1, 2. (a) Abeebembezi b’ediini bakatunga businguzi ki aha murimo gwaitu gw’okubuurira, kwonka entumwa bakatwaza bata? (b) Ahabw’enki entumwa baagumizemu nibabuurira n’obu baazibiirwe

 HAHINGWIREHO obwire bukye bwanyima ya Pentekoote 33 Y.A.K., ekibiina Ekikristaayo omuri Yerusaalemu kimazire saabiiti nkye kiherize kutandikwaho. Sitaane areeba ngu buzima obu nibwo bwire burungi bw’okugira eki yaakora. Ekibiina kitakahamire gye, naayenda kukimaraho. Ahonaaho, Sitaane areetera abeebembezi b’ediini kuzibira omurimo gw’okubuurira aha Bukama. Kwonka, entumwa zigumizamu nizibuurira n’obumanzi kandi abashaija n’abakazi baingi ‘baikiririza omuri Mukama’—Byak 4:18, 33; 5:14.

² N’ekiniga kingi, abahakanisa bagaruka babataahirira kandi aha murundi ogu bata entumwa omu kihome. Kwonka, omu kiro, Maraika wa Yehova aigura enyigi z’ekihome kandi omu kasheeshe entumwa zigaruka kubuurira! Ogundi omurundi bagaruka bakwatwa kandi batwarwa omu maisho g’abategyeki, barikubatura okuhenda ekiragiro ky’okubuurira. Entumwa zigarukamu n’obumanzi ziti: “Tushemereire kworobera Ruhanga okukira abantu.” Abategyeki abo bakwatwa ekiniga munonga, benda kwita entumwa ezo. Kwonka omu kaanya ako, Gamalieli omwegyesa w’Ebiragiro owaabaire naaheebwa ekitiinisa, agamba arikurabura abategyeki abo: “Mwerinde. . . Eby’aba bantu mu byetantare, mu barekye.” Ekirikutangaaza, abategyeki abo baikiriza obuhabuzi bwe barekura entumwa zigyenda. Abashaija aba abeesigwa bacwamu kukora ki? Bataine kutiina kwona, bagumizamu “kwegyesa ebya Yesu n’okubuurira abantu ku ari Kristo.”—Byak 5:17-21, 27-42; Enf. 21:1, 30.

3, 4. (a) Sitaane abaasize kukoresa miringo ki y’okuhakanisa aha bantu ba Ruhanga kumara obwire buraingwa? (b) Omu shuura egi n’eziraakurateho ibiri nituza kugamba ahari ki?

³ Omushango ogw’omu icwero ry’emanja omu gwa 33 Y.A.K. nigwo gwabandize kworeka butunu okuhiiganisibwa kw’ekibiina Ekikristaayo, kwonka tigwo gwahererukireyo. (Byak 4:5-8; 16:20; 17:6, 7) Omu bwire bwaitu, Sitaane naareetera abarikutuhakanisa kureetera ab’obushoboorozi kuzibira omurimo gwaitu ogw’okubuurira. Abahakanisa abo bataire emishango mingi aha bantu ba Ruhanga. Gumwe ahari egyo n’okugira ngu nituteganisa obusingye bw’abantu—nitureetaho obutabanguko. Ogundi n’okugira ngu nitugomera gavumenti; ogundi omushango n’okugira ngu turi baakitunzi. Omu bwire obuhikire, ab’eishe-emwe bagiire omu macwero g’emanja kworeka obuhame ogu emishango egi tehikire. Mbwenu shi niki ekirugire omu kuhurira emishango egi? Okucwamu kwa Amacwero g’emanja okwakozirwe emyaka mingi enyima nikukukwataho kuta hati? Ka tushwijume emwe aha mishango tureebe oku yaahwereire “omu kurwanirira engiri...n’okugihamya.”—Fil. 1:7.

⁴ Omu shuura egi nituza kuta omutima aha ku tubaasize kurwanirira obugabe bwaitu bw’okubuurira. Eshuura ibiri eziraakurateho niziza kworeka emishango ei tubaasize kuhoza obwo turi kurwanirira okutaba b’ensi egi kandi turikuhamira aha mitindo y’Obukama.

5. Ahabw’enki ababuurizi b’Obukama baakomirwe omwaka 1930 gurikuza kuhendera, kandi abareeberezi bakakora ntebeekanisa ki?

