EBI NAARABIREMU:

Nkazaarirwa Acul, omu tauni y’ebibungo eyehereire omuri Guatemala. Eka yaitu neekomooka omu bantu ba Ixil, ab’oruganda rwa Maya. Oyihireho okugamba Orusipania, nkakura ndikugamba n’endimi z’omu kicweka kyaitu. Omu myaka y’okubanza hakabaho orutaro rurikutiinisa omuri Guatemala orwamazire myaka 36. Omu bwire obwo abantu baingi aba Ixil bakafa.

Obu naabaire nyine emyaka ena, mukuru wangye ow’emyaka mushanju akaba naazaanisa gurineedi yaabaruka. Eky’obusaasi nkahuma amaisho na mukuru wangye yaafa. Bwanyima y’ebyo, nkatwarwa omu ishomero ry’empumi omu rurembo Guatemala, ahu naayegyeire Braille. N’ahabw’ekyo, ahabw’enshonga zitari zimwe nkaba ntarikwetegyereza gye, abashomesa bakanzibira kugamba n’abaana abandi kandi abeegi bagyenzi bangye bakaba nibanyentatara. Butoosha nkaba mba nyine eihamba kandi nkaba mmara ameezi abari omuka buri mwaka ndi na maawe, kandi butoosha akaba naantwariza omu muringo gw’embabazi kandi arikunfaho. Eky’obusaasi, akafa nyine emyaka ikumi. Okurugwaho omuntu wenka owaabaire naankunda, kikampenda omutima.

Aha myaka 11, nkagaruka omu tauni y’owaitu naatandika kutuura omu ka ya murumuna wangye. Bakaba nibafayo kundeeberera omu by’omubiri, kwonka tihaine owaabaire naabaasa kumpwera omu nyehurira. Obumwe, nkaba ntakira Ruhanga ndikugira nti: “Ahabw’enki maawe yaafiire? Ahabw’enki naahumire amaisho?” Abantu bakaba nibagira ngu obugwe obu bukampikaho ahabw’okukunda kwa Ruhanga. Eki kikandeteera kuteekateeka ngu Ruhanga taine saasi n’oburingaaniza. Enshonga yonka ahabw’enki ntaraitsire n’ahabw’okugira ngu nkaba ntaine buryo bw’okukikora.

Okuba empumi kikandeetera kwereeba nk’otaine kihwera omu by’omubiri n’omu nyehurira. Nkiri omwojo muto, nkatorobozibwa emirundi mingi. Tihaine ou naatabarize ahabw’ebihagaro ebyo, nkaba niimanya ngu tihaine orikufayo. Abantu bakaba batarikukira kugamba naanye, kandi naanye nkaba ntarikwenda kugaaniira n’omuntu weena. Nkaba ninkira kuba ndi nyenka nyine enaku, ntarikwesiga muntu weena.

OKU BAIBULI YAAHINDWIRE EMITWARIZE YANGYE:

Omu bushogoyo, Abajurizi ba Yehova babiri (omushaija n’omukazi we) bakampikaho ndi aha ishomero omu shaaha z’akahuumuro. Omwe aha beegyesa bangye aha ishomero, akansaasibwa yaabashaba kwija kuntaayaayira. Baakanyegyesa ngu Baibuli neeraganisa ngu abafu nibaija kuzooka kandi eizooba rimwe empumi nibaija kuhumuuka. (Isaaya 35:5; Yohaana 5:28, 29) Ebi baayegyeise nkabikunda, kwonka nkaba ningumirwa kugaaniira nabo, ahabw’okutamanyiira kugamba. Kwonka, n’obu ndaabe naabaire nyine ebigambo bikye, bakangirira embabazi baaguma nibataayaayira kubaasa kunyegyesa Baibuli. Omushaija n’omukazi we bakaba nibagyenda orugyendo rwa mahiro mukaaga kandi barikutemba orushozi kubaasa kuhika omu tauni yaitu.

Murumuna wangye akangira ngu Abajurizi ba Yehova n’abantu barikujwara gye kwonka abooro. Kwonka, butoosha bakaba booreka ngu nibanfaho, barikundeetera obutuconco tukye. Nketegyereza ngu Abakristaayo abaabuzima nibo bonka abarikubaasa kworeka okwefeerereza nk’oku.

