Ebibuuzo Kuruga omu Bashomi

Omu 2 Abakorinso 6:14, ekigambo “abatarikwikiriza” eki Paulo yaakoreise nikimanyisa baahi?

Omu 2 Abakorinso 6:14, nitushoma ngu: “Mutakwatanisa n’abatarikwikiriza.” Waayetegyereza eki Paulo yaabaire naagambaho enyima, nikireebwa butunu ngu akaba naagamba aha bantu abatari omu kibiina Ekikristaayo. Enyetegyereza egi neehikaana n’ebyahandiikirwe ebindi ahu Paulo yaakoreise ebigambo “otarikwikiriza” nari “abatarikwikiriza.”

Nk’eky’okureeberaho, Paulo akahana Abakristaayo abarikuza omu macwero g’emanja omu maisho ‘g’abatarikwikiriza.’ (1 Abakorinso 6:6) Akaba naagamba aha baramuzi omu macwero g’emanja omuri Korinso. Paulo omu baruha ye eya kabiri, naagira ngu Sitaane ‘ahumiize emitima’ y’abatarikwikiriza. Emitima y’abantu nk’abo ‘etwekyereirwe’ tibarikwetegyereza amakuru marungi. Kandi tihaine eki barikora kubaasa kuheereza Yehova, ahakuba Paulo akaba yaashobooroire enyimaho ati: ‘Kwonka omuntu yaahindukira [Yehova], eky’okwetwekyerera ekyo nikihwaho.”—2 Abakorinso 3:16; 4:4.

Bamwe aha bantu nk’abo nibahenda ebiragiro nari nibaramya ebishushani. (2 Abakorinso 6:15, 16) Kwonka, ti boona ngu nibahakanisa abaheereza ba Yehova. Abamwe nibakunda kwega amazima. Baingi bari omu bushwere n’Abakristaayo kandi bashemereirwe kuguma nabo. (1 Abakorinso 7:12-14; 10:27; 14:22-25; 1 Petero 3:1, 2) Kwonka, Paulo naakira kukoresa ekigambo “abatarikwikiriza” kugamba aha bantu nk’abu twashoboororaho nari abatari mu kibiina Ekikristaayo, ekirikuba kirimu ‘abarikwikiririza’ omuri Yesu.—Ebyakozirwe 2:41; 5:14; 8:12, 13.

Omusingye oguri omu 2 Abakorinso 6:14 ni mukuru nigubaasa kuhwera Abakristaayo boona, gurimu obuhabuzi bw’obwengye oburikugasira Omukristaayo orikusherura ow’okutaaha nawe omu bushwere. (Matayo 19:4-6) N’eky’obwengye Omukristaayo oyehaireyo kandi obatiziibwe kutataaha omu bushwere n’omuntu otari mu mazima, ahakuba nibaba baine emitindo n’ebigyendererwa bitarikushushana, kandi n’ebi barikwikiririzamu nibitaana.

Kandi shi abo abarikwega Baibuli n’abarikukira kwija omu nteerane? Kandi shi ababuurizi abatakabatiziibwe? Nabo n’abatarikwikiriza? Ngaaha. Abo abaaherize kwikiriza amakuru marungi, kandi bakatunguuka kuhika aha kubatizibwa tibarikubarwa nk’abatarikwikiriza. (Abarooma 10:10; 2 Abakorinso 4:13) Koruneelio atakabatiziibwe akaba naamanywa nk’omuntu “orikutiina Ruhanga.”—Ebyakozirwe 10:2.

Mbwenu shi n’eky’obwengye Omukristaayo obatiziibwe kuriima omubuurizi otabatiziibwe ahabw’okugira ngu ebiri omu 2 Abakorinso 6:14 tibirikumukwataho? Ngaaha tiky’obwengye. Ahabw’enki? Ahabw’obuhabuzi bwa butunu obu Paulo yaahaire Abakristaayo efaakazi. Paulo akahandiika ati: ‘Aine obugabe bw’okushwerwa ou arikwenda, kwonka omuri Mukama’ honka. (1 Abakorinso 7:39) Kuhikaana n’obuhabuzi obwo, Abakristaayo nibahigwa kusherura ow’okutaaha nawe omu bushwere “omuri Mukama” honka.

Ebigambo “omuri Mukama” nari “omuri Kristo” nibimanyisa ki? Paulo naagamba aha bantu abari “omuri Kristo” nari “omuri Mukama” omu Abarooma 16:8-10 na Abakolosai 4:7. Waashoma Ebyahandiikirwe ebyo, noija kwetegyereza ngu nibo b’eishe-emwe ‘abakozi bagyenzi baitu,’ ‘abarikukundwa’ omu kibiina, ‘ababuurizi abeesigwa,’ kandi ‘abahuuku bagyenzi baitu.’

Ni ryari obu omuntu arikuba “omuhuuku wa Mukama”? Ekyo nikibaho bwanyima y’okwehayo ayekundiire kukora eki omuhuuku aine kukora kandi akagira ebi yaayefeerereza. Yesu akagira ati: “Omuntu weena ku araayende kunkuratira, ayeyangise, ayekorere” omuti gwe, ankuratire. (Matayo 16:24) Omuntu naatandika kuba omukuratsi wa Kristo n’okukora ebi Ruhanga arikukunda omu bwijwire yaaheza kwehayo ahari Ruhanga omu kushaba ari wenka. Bwanyima naabatizibwa, abona kuba omubuurizi otongoziibwe oine omukago murungi na Yehova. * N’ahabw’ekyo, ‘okushwera omuri Mukama,’ nikimanyisa okutaaha omu bushwere waaherize kworeka okwikiriza okwabuzima, kandi oyehaireyo kuba “omuhuuku wa Ruhanga na Mukama waitu Yesu Kristo.”—Yakobo 1:1.

Omuntu ou Abajurizi ba Yehova barikwegyesa Baibuli kandi orikutunguuka omu by’omwoyo nitumusiima. Kwonka naaba atakeehaireyo ahari Yehova kuguma naamuheereza. Naaba naakikora empinduka ezirikwetengyesa. Ni kikuru ngu abanze amare kukora empinduka enkuru kubaasa kuhika aha kwehayo kandi akabatizibwa nk’Omukristaayo, atakateekateekire aha kintu ekindi nk’okutaaha omu bushwere.

N’eky’oburyo Omukristaayo kuriima omuntu orikutunguuka omu kwega Baibuli kwe kugira ngu ku araabatizibwe abone kutaaha nawe omu bushwere? Ngaaha. Ebigyendererwa by’omwegi wa Baibuli nibibaasa kuhinduka yaamanya ngu Omukristaayo naayenda kutaaha nawe omu bushwere kwonka amutegyereize ngu abanze yaabatizibwa.

Kaingi, omuntu tarikumara obwire buraingwa ari omubuurizi otabatiziibwe. N’ahabw’ekyo obuhabuzi bw’okushwera omuri Mukama honka ti bugumire kworobera. Kandi shi omuntu ku yaakuba yaahikize emyaka y’okutaaha omu bushwere, akuriire omu ka y’Ekikristaayo