⁵ Omu myaka ya 1930, ebibuga hamwe na tawuni ezimwe omuri United States bikateeraho kugyemesereza Abajurizi ba Yehova kutunga ebihandiiko ebirikubaikiriza kwejumba omu murimo gw’okubuurira. Kwonka ab’eishe-emwe bakanga kubitunga. Ahabw’okuba ebihandiiko ebyo nibibaasa kubaihwaho, kandi bakaba nibamanya ngu tihariho gavumenti eyabaire eine obushoboorozi bw’okuzibira ekiragiro eki Yesu yaahaire Abakristaayo eky’okubuurira amakuru marungi g’Obukama. (Mak 13:10) Ekyakuratsireho, ababuurizi b’Obukama baingi bakakwatwa. Eki kikareetera abarikureeberera ekibiina kuza omu icwero ry’emanja. Bakaba nibenda kworeka ngu ebiragiro ebyabaire bitairwe aha Bajurizi ba Yehova bikaba nibitaahirira obugabe bwabo bw’okuramya. Omuri 1938 hariho ekyabaireho ekyarugiremu omushango mukuru munonga. Niki ekyabaireho?

6, 7. Niki ekyahikire aha ka y’Ow’eishe-emwe Cantwell?

⁶ Aha Rwakabiri omu kasheeshe, Okwakana 26, 1938, Newton Cantwell, ow’emyaka 60; omukazi we Esther; n’abaana baabo Henry, Russell, na Jesse​—boona batano barikuheereza nka baapayoniya ab’omutaano—bakaza kubuurira omu kibuga New Haven, Connecticut. Bakaba betebeekaniise kumara obwire batari muka. Ahabw’enki? Bakaba bakwatsirwe emirundi mingi kandi bakaba nibamanya ngu nibabaasa kugaruka kukwatwa. Kwonka ekyo tikiraatuubize aha mujinya gwabo ogw’okubuurira amakuru g’Obukama. Bakahika omuri New Haven n’emotoka zaabo ibiri. Newton akavuga emotoka ei ab’omuka baabaire barimu hamwe n’ebitabo n’obuzindaro obukye oburikwetwa phonographs, Kandi Henry owaabaire aine emyaka 22 akavuga emotoka eyabaire eine ebizindaro ahaiguru. Nk’oku baabaire nibateekateeka bwanyima y’eshaaha nkye poriisi ekabeemereza.

⁷ Russell, ow’emyaka 18,niwe yaabandize kukwatwa bwanyima Newton na Esther nabo bakakwatwa. Jesse, ow’emyaka 16, akaba naareebera hangahari poriisi erikutwara abazaire be na mukuru we. Henry akaba naabuurira omu kicweka ekindi ekya tauni, n’ahabw’ekyo Jesse akaguma ari wenka. Kwonka nabwo, akakwata phonograph ye yaagumizamu naabuurira. Abashaija babiri ab’ediini y’Abanyakaturiki bakaikiriza Jesse kubateereho orubazo baaruhurira, omutwe gw’orubazo rw’ow’eishe-emwe Rutherford gukaba guri “Abazigu.” Kwonka ku baabaire nibahurira orubazo orwo, bakagira ekiniga bayenda kuteera Jesse. Omu bucureezi, Jesse akabaruga omu maisho yaagyenda, kwonka bwanyima y’obwire bukye, omuserukare akamwemereza. Na Jesse akakwatwa. Poriisi terateire mushango gwona ahari munyaanyazi-itwe Cantwell, kwonka emishango ekagita aha w’eishe-emwe Cantwell n’abatabani. Kandi bakarekurwa eizooba eryo ryenyini bwanyima y’okubeemerera.

8. Ahabw’enki kooti yaataire ahari Jesse Cantwell omushango gw’okushiisha obusingye?

⁸ Bwanyima y’ameezi makye omu Kwamwenda 1938, eka ya Cantwell ekareetwa omu kooti omuri New Haven. Newton, Russell, na Jesse bakacwerwa omushango ogw’okushorooza esente omu bantu bataine ekihandiiko ekirikubaikiriza. N’obu baajuriize omu kooti erikukirayo omuri Connecticut, Jesse akasingwa omushango gw’okushiisha obusingye. Ahabw’enki? Ahabw’okugira abashaija abanyakaturiki abahurikiize orubazo bakaha obujurizi oburikugira ngu orubazo rukaba nirujuma ediini yaabo kandi bakaba nibabagarura ahansi. Kubaasa kuhakanisa okucwamu oku ab’eishe-emwe abaine obujunaanizibwa bakatwara omushango ogu omu kooti erikukirayo omu ihanga rya United States.

