•  Ebigambo by’Okwanjura 2

•  Eby’omuhendo Ebiri omu Kigambo kya Ruhanga 3-5

  •  Orubazo 3

  •  Eby’omuhendo eby’Omwoyo 4

  •  Okushoma Baibuli 5

•  Teeraho Kwejumba omu Kubuurira 6-14

  •  Okutandika Ekigaaniiro 7

  •  Okugarukayo 8

  •  Okuhindura Abantu Abeegi 9

  •  Okushoboorora Enyikiriza Zaawe 10

  •  Orubazo 11

  •  Eby’okugaaniiraho 12

  •  Omuringo 13

  •  Okukoresa Vidiyo n’Ebitabo 14

•  Ebi Abakristaayo Twine Kukora 15-16

  •  Okwega Baibuli okw’Ekibiina 16

•  Ebigambo by’Okuhendera 17

•  Okusiima n’Obuhabuzi 18

•  Obwire 19

•  Okutaayaaya kw’Omureeberezi wa Saketi 20

•  Saabiiti y’Oruteerane rwa Saketi Nari orw’Ebiro Bishatu 21

•  Saabiiti y’Ekiijutsyo 22

•  Orikwebembera Obuheereza n’Oku Turikutwaza 23

•  Ceyamaani w’Oruteerane rw’Obuheereza n’Oku Turikutwaza 24

•  Orikuhwera omu Kuha Obuhabuzi 25

•  Oruteerane rw’Abeegi Abandi 26

•  Vidiyo 27

1. Obuhabuzi oburi omu kihandiiko eki nibwija kuhwera boona abaine ebicweka omu ruteerane rw’Obuheereza Bwaitu n’Oku Turikutwaza. Baine kushwijuma obuhabuzi bw’ebicweka byabo nk’oku burikworekwa omu Obuheereza Bwaitu n’Oku Turikutwaza Akatabo k’Okukoresa n’ekihandiiko eki batakatebeekaniise ebicweka byabo. Ababuurizi boona baine kuhigwa kwejumba omu kuha embazo z’abeegi. N’abandi abarikukwatanisa n’ekibiina nibabaasa kwikirizibwa kwejumba omu ruteerane oru baaba nibaikiriza enyegyesa za Baibuli, kandi emitwarize yaabo erikuhikaana n’emisingye y’Ekikristaayo. Orikwebembera Obuheereza n’Oku Turikutwaza aine kugaaniira na weena orikwenda kwejumbamu otari mubuurizi, reero amumanyise yaaba ahikire kuba omwegi. Eki kishemereire kukorwa hariho orikumwegyesa Baibuli (nari omuzaire we ori omu mazima). Aine kuba naahikiiriza nk’eby’ogwo orikwenda kuba omubuurizi otakabatiziibwe.—od eshu. 8 kacw. 8.

2. Edakiika emwe. Buri saabiiti, bwanyima y’ekyeshongoro n’okushaba, ceyamaani w’Oruteerane rw’Obuheereza n’Oku Turikutwaza naija kwanjura oruteerane areetere abahurikize ekihika. Aine kuta omutima aha nshonga eziraagasire munonga ekibiina.

 3. Orubazo: Edakiika ikumi. Orubazo oru rwine mutwe n’enshonga ibiri nari ishatu ezirikworekwa omu Buheereza n’Oku Turikutwaza Akatabo k’Okukoresa. Orubazo oru n’orw’okuheebwa omureeberezi nari omuheereza ohikire. Okushoma Baibuli okwa buri saabiiti kwaba nikutandika n’ekitabo kya Baibuli ekisya, nihaija kworekwa vidiyo y’okukyanjura. Omugambi naabaasa kworeka oku bimwe omu vidiyo birikuhikaana n’omutwe gw’orubazo. Kwonka, aine kureeba ngu yaagamba n’aha nshonga eziri omu katabo k’okukoresa. Kandi obwire bwamubaasisa, agambe n’aha bishushani ebirikuhikaana n’orubazo oru. Naabaasa kugamba n’aha nshonga ezindi kasita ziba nizihikaana n’orubazo oru.

