AMAZIMA agarikukwata ahari ki? Agarikukwata aha bibuuzo ebikuru ebimwe ebi abantu barikwebuuza. Noobaasa kuba oreebuurize ebibuuzo nk’ebi:

• Ruhanga buzima naatufaho?

• Entaro n’okubonabona biryahwaho?

• Omuntu naagumizamu kuba ohuriire bwanyima y’okufa

• Abaafiire baryagaruka kuba abahuriire?

• Nshemereire kushaba nta okubaasa kuhurirwa Ruhanga?

• Nimbaasa kutunga nta okushemererwa omu magara?

Noobaasa kwiha nkahi eby’okugarukamu ebibuuzo ebi? Ku waakubuuza abantu nari abeebembezi b’ediini, nibabaasa kukugarukamu ebitarikwikirizana. Kandi waaza omu mabikiro g’ebitabo, noobaasa kushangayo enkumi n’enkumi z’ebitabo ebirikugira ngu nibigarukamu ebibuuzo ebi. Kwonka emirundi emingi, nooshanga ekitabo ekimwe kirikuhakanisa ekindi. Ebindi nibireebeka nk’ebihikire hati, kwonka bwanyima y’obunaku bukye nibiba bitakiine mugasho; nibabigarukamu nari baahandiika ebindi.

Kwonka, hariho ekitabo kimwe ekirimu eby’okugarukamu ebirikwesigwa. N’ekitabo ky’amazima. Yesu Kristo akashaba Ruhanga ati: “Ekigambo kyawe n’amazima.” (Yohaana 17:17) Omu bunaku obu, Ekigambo ekyo nitukimanya nka Baibuli Erikwera. Aha mpapura ezirikukurataho, nooza kureeba bikye aha by’okugarukamu by’ebibuuzo ebi aharuguru.

ENSHONGA AHABW’ENKI EKIBUUZO EKI NIKIBUUZIBWA: Turi omu nsi eijwiremu obushaarizi n’obutari buringaaniza. Ediini nyingi nizeegyesa ngu okubonabona okurikutuhikaho ni Ruhanga orikuba akureetsire.

EKI BAIBULI ERIKWEGYESA: Ruhanga tarikubaasa kureetaho kintu kibi. Yobu 34:10 nihagira hati: “Nikikabure Ruhanga okukora ebitahikire, ow’obushoboorozi bwona okukora kubi!” Yehova ainiire abantu ekigyendererwa kya rukundo. Egyo niyo nshonga ahabw’enki Yesu yaatwegyeise kushaba tuti: “Tataitwe ow’omu iguru, . . . obukama bwawe bwije; eby’okunda bikorwe omu nsi nk’oku bikorwa omu iguru.” (Matayo 6:9, 10) Ruhanga naatufaho munonga kandi ahikire n’aha kukora kyona ekirikubaasika kuhikiiriza ebi yaaraganiise.​—Yohaana 3:16.

Reeba na Okutandika 1:26-28; Yakobo1:13; na 1 Petero 5:6, 7.

ENSHONGA AHABW’ENKI EKIBUUZO EKI NIKIBUUZIBWA: Obutabarwa bw’abantu nibeyongyera kufa ahabw’entaro. Twena nitukwatwaho okubonabona kw’abantu.

EKI BAIBULI ERIKWEGYESA: Ruhanga naagamba aha bwire obu araije kureetaho obusingye omu nsi yoona. Ahansi y’Obukama bwe, niyo gavumenti ey’omu iguru, abantu “tibarigaruka kwega by’engamba.” Kureka, “zaarurara zaabo baryaziheeshamu amafuka.” (Isaaya 2:4) Ruhanga naija kumaraho obutari buringaniza n’okubonabona kwona. Baibuli neeraganisa eti: “[Ruhanga] aryaragaza amarira goona aha maisho gaabo; tiharibaho kufa bundi n’obu kwakuba okucura nari okurira nari obusaasi, ahakuba ebya ira [otwariiremu n’obutari buringaaniza n’okubonabona ebiriho omu bunaku obu] biryaba bihweireho.”​—Okushuuruurwa 21:3, 4.

Reeba na Zaaburi 37:10, 11; 46:9; na Miika 4:1-4.

ENSHONGA AHABW’ENKI EKIBUUZO EKI NIKIBUUZIBWA: Ediini nyingi omu nsi nizeegyesa ngu hariho ekintu ekitafa ekiruga omu muntu kikagumizamu kubaho bwanyima y’okufa. Abamwe nibaikiriza ngu abafu nibabaasa kusaasa abahuriire nari ngu Ruhanga naafubira ababi arikubootsya omu muriro ogutaraara.

EKI BAIBULI ERIKWEGYESA: Abantu ku barikufa, nibaba batakiriho. Omubuurizi 9:5 nihagira hati: “Abafiire tibagira ki bamanya.” Obu abafu batarikubaasa kumanya, kuhurira nari kuteekateeka ekintu kyona, tibarikubaasa kusaasa​—nari kuhwera​—abahuriire.​—Zaaburi 146:3, 4.

Reeba na Okutandika 3:19 na Omubuurizi 9:6, 10.

ENSHONGA AHABW’ENKI EKIBUUZO EKI NIKIBUUZIBWA: Nitwenda ngu tugume turi abahuriire, kandi ngu tushemererwe n’abakundwa baitu. Twine ekyetengo ky’okwenda kugaruka kureeba abakundwa baitu abaafiire.