9, 10. (a) Kooti erikukirayo omuri U.S. ekacwamu eta aha mushango gw’eka ya Cantwell? (b) Obunaku obu nitugasirwa tuta omu kucwamu okwo

⁹ Kutandika na Okwakashatu 29, 1940, Omuramuzi omukuru Charles E. Hughes n’abandi baramuzi munaana bakahurira okwehozaho okwayanjwirwe ow’eishe-emwe Hayden Covington, omuhorereza w’Abajurizi ba Yehova. * Orikuhorereza ekibuga Connecticut akagamba omu muringo ogurikworeka ngu Abajurizi ba Yehova bakaba nibareetaho obutabanguko, omuramuzi omwe akabuuza ati: “Tiky’amazima ngu n’obutumwa obu Yesu yaabaire naabuurira omu bwire bwe ti boona ngu bakaba nibabukunda?” Omuhorereza ogwo akagarukamu ati: “N’amazima, kandi naaba ninyijuka gye, ebyahandiikirwe nibitugambira ekyahikire ahari Yesu ahabw’okubuurira obutumwa obwo.” Ebyo ka n’ebigambo bikuru! Atakimanyire, omuhorereza ogwo akagyeragyeranisa Abajurizi ba Yehova na Yesu reero abarikukurira ekibuga kye yaabagyeragyeranisa n’abaitsire Yesu. Okwakataano 20, 1940, kooti ekarangirira ngu Abajurizi ba Yehova basingire omushango.

¹⁰ Mbwenu shi okucwamu kwa kooti egyo kukatugasira kuta? Kukatuhwera kurinda obugabe bwaitu bw’okuramya kugira ngu tihariho gavumenti, tauni nari ishaza eririkubaasa kuzibira obugabe bwaitu bw’okwejumba omu bikorwa by’ediini. Okwongyera ahari ekyo, kooti ekagira ngu entwaza ya Jesse “ekaba . . . etarikushiisha obusingye bw’abantu.” N’ahabw’ekyo, okucwamu kukoreka butunu ngu Abajurizi ba Yehova tibarikutabangura obusingye bw’abantu. Obwo ka bwabaire buri obusinguzi bw’amaani ahabw’Abaheereza ba Ruhanga! Nitukigasirwa tuta omu kucwamu okwo? omuhorereza omujurizi wa Yehova naagira ati: “Obugabe bw’okwejumba omu bikorwa by’ediini yaitu tutarikutiina kuzibirwa nibutubaasisa kugambira abantu ahu turikutuura n’omu kicweka kyaitu amakuru marungi agarikubaha amatsiko.”

11. Ab’eishe-emwe bagyenzi baitu omuri Canada bakakora kampeyini ki?, kandi ahabw’enki?

¹¹ Omu myaka ya 1940, Abajurizi ba Yehova omuri Canada bakatunga okuhakanisibwa kw’amaani. N’ahabw’ekyo omuri 1946, ab’eisheemwe bakatandika kampeyini ey’ebiro 16 ey’okugaba turakiti eine omutwe Rwango ei Quebec einiire Ruhanga, Kristo, n’obugabe bw’okuramya neeshwaza Canada yoona. Turakiti egi ekasheeshuura obwesharingo obwabaire butandikirweho abeebembezi b’ediini, obushaarizi bwa poriisi, n’ebikorwa bibi ebi abantu ba Quebec baabaire bahikize aha b’eishe-emwe baitu. Turakiti ekoongyeraho eti: “Abajurizi ba Yehova nibeeyongyerwa kukwatwa omu muringo ogurikuhenda ebiragiro kandi hariho emishango erikurenga omuri 800 ei barikujunaana Abajurizi ba Yehova omuri Greater Montreal.”

12. (a) Abahakanisa bakatwaza bata omu kampeyini ya turakiti? (b) Ab’eishe-emwe bakateebwaho mushango ki? (Reeba obugambo obw’ahansi.)

¹² Engaanzi ya Quebec, Maurice Duplessis arikukora hamwe na Kadinaali w’abanyakaturiki Abarooma orikwetwa Villeneuve, ku yaashomire turakiti akarangirira “orutaro orutarimu mbabazi” aha Bajurizi ba Yehova. Omubaro gw’emishango erikujunaanwa Abajurizi ba Yehova gukeeyongyera kuruga ahari 800 kuhika ahari 1,600. Payoniya omwe akagira ati “Poriisi ekatukwata emirundi mingi, twarekyera aho n’okubara.” Abajurizi ba Yehova abaakwatsirwe nibagaba turakiti bakateebwaho omushango gw’okugaba ebitabo ebirimu “ebitahikire kandi ebirikugomesa abantu.” *

