Malachi 3:1-18
3 Shá halneʼii deeshʼaałgo shilą́ąjįʼ honítʼiʼgo áhodoolííł, jóʼakon, áádóó Bóhólníihii hadanohtáii tʼáadoo hooyání bikin biiʼ sohodizingi hodoołeeł; bee ahaʼdeetʼáanii yaa halneʼii baa nihił dahózhóonii doogááł, jóʼakon, ní tʼáá ałtsoní bee Bóhólníihii.
2 Nidi níyá bijı̨́įdi háishąʼ haʼólníi doo áádóó níyáagoshąʼ háí yíníłdzil doo?
Háálá kǫʼ bee béésh dilyı̨́įhii nahalin índa táláwosh bee iilgáhígíí nahalin.
3 Béésh łigaii yąąh nichǫ́ʼígíí yidiłhı̨́įhii nahalingo dah sidáa doo áádóó Líívai biyeʼké ahoolchíiłii biʼdíídeeʼgo éí óola áádóó béésh łigaii bąąh hadoolyı̨́įʼii nahalingo íidoolííł, áko tʼáá ákogi átʼéego Bóhólníihii bichʼįʼ náádazhdiʼyoołnih.
4 Áko índa tʼáá ałkʼidą́ą́ʼ áádóó tʼáá nináháhááhdę́ę́ʼ átʼéhígi átʼéego Júdah índa Jerúsalem binááhániihii bee Bóhólníihii bił nááhojíshǫ́ǫ dooleeł.
5 Nihaa nídéeshtʼįįł biniyé tʼáá áháníjįʼ nihaa hodeeshłeełgo bindaʼadloʼgo álílee kʼehgo nidahałáii, daʼdiléii, tʼáá ádzaagóó ádee hadahididziihii, bá nidaalnishí áádóó asdzání bąąh ádahasdįįdii índa áłchíní bizhéʼé ádaadinii yide ádahósinii áádóó déʼéyóní danilíinii bee bá nahazʼáanii doo yee yá dahoołʼaahii índa doo dashidósinii tsxı̨́įłgo bá nahodiyeeshʼááł, ní tʼáá ałtsoní bee Bóhólníihii.
Neeznáá daníjaaʼígíí éí tʼááłáʼígo shijaaʼ nináhályéii
6 Háálá Bóhólníihii nishłı̨́; doo łahgo ánáóshʼnééh átʼée da; éí bąą doo ádasoohdįįd da, Jéíkab biyeʼké danohłíinii.
7 Danihizhéʼé yę́ę bídayéełkaah yę́ędą́ą́ʼdóó wóshdę́ę́ʼ shibikʼeh hoogáałii bitsʼáhisoohkaigo doo bikʼeh dahosoołʼįįd da. Shaa nánóhkááh; shí ałdóʼ nihaa náhodeeshłeeł, ní tʼáá ałtsoní bee Bóhólníihii. Áko ádadohní, Haʼátʼéegoshąʼ tʼą́ą́ʼ nináhidiikah?
8 Daʼ dinéésh éí Diyin God yee adínóoʼı̨́ı̨́ł? Nidi nihíyeeʼ shee daʼnohʼįįh. Áko ádadohní, Haash yitʼéego nee daʼneetʼı̨́ı̨́ʼ? Neeznáá daníjaaʼígíí éí tʼááłáʼígo shijaaʼ, éí Bóhólníihii baa nídahidohʼaahii índa náádahołniihii bee shee daʼnooʼı̨́ı̨́ʼ.
9 Hóyéeʼgo á haʼiidziihii éí bee hóyéeʼgo nihá haʼoodzííʼ, háálá nihí tʼáá kééhohtʼı̨́ı̨́ nítʼééʼ shee daʼnooʼı̨́ı̨́ʼ.
10 Shikin biyiʼ góneʼ chʼiyáán hólǫ́ǫ doo biniyé neeznáá daníjaaʼígíí éí tʼááłáʼígo shijaaʼ Bóhólníihii baa náhiditʼaahígíí tʼáá átʼé kin biiʼ nooh náʼáchíihii biyiʼ góneʼ yah adahohjááh. Áko yáʼąąshdi tsésǫʼ ąą ádadeeshłíiłgo ayóó átʼéego bee akʼihojidlíii nihikʼijįʼ yeideeshniłgo shódeisoołtʼeʼ, nidi doo hwiidooʼaał da. Éí ákódeeshníłígíí bee shééhodoozįįłgi bee shá hoołʼaah, ní tʼáá ałtsoní bee Bóhólníihii.
11 Nihikéyahgóó aneestʼąʼ nídahoodleełii doo yidoołchǫǫł da biniyé índa chʼil naʼatłʼoʼii kʼéédadohdléehgi doo chʼééh naniseʼ da dooleeł biniyé tʼáá bizááká aldeełii nihá dideeshteh, ní tʼáá ałtsoní bee Bóhólníihii.
12 Índa ałʼąą dineʼé éí bikʼidahojidlíii danihididooniił, háálá kéyah baa hózhóonii danohłı̨́į doo, ní tʼáá ałtsoní bee Bóhólníihii.
Tʼáá ákogi ádaatʼéii áádóó doo yáʼádaashóonii yee ałʼąą ádaatʼéii
13 Danihizaadígíí bee shidadoołkaal nítʼééʼ, ní Bóhólníihii. Áko ádadohní, Haʼátʼíishąʼ bee nidadiilkaalgo yádeiiltiʼ nítʼééʼ?
14 Ádadooniid, Tʼáadoo biniyéhígóó Diyin God bá nideiilʼaʼ. Bóhólníihii bibikʼeh hoogáałii bikʼeh dahoniilʼı̨́įgo índa tʼáá ałtsoní bee Bóhólníihii binááł yínííł bił deíníikáahgo haʼátʼíísh nihaa dadoodił?
15 Áádóó tʼáá ádíláahgo deíkáahii bikʼidahojidlíii dabidiiʼní; tʼáá íiyisí doo yáʼáshǫ́ǫ́góó ádáátʼįįdii náás deeskai; tʼáá aaníí, Diyin God yídaneeztą́ą́ʼ, nidi tʼáadoo ábiilaaí da.
16 Ákohgo Bóhólníihii dabidósinii ałchʼįʼ yádaałtiʼ, índa Bóhólníihii bidiiztsʼą́ąʼgo baa ákoniizı̨́ı̨́ʼ áádóó dabidósinii índa bízhiʼ yaa nitsídaakeesii naaltsoos bee ééhániihii Bóhólníihii binááł ályaa.
17 Tʼáá ałtsoní bee Bóhólníihii ání, Shííʼ dadooleeł, índa diné biyeʼ ayóóʼábóʼníigo bikʼeh hółʼíinii yaa joozbaʼígi átʼéego áajįʼ ayííłką́ągo shiyódí íiyisí ílíinii hashtʼeeshłéehgo baa jiideeshbaał.
18 Áko tʼáá ákogi ádaatʼéii áádóó tʼáá íiyisí doo yáʼádaashóonii ałʼąą ádaatʼéego, doodaiiʼ Diyin God yá nidaalʼaʼígíí áádóó doo yá nidaalʼaʼígíí ałʼąą ádaatʼéego nihił béédahodoozįįł.
