Ombimbiliya Ipilulula Omwenyo Wovanthu

OITYI tyakwatesile-ko omukwendye umwe akondoka ku Siovaa? Omukwendye umwe ankho uhanda ñgeno uvasa-vo omunthu akala umwe ngatyina o tate yae. Oityi alingile opo emuvase? Tanga onthele ei na utyimone.

“Ankho Nesukisa Okukondoka ku Siovaa.” —ELIE KHALIL

ENIMA ATYITWA: 1976

OTYILONGO ATYITILWA: CHIPRE

EHIPULULO: OMONA OMUPESELI

OMUENYO WANGE KOHALE: Natyitilwa ko Chipre, mahi nekulila ko Austrália. Ovo tate Onombangi mba Siovaa, Vankhwatesile-ko umwe okunoñgonoka Siovaa, nokuhumba Ondaka yae Ombimbiliya. Mahi etyi pahe ndyili nokukola andyihimbika okuteneneka ehinga. Kounthiki ankho ndyihena meumbo andyiende komapanga ange. Atukala ovimphulu viomatuku-tuku.

Potete ankho ndyina owoma novo tate, ovipuka vina ankho ndyilinga, ankho ndyivilinga vala tyiholama, mahi etyi pakala owoma aweende. Andyilingi epanga liovakulu vamwe ankho vandongesa vala okulinga ovivi. Andyipopila ovo tate andyiti hihande vali okukala melongeso lienyi. Ovo tate avahetekela-vo okunkhwatesako mahi nii anehetavela.

Meumbo andyitundumo, oku naya nako ankhevilapo umwe. Andyihimbika okupwena epangwe, atee umwe ankho ndyilikuna otyo ndyilandesa. Ankho ndyilinga vala ovipuka ovivi, ndyityihole tyokukala povipito. Andyikala omukalavi, okulingwa umwe vala okapuka okatutu ankho ndyinumana umwe unene, omunthu watyo wokwetyindinga andyimuvete omapita. Ovipuka aviho nalongesilwe okuti omunthu ufenda Huku kapondola okuvilinga, ankho ovio umwe ndyilinga.

OÑGENI OMBIMBILIYA YAPILULULA OMWENYO WANGE: Nakalele epanga liomukwendye umwe ankho nae upwena epangwe. Omukwendye watyo oo, tate yae wanyima-le kohale pu etyi ngwe ankho omututu vala. Ankho tuhipulula unene pamwe ankho tutomphola umwe aloo mokati kovinthiki. Pamwe ankho umphopila okuti wivaluka unene tate yae. Mokonda pu etyi ankho ndyimona nalongesilwe okuti ovanthu vakwankhia Huku meya okuvetutilisa andyimupopila etyi Sesusi atutilisile vokwankhia netyi Huku makalinga komutwe wandyila. (Suau 5:28, 29) Nthiki imwe andyimupopila okuti: “Tate yove makatutila amukakala vali amuho! Onthwe atuho matukakala mouye umwe omupe, momphangu yombembwa!” Etyi nemupopila umwe ngotyo ahambukwa unene.

Pamwe epanga liange ankho upopia ovipuka viayemba kononthiki mbahulililako, tupu pamwe upopia outatu ukola. Ame ankho ndyimulekesa umwe mombimbiliya yae, olie Siovaa, olie Sesusi, netyi Ombimbiliya ipopia ononthiki mbahulililako. (Suau 14:28; 2 Timotiu 3:1-5) Apeho tyina ankho ndyilongesa apenga liange okunoñgonoka Siovaa, ndyisoka unene ku Siovaa.

Ovipuka ovo tate vandongesile, katutu-katutu andyihimbika okuvisoka. Pamwe tyina ndyili motyipito navakwetu otyo tupwena omapangwe, ankho ndyisoka okuti ‘olo oyo Siovaa ukahi ñgeni tyina anthala ñga?’ Omapanga ange ankho vati vehole Huku mahi ovipuka ankho valinga kavityilekesa. Ame ankho hihande okulinga ngavo. Andyisoko umwe ñga andyiti, ‘nesukisa okukondoka ku Siovaa.’

Omunthu okwii etyi tyaviuka mahi ehetyilingi opo utupwa-le etyi alinga. Mokonda yotyo andyiyekepo okupwena epangwe, omapanga omavi nao andyieeyeke-po. Pahe andyilongeswa Ombimbiliya nomukulu umwe.

