Nkhele vala tya pouna ame ndyihole unene onohika mbayova nawa. Ndyimbuhole mokonda atuho meumbo ankho tuenda apa pena etala limwe enene, nomiti ominyingi. Kuna o kokuwa! Tupu ndyihole unene ovinyama. Puetyi ndyimona, okumona umwe vala otyimbisi oo otyimbwa, ankho ndyihatekela-ko ndyiketyinyanese. Ankho ndyinumana unene tyina ndyimona omunthu ulinga onya ovinyama. Etyi pahe nekula, atulipake kumwe novanthu vokuamena ovinyama.

Ankho tututumba umwe opo ovanthu vahalinge omapita ovinyama. Ankho tuenda-enda momatapolo tupopile ovanthu vatekule nawa ovinyama. Ankho katuhande ovanthu valandesa ovikutu vianyikwa nombandwa, na vana vokuti tyina valinga ovihemba tete avevihetekela kovinyama. Mokonda ankho tuetyikwata-po umwe tyokuamena ovinyama, vimwe ankho tulinga ovatumini kavevihande. Ame nakwatwa-kwatwa-le ehimbwe, pamwe andyipakwa mokaleya, pamwe andyifete vala.

Otyipuka otyikwavo ankho nahahande, okusoka kovitateka viouye. Etyi pakala, tupu atulipake kumwe novanthu vamwe valwa vamaneko ovitateka viouye. Otyipuka ankho nesuka vali natyo, okuundapa novanthu ovo tuamene ovinyama, atuhetekela okumanako ovitateka viovanthu. Ankho tukuatesako ovanthu vokuahepa, no vokuehena okulia, novanthu ovakuavo vali vehena oku vakuatelela.

Etyi netyisoka umwe nawa, andyityimono okuti ankho ndyina umwe vala nokulipuilisa. Ankho tyina tulinga ngoti tuetyivila okumanako otyitateka tyimwe, kuna akutumbuka otyikwavo otyinene vali. Ngoti ankho tyina utala vala, ouye auho ngoti ankho uli nokutuminwa nomunthu umwe omukalavi. Ngoti ankho ovanthu kavesukile-ale netyi ouye ukahi. Ovipuka ovio avimphoneswa umwe!

Etyi netyimona umwe okuti tyina ankho tyitupu-ale, pahe andyihimbika okusoka vali ku Huku no ko Mbimbiliya. Ame nelilongesile-ale Ombimbiliya Nonombangi mba Siovaa. Onombangi ankho ndyivehole mokonda ovanthu vamwe ovawa, vesuka na vakuavo. Tyina ankho okulilongesa umwe vala, tyokufenda Huku katyili-ale komutima. Mahi pahe ankho nesuka umwe na Huku.

Andyikwate Ombimbiliya yange, andyihimbika okuitanga. Nalingile neitangele! Namona okuti naina Ombimbiliya ipopia okuti tuna okutekula nawa ovinyama vietu. Navasa-mo omukanda wa Provérbios 12:10, wapopia okuti “omunthu wonondunge utekula nawa otyipako tyae.” Tupu namona okuti Huku haeko weetela ovanthu ononkhumbi. Naina ovivi mouye vieliyawisa tupu, o tyovanthu vahahande okutavela etyi ngwe apopia. Namona okuti Siovaa Huku wapwa-elundo, uhole unene ovanthu. — Salmo 103:8-14.

Andyiiti omukanda Oityi Ombimbiliya Tyilityili Ilongesa?. Etyi naita ngotyo, apahakala ehimbwe, meumbo lietu amuya ovalinepi vamwe Onombangi, avahimbika okundongesa Ombimbiliya. Tupu andyihimbika okuenda komaliongiyo. Ovipuka ankho ndyili nokulilongesa mo Mbimbiliya, pahe andyihimbika umwe okuvihumba.

Ndyipadula umwe Ombimbiliya mokonda oyo yamphilulula. Tyokunwa unene, nokusipa, nokupopia ovipuka viasila, nokuvala omapita, andyityiyeke-po. Pana ankho ovatumini hivehande, mahi pahe andyihimbika okuvehumba. (Ova Loma 13:1) Tupu ankho ndyenda vala novahikuena ovanyingi, mahi natyo andyityiyeke-po.

Namphila napilulukile umwe, mahi ankho ndyisoka okuti vokututumba vamaneko ovitateka viouye, no vokupopila ovanthu vatekule nawa ovinyama, vekahi nokulinga nawa. Ankho ndyisoka okuti okuvesa-po ovanthu ovo, kamavakala nawa, mavanumana. Mahi pahe konyima andyityinoñgonoka okuti o Huku umwe vala utyivila okumanako ovitateka viovanthu. Okutuka umwe opo, tyange pahe ankho okulongesa ovanthu etyi Huku meketulingila. — Mateusi 6:33.

Ku ame kouye ankho kuna umwe vala ovanthu vevali: Ava vekahi nawa, na ava vehekahi nawa. Vana ndyitala okuti kavekahi nawa, ankho ndyiveyele! Mahi pahe ndyikahi nawa, pahe ndyihole ovanthu vatyo aveho. (Mateusi 5:44) Otyipuka tyimwe ndyilinga opo ovanthu vetyimone okuti ndyivehole, ndyivepopila oviwa Huku meketulingila. Ndyihole okumona okuti tyina ndyilongesa ovanthu Ombimbiliya, vakala nawa, vahambukwa, kavasoyo novitateka viouye.

Pahe ndyityii okuti Huku, wokuatunga ovipuka aviho, apa katutu kamayeke ovinyama vimoneswe vali ononkhumbi. Ndyina onthumbi yokuti apa katutu ovanthu mavakakala nawa. Huku kamayeke ohi ihanyue-po. Pahe natula omutima, ndyina ehambu, mokonda ndyityii okuti apa katutu Huku makamanako ovitateka aviho ankho ndyitutumba navio. (Isaías 11:1-9) Otyipuka otyikwavo tyinthyambukiswa, okupopila vakuetu ovipuka ovio oviwa. Ame pahe hitutumba vali ndyimane-ko ovitateka viouye.