13. N’oha owaabandize kuteebwaho omushango gw’okugomesa abantu, kandi kooti ekacwamu eta?

¹³ Omuri 1947, Ow’eishe-emwe Aimé Boucher na bahara be Gisèle, ow’emyaka 18, na Lucille, ow’emyaka 11, nibo baabandize kutwarwa omu kooti barikujunanwa omushango gw’okugomesa abantu. Bakaba nibagaba turakiti eya Rwango ya Quebec haihi na faamu yaabo omu bibungo ebiri omu bukiizi bwa-bumosho bw’ekibuga Quebec, kwonka kikaba kigumire okutabareeba nk’abarikuhenda ebiragiro abarikureetaho obutabanguko. Ow’eishe-emwe Boucher akaba ari omushaija omucureezi owaabaire naareeberera faamu ye kandi rimwe na rimwe arikuza omu tauni n’embaraasi ye. Kwonka, eka ye ekagumisiriza okutwarizibwa kubi okwabaire nikugambwaho omu turakiti egyo. Omuramuzi wa kooti egyo owaabaire naayanga Abajurizi ba Yehova akanga kwikiriza obuhame obwabaire nibworeka ngu ab’eka ya Boucher tibaine mushango. Omu mwanya gw’ekyo, akaikiriza ebi owaatabariize ab’eka ya Boucher yaagambire ngu turakiti ekaba neereetera abantu emiteekateeyere mibi n’ahabw’ekyo omushango gukabasinga. Okucwamu kw’omuramuzi ogwo kukaba nikumanyisa ngu: Okugamba amazima n’omushango! Aimé na Gisèle bakateebwaho omushango gw’okugaba ebitabo ebirikugomesa abantu, kandi na Lucille omwana muto akamara ebiro bibiri omu kihome. Ab’eishe-emwe bakatwara omushango ogwo omu kooti erikurayo obukuru omuri Canada, kandi ekaikiriza kuhurira omushango gwabo.

14. Ab’eishe-emwe omuri Quebec bakatwaza bata obu baabaire nibahiiganisibwa?

¹⁴ Obwo, ab’eishe-emwe na banyanaayazi-itwe omuri Quebec bakagumiza nibabuurira amakuru marungi g’Obukama n’obu baabaire nibahiiganisibwa—kandi harikurugamu n’ebirungi bingi. Bwanyima y’emyaka ena kampeyini ya turakiti eherize kutandika omuri 1946, omubaro gw’Abajurizi ba Yehova omuri Quebec gukeeyongyera kuruga ahari 300 gwahika 1,000! *

15, 16. (a) Kooti enkuru eya Canada ekacwamu eta aha mushango gw’eka ya Boucher? (b) Ekyo kikakwata kita aha b’eishe-emwe bagyenzi baitu n’abantu abandi?

¹⁵ Omu Kwamukaaga 1950, kooti erikukirayo obukuru omuri Canada, erimu abaramuzi mwenda, ekahurira omushango gwa Aimé Boucher. Bwanyima y’ameezi mukaaga, Desemba 18, 1950, kooti ekacwamu ngu tukaba tutaine mushango. Ahabw’enki? Ow’eishe-emwe Glen How, omuhorereza w’Abajurizi ba Yehova, akashoboorora ngu kooti ekaikirizana n’ebyagambirwe ngu “okugomesa abantu” nikyetengyesa kureetera abantu okweshariinga nari okurwanisa gavumenti. Kwonka turakiti, “ekaba etarimu ebirikureetera abantu kukora ekyo n’ahabw’ekyo ebyabaire birimu bikaba nibihikaana n’obugabe bw’okugamba.” Ow’eishe-emwe How akoongyeraho ati: “Nkareeba butunu oku Yehova yaatuhaire obusinguzi.” *

¹⁶ Okucwamu kwa kooti erikukirayo obukuru, buzima bukaba buri obusinguzi bw’amaani bw’Obukama bwa Ruhanga. Eki kikahwera kushazamu emishango nka 122 ei baabaire nibajunaana Abajurizi ba Yehova omuri Quebec. Okwongyera ahari ekyo, okucwamu kwa kooti egyo kukaba nikumanyisa ngu abatuuzi ba Canada n’ekigombe ekya Commonwealth hati bakaba baine obugabe bw’okujumiirira ebikorwa bya gavumenti. N’ekindi, obusinguzi obu bukaremesa okutaahirira okw’ekanisa na gavumenti ya Quebec aha Bajurizi ba Yehova. *

17. Gavumenti ezimwe nizizibira zita emirimo yaitu?

¹⁷ Nk’Abakristaayo aba ira, abaheereza ba Yehova obunaku obu ‘tituri bashuubuzi b’Ekigambo kya Ruhanga.’ (Shoma 2 Abakorinso 2:17.) kwonka, gavumenti ezimwe niteeraho kutegyeka omurimo gwaitu gw’okubuurira zirikwihirira aha biragiro ebirikutegyeka eby’obushuubuzi. Ka tushwijume emishango ya kooti ibiri ezaacwiremu aha kibuuzo, Abajurizi ba Yehova n’abashubuuzi nari n’abaheereza?

