Yebeembeze ebikuru. ‘Manya ebirikukira obukuru,’ nikwo Baibuli erikugira. (Abafilipi 1:10) Handiika ebikuru ebi orikwenda kukora, kandi ebiine kukorwa ahonaaho, nk’okugira eby’okurya by’okurya kyakiro nikibaasa kuba kitari kikuru. Kandi ebirikureebeka nk’ebiine kukorwa ahonaaho nk’okureeba puroguraamu ya tiivi ei orikukunda nibibaasa kuba bitari bikuru. *

Ranzya hare. “Ekyoma ku kihwa obwogi, nyinakyo ataakityaza, aba ashemereire kwongyera amaani,” Omubuurizi 10:10 nikwo harikugira. Kandi nihongyeraho hati: “Kwonka obwengye nibwo buhwera omuntu okuhikiiriza eki arikwenda kukora.” Eishomo ni riiha? Kora entebeekanisa bukiri kare kugira ngu obaase kukoresa gye obwire bwawe. Gira obwire nari aha ntebeekanisa yaawe ihaho ebintu ebitari bikuru ebirikushiisha obwire bwawe n’amaani gaawe. Waashanga okiine obwire, noobaasa kukora omurimo ogu waaba otebeekaniise kukora obundi. Waaranzya hare, nikirungamu ebirungi nk’oku omuntu omunyabwengye arikutazya empango ye.

Yorobya embeera yaawe. Yega kwangira ebintu ebitari bikuru nari ebirikushiisha obwire bwawe. Emirimo mingi n’okuraganisa kwingi nibibaasa kukureetera amaganya agatarikwetengyesa n’okuburwa okushemererwa.

Okweziringa n’okutacwamu. ‘Orikuhanga amaisho omuyaga, tarikubiba, kandi orikugahanga ebicu, tarikugyesha.’ (Omubuurizi 11:4) Eishomo ni riiha? Okweziringa nikushiisha obwire n’oburungi bw’ebi orikukora. Omuhingi orikutegyereza ngu embeera zibe gye tarikubiba mbibo, kandi nabwo tarikushaaruura kintu kyona. Nikyo kimwe, nitubaasa kwikiriza obutamanya ekiraabeho kuturemesa kucwamu. Nari nitubaasa kuteekateeka ngu twine kutegyereza kutunga obuhame bwona kubaasa kucwamu. Amazima gari ngu, kubaasa kucwamu aha bintu ebikuru nituba twine kucondooza n’okumariirira. ‘Omwerinzi naayetegyereza ahu arikuraba,’ Enfumu 14:15 nikwo harikugira. Kwonka amazima gari ngu eby’okucwamu bingi nooba otarikumanya ekiraabeho.—Omubuurizi 11:6.

Okurengyesereza okuhikiirira. “Obwengye oburikuruga omu iguru [nari ahari Ruhanga]” n’oburinganiire, Yakobo 3:17 nikwo harikugira. Okutaho emitwarize y’ahaiguru ni kirungi! Kwonka obumwe, nitubaasa kutaho emitwarize y’ahaiguru munonga kitumaremu amaani nari turemwe. Nk’eky’okureeberaho, omuntu orikwega orurimi naikiriza kukora enshobe, arikumanya ngu naija kwegyera aha nshobe ze. Kwonka omuntu orikurengyesereza okuhikiirira naaba naatiina kugamba ekintu ekigwire ekirikumuremesa kutunguuka omu kwega orurimi. Ka ni kirungi kuba abaringaaniza aha bi turikubaasa kukora! “Obwengye bugirwa abacureezi,” nikwo Enfumu 11:2 harikugira. Kandi, abarikwetwara n’abacureezi tibarikwereeba nk’abatarikukora nshobe, kandi butoosha nibeeshekyerera.

Ringaaniza omurimo n’eby’okweshemeza. “Oruhi rumwe rwijwire obusingye niruhita empi ibiri eziijwire emirabanamu n’okwitanira omuyaga.” (Omubuurizi 4:6) Abarikukora munonga tibarikwesiimira omu bintu ebi barikuhendekyera. Nibaba batakiine bwire n’amaani. Kwonka abanafu, nibakunda kubyama bahendera basiisire obwire. Baibuli neetuhiga kugira emiteekateekyere eringaniire: Kora n’amaani noija kwesiimira omu kukora kwawe. Okwesiima nk’okwo “n’ekiconco kya Ruhanga.”—Omubuurizi 5:19.

