąʼii nihá bilááh áńdeeshdlííł.
26 Tʼóó ahayóí daʼohsą́ą doo índa hwiih danohłı̨́į doo. Áko Bóhólníihii nihiDiyin God bízhiʼ baa dahohniih doo, éí nihitahgóó ayóó ádaatʼéii nihá yaa naayá. Áko shidineʼé tsʼídá doo baa yádahasin da doo.
27 Ízrel dineʼé bitahgóó honishłǫ́ǫgo nihił béédahózin doo, áko shí Bóhólníihii nihiDiyin God nishłı̨́, áádóó doo łaʼ diyin nááhódlǫ́ǫ da. Áko shidineʼé tsʼídá doo baa yádahasin da doo.
Diyin God biNíłchʼi Diyinii akʼi hooleʼ
28 Díí kódzaadóó bikʼijįʼ nihokááʼ dineʼé tʼáá ałtso shiNíłchʼi bikʼi hwiidooleeł, áko nihiyeʼké áádóó nihitsiʼké Diyin God yá dahalneʼ dadooleeł áádóó nihadahastóí nideiyeeł dooleeł índa nihitsíłkeʼé bił ádahatʼı̨́į dooleeł.
29 Éí yoołkáałdi diné shá nidaalʼaʼí índa asdzání shá nidaalʼaʼí nidi shiNíłchʼi tʼáá biláahgo baa dideeshʼááł.
30 Áko yótʼááh hiníláii biyiʼdi áádóó nahasdzáán bikáaʼgi ayóó átʼéego áhooníiłii éí dił áádóó kǫʼ índa łid áhí nahalingo ádadeeshłííł.
31 Jı̨́honaaʼéí bił chahodoołhił índa tłʼééhonaaʼéí dił nahalin dooleeł. Bóhólníihii tʼah doo beiyíłkaahgóó áhodoonííł; jó, éí ayóó átʼé índa ooʼáał doo.
32 Áko tʼáá háiida Bóhólníihii bízhiʼ bee józhíigo níjooskanígíí yisdáhodoołtééł, háálá Dził Záíyan bighą́ąʼdi índa Jerúsalem kin haalʼáadi kéédahatʼíinii bá chʼídahwiiztʼiʼ doo. Bóhólníihii yee haadzííʼ yę́ęgi átʼéego daadzíiʼii bitahgi Bóhólníihii yíká ádííniidígíí kééhatʼı̨́į doo.
Footnotes
^ Júdah dineʼé, doodaiiʼ Jerúsalem kin haalʼáagi kéédahatʼíinii ááhyiłní.
