John 4:1-54
4 Jesus bídahoołʼaahii éí John bídahoołʼaahii bilááh ánéelą́ą́ʼ silı̨́įʼgo áádóó tó yee daʼası̨́įhgo Férisii danilíinii Jesus yaa dahodiiztsʼą́ą́ʼ. Éí Bóhólníihii bił bééhoozin,
2 (azhą́ Jesus tʼáá bí doo tó yee ası̨́įh da nidi, bídahoołʼaahii tʼéiyá).
3 Judíyadóó Gáliliigóó dah náázdiidzá.
4 Áko tʼáá kʼéhézdon Samériya biyiʼgóó chʼídeeshááł jiniizı̨́ı̨́ʼ.
5 Samériya biyiʼ kin haalʼáá léiʼgi jiníyá, ákwii Sáíkar hoolyéé lá, Jéíkab biyeʼ Jóseph kéyah yeidiníʼą́ yę́ędóó tʼáá áyídígi.
6 Ákweʼé Jéíkab bitóhahadleeh, áko Jesus chʼééh jideeyáago tóhahadleeh bíighahgi jineezdá, ałníʼníʼą́ągo daatsʼí.
7 Nítʼééʼ Samériya dineʼé asdzání léiʼ tó háníyáá lá. Áko Jesus áhodííniid, Tó deeshdlı̨́łígíí łaʼ shaa níkaah.
8 Háálá hódahoołʼaahii éí chʼiyáán nideidiyoołnih biniyé kintahgóó eekai.
9 Áko Samériya dineʼé asdzání áhodííniid, Haʼátʼéegoshąʼ Jew dineʼé łaʼ nílı̨́ı̨́ léiʼ, Tó łaʼ shaa níkaah, shidiní? Jó, Jew dineʼé éí Samériya dineʼé doo yił chodaʼahoolʼı̨́į da.
10 Jesus hachʼįʼ hanáánáádzíiʼgo áhodííniid, Diyin God einíláhígíí áádóó, Tó łaʼ shaa níkaah, niłnínígíí bééhonísingo bídííʼníkeedgo, tó hináanii neidookááł nítʼééʼ.
11 Áko asdzání ánááhodooʼniid, Kwáʼásiní, jó, tʼáadoo bee tó haóleehí da, áádóó tóhahadleeh góyaa hózaad, háádę́ęʼshąʼ áko tó hináanii shóidííłtʼeeł?
12 Daʼ Jéíkab nihizhéʼé yę́ęésh biláahgo ánítʼé, éí díí tóhahadleeh nihaidiníʼą́, bí índa baʼáłchíní áádóó dabilı̨́ı̨́ʼ deidlą́ą́ nítʼééʼ?
13 Jesus ánááhodooʼniid, Tʼáá háiida díí tó yoodlą́ʼígíí éí dibááʼ náádoodleeł,
14 nidi tʼáá háiida tó baa níką́ągo yoodlą́ʼígíí éí doo dibááʼ náádoodleeł da, áko tó haa deeshkáłígíí éí hayiʼdi tó tʼáá bíniʼdii háálíinii dooleeł, áko háálı̨́įgo iiná doo ninítʼiʼii biih yílı̨́į dooleeł.
15 Asdzání ánááhodooʼniid, Kwáʼásiní, tó baa hólneʼígíí łaʼ shaa níkaah, áko doo dibááʼ náádeeshdleeł da, doo nidi kweʼé tó hánáshdáah da doo.
16 Jesus ánááhodiʼní, Nílááh, nahastiin hágo bidiní, kweʼé bił nánítʼaash.
17 Áko asdzání hanáánáádzíiʼgo áhodííniid, Shahastiin ádin. Jesus áháłní, Shahastiin ádin, dinínígíí tʼáá aaníí ádííníniid,
18 háálá ashdlaʼ nahastiin nítʼééʼ, nidi kʼad bił naniʼaashígíí doo nahastiin átʼée da, áko tʼáá aaníígóó háínídzííʼ.
19 Asdzání ánááhodiʼní, Kwáʼásiní, kʼad lą́ą shił bééhoozin ni, Diyin God yá halneʼii nílı̨́ı̨́ lá.
20 Danihizhéʼé yę́ę díí dził bighą́ąʼdi nidahałáá nítʼééʼ, áko nihí éí Jerúsalemgi tʼéiyá diné nidahałáago bá hazʼą́ dadohní.