Mahi otyipuka tyemphwilisile vali unene okutyiyekapo, okumana liwa. Pamwe ankho ndyityivila umwe okuliyunga mahi pamwe hityivili. Pahe pamwe ankho hikala nawa mokonda nahanda okutyiyekapo. Ankho ndyiti tyina nasoya andyikapopia nomukulu wokuli nokundongesa Ombimbiliya na ankhwateseko-vo. ankho ukahi nawa wapwa elundo ankhwatesako umwe unene. Amphopila ndyitange Omutala Womulavi umwe upopia okuti twesukisa okulikwatesila, atwahayekeko. a Atulilongesa nae ovipuka vimwe ndyipondola okulinga tyina namanumana. Tupu nelikwambelele unene ku Siovaa, ankhwatesako umwe andyityivili okuliyunga. Etyii tyati mohanyi ya Abril menima lyo 2000, Andyimbatisalwa. Ovo tate avahambukwa unene.

OUWA PATYI NAPOLA-KO: Pahe ndyina ehambu, omutima wange watula vala nawa, mokonda hilingi vali ovipuka vinyona ekongoko liange. Pahe tyino ndyina umwe ehambu movipuka aviho ndyilinga. Tyilinge ndyili kovilinga, tyilinge ndyili meliongiyo, tyilinge ndyili nokutomphola na vakwetu, ndyina umwe vala ehambu.

Ndyipandula unene ovo tate vahayekeleko okunkhwatesako. Tupu hilimbwa etyi Sesusi apopia tyili momukanda wa Suau 6:44, wati: “Nawike upondola okuya ku ame, Tate wanthuma ehemuetele ku ame.” Nahambukwa unene mokonda Siovaa wankhwatesako andyikondoka kwe.

“Ankho Ndyihanda-vo Ñgeno Ndyikala na Tate.” —MARCO ANTONIO ALVAREZ SOTO

ENIMA ATYITWA: 1977

OTYILONGO ATYITILWA: CHILE

EHIPULULO: ANKHO WIIMBA

OMUENYO WANGE KOHALE: Nekulila mepunda-umbo lyo Punta Arenas, kotyilongo tyo América do Sul. Ovo tate velihengale kohale etyi ndyina vala omanima 5, pahe ankho ndyikala vala na mee. Pamwe ankho ndyiivaluka unene tate andyikala umwe vala ngoti navomba. Ankho ndyihanda-vo ñgeno ndyikala na tate.

Mee ankho ulongeswa Ombimbiliya no Nombangi mba Siovaa iya ankho twenda umwe nae komaliongiyo. Ame ankho ndyikuluminyuako-ale vala ankho hihandeko-ale. Etyi ndyina omanima 13 pahe andyiyekeko, andyihaenda-endako vali.

Pomuvo opo ankho ndyihole unene oviimbo, tupu ankho ndyityivilale okwiimba. Etyi ndyina omanima 15 ankho ndyikongwa umwe opo ndyikaimbe monombale nokovipito. Movipito omo ankho tulivasa-mo novanthu vetyivila umwe okwiimba nawa, na ame andyiende kosikola ndyikalongeswe okwiimba. Etyi natuukisa omanima 20 andyiilukila ko Santiago ngako ndyikalongeswa okwiimba. Atyiti umwe oku otyo ndyilongesiwa, oku otyo ndyiimba.

Ankho ndyilinga umwe ovipuka ovio aviho, mahi uti hamwe ankho pena tyimwe nakambela. Opo ndyikale nawa ankho ndyina vala okupwena omapangwe, nokukanwa nomapanga ange. Ankho hitavela, novanthu ankho vetyimona umwe okuti hitavela. Ankho ndyivala vala ovikutu ovinthikovei, ndyina onondyeli ononene, onohuki mbatyo ankho mbuti umwe komwongo.

Ame ankho ndyilwisa vala ovanthu, pahe ankho ndyikalela vala okutaindywa no nopulisa. Nthiki imwe ankho napialuka andyivasi ovanthu ankho vehole okutuleva andyivetañgunisa, avambeteko otyipuka tyimwe onomphanda ambumiti.

Otyipuka tyimwe tyandyihamene unene otyetyi vakwetu vandingile. Ankho ndyina omuhikwena wange, naina umwe pomapanga ange weenda nomuhikwena wange oo, omapanga ange aveho ankho vetyii umwe, mahi nii vala avehetyimphopila. Otyipuka tyina atyindyihama unene.