18, 19. Ab’obushoboorozi omuri Denmark bakakora ki kuremesa omurimo gw’okubuurira?

¹⁸ Denmark. Okwaikumi 1, 1932, hakateebwaho ekiragiro ekirikuzibira okuguza ebitabo otaine ekihandiiko ekirikukwikiriza kushubuura. Ab’eishe-emwe baitu bakanga kushaba ekihandiiko eki. Eizooba eryakuratsireho, ababuurizi bataano bakamara eizooba ryona barikubuurira omuri Roskilde, tauni eri nka mahiro 20 burugwa-izooba bwa Copenhagen, ekibuga ekikuru. Aha muheru gw’eizooba omwe aha babuurizi, August Lehmann, akaba atarikureebeka. Akaba akwatsirwe ahabw’okuguza ebitabo ataine kihandiiko kirikumwikiriza.

¹⁹ Okwikuma-n’abiri 19, 1932, August Lehmann akatwarwa omu kooti. Akagira ngu akaba ataayaayire abantu arikwenda kubaha ebitabo ebirikushoboorora Baibuli, kwonka akagira ngu akaba atarikubishuubuza. Kooti ekaikirizana nawe. Ekagira eti: “Owaahababirwa . . . naabaasa kwebaisaho, kandi taine magoba goona agaatungire nari agaabaire naayenda kutunga, kureka ebi arikukora bimureetaire kufeerwa esente ze.” Kooti ekaikirizana n’Abajurizi ba Yehova, ekagira ngu ebi Lehmann yaabaire naakora “tibirikubaasa kutwarwa nk’obushuubuzi.” Kwonka abazigu b’abantu ba Ruhanga bakaba bamaririire kuzibira omurimo gw’okubuurira omu ihanga eryo. (Zab. 94:20) Orikuhababira gavumenti akatwara omushango ogwo omu kooti erikukirayo obukuru. Mbwenu shi ab’eishe-emwe bakakora ki?

20. Kooti erikukirayo eya Denmark ekacwamu eta, ab’eishe-emwe bakatwaza bata?

²⁰ Harikuburayo saabiiti emwe kooti erikukirayo ekahurira omushango, Abajurizi ba Yehova omuri Denmark yoona bakoongyera amaani omu murimo gw’okubuurira. Orwakabiri, Okwaikumi 3, 1933, kooti erikukirayo ekarangirira okucwamu kwayo. Ekaikirirzana na kooti ey’ahansi ngu August Lehmann tihaine ekiragiro eki yaabaire ahenzire. Okucwamu oku kukaba nikumanyisa ngu Abajurizi ba Yehova nibabaasa kugumizamu nibabuurira batateganisibwe gavumenti. Ab’eishe-emwe bakooreka Yehova okusiima kwabo ahabw’okubaha obusinguzi obwo, barikwongyera aha buheereza bwabo obw’okubuurira amakuru marungi. Kwiha obu kooti yaacwamu etyo, ab’eishe-emwe bagyenzi baitu omuri Denmark batwire nibabuurira amakuru marungi batarikuteganisibwa gavumenti yoona.

21, 22. Kooti erikukirayo eya U.S. ekacwamu eta aha mushango gw’ow’eishe-emwe Murdock?

²¹ United States. Aha Sande, Okwakabiri 25, 1940, payoniya orikwetwa Robert Murdock, Jr., hamwe n’Abajurizi ba Yehova abandi mushanju bakakwatwa obu babaire nibabuurira omuri Jeannette, ekibuga ekiri haihi na Pittsburgh, omuri Pennsylvania. Bakatebwaho omushango gw’okwanga kutunga ekihandiiko ekirikubaikiriza kugaba ebitabo. Kooti erikukirayo omuri United states ekaikiriza okuhurira omushango ogwo.