 4. Eby’omuhendo eby’Omwoyo: Edakiika ikumi. Eki n’ekicweka ky’ebibuuzo n’eby’okugarukamu ekitaine nyanjura nari okuhendera. Kiine kuheebwa omureeberezi nari omuheereza oine emyegyeseze ehikire. Aine kubuuza abamuhurikiize ebibuuzo byombi. Kandi, naabaasa kucwamu yaaba emishororongo eyorekirwe eine kushomwa nari kutashomwa. Abaraatooranwe kugarukamu baine kugarukamu omu butikitiki 30 nari n’obutabuhitsya.

 5. Okushoma Baibuli: Edakiika ina. Ekicweka eki kiine kukorwa omwegi omushaija. Omwegi aine kushoma ebimuhairwe atarikubyanjura nari kubihendera. Ceyamaani w’oruteerane naija kufayo munonga kuhwera abeegi kushoma gye, barikwetegyereza, batarikuteera entsibo, barikuhamiiriza gye enshonga, barikuhindura eiraka, barikwemerera ahu kirikwetengyesa, n’okukoresa engamba ya butoosha. Ahabw’okugira ngu eby’okushoma omu Baibuli ebimwe ni bigufu kandi ebindi ni biraingwa, Orikwebembera Obuheereza n’Oku Turikutwaza aine kuteekateeka aha kubaasa kw’abeegi yaaba naabaha eby’okushoma.

6. Edakiika ikumi na itaano. Ekicweka eki kitebeekanisiibwe kuha boona omugisha gw’okwetebeekanisiza obuheereza n’okuboneza obukoryo bwabo bw’okubuurira n’okwegyesa. Kyaba nikyetengyesa, abareeberezi nibabaasa kuheebwa embazo z’abeegi. Buri mwegi aine kukora aha ishomo rimwe eriri omu katabo Okwegyesa nari Kunda Abantu eririkworekwa omu bugo omu maisho g’orubazo rwe omu Obuheereza n’Oku Turikutwaza Akatabo k’Okukoresa. Obumwe, nihaija kuba nihateebwaho ekicweka ky’okuhikaanisa ebiteekateeko. Ekicweka eky’omuringo nk’ogu, nikiija kwebemberwa omureeberezi nari omuheereza ohikire.—Reeba  akacweka 15 kumanya obuhabuzi bw’ebicweka by’okuhikaanisa ebiteekateeko.

 7. Okutandika Ekigaaniiro: Eky’okureeberaho eki nikibaasa kukorwa omwegi omushaija nari omukazi. Omuhwezi aine kuba ou arikushushanisa nawe obuhangwa nari ow’omu ka ye. Nibabaasa kuba bashutami nari beemereire.—Okumanya ebirikukiraho aha by’okugaaniiraho n’omuringo gw’okukikoramu, reeba  akacweka 12 na  13.

 8. Okugarukayo: Eky’okureeberaho eki nikibaasa kukorwa omwegi omushaija nari omukazi. Omuhwezi aine kuba ou arikushushanisa nawe obuhangwa. (km 5/97-E rup. 2) Nibabaasa kuba bashutami nari beemereire. Omwegi aine kworeka ebirikubaasa kugambwa kwongyerera aha kigaaniiro eky’okubanza.—Okumanya ebirikukiraho aha by’okugaaniiraho n’omuringo gw’okukikoramu, reeba  akacweka 12 na  13.

