Ebibuuzo Kuruga omu Bashomi
Ebibuuzo Kuruga omu Bashomi
Kurugiirira aha biragiro bya Baibuli ebirikukwata aha shagama, Abajurizi ba Yehova baine miteekateekyere ki aha bujanjabi oburikutwariramu okukoresa eshagama eyaabo?
Omukristaayo omu mwanya gw’okucwamu arikwihirira aha ki arikukunda nari eki omushaho yaamugambira, aine kucwamu arikwihirira aha ki Baibuli erikugamba. N’okucwamu okuri aha gati ye na Yehova
Yehova owaatuhaire amagara, akaragiira ngu eshagama etariibwa. (Okutandika 9:3, 4) Omu biragiro ebi yaahaire Israeli eya ira, Ruhanga akooreka oku eshagama eine kukoresibwa ahakuba neejwekyera amagara. Akagira ati: “Amagara g’omubiri gaba omu shagama, nikyo naagibaheera kushukwa aha itambiro ngu erihiirire amagara gaanyu.” Kandi shi omuntu ku yaabaire aita enyamaishwa kugirya? Ruhanga akagira ati: “Ayate eshagama yaayo ahansi, agishwekye eiju.” * (Abaleevi 17:11, 13) Yehova akagarukamu ekiragiro eki emirundi mingi. (Eky’Ebiragiro 12:16, 24; 15:23) Ekitabo ky’Abayudaaya Soncino Chumash nikigira kiti: “Eshagama teshemereire kubiikwa kureka eine kwatwa ahansi ahabw’okuba teine kuriibwa.” Tihaine Omwisraeli owaabaire naikirizibwa kubiika nari kukoresa eshagama y’ekihangirwe kyona ahakuba amagara gaakyo n’aga Ruhanga.
Okukuratira ebiragiro bya Musa kukahendera obu Mesia yaafa. Kwonka nabwo, oku Ruhanga arikutwara eshagama nk’erikwera tikurahindukire. Barikuhwerwa omwoyo gurikwera, entumwa bakagambira Abakristaayo ‘kwerinda eshagama.’ Ekiragiro ekyo kikaba kitari ky’okutwarwa nk’ekitari kikuru. Kikaba kiri kikuru nk’okwetantara obushambani n’okuramya ebishushani. (Ebyakozirwe 15:28, 29; 21:25) Omu kyasha kya 20 ekikorwa ky’okugaba eshagama n’okugita omu mubiri kikajanjaara munonga, Abajurizi ba Yehova bakaba nibamanya ngu ekikorwa ekyo tikirikuhikaana n’ebiri omu Baibuli. *
Obumwe, omushaho naabaasa kuhiga omurwaire kuhayo eshagama ye harikuburayo saabiiti nkye akashemezibwa (preoperative autologous blood donation, nari PAD) kugira ngu kyayetengyesa, ateebwemu eshagama ye ebaire ebiikirwe. Kwonka, okurundaana, okubiika, n’okuteebwamu eshagama nk’okwo nikuhakanisa ebirikugambwaho omu kitabo ky’Abaleevi n’Eky’Ebiragiro. Eshagama teine kubiikwa, eine kushukwa ahansi ekagaruririrwa Ruhanga, nk’oku kiine kuba. Titukikuratira ebiragiro by Musa. Kwonka nabwo, Abajurizi ba Yehova nibaha ekitiinisa emisingye ei Ruhanga yaabitairemu, kandi bamaririire ‘kwetantara eshagama.’ N’ahabw’ekyo, titurikuhayo eshagama yaitu, kandi titurikugibiika yaaba eshemereire ‘kushukwa ahansi.’ Ekikorwa ekyo tikirikuhikaana n’ekiragiro kya Ruhanga.
Obujanjabi obundi n’okukyebeza oburikutwariramu okukoresa eshagama y’omuntu ogwo tiburikuhenda emisingye ya Ruhanga butunu. Nk’eky’okureeberaho, Abakristaayo bingi baikirize kwihwamu eshagama kubaasa kubacebera reero bwanyima eshagama egyo neeyatwa. Emiringo endiijo ey’obujanjabi erikutwariramu okukoresa eshagama y’omuntu ogwo nayo neebaasa kukoresibwa.
Nk’eky’okureeberaho, omu miringo y’obujanjabi emwe nka hemodilution, eshagama nkye neebaasa kwihwa omu mubiri gw’omuntu, reero eyasigaramu efungurwa. Bwanyima eshagama ei bamwihamu nibagirekura egaruka omu mubiri gwe, kwongyera aha bwingi bw’eshagama ye. Nikyo kimwe, eshagama erikushohora kuruga omu kironda neebaasa kurundanwa, ebonezibwe kugira ngu obutafaari oburikutukura bugarurwe omu mubiri gw’omurwaire, omuringo ogu nigwetwa cell salvage. Omu muringo ogundi, nibabaasa kurabya eshagama omu kyoma ekirikukora nk’ekicweka ky’omubiri (nk’omutima, ebihaha, entsigo) kumara obwire bukye. Bwanyima eshagama eri omu kyoma neegarurwa omu mubiri gw’omurwaire. Omu miringo endiijo ey’obujanjabi, eshagama nibagirabya omu kyoma ekirikugyegyena oburofa (centrifuge). Obumwe ekigyendererwa nikiba kiri eky’okushoroora ebicweka ebimwe eby’eshagama kugira ngu bikoresibwe omu bicweka ebindi eby’omubiri. Hariho n’okukyebera okurikwetengyesa kwiha eshagama nyingi omu mubiri kugira ngu etaburwe n’omubazi reero bwanyima egarurwe omu mubiri gw’omurwaire.
Ebirikutwariramu omu bujanjabi tibirikushushana, kandi emiringo misya y’obujanjabi n’okukyebera neija kukoresibwa. Ti bujunaanizibwa bwaitu kushwijuma emiringo egi yoona reero tukacwamu. Buri Mukristaayo aine kwecweramu oku eshagama ye eraakoresibwe omu kushemezibwa, omu kuceberwa, nari omu muringo ogundi gwona ogw’obujanjabi. Omukristaayo ashemereire kubuuza omushaho we bukiri kare ebirikukwata aha ku eshagama ye eraakoresibwe omu bujanjabi. Reero ayecweremu arikwihirira aha ki omuntu we ow’omunda arikwikiriza. (Reeba akabokusi.)
Abakristaayo baine kwijuka okwehayo kwabo ahari Ruhanga n’okuraganisa kwabo ‘okw’okumukunda n’omutima gwabo gwona, n’amagara gaabo goona, n’amaani gaabo goona, n’obwengye bwabo bwona.’ (Luka 10:27) Okutashushana na baingi omu nsi, Abajurizi ba Yehova nibatwara omukago gwabo murungi na Ruhanga nk’ogwo muhendo munonga. Obukomooko bw’amagara, naayehanangiriza boona kuta obwesigye omu shagama ya Yesu eyaasheeshekire. Baibuli neegira eti: “Omuri Ogwo [Yesu Kristo] tuheebwa okucungurwa ahabw’eshagama ye, okusaasirwa eby’okushiisha byaitu.”—Abaefeso 1:7.
[Obugambo obw’Ahansi]
^ Professor Frank H. Gorman akahandiika ati: “Okushuka eshagama ahansi nikitwarwa nk’ekikorwa ky’okuha ekitiinisa amagara g’enyamaishwa, na Ruhanga, owaahangire amagara kandi orikugumizamu naagareeberera.”
^ Watchtower eya July 1, 1951, ekagarukamu ebibuuzo bikuru ebi, erikworeka ahabw’enki kitari kirungi kuteebwamu eshagama ehairweyo abandi.
[Akabokusi]
EBIBUUZO BY’OKWEBUUZA
Ka tugire ngu eshagama yangye baagirabya omu aheeru y’omubiri gwangye kandi ekeemerezibwamu kakye aheeru yaagwo, omuntu wangye w’omunda naija kuunyikiriza kureeba eshagama egi nk’ekiri omu mubiri gwangye, kibe kitarikunyetengyesa ‘kugyata ahansi’?
Omuntu wangye w’omunda otendekirwe Baibuli naija kuunshinja omu kushemezibwa baanyihamu emwe aha shagama yangye, bakagiboneza, reero ekagarurwa omu mubiri gwangye?