²² Okwakataano 3, 1943, kooti erikukirayo ekarangirira okucwamu kwayo, erikushagika Abajurizi ba Yehova. Ekagira ngu tikirikwetengyesa okutunga ekihandiiko ekyo ahabw’okuba kikaba kitarikwetengyesa “kushashura kubaasa kutunga obugabe oburikuheebwa engyenderwaho y’eihanga.” Kooti ekashazamu ekiragiro ekyabaire kitairweho ab’obushoboorozi omu rurembo orwo ahabw’okugira ngu “kikaba nikitaahataaha omu bugabe bw’ab’eby’amakuru hamwe n’obw’okuramya.” Omuramuzi William O. Douglas, arikugamba eki kooti ecwiremu akagira ngu omurimo gw’Abajurizi ba Yehova “ti gurikugarukira aha kubuurira kyonka, nari okugaba ebitabo by’ediini. Kureka nigutwariramu byombi” akongyeraho ati: “Omurimo nk’ogu nigwingana . . . n’okuramya okurikuba omu makanisa nari okubuurira kw’aha puratifoomu.”

23. Ahabw’enki okusinga emishango omuri 1943 kuri kukuru omu bunaku obu?

²³ Okucwamu oku okwa kooti enkuru bukaba buri obusinguzi bw’amaani aha bantu ba Ruhanga. Kukoreka butunu ngu turi ababuurizi, beitu tituri bashuubuzi. Aha izooba eryo ery’ebyafaayo omuri 1943, abajurizi ba Yehova bakasinga emishango 12 ahari 13 omu kooti erikukirayo, otwariiremu n’omushango gwa Murdock. Okucwamu oku kooti ezo zaakozire kubaasize kuhwera omu mishango eya hati obu abarikutuhakanisa bataireho kugaruka kwihaho obugabe bwaitu bw’okubuurira omu rwijwire nari enju aha nju.

24. Nitukora ki gavumenti ku erikuzibira omurimo gwaitu gw’okubuurira?

²⁴ Itwe Abajurizi ba Yehova, nitusiima munonga gavumenti ku zirikutuha obugabe bw’okubuurira amakuru g’Obukama. Kwonka, gavumenti ku erikuzibira omurimo gwaitu gw’okubuurira, nituhindura omu miringo ei turikukoresa reero tugumizamu nitubuurira nk’oku kirikubaasika. Nk’entumwa, “Tushemereire kworobera Ruhanga okukira abantu.” (Byak 5:29; Mat. 28:19, 20) Kandi nituza n’omu macwero g’emanja kugira ngu omurimo gwaitu gurekye kuzibirwa. Yetegyereze eby’okureeberaho ebi bibiri.

25, 26. Niki ekyabaireho omuri Nicaragua ekyareeteire twatwara omushango gwaitu omu kooti erikukirayo, kandi niki ekyarugiremu?

²⁵ Nicaragua. Okwaikumi-na-kumwe 19, 1952, Donovan Munsterman Omumiisani kandi omuheereza aha ofiisi w’eitaagi akaza omu ofiisi y’empungi omuri Managua, ekibuga ekikuru. Akaba aragiirwe kuza kureeba orikukurira ofiisi egyo Omukuru Arnoldo García. Omukuru ogwo akagambira Donovan ngu Abajurizi ba Yehova boona omuri Nicaragua “bakaba batarikwikirizibwa kugumizamu nibabuurira aha nyegyesa zaabo nari kwejumba omu mirimo y’ediini.” Donovan Ku yaabuurize Omukuru García ahabw’enki, akashoboorora ngu Abajurizi ba Yehova bakaba bataine rusa kuruga ahari minista wa gavumenti owaabaire naabaikiriza kukora omurimo gwabo, kandi ngu bakaba nibajunaanwa okuba Abakomunisiti. Ni baahi abaabaire nibabajunaana? Abeebembezi b’ediini y’Abanyakaturiki

²⁶ Ow’eishe-emwe Munsterman ahonaaho akajurira omu kitongore kya Gavumenti ky’ediini hamwe n’owa mukuru w’eihanga Anastasio Somoza García, kwonka tihaine kirungi ekyarugireyo. N’ahabw’ekyo ab’eishe-emwe bakahindura omu miringo ei baabaire nibakoresa. Bakakinga Ebyombeko by’Obukama, bakatandika kuteeranira omu guruupu nkye, kandi baarekyeraho okubuurira aha muhanda, kwonka baagumizamu nibabuurira amakuru g’Obukama. Kandi, bakatwara omushango gwabo omu kooti erikukirayo omuri Nicaragua, barikushaba kooti kwikiriza omurimo gwaitu. Empapura z’amakuru zikahandiika aha kuzibirwa kw’omurimo gwaitu n’ebyabaire biri omu mushango ogwo, kandi kooti erikukirayo ekaikiriza kuhurira omushango. Niki ekyarugiremu? Ebiro 19 Okwamukaga 1953, kooti erikukirayo ekarangirira okucwamu kwayo erikwikirizana n’Abajurizi ba Yehova. Kooti ekagira ngu okuzibirwa kw’omurimo gwaitu kukaba nikuhenda obugabe oburikuheebwa engyenderwaho y’eihanga obw’okugamba n’okwejumba omu bikorwa by’ediini. Kandi ekaragiira ngu enkoragana ebaire eriho aha gati ya gavumenti ya Nicaragua hamwe n’Abajurizi ba Yehova egarukye kuba nk’oku yaabaire eri.