Andyikondoka ko Punta Arenas, andyikalongesa ovanthu okwiimba nokuhika oviyola. Tupu tyokwiimba anehetyiyekepo-ale. Nthiki umwe andyivasi omuhikwena umwe omuwa utiwa Sussan, andyimuhande-po. Mee ya Sussan utavela koutatu ukola, mahi ame ankho hityitavela. Pahe Sussan amphulu okuti “opo naina outatu ukola oko ukahi ine kau-ko?” Andyiti otyipuka otyo omatutu vala, mahi anehemulekesa-tyo mo Mbimbiliya mokonda apa tyahonekwa hipei. Andyimupopila vala okuti ine upula Onombangi mba Siovaa mavekulekesa-tyo umwe mo Mbimbiliya. Monthiki oyo andyilingi otyipuka tyimwe ankho nahulale okulinga kohale, andyilikwambela ku Huku, andyimwiiti ankhwateseko.

Etyi pakala atulivasi nomukulu umwe tyina ndyimutala uti hamwe ndyimwii, andyimupulu ine Ombangi ya Siovaa, no ola valinga omaliongiyo. Namphila ankho navala vala otyipuka ñga, mahi ahatili owoma ankhumbulula umwe nawa. Tyina ankho elikwambelo liange umwe liakumbululwa. Etyi napita Kondywo Yomaliongiyo andyipumphama vala konyima opo nahatumphulele ovanthu. Mokonda etyi ndyimona ankho ndyiendale komaliongiyo, pahe etyi vamona avandyimbuka umwe, avanthambula nawa. Otyipuka tyina atyinkhalesa nawa uti vala nkhwali ankho navomba pahe nakondoka meumbo. Etyi namona omukulu ankho undongesa Ombimbiliya etyi ndyimona, andyimwiiti andongaise vali.

OÑGENI OMBIMBILIYA YAPILULULA OMWENYO WANGE: Nthiki imwe andyitange Provérbios 27:11, yati: “Kala nonondunge mona wange, hambukiswa omutima wange.” Etyi nanoñgonoka okuti naame umwe ndyipondola okuhambukiswa Huku, andyihuvu unene. Andyimono umwe okuti Siovaa o Tate una ankho ndyili nokuovola!

Ame ankho nahanda umwe okuhambukiswa Huku, nokulinga etyi ahanda. Mahi ankho ndyinwa unene nokupwena epangwe. Ankho nati hamwe himetyivili okutyiyekapo mokonda netyihimbikale kohale. Etyi natanga omukanda wa Mateusi 6:24, wokwati: “Nawike upondola okukala omupika wovahona vevali,” atyinkhwatesako unene. Omukanda omukwavo nao wankhwatesileko unene o wa 1 Ova Kolindu 15:33, wati: “Omapanga omavi anyona ovituwa oviwa.” Opo ndyityivile umwe okuhambukiswa Siovaa nesukisile okuyekapo omapanga ange, apa palingwa ovipuka ovivi anahai-po vali. Ombimbiliya yapopia umwe nawa okuti nesukisa okulipola ovipuka aviho vipondola okunthyika anahahambukiswa Siovaa. — Mateusi 5:30.

Mokonda ankho ndyihole umwe onomusika mbuna ankho ndyitehela atyimphwilisa unene okumbuyekapo. Mahi vakwetu mewaneno avankhwatesako unene, andyityivili umwe okumbuyekapo. Tupu andyiyekepo okupwena omapangwe nokunwa unene. Onohuki nonondyeli andyimbukeyeko. Onthiki napopila omukai wange okuti mandyikeye-ko onohuki amphopila okuti: “Naame ndyenda noove keliongiyo nkhatehela etyi muhole okupopilwa!” Etyi ehika-ko nae aiti alongaiswe Ombimbiliya. Etyi pakala atuhonekesa otyinepo tyetu kombonge. Mo 2008, atumbatisalwa. Twahambukwa unene mokonda tyati umwe ame omukai wange o mee atuho pahe tufenda Siovaa.

OUWA PATYI NAPOLA-KO: Nayovoka mouye uno vokunyona vala ovanthu. Nkhele ndyihole unene oviimbo mahi pahe ndyikoya nawa evi mandyitehela. Ndyityihole tyokukwatesako vakwetu nombunga yange haunene umwe ovakwendye. Apeho ndyivepopila okuti mouye omu mutupu-ale otyiwa, ovipuka vikahimo vimoneka ngatyina oviwa nii vala kavisilivila. Vikahi vala ‘ngatyina esilo.’ — Ova Filipu 3:8.

Pahe mewaneno navasa-mo omapanga ayumbwa onthumbi, vena olwembia, vena ombembwa pokati kavo. Otyipuka otyikwavo tyinthyambukiswa unene otyetyi pahe nakala epanga lya Siovaa, pahe navasa umwe Tate.

[Okatoi]

[Onondaka Mbavilapo]

“Nahambukwa unene mokonda Siovaa wankhwatesako andyikondoka kwe”