Nkakurira omu tauni nkye erikwetwa Warialda, omuri New South Wales. Abantu baingi omuri Warialda n’abatungi abaine ente n’entaama, kandi abamwe n’abahingi. Etauni egi neereebeka gye, kandi tihariyo barikuhenda ebiragiro baingi.

Turi abaana ikumi omuka, kandi niinye mukuru, n’ahabw’ekyo obu naabaire nyine emyaka 13, nkatandika kukora kuhwera omu kureeberera eka yaitu. Ahabw’okugira ngu nkaba nteegire munonga, nkaba ninkora omu mariisizo. Kuza kuhitsya emyaka 15, nkaba ninkora omu iriisizo ry’endogoya.

Okukora omu mariisizo kikaba kiine ebirungi n’ebibi. Nk’eky’okureeberaho, nkaba ninkunda omurimo gwangye, n’omwanya ogu naabaire niinkoramu. Nkaba ninkira kuhemba omuriro omu kiro, reero ndeeba okwezi n’enyonyoozi omu kiro. Ninyijuka ndikuteekateeka ngu haine kuba hariho owaahangire ebintu birungi ebi byona. Kwonka kandi omu mariisizo ago nkaba ninkoramu n’abantu b’emicwe mibi. Bakaba nibakira kugamba ebirikuhemurana kandi kikaba kyorobi kutunga tsigara. N’ahabw’ekyo omu bwire bukye naanye nkatandika kureetsa n’okugamba ebirikuhemurana.

Ku naahikize emyaka 18, nkafuruka naaza Sydney. Nkateeraho kuza omu mahe, kwonka tibarantwire ahakuba nkaba nyine obwegyese bukye. Nkatunga omurimo ogundi naaguma omuri Sydney kumara omwaka gumwe. Omu bwire obwo nibwo naabanza kubugana Abajurizi ba Yehova. Nkaikiriza kuza omu rumwe aha nteerane zaabo, kandi omu ruteerane orwo nketegyereza ngu ebi barikwegyesa n’amazima.

Kwonka bwanyima y’obwire bukye, nkacwamu kugaruka omu kyaro. Nkaza Goondiwindi, omuri Queensland. Nkatunga omurimo, naataatsya omukazi, kandi eky’obusaasi, nkatandika kunywa amaarwa.

Nyowe n’omukazi wangye tukazaara abaana babiri b’aboojo. Abaana bangye ku baazairwe nkatandika kuteekateeka munonga aha biro byangye by’omumaisho. Nkeijuka ebi naabaire nyegire omu ruteerane rw’Abajurizi ba Yehova omuri Sydney naacwamu kugira eki naakoraho.

Nkabona Omunaara gw’Omurinzi gukuzire ogwabaire guriho endagiriro ya ofiisi y’eitaagi ey’Abajurizi ba Yehova omuri Australia. Nkaboherereza ebaruha ndikubashaba ngu baampwere. N’ahabw’ekyo ow’eishe-emwe akaija kuntaayaayira. Omu bwire bukye, akatandika kunyegyesa Baibuli.

AKu naabaire niinyega Baibuli, nkatandika kwetegyereza ngu nyine kukora empinduka. Ekyahandiikirwe kimwe ekyankwatsireho munonga ni 2 Abakorinso 7:1. Ekyahandiikirwe ekyo nikituhiga ‘kweyozyeho oburofa bwona obw’aha mubiri.”

Nkacwamu kurekyera aho kureetsa n’okukoresa kubi amaarwa. Kikaba kitoorobi kukora empinduka ezo, ahakuba nkaba mmazire obwire buraingwa ndikukora ebintu ebyo. Kwonka nkaba mmaririire kutwaza omu muringo ogurikushemeza Ruhanga. Omusingye oguri omu Abarooma 12:2 gukampwera munonga. Nigugira guti: ‘Mutashushanisibwa n’ab’obusingye obu, kureka muhindurwe basya ahabw’okugarurwa obusya omu biteekateeko byanyu.’ Nketegyereza ngu kubaasa kuhindura oku naabaire nintwaza, nkaba nyine kuhindura emiteekateekyere yangye, nkareeba ngu emicwe yangye ni mibi, nk’oku Ruhanga arikugireeba. Ahabw’obuhwezi bwa Yehova, nkabaasa kurekyera aho kureetsa n’okukoresa kubi amaarwa.

Kwonka ekyakizireyo kungumira, n’okurekyera aho kurahira ndikukoresa ebigambo bibi. Nkaba niimanya obuhabuzi oburi omu Abaefeso 4:29 oburikugira ngu ‘omu kanwa kaanyu hatarirugamu ekigambo kyona ekibi.’ Kwonka nabwo, tindabaasize kurekyera aho kurahira ahonaaho. Okuteekateeka aha biri omu Isaaya 40:26 kikampwera. Nihagamba aha nyonyoozi hati: ‘Mwimutsye amaisho gaanyu ahaiguru, mureebe, n’oha owaahangire biriya? Niwe Ogwo oshohoza amahe gaabyo omu mitwe, byona akabyeta omu maziina, ahabw’obukuru bw’amaani ge, kandi ahabw’okuba ow’amaani omu bushoboorozi, tihariho na kimwe ekibuzireho.’ Nketegyereza ngu Ruhanga yaaba naabaasa enyonyoozi zoona eziri omu iguru ezi ndikukunda kureeba, buzima naabaasa kumpa amaani g’okukora empinduka kugira ngu mushemeze. Ahabw’okushaba kwingi kandi nkatamu amaani, mporampora naabaasa kwega kutegyeka akanwa kangye.

Obu naabaire ninkora omu mariisizo, nkaba ntarikukira kugaaniira n’abantu ahabw’okubamu abantu bakye. Kwonka ahabw’okutendekwa omu nteerane z’Abajurizi ba Yehova, nyegire oku kugaaniira n’abantu. Kandi okutendekwa okwo kumbaasiise kugaaniira n’abantu aha makuru marungi agarikukwata aha Bukama bwa Ruhanga.​—Matayo 6:9, 10; 24:14.

Kumara emyaka mingi, ntwire nimpeereza nk’omureeberezi omu kibiina. N’omugisha gw’amaani kuhwera ab’eishe-emwe bagyenzi bangye. Kwonka ekirikukirayo kunshemeza n’okuheereza Yehova hamwe n’omukazi wangye n’abaana baitu.

Ninsiima Yehova ahabw’okwikiriza kwegyesa omuntu otashomire nkaanye. (Isaaya 54:13) Ninyikirizana n’ebiri omu Enfumu 10:22 ebirikugira ngu ‘omugisha ogu [Yehova] arikuha, nigwo gurikutungisa abantu.’ Nyowe n’eka yangye twine ekihika ky’okwongyera kwega ebirikukwata ahari Yehova n’okumuheereza ebiro byona.