EKI BAIBULI ERIKWEGYESA: Abantu abaingi abaafiire nibaija kuzoorwa. Yesu akaraganisa ngu ‘abari omu bituuro abarikwijukwa . . . baryarugamu.’ (Yohaana 5:28, 29, New World Translation) Okuhikaana n’ekigyendererwa kya Ruhanga eky’okubanza, abo abarizoorwa baryatunga omugisha gw’okutuura omu paradiso omu nsi ebiro byona. (Isaaya 65:21-25) Okuraganisa oku nikutwariramu amagara marungi n’amagara agatahwaho ahabw’abantu abarikworobera Ruhanga. Baibuli neegira eti: “Abahikiriire baryahungura ensi, bagituuremu ebiro byona.”​—Zaaburi 37:29.

Reeba na Yobu 14:14, 15; Luka 7:11-17; na Ebyakozirwe 24:15.

ENSHONGA AHABW’ENKI EKIBUUZO EKI NIKIBUUZIBWA: Haihi abantu omu diini zoona nibashaba. Kwonka, baingi nibagira ngu eshaara zaabo tizirikugarukwamu.

EKI BAIBULI ERIKWEGYESA: Yesu akatwegyesa kwetantara okutagarukagaruka omu bigambo twaba nitushaba. Akagira ati: “Ku muraabe nimushaba, murekye kushaba nimugarukagaruka omu bigambo bya busha.” (Matayo 6:7) Twaba nitwenda ngu Ruhanga ahurire eshaara zaitu, tushemereire kushaba omu muringo ogu arikusiima. Okukora ekyo, nitwetenga kwega ebi Ruhanga akunda reero tukashaba ebirikuhikaana nabyo. Ebaruha ya Yohaana ey’okubanza, eshuura 5:14 nihashoboorora hati: “Ku tushaba ekintu kyona nk’oku [Ruhanga] akunda, atuhurira.”

Reeba na Zaaburi 65:2; Yohaana 14:6, 14; na 1 Yohaana 3:22.

ENSHONGA AHABW’ENKI EKIBUUZO EKI NIKIBUUZIBWA: Abantu baingi nibateekateeka ngu okugira esente, oburungi bw’aha mubiri, nari okurangaanwa nikibareetera okushemererwa. N’ahabw’ekyo, nibasherura ebintu ebyo​—kwonka bwanyima bashanga bitarimu kushemererwa.

EKI BAIBULI ERIKWEGYESA: Yesu akagamba aha kintu kikuru ekirikureeta okushemererwa obu yaagira ati: ‘Baine okushemererwa abo abarikumanya ngu baine ekyetengo ky’eby’omwoyo.’ (Matayo 5:3, NW) Titurikubaasa kutunga okushemererwa okwa buzima okwihaho twagira eki twakora okwigutsa ekyetengo kyaitu ekikuru munonga​—okumanya amazima agarikukwata ahari Ruhanga n’ekigyendererwa eki atwiniire. Amazima ago nigashangwa omu Baibuli. Okumanya amazima ago buzima nikibaasa kutuhwera kumanya ekikuru n’ekitari kikuru. Okwikiriza amazima ga Baibuli okutwebembera omu bi turikucwamu n’ebi turikukora nikitureetera kugira ekigyendererwa omu magara.​—Luka 11:28.

Reeba na Enfumu 3:5, 6, 13-18 na 1 Timoseo 6:9, 10.

 Oku kwaba kuri okureeba oku Baibuli omu bigufu erikugarukamu ebibuuzo ebi mukaaga. Nooyenda kumanya ebirikukiraho? Ku oraabe ori omwe ahari abo ‘abarikumanya ngu baine ekyetengo ky’eby’omwoyo,’ hatariho kubangaanisa nooyenda kumanya ebirikukiraho. Noobaasa kuba nooyebuuza ebindi bibuuzo nk’ebi: ‘Ruhanga ku araabe naatufaho, ahabw’enki naareka obubi n’okubonabona bikabaho? Nimbaasa nta kwongyera okushemererwa omu ka yaitu?’ Baibuli neegarukamu gye ebibuuzo ebi hamwe n’ebindi bingi.

Kwonka, abantu baingi tibarikufayo kushoma Baibuli. Nibagireeba nk’ekitabo ekirimu ebintu bingi kandi obumwe ekigumire eiyetegyereza. Nooyenda obuhwezi okutunga eby’okugarukamu kuruga omu Baibuli? Abajurizi ba Yehova nibabaasa kukuhwera omu miringo ebibiri.

Ogw’okubanza, nibakoresa akatabo Niki Eki Baibuli Buzima Erikwegyesa? akatairwe kuhwera abantu abaine bingi eby’okukora okushwijuma eby’okugarukamu bya Baibuli eby’ebibuuzo bikuru. Omuringo gwa kabiri, n’entebeekanisa y’okwegyesa abantu Baibuli omu maka gaabo hatariho kushashura. Omujurizi wa Yehova orikutuura haihi naiwe naabaasa kwega naiwe Baibuli buri saabiiti omu ka yaawe nari omu mwanya ogundi. Obukaikuru bw’abantu omu nsi yoona bagasiirwe entebeekanisa egi. Baingi aharibo babaasize kugamba ebigambo ebi: “Mboine amazima!”

Tihariho ky’obutungi ekirikukira ekyo. Amazima ga Baibuli nigatuhwera okutaikiririza omu bitarikubaasa kubaho, gatuhwera okutaburabuzibwa, n’okutatiina. Nigatuha amatsiko, ekigyendererwa n’okushemererwa. Yesu akagira ati: “Muryamanya amazima, n’amazima garyabahindura ab’obusingye.”​—Yohaana 8:32.