 9. Okuhindura Abantu Abeegi: Eky’okureeberaho eki nikibaasa kukorwa omwegi omushaija nari omukazi. Omuhwezi aine kuba ou arikushushanisa nawe obuhangwa. (km 5/97-E rup. 2) Nibabaasa kuba bashutami nari beemereire. Eky’okureeberaho eki kiine kworeka ngu okwega Baibuli kuriyo nikugyenda omu maisho. Tikirikwetengyesa kwanjura ekicweka eki nari kukihendera okwihaho bwaba nibwo buhabuzi obu omwegi arikukoraho. Tikirikwetengyesa kushoma eby’okwega byona omu iraka eririkuhurirwa, n’obu eki kiraabe nikibaasa kukorwa.

 10. Okushoboorora Enyikiriza Zaawe: Ekicweka eki kyayorekwa nk’orubazo, kiine kukorwa omwegi omushaija. Kyayorekwa nk’eky’okureeberaho nikibaasa kukorwa omwegi omushaija nari omukazi. Omuhwezi aine kuba ou arikushushanisa nawe obuhangwa nari ow’omu ka ye. Omwegi aine kugarukamu gye kandi omu muringo gw’obwengye ekibuuzo ekimuhairwe arikukoresa ebijuriziibwe ebimuhairwe. Omwegi naabaasa kucwamu kugamba aha bijuriziibwe omu kicweka kye nari kutabigamba.

 11. Orubazo: Oru rwine kuheebwa omwegi omushaija arikuruha ekibiina. Orubazo rwaba nirwegamira aha biri omu byongyeirweho A eby’akatabo Kunda Abantu, omwegi aine kworeka oku byahandiikirwe birikubaasa kukoresibwa omu buheereza. Nk’eky’okureeberaho, naabaasa kushoboorora obu ekyahandiikirwe kirikubaasa kukoresibwa, amakuru gaakyo, n’omuringo gw’okukihikaanisaho ebiteekateeko n’omuntu. Orubazo rwaba nirwegamira aha ishomo rimwe omu katabo Kunda Abantu, omwegi aine kuta omutima aha ku arikubaasa kukoresa enshonga egi omu buheereza. Naabaasa kworeka eky’okureeberaho ekiri omu nshonga 1 ey’eishomo nari agambe aha byahandiikirwe ebindi ebiri omu ishomo, eki kyaba nikihwera.

   12. Eby’okugaaniiraho: Ebiri omu kacweka aka n’akarikukurataho nibikwata aha bicweka, “Okutandika Ekigaaniiro” na “Okugarukayo”. Okwihaho kyayorekwa okundi, ekigyendererwa ky’omwegi n’okworeka omuntu amazima ga Baibuli agoorobi, kandi akataho omusingi gw’okwongyera aha kigaaniiro nyentsya. Omwegi aine kutoorana enshonga erikuhikaana n’ebirikubaho, kandi erikukora gye omu kicweka. Naabaasa kucwamu kuha omuntu ekitabo nari kutakimuha, nari kumworeka vidiyo kuruga omu Bi Turikukoresa omu Kwegyesa. Omwegi omu mwanya gw’okukoresa enyanjura ei akwatsire omu mutwe, aine kworeka obukoryo bw’okugaaniira gye, nk’okufayo aha bantu nari okugamba omu ngamba ya butoosha.

   13. Emiringo: Omwegi aine kukoresa omuringo ogworekirwe kuhikaana n’embeera y’ekicweka. Nk’eky’okureeberaho:

1.  (1) Enju aha Nju: Omuringo ogu nigutwariramu okubuurira enju aha ndiijo, yaaba butunu, okuteera esimu, nari okuhandiika amabaruha, n’okugarukira omuntu owaaboinwe omu kubuurira enju aha nju kwongyera aha kigaaniiro.

2.  (2) Okubuurira Kitaraariire: Omuringo ogu nigutwariramu okusherura oburyo bw’okuhindura ekigaaniiro ekya butoosha kikarugamu okubuurira. Omuringo ogu nigubaasa kutwariramu okugamba aha Byahandiikirwe waaba ori aha murimo, aha ishomero, omu bataahi, omu motoka z’orweteeraine, nari ahandi hoona waaba ori omu byawe.