21 Jesus ánááhodooʼniid, Asdzání, shiinídlą́, díí dził bighą́ąʼgi dooda, Jerúsalemgi ałdóʼ doo aTaaʼ bichʼįʼ nidahohłáa da dooleełgo bichʼįʼ hoolzhish.
22 Nihí tʼáadoo béédahonohsinii bichʼįʼ nidahohłá, nidi nihí éí béédahoniilzinígíí bichʼįʼ nidahwiidlá, háálá yisdáʼiildééh éí Jew dineʼé bitahdóó hazlı̨́ı̨́ʼ.
23 Áko bichʼįʼ hoolzhish, áádóó kʼad nidi baa hoolzhiizh, tʼáá aaníígóó nidahałáii éí níłchʼi iiʼ sizíinii yee áádóó tʼáá aaníinii yee aTaaʼ yichʼįʼ nidahałáa dooleeł, háálá ákótʼéego aTaaʼ bichʼįʼ nidahałáa dooleełígíí haintá.
24 Diyin God éí Níłchʼi jílı̨́, áko hachʼįʼ nidahałáii éí tsʼídá níłchʼi iiʼ sizíinii yee áádóó tʼáá aaníinii yee hachʼįʼ nidahałáa dooleeł.
25 Nítʼééʼ asdzání ánááhodooʼniid, Mesáíyah, Christ joolyéhígíí lá jígháahgo shił bééhózin ni, áko jiníyáago tʼáá ałtsoní bee nihił hozhdoolnih.
26 Áko Jesus ánááhodooʼniid, Shí nichʼįʼ yáshtiʼígíí éí áshtʼı̨́.
27 Tsʼídá ákohgo hódahoołʼaahii haa nákaigo asdzání bichʼįʼ yájíłtiʼígíí bikʼee tʼóó bił adahóóyóí, nidi, Haʼátʼíísh bínabídíłkid? tʼáadoo hodííniidí da, áádóó, Haʼátʼíísh biniyé bichʼįʼ yáníłti? tʼáadoo hodííniidí da.
28 Áko asdzání bitóshjeeh yázhí tʼáá ákǫ́ǫ́ siʼą́ągo kin haalʼáágóó anídzoodzá, áko diné tʼáá ałtso ábizhdííniid,
29 Tįʼ, diné léiʼ áátʼįįdii ałtso yee shił náhoolneʼígíí deidoołtsééł. Éí daatsʼí Christ átʼı̨́?
30 Áko kin haalʼáádóó chʼíjiizhjéeʼgo Jesus baazhníjééʼ.
Dáʼákʼehgóó daʼdiigaii
31 Tʼahdii bichʼįʼ jookahgo Jesus hódahoołʼaahii nídahookąąhgo ádahodííniid, Naʼnitiní, íyą́.
32 Nidi ábizhdííniid, Chʼiyáán doo nihił béédahózinii shee hólǫ́ǫgo éí yishą́.
33 Áko hódahoołʼaahii ádaʼahidooʼniid, Daʼ łaʼdaásh haʼníłtsood?
34 Jesus áhodííniid, Shiníłʼaʼii yee íinízinii binaashnishgo łaʼyishłéhígíí, éí shichʼiyąʼ átʼé.
35 Adoogishjįʼ dı̨́ı̨́ʼ nídeezid hadziih, daʼ doósh dadohníi da? Jó, nidi shí ánihidishní, Dadohhaałgo dádaʼakʼehgóó dadóhʼı̨́ı̨́ʼ, háálá daʼdiigaii, áko kʼad agizhjįʼ ahoolzhiizh.
36 Ayizhii éí bichʼįʼ naʼiilyé, áádóó aneestʼąʼ iiná doo ninítʼiʼii biniyé áłah ííłʼı̨́, áko kʼééʼdídléhígíí índa ayizhii éí tʼáá áłah tʼáá íiyisí bił hózhǫ́ǫ dooleeł.
37 Háálá kweʼé bee haʼoodzíʼígíí tʼáá aaníí átʼé, Łaʼ kʼéézhʼdídlééh, łaʼ éí ajiyish.
38 Tʼáadoo bindashoołnish daígíí dadoohhish biniyé ákǫ́ǫ́ anihiyíłʼaʼ, áko łaʼ yindaashnishii nihí éí bee ákidasoohdlaʼ.
39 Áko éí kin haalʼáádóó Samériya dineʼé tʼóó ahayóí éí asdzání bahaneʼígíí binahjįʼ Jesus dayoosdląąd, Áátʼįįdii tsʼídá tʼáá ałtso yee shił náhoolneʼ, níigo.
40 Áko Samériya dineʼé haa haaskaigo, Tʼáá kweʼé nihitah naniná, daaníigo nídahooskan, áko tʼáá ákweʼé naaki hwiiską́.
41 Índa tʼóó ahayóí náádahoosdląąd, háálá tʼáá hó hazaad deidiiztsʼą́ą́ʼ.
42 Áko asdzání ádeidííniid, Kʼad ni ádínínígíí doo tʼáá éí tʼéiyá binahjįʼ daʼiiniidlą́ą da, háálá tʼáá bí nihił nahasneʼgo tʼáá nihí dasidiitsʼą́ąʼgo tʼáá aaníí [Christ nilíinii,] nihokááʼ dineʼé Yisdáyiiníiłii átʼı̨́ı̨́ lágo nihił béédahoozin.
Naatʼáanii biyeʼ náábiʼdiilzá
43 Ákweʼé naaki hwiiską́ągo índa Gálilii bichʼįʼgo dashdiiyá.
44 Háálá Jesus tʼáá bí ádííniid, Diyin God yá halneʼii tʼáá bí bikéyahgi diné doo bił jílı̨́į da.
45 Áko Gáliliigi jiníyáago, Gálilii dineʼé bił dahóózhǫǫdgo bił kʼé daʼahizhdooʼniid, Jerúsalemgi hodílzingo áłah náʼádleehígi ájíítʼįįdígíí tʼáá ałtso dayiiłtsą́ éí bąą. Jó, éí ałdóʼ hodílzingo áłah náʼádleehígóó nidaaskai.
46 Ákódzaago Gálilii biyiʼ, Kéína hoolyéedi, tó wáin ájiilaa yę́ęgi náádzídzá. Nítʼééʼ Kapérniyamgi naatʼáanii łaʼ biyeʼ daatsaah lá.
47 Éí Judíyadóó Gáliliijįʼ Jesus níyáhígíí jííniiʼ, áko baazhníyáago nídzooskango ájíní, Kapérniyam góyaa díínáałgo shiyeʼ náábididííłááł, háálá doo baa dzoosʼníiʼ da.
48 Jesus áhodííniid, Bee éédahózinii áádóó bikʼee tʼóó ił adahayóigo ádahooníiłii doo daołtsą́ą́góó doo daʼiidoohdląął da.
49 Áko naatʼáanii ánááhodooʼniid, Kwáʼásiní, shiyeʼ tʼah doo daatsaahdą́ą́ʼ ákóyaa díínááł.
50 Jesus ánááhodooʼniid, Nílááh, nídídááh; niyeʼ náádiidzá. Áko Jesus saad yee hachʼįʼ haadzíʼígíí dzoosdląądgo anídzoodzá.
51 Ákóyaa níjoodááł, nítʼééʼ há nidaalʼaʼí hadááh yíkaigo hoł dahoolneʼgo ádaaní, Niyeʼ náádiidzá.
52 Ákohgo naʼízhdééłkidgo ázhdííniid, Díkwíigi oolkiłgoshąʼ tʼah nítʼééʼ yáʼátʼééh nídzísdlı̨́ı̨́ʼ? Áko ádahodííniid, Adą́ą́dą́ą́ʼ yaaʼadeezʼą́ągo hatah honeezgaii yę́ę hatsʼáldoh.
53 Áko tsʼídá ákwii ooʼáałgo Jesus, Niyeʼ náádiidzá, hodííniidí góneʼ yáʼátʼééh nídzísdlı̨́ʼígíí hazhéʼé yénáálniiʼ, áko hó áádóó haghandóó tʼáá ałtso daʼoosdląąd.
54 Judíyadóó Gáliliijįʼ Jesus jiníyáago, díidí naaki góneʼ habee adziilii bee bééhózinii baa nijiyáhígíí átʼé.
