John 17:1-26
17 Jesus díí saad yee haadzíiʼgo, yáʼąąshgóó dééʼı̨́įʼgo ání, ShiTaaʼ, kʼad áajįʼ ahoolzhiizh; niYeʼ ayóó átʼé ánílééh, áko niYeʼ ałdóʼ ayóó átʼé ándoolííł,
2 háálá baa hidííníʼánígíí tʼáá ałtso iiná doo ninítʼiʼii yeididooʼááł biniyé nihokááʼ dineʼé nináneelʼą́ąjįʼ bee hóhólníihgo íinilaa.
3 Áko iiná doo ninítʼiʼii éí díí, ni tʼéiyá tʼáá aaníí Diyin God nílı̨́įgo néédahodoosįįł, índa Jesus Christ yiníłʼaʼígíí ałdóʼ yéédahodoosįįł.
4 Niʼ bikááʼ ayóó ánítʼéego ániishłaa, naanish shaa dííníʼánígíí ałtso łaʼyishłaa,
5 áko kʼad, shiTaaʼ nílíinii, nił honishłǫ́ǫgo nahasdzáán tʼah doo álnééhdą́ą́ʼ ayóó átʼéii bee nił honishłǫ́ǫ́ nítʼéʼígíí bee ayóó áníshtʼéego áshílééh.
6 Nihokááʼ dineʼé bitahdę́ę́ʼ diné shaa hínínilígíí bichʼįʼ nízhiʼ bee ánítʼéii bééhózingo íishłaa; éí tʼáá ałtso nííʼ nítʼéeʼgo shaa hínínil, índa nizaad yikʼeh dahółʼı̨́.
7 Áádóó tʼáá ałtsoní shaa dííníʼánígíí nitsʼą́ą́dę́ę́ʼ ádaatʼéego bił béédahoozin,
8 háálá saad shaa dííníʼánígíí baa diníʼą́, áádóó nídeidiiláago tʼáá aaníí nitsʼą́ą́dę́ę́ʼ níyáago bił béédahoozin, áádóó shííníłʼaʼígíí dayoosdląąd.
9 Éí bá sodiszin; nihokááʼ dineʼé éí doo bá sodiszin da, nidi shaa hínínilígíí tʼéiyá, háálá éí ni;
10 shíhígíí tʼáá ałtso ni, índa nihígíí tʼáá ałtso shí, áko éí hwee ayóó áníshtʼéego áshiʼdiilyaa.
11 Kʼad nahasdzáán bikáaʼgi doo nináánáshdáa da doo, nidi bí tʼéiyá nahasdzáán yikááʼ nidaakai doo, nidi shí kʼad nichʼįʼ nihéénísdzá. ShiTaaʼ Diyin nílíinii, shaa hínínilígíí tʼáá ni nízhiʼ bibee adziilii bee dayínítąʼ, áko tʼááłáʼí niidlínígi átʼéego tʼááłáʼí danilı̨́į doo.
12 [Nahasdzáán bikáaʼgi] tʼah bił naashkai yę́ędą́ą́ʼ shaa hínínilígíí nízhiʼ bibee adziilii bee dayíníshtąʼ nítʼééʼ; éí baa áháshyą́ą́ nítʼééʼ, áko tʼáadoo łaʼda yóóʼíítłizh da, nidi anoonééł bá yizhchíinii tʼéiyá, éí Diyin God bizaad bee akʼeʼashchínígíí bohodoolnííł biniyé.
13 Nidi kʼad nichʼįʼ nihéénísdzá, áko shibee ił hózhǫ́ bee bíniʼ dabíighahgo bee bił dahózhǫ́ǫ dooleeł biniyé díidíígíí nahasdzáán bikáaʼgi bee hahasdziih.
14 Nizaad baa diníʼą́, áádóó tʼáá shí nihokááʼ dineʼé doo bitsʼą́ą́dóó áshtʼínígi átʼéego nihokááʼ dineʼé doo yitsʼą́ą́dóó ádaatʼı̨́į daígíí biniinaa nihokááʼ dineʼé dabijoołá.
15 Éí nahasdzáán bikááʼdóó náádidíídléłígíí doo biniyé ádíshníi da, nidi bąąhági átʼéii nilíinii bitsʼąą baa áhólyą́ą doo biniyé ádíshní.
16 Nihokááʼ bił nidahaztʼiʼii doo bídííníshtʼiʼ da; tʼáá éigi átʼéego bí ałdóʼ nihokááʼ bił nidahaztʼiʼii doo yídadéétʼiʼ da.
17 Nitʼáá aaníinii yee dadiyingo ádanileʼ; nizaad éí tʼáá aaníinii átʼé.
18 Tʼáá nahasdzáán bikáaʼjįʼ ashííníłʼaʼígi átʼéego, shí ałdóʼ nahasdzáán bikááʼgóó adahoyíłʼaʼ.
19 Áko éí tʼáá aaníinii bee dadiyingo ádahodiʼdoolnííł biniyé, shí éí honiinaa diyingo íʼdiishyaa.
20 Díí shídahoołʼaahii tʼéiyá doo bá ádíshníi da, nidi dabizaad binahjįʼ dashiidoodląąłgo shaa dadzólíi dooleełígíí ałdóʼ bá sodiszin,
21 áko tʼáá ałtso tʼááłáʼí nilı̨́į doo; shiTaaʼ nílíinii, tsʼídá shiiʼ honílǫ́ áádóó shí ałdóʼ niiʼ honishłónígi átʼéego bí ałdóʼ tʼááłáʼí nilı̨́įgo nihiiʼ hólǫ́ǫ doo, áko nihokááʼ dineʼé éí shííníłʼaʼígíí deidoodląął.
22 Bee ayóó áníshtʼéii shaa dííníʼánígíí tʼáá éí baa diníʼą́, áko tʼááłáʼí niidlínígi átʼéego tʼááłáʼí danilı̨́į dooleeł,
23 shí biiʼ honishłǫ́ índa ni shiiʼ honílǫ́, áko tsʼídá tʼááłáʼí danilı̨́į dooleeł, áko shííníłʼaʼígíí índa ayóóʼáshííníʼnínígi átʼéego ayóóʼííníʼnínígíí nihokááʼ dineʼé bił béédahodoozįįł.
24 ShiTaaʼ, shaa hínínilígíí honishłǫ́ǫdi shił dahólǫ́ǫ leʼ laanaa nisin, áko bee ayóó áníshtʼéii shaa dííníʼánígíí deidoołtsééł, háálá nahasdzáán tʼah doo niitʼaahdą́ą́ʼ ayóóʼáshííníʼní.
25 ShiTaaʼ tsʼídá tʼáá ákogi ánítʼéii, nihokááʼ dineʼé doo néédahósin da, nidi shí tʼéí nééhasin, áádóó díidíígíí shííníłʼaʼgo bił béédahoozin.
26 Nízhiʼ bee bił hweeshneʼgo ánítʼéii bił béédahózingo íishłaa, áádóó tʼáá baa hashneʼ doo, áko ayóóʼóʼóʼní bee ayóóʼáshííníʼníinii biiʼ dahólǫ́ǫ doo, índa shí ałdóʼ biiʼ dahonishłǫ́ǫ dooleeł.