Nkeega Baibuli ndikukoresa ebitabo bya Braille. N’obu ndaabe naabaire ninyetegyereza ebi naabaire niinyega, kwonka nkaba nindeeba ngu haine ebintu bimwe ebirikungumira kwikiriza. Nk’eky’okureeberaho, nkagumirwa kwikiriza ngu Ruhanga buzima naanfaho kandi ngu abantu abandi nabo nibabaasa kugira enyehurira nk’eza Ruhanga. Nketegyereza ahabw’enki Yehova akirekireho ebikorwa bibi, kwonka kikaba kitoorobi kumureeba nka Tataitwe oine rukundo. *

Mporampora, ebi naayegire omu byahandiikirwe bikampwera kuhindura emiteekateekyere yangye. Nk’eky’okureeberaho, nkeega ngu Ruhanga naafayo munonga ahari abo barikubonabona. Kyahika aha baheereza be abaabaire nibatuntuzibwa, Ruhanga akagira ati: “Buzimazima ndeebire okubonabonesibwa kw’abantu bangye. . . Ahabw’okuba nimmanya obusaasi bwabo.” (Okuruga 3:7) Ku naamanyire ngu Ruhanga aine emitwarize mirungi, kikampiga kwehayo ahariwe. Omu 1998, nkabatizibwa naaba omwe aha Bajurizi ba Yehova.

Bwanyima y’omwaka gumwe mperize kubatizibwa, nkaza omu itendekyero ry’empumi haihi n’orurembo rwa Escuintla. Omureeberezi w’omu kibiina ky’omu kicweka ekyo akateeraho kumanya ekyabaire nikindemesa kuza omu nteerane obu naabaire nkiri omu tauni y’owaitu. Ekibiina ekyabaire kiri haihi kikaba kyombekirwe aha rushozi oru omushaija n’omukazi we baabaire nibatemba kwija kunyegyesa, kandi nkaba ningumirwa kurutemba. Kubaasa kumpwera kuzayo, omureeberezi akamanyisa eka emwe omuri Escuintla abaabaire beteekateekire kunyiikiriza kutuura nabo, kandi bakampwera kuguma ninza omu nteerane z’ekibiina. Kuhitsya n’eri izooba, nibakindeeberera nk’omwe ah’ab’eka yaabo.

Ninyijuka ab’omu kibiina baingi abaambereire eby’okureeberaho abaayorekire rukundo eyaabuzima. Eby’okureeberaho ebyo byona nibimpamiza ngu nk’omwe aha Bajurizi ba Yehova, ndi omwe aha Bakristaayo abaabuzima.—Yohaana 13:34, 35.

OKU NGASIRWE:

Tindikwereeba nk’otaine mugasho nari amatsiko. Hati niimanya gye ekigyendererwa ky’okubaho. Obu ndi Omujurizi wa Yehova wa Yehova ow’obutwire omu murimo gw’okwegyesa, ninyebembeza okwegyesa abandi amazima ga Baibuli omu mwanya gw’okuta omutima aha bumuga bwangye. Kandi, nyine omugisha gw’okuba omureeberezi omu kibiina n’okuha embazo omu bibiina. Nangwa ntungire n’omugisha gw’okuha embazo aha nteerane empango ezirikuba ziriho abantu baingi.

Omu 2010, nkaza omu Ishomero ry’Okutendeka Abareeberezi n’Abaheereza (hati niryetwa Ishomero ry’Ababuurizi b’Obukama) omuri El Salvador. Ishomero eri rikampwera kwetebeekanisa kuhikiiriza gye obujunaanizibwa bwangye omu kibiina. Okutunga okutendekwa oku kikandeetera kwereeba nk’ow’omuhendo kandi orikukundwa Yehova Ruhanga, orikutubaasisa kuba abahikire kukora omurimo gwona.

Yesu akagira ati: ‘Okuha nikureeta okushemererwa okukira okuheebwa.’ (Ebyakozirwe 20:35) Ebiro ebi, nimbaasa kugamba ntarikubangaanisa ngu nyine kushemererwa, n’obu omu kubanza naabaire ninteekateeka ngu eki tirikubaasa kubaho, hati nindeeba ngu nimbaasa kuhwera bandi.