3.  (3) Okubuurira omu Rweteeraine: Omuringo ogu nigutwariramu okukoresa akagaari, okubuurira abashuubuzi, okubuurira aha nguuto, nari okubuurira omu myanya y’okuhuumuriramu, ey’okwemerezamu ebiiruka, nari hoona ahu abantu baingi bari.

 14. Okukoresa Vidiyo n’Ebitabo: Kurugiirira aha mbeera, omwegi naabaasa kucwamu kworeka omuntu vidiyo nari kumuha ekitabo. Ekicweka ky’omwegi kyaba kirimu vidiyo nari yaacwamu kugikoresa, aine kugyanjura kandi akagigaaniiraho n’omuntu kwonka atagyorekire.

15. Bwanyima y’ekyeshongoro, nihakurataho ekicweka kimwe nari bibiri omu dakiika 15 kuhwera abahurikiize kugyendera aha Kigambo kya Ruhanga. Okwihaho kyayorekwa okundi, ebicweka ebi nibibaasa kuheebwa abareeberezi nari abaheereza abahikire kwegyesa, okwihaho ebyetengo by’ekibiina ebiine kuheebwa abareeberezi. Ekicweka kyaba kiri eky’okuhikaanisa ebiteekateeko, ow’eishe-emwe orikukyebembera naabaasa kubuuza ebibuuzo omu kicweka kye kyona kwongyera aha bimuhairwe. Enyanjura ye eine kuba ngufu kumubaasisa kutunga obwire burikumara kugamba aha nshonga enkuru, n’abahurikiize kwejumbamu. Haaba harimu okubuuzibwa, kyaba nikibaasika ni kirungi abarikubuuzibwa kugarukamu bari aha puratifoomu omu mwanya gw’okugarukiramu omu myanya yaabo.

  16. Okwega Baibuli okw’Ekibiina: Edakiika makumi ashatu. Ekicweka eki kiine kwebemberwa omureeberezi ohikire. (Ebibiina ebiine abareeberezi bakye, abaheereza abahikire nibabaasa kuheebwa ekicweka eki kyayetengyesa.) Akakiiko k’abareeberezi niko kaine kutoorana abahikire kwebembera Okwega Baibuli okw’Ekibiina. Abatoorainwe baine kuba nibeebembera omu muringo murungi kugira ngu okwega kuhwe omu bwire, bahamiirize ebyahandiikirwe ebikuru, kandi bahwere buri omwe kwetegyereza obukuru bw’ebyayegwa. Nibaija kugasirwa baashwijuma obuhabuzi oburikukwata aha kwebembera ebicweka by’ebibuuzo n’eby’okugarukamu. (w23.04 rup. 24, akabokusi) Eby’okwega byahwayo gye, tikirikwetengyesa kugumizamu n’okwega ahabw’okwenda kumarayo obwire. Kyaba nikibaasika, buri saabiiti nihabaasa kwebembera omuntu ondiijo n’omushomi ondiijo. Ceyamaani w’Oruteerane rw’Obuheereza n’Oku Turikutwaza yaashaba ngu okwega kube kugufu, orikwebembera niwe aine kucwamu oku araakikore. Naabaasa kucwamu ngu obucweka obumwe butashomwa.

17. Edakiika ishatu. Ceyamaani w’Oruteerane rw’Obuheereza n’Oku Turikutwaza naija kugamba aha nshonga nkuru ezaaba ziri omu ruteerane. Ashemereire n’okugamba ahari bimwe ebya saabiiti erikukurataho. Naabaasa kugamba amaziina g’abeegi abaine ebicweka saabiiti erikukurataho, haaba hakiriyo obwire. Okwihaho kyayorekwa okundi, ceyamaani aine kushoma ebirango nari amabaruha aha muheru gw’oruteerane. Ebintu ebya butoosha nk’entebeekanisa z’okubuurira n’ez’okuboneza, tibiine kurangwa, beitu biine kuteebwa ahu amabaruha g’ekibiina garikuhanikwa. Ceyamaani yaareeba ngu obwire bw’ebigambo ebirikuhendera tiburikumara kushoma ebirango nari amabaruha, aine kushaba abaine ebicweka ahansi y’Ebi Abakristaayo Twine Kukora kubiha omu bugufu nk’oku kirikubaasika. ( Reeba akacweka 16 na  19.) Oruteerane rwine kuhendera n’ekyeshongoro n’okushaba.