Byama ekirikumara. “Ninyija kubyama ntaine ki ndikwekyenga, ngwejegyere,” omuhandiiki wa Baibuli nikwo yaagizire. (Zaaburi 4:8) Abantu baingi abakuzire nikibeetengyesa kubyama eshaaha munaana omu kiro, kubaasa kugira amaani omu mubiri, enyehurira, n’omu miringo endiijo. Okugwejegyera n’ekintu eki tuhikire kutamu obwire bwaitu ahakuba nikihwera omu kuta omutima aha kintu, n’okwijuka, kandi eki n’eky’omugasho munonga omu kwega. Kwonka okutabyama, nikiteganisa okwega, kandi nikurugamu butandu, okukora enshobe, n’okurahuka kuguubwa kubi.

Taho ebigyendererwa biringaniire. “Okushemerererwa ebi orikureeba nikikira okuguma noozengyereza omutima aha bi orikwetenga.” (Omubuurizi 6:9) Enshonga n’eha? Omunyabwengye tarikwikiriza ebyetengo bye ebitaringaniire nari ebi atarikubaasa kuhikiiriza. N’ahabw’ekyo tarikubeihwabeihwa ebirango, nari esente z’ahonaaho. Kureka, naayega kumarwa n’ebi arikubaasa kutunga—‘ebi amaisho arikureeba.’

Shwijuma emitwarize yaawe. Emitwarize yaawe neekubaasisa kumanya ebirungi, ebikuru, n’ebirikwetengyesa. Amagara gaawe ku garaabe nigatwarwa nk’emyambi, emitwarize yaawe aine kuba neeyorekyera emyambi egyo. N’ahabw’ekyo, emitwarize mirungi neekuhwera kwebembeza ebikuru n’okukoresa gye obwire bwawe buri shaaha na buri izooba. Noobaasa kwiha nkahi emitwarize nk’egyo? Abantu baingi nibatwara Baibuli nk’erimu obwengye bw’ahaiguru.—Enfumu 2:6, 7.

Hindura rukundo omutwarize gwawe omukuru. Rukundo niyo ‘erikukomerana byona bikakwatanisibwa kimwe,’ Akakolosai 3:14, nikwo harikugira. Titurikubaasa kushemererwa buzima kandi tukagira enyehurira nungi twaba tutaine rukundo na munonga omu ka. Abantu abarikwehuzya enshonga egi, obundi barikuta omutima aha kusherura eby’obugaiga, nari omurimo, nibahendera bataine kushemererwa. Ahabw’enshonga nungi, Baibuli neeyoreka ngu rukundo n’omutwarize mukuru erikugugambaho emirundi mingi.—1 Abakorinso 13:1-3; 1 Yohaana 4:8.

Taho obwire bw’okwigutsa ekyetengo kyawe eky’eby’omwoyo. Omushaija orikwetwa Geoff akaba aine omukazi murungi, abaana babiri, abanywani barungi, n’omurimo murungi gw’obushaho. Kwonka, omurimo gwe gukaba nigukira kumureetera kureeba okubonabona n’okufa. Akabuuza ati: “Oku amagara nikwo gashemereire kuba?” Kwonka eizooba rimwe akashoma ebitabo ebirikushoboorora Baibuli ebirikushohozibwa Abajurizi ba Yehova, kandi yaatunga eby’okugarukamu ebihikire.

Geoff akagambira omukazi we n’abaana be ebi yaabaire naayega, kandi nabo bakasiima. Nk’eka bakatandika orugyendo rw’eby’omwoyo, ekyabarugiiremu ebirungi n’okukoresa gye obwire bwabo. Okwega Baibuli kwabo kukabaha n’amatsiko g’amagara agatahwaho, omu nsi etarimu kuhendekyera busha n’okufa.—Okushuuruurwa 21:3, 4.

Ekyahikire ahari Geoff nikitwijutsya ebigambo bya Yesu Kristo obu yaagira ngu, baine okushemererwa abarikufayo aha kyetengo kyabo eky’eby’omwoyo. (Matayo 5:3) Oyeteekateekire kutaho obwire bw’okwigutsa ekyetengo kyawe eky’eby’omwoyo? Buzima, tihariho gundi muringo ogurikubaasa kukuha obwengye, bw’okukoresa gye obwire bwawe, ti kiro kimwe kyonka, beitu ebiro byona eby’amagara gaawe.