27. Ahabw’enki abantu ba Nicaragua batangaareire okucwamu kwa kooti erikukirayo, kandi ab’eishe-emwe bakatwara bata obusinguzi bwabo?

²⁷ Abantu ba Nicaragua bakatangaara ngu kooti erikukirayo ekashagika Abajurizi ba Yehova. Kuruga enyima Abeebembezi b’ediini bakaba baine amaani maingi kandi kooti zikaba zitarikwenda kubarwanisa. Kandi n’abakuru omu gavumenti bakaba baine amaani maingi n’ahabw’ekyo kooti zikaba zitarikukira kubahakanisa. Ab’eishe-emwe baitu bakaba nibamanya ngu bakatunga obusinguzi obwo ahabw’oburinzi bw’Omugabe waitu kandi n’ahabw’okugira ngu bakagumizamu nibabuurira.—Byak 1:8.

28, 29. Omu myaka ya 1980, haakabaho ki omuri Zaire eki baabaire batarikumanya ngu nikibaasa kubaho?

²⁸ Zaire. Omu myaka ya 1980, Abajurizi ba Yehova nka 35,000 nibo baabaire bari omuri Zaire, hati erikwetwa Democratic Republic of Congo. Kubaasa kureeberera gye emirimo y’Obukama eyabaire neetunguuka, bakatandika kwombeka ebyombeka bya ofiisi y’Eitaagi ebisya. Okwikumi-n’abiri 1985, Oruteerane oruhango orurikubaho n’ab’amahanga agandi rukaba omu kibuga ekikuru, Kinshasa, kandi abagyenyi abarikuhika nka 32,000 kuruga omu bicweka by’ensi ebindi bakaija. Kwonka, embeera z’abaheereza ba Yehova zikatandika kuhinduka. Niki ekyabaireho?

²⁹ Ow’eisheemwe Marcel Filteau, omumiisani kuruga Quebec, Canada, owaahiiganisibwe omu butegyeki bwa Duplessis, akaba naaheereza omuri Zaire. Akagamba ekyabaireho ati: “Ebiro 12 Okwakashatu 1986, Ab’eishe-emwe abaabaire baine obujunaanizibwa bakaheebwa ebaruha eyabaire neegira ngu Abajurizi ba Yehova bakaba batakiikirizibwa omuri Zaire.” Ebaruha ekaba etairweho omukono mukuru w’eihanga, Mobutu Sese Seko.

30. Akakiiko k’eitaagi kakaba kaine kukora kucwamu ki okw’amaani, kwonka kakacwamu kukora ki?

³⁰ Eizooba eryakuratsireho radiyo y’eihanga ekarangirira eti: “Titurigaruka kuhurira Abajurizi ba Yehova omuri [Zaire] obundi.” Ahonaaho okuhiiganisibwa kukatandika. Ebyombeko by’Obukama bakabisheenyagura, bakaiba ebintu by’ab’eishe-emwe, babakwata, bakabata omu bihome kandi bakabateera. N’abaana b’Abajurizi ba Yehova bakateebwa omu bihome. Okwikumi 12, 1988, gavumenti ekatwara ebintu byona eby’ekibiina, kandi amahe gakatandika kutuura omu byombeko bya ofiisi y’Eitaagi. Abaabaire baine obujunaanizibwa bakateeraho kujurira ahari Mukuru w’eihanga Mobutu, kwonka tibaragarukirwemu. Omu bwire obwo, Akakiiko k’eitaagi kakaba kaine kukora okucwamu kw’amaani, “Omushango kutwarwa omu kooti erikukirayo, nari kuba bategyereizeho?” Timothy Holmes, owaabaire ari omumiisani kandi omuhikaanisa w’akakiiko k’eitaagi omu bwire obwo, akagira ati, “Tukashaba Yehova kutuha obwengye n’okutuhabura.” Bwanyima y’okushaba munonga, bakareeba ngu obwire bw’okutwara omushango omu kooti bukaba butakahikire. N’ahabw’ekyo, bakata omutima aha kureeberera ab’eishe-emwe n’okusherura emiringo ei baraakorese kugumizamu nibabuurira.

31, 32. Kooti erikukirayo omuri Zaire ekakora ki ekyatangaarize abantu, kandi ekyo kikakwata kita aha b’eishe-emwe bagyenzi baitu?

³¹ Bwanyima y’emyaka. Okuhiiganisa Abajurizi ba Yehova kukatuuba, kandi n’okuha ekitiinisa obugabe bw’abantu kukeyongyera omu eihanga. Akakiiko k’eitaagi kakahamya ngu hati nibwo bwire bw’okujurira omu kooti erikukirayo omuri Zaire aha bw’omurimo gwaitu. Ekirikutangaaza, kooti erikukirayo ekaikiriza kuhurira omushango. Okw’okubanza 8, 1993, bwanyima y’emyaka nka mushanju mukuru w’eihanga aherize kuta omukono aha kihandiiko ekirikuzibira omurimo gwaitu, kooti ekacwamu ngu omuringo ogu gavumenti yaatwariizemu Abajurizi ba Yehova gukaba niguhenda ebiragiro, kandi omurimo gwaitu gukagaruka gwaikirizibwa. Teekateeka okucwamu okwo eki kwabaire nikumanyisa! Abaramuzi abo bakata amagara gaabo omu kabi barikuhakanisa eki mukuru w’eihanga yaabaire acwiremu! Ow’eishe-emwe Holmes akagira ati: “Omu kaire ako obu okucwamu kwabaire nikushomwa, tukareeba oku Yehova arikubaasa kuhindura ebintu.” (Dan. 2:21) Obusinguzi obu bukahamya okwikiriza kw’ab’eishe-emwe. Bakaba nibahurira ngu Omugabe Yesu akaba naayebembera abantu be kumanya obu baine kugira eki bakora n’oku baraakikore.

³² Emirimo yaitu ku yaikirizibwe, ofiisi y’eitaagi ekaba neebaasa kureeta abamiisani, kwombeka ofiisi y’eitaagi ensya, kandi n’okureeta ebitabo omu eihanga. * Buzima ka nikishemeza abaheereza ba Ruhanga omu nsi yoona kureeba oku Yehova arikubarinda omu by’omwoyo!—Isa. 52:10.

33. Nitwegyera ki aha mishango ei twashwijuma?

³³ Emishango ei twashwijuma neeyoreka butunu ngu Yesu ahikiriize okuraganisa kwe: “Ndyabaha orurimi n’obwengye, ebi abazigu baanyu bataribaasa kurwanisa n’obu kwakuba okuhakanisa.” (Shoma Luka 21:12-15.) Obumwe, Yehova ataireho abantu abari nka Gamalieli kurinda abantu kandi obumwe akoreise abaramuzi n’abaramuzi kuhamira aha buringaniza. Yehova acwire busha eby’okurwanisa by’abazigu baitu. (Shoma Isaaya 54:17.) Okuhakanisibwa tikurikubaasa kuremesa omurimo gwa Ruhanga.

34. Ahabw’enki obusinguzi bwaitu omu macwero g’emanja nibutangaaza, kandi nibworeka ki? (Reeba akabokusi “ Obusinguzi omu Macwero g’Emanja Agarikukirayo Okwahwereire omu Kujanjaaza Amakuru Marungi.”)

³⁴ Ahabw’enki obusinguzi obu tutungire nibutangaaza? Teekateeka ahari eki: Abajurizi ba Yehova tibarikumanywa munonga kandi tibaine maani maingi. Titurikuteera akaruuru, titurikushagika kampeyini z’eby’obutegyeki, nari okuha enguzi ab’eby’obutegyeki. Nangwa, itwe abarikutwarwa omu macwero g’emanja aga haiguru nitureebwa nk’abantu “babisi abateegyesiibwe.” (Byak 4:13) N’ahabw’ekyo, omu kureeba kw’abantu kooti ezi niziba zitaine enshonga y’amaani y’okutushagika reero zikasingisa emishango amadiini g’amaani n’ab’eby’obutegyeki abarikutuhakanisa. Kwonka, okucwamu kwa kooti ezi emirundi mingi nikuba nikutushagika! Obusinguzi bwaitu omu macwero g’emanja n’obuhame ngu nitugyendera “omu maisho ga Ruhanga kandi tugambira omuri Kristo.” (2 Kor. 2:17) Naitwe, nk’entumwa Paulo nitugira tuti: “[Yehova] niwe muhwezi wangye,Tinditiina.”—Heb. 13:6.