18. Bwanyima ya buri kicweka ky’omwegi, ceyamaani w’Obuheereza n’Oku Turikutwaza naaba aine edakiika nk’emwe y’okusiima omwegi n’okumuha obuhabuzi kuruga omu ishomo eri arikukoraho. Ceyamaani yaayanjura orubazo rw’omwegi, tarikwija kugamba aha ki omwegi arikukoraho. Kwonka, omwegi yaaheza ekicweka kye, bwanyima y’okumusiima, naabaasa kugamba aha ki yaaba naakoraho, kandi agambe n’ahabw’enki omwegi yaakora gye, nari omu muringo gw’embabazi agambe enshonga ei omwegi aine kwongyeramu amaani. Ceyamaani naabaasa kugamba aha bindi ebyaba biri omu ky’okureeberaho yaaba naareeba ngu nibibaasa kuhwera omwegi nari abahurikiize. Omwegi naabaasa kuheebwa obuhwezi obundi kuruga omu katabo Kunda Abantu, Okwegyesa nari omu kitabo Ministry School ari wenka bwanyima y’oruteerane nari omu bwire obundi, arikuhaburwa aha ki yaaba naakoraho nari ekindi.—Okumanya ebirikukiraho aha bikwatiraine n’obujunaanizibwa bwa ceyamaani w’Oruteerane rw’Obuheereza n’Oku Turikutwaza n’orikuhwera omu kuha obuhabuzi, reeba  akacweka 19,  24, na  25.

19. Tihaine ekicweka ekiine kurenzya obwire bwakyo, n’obu yaakuba ceyamaani w’Oruteerane rw’Obuheereza n’Oku Turikutwaza. N’obu obwire bwa buri kicweka buraabe nibworekwa omu Buheereza n’Oku Turikutwaza Akatabo k’Okukoresa, tikirikwetengyesa kugumizamu kuhezayo obwire bwona, enshonga zaaheza kushoboororwa gye. Abarikwebembera ebicweka baarenzya obwire, ceyamaani w’Oruteerane rw’Obuheereza n’Oku Turikutwaza nari orikuhwera omu kuha obuhabuzi aine kugamba nabo omu mubonano. (Reeba  akacweka 24 na  25.) Oruteerane rwona otwariiremu n’ebyeshongoro n’okushaba, rwine kumara eshaaha 1 n’edakiika 45.

20. Omureeberezi wa saketi yaaba ataayaayiire ekibiina kyanyu, oruteerane rwine kwebemberwa nk’oku kirikworekwa omu Buheereza n’Oku Turikutwaza Akatabo k’Okukoresa, kwonka aine kuha orubazo rw’obuheereza orw’edakiika 30 omu mwanya gw’Okwega Baibuli okw’Ekibiina ahansi y’Ebi Abakristaayo Twine Kukora. Orubazo oru rutakatandikire, ceyamaani w’Oruteerane rw’Obuheereza n’Oku Turikutwaza naija kugamba enshonga nkuru ezaaba ziri omu ruteerane, agambe n’ebiri omu ntebeekanisa ya saabiiti erikukurataho, arange ebirango ebirikwetengyesa, nari ashome amabaruha, reero ayete omureeberezi wa saketi kuha orubazo. Bwanyima y’orubazo, omureeberezi wa saketi aine kuhendera oruteerane n’ekyeshongoro eki atooraine. Naabaasa kushaba ow’eishe-emwe ondiijo kuhendera n’okushaba. Omu saabiiti y’okutaayaaya kw’omureeberezi wa saketi, tihaine abeegi abaine kwetaanisa aha kibiina baaba nibakoresa orurimi rumwe. Guruupu y’orurimi orundi neebaasa kugira enteerane zaayo yaaba ataayaayiire ekibiina ekirikukomookamu guruupu egyo. Kwonka, guruupu egyo eine kuba hamwe n’ekibiina yaaba naaha orubazo rw’obuheereza.

21. Omu saabiiti egyo, tihaine kubaho enteerane. Ekibiina kiine kwijukibwa ngu eby’okwega saabiiti egyo, buri omwe naaza kubyeyegyesa wenka nari nk’eka.

22. Ekiijutsyo kyaba nikiza kubaho aha gati ya saabiiti, tiharikwija kubaho Oruteerane rw’Obuheereza n’Oku Turikutwaza.

23. Akakiiko k’abareeberezi nikatoorana omureeberezi kwebembera Oruteerane rw’Obuheereza n’Oku Turikutwaza. Obujunaanizibwa bwe n’okureeba ngu oruteerane oru ruri omu buteeka kandi nirwebemberwa kurugiirira aha buhabuzi obu. Aine kukwatanisa gye n’orikuhwera omu kuha obuhabuzi. Ahonaaho Obuheereza n’Oku Turikutwaza Akatabo k’Okukoresa kaashohozibwa, orikwebembera Oruteerane rw’Obuheereza n’Oku Turikutwaza, naija kukora entebeekanisa y’embazo z’abeegi ey’ameezi abiri. Eki nikitwariramu ebicweka ebitari by’abeegi na baaceyamaani b’enteerane z’aha gati ya saabiiti abaikiriziibwe akakiiko k’abareeberezi, n’embazo z’abeegi. (Reeba  akacweka 3-16 na  24.) Yaaba naaha abeegi ebicweka, aine kuteekateeka aha myaka yaabo, ebi barikumanya, n’okugamba aha nshonga batarikwekyengyera. Ashemereire kukoresa okwetegyereza nikwo kumwe yaaba naaha n’abatari beegi ebicweka. Buri mwegi aine kuheebwa ekicweka kye harikuburayo saabiiti nk’ishatu. Foomu Our Christian Life and Ministry Meeting Assignment (S-89) eine kukoresibwa aha mbazo z’abeegi. Orikwebembera Obuheereza n’Oku Turikutwaza aine kuhamya ngu entebeekanisa y’oruteerane rwona yaahanikwa ahu amabaruha g’ekibiina garikuhanikwa. Akakiiko k’abareeberezi nikabaasa kutoorana omureeberezi ondiijo nari omuheereza kumuhwera. Kwonka, abareeberezi bonka nibo barikutoorana abaraayebembere ebicweka ebitari by’abeegi.

24. Buri saabiiti, omureeberezi omwe naija kuba ceyamaani w’Oruteerane rw’Obuheereza n’Oku Turikutwaza. (Ebibiina ebiine abareeberezi bakye, abaheereza abahikire nibabaasa kuheebwa obujunaanizibwa obu.) Niwe arikutebeekanisa ebigambo by’okwanjura n’eby’okuhendera oruteerane. Niwe aine kwanjura ebicweka byona, kandi kurugiirira aha muhendo gw’abareeberezi abari omu kibiina, naabaasa kugira n’ebicweka ebindi ebi yaayebembera, na munonga eby’okworeka bworeka vidiyo ezitarikwetengyesa okuzihikaanisaho ebiteekateeko. Taine kugamba bingi bwanyima ya buri kicweka. Akakiiko k’abareeberezi nikaija kutoorana abareeberezi abahikire kuba baaceyamaani. Abareeberezi abahikire kuba baaceyamaani nibaguma nibaheebwa obujunaanizibwa obu. Kurugiirira aha mbeera z’ekibiina kyanyu, orikwebembera Oruteerane rw’Obuheereza n’Oku Turikutwaza naabaasa kukoresibwa nka ceyamaani emirundi mingi kukira abareeberezi abandi abahikire. Omureeberezi yaaba ahikire kwebembera Okwega Baibuli okw’Ekibiina, obundi naaba ahikire n’okuba ceyamaani w’oruteerane oru. Kwonka nyabura ’mwe, mugume nimwijuka ngu omureeberezi orikukora nka ceyamaani, niwe aine kusiima omu muringo gwa rukundo abo abaaha embazo z’abeegi, kandi akabaha n’obuhabuzi nk’oku kirikwetengyesa. Kandi ceyamaani aine obujunaanizibwa bw’okureeba ngu oruteerane rwahendera omu bwire. (Reeba  akacweka 17 na  19.) Ceyamaani yaaba naayenda kandi hariho n’omwanya gurikumara, naabaasa kuguma naakoresa omuzindaaro ogwemereziibwe aha puratifoomu kwanjura buri kicweka ekirikugarukaho, obwo orikuza kukyebembera arikwetereeza aha muzindaaro ogu abagambi barikukoresa. Kandi nabwo, ceyamaani naabaasa kushutama aha puratifoomu yaaba naayanjura orubazo rw’omwegi orw’okushoma, n’eby’okureeberaho eby’ekicweka Teeraho Kwejumba omu Kubuurira. Eki nikibaasa kuhwera kutashiisha bwire.

25. Kyaba nikibaasika, ni kirungi kukoresa omureeberezi orikumanya kwegyesa gye kuhikiiriza obujunaanizibwa obu. Obujunaanizibwa bwe n’okuhabura abareeberezi n’abaheereza kyaba nikyetengyesa kandi omu mubonano aha bikwatiraine n’ekicweka kyona eki barikwebembera otwariiremu ebicweka by’Oruteerane rw’Obuheereza n’Oku Turikutwaza, embazo za boona, okwebembera Okwega Omunaara gw’Omurinzi, Okwega Baibuli okw’Ekibiina, n’okushomera ekibiina. (Reeba  akacweka 19.) Omu kibiina haaba harimu abareeberezi baingi abarikwegyesa gye, buri mwaka nihabaasa kutooranwa ondiijo. Tikirikumwetengyesa kuha obuhabuzi bwanyima ya buri kicweka nari buri rubazo.

26. Kurugiirira aha mubaro gw’abeegi, ekibiina nikibaasa kucwamu ngu abeegi abamwe bagire oruteerane orwabo orw’embazo z’abeegi. Abeegi aba bashemereire kuba baine orikuha obuhabuzi owaabo, na munonga omureeberezi. Kyaba nikyetengyesa, omuheereza ohikire gye naabaasa kuhikiiriza obujunaanizibwa obu. Akakiiko k’abareeberezi niko kaine obujunaanizibwa bw’okumutoorana nari kumuhindura. Orikuha obuhabuzi aine kukuratira obuhabuzi oburi omu  kacweka 18. Abeegi baine kushabwa kuza omu ruteerane rwabo bwanyima y’Eby’omuhendo eby’Omwoyo ahansi y’ekicweka ky’oruteerane eby’Omuhendo Ebiri omu Kigambo kya Ruhanga. Baine kwegaita aha bandi omu bwanyima y’orubazo rw’abeegi orw’aha muheru.

27. Vidiyo ezitoorainwe niziija kuba nizoorekwa omu ruteerane oru. Vidiyo z’oruteerane rw’aha gati ya saabiiti niziija kuba niziteebwa aha nkora ya JW Library^® kandi orikubaasa kuzitunga orikukoresa ebyoma bitari bimwe na bimwe.

© 2023 Watch Tower Bible and Tract Society of Pennsylvania

S-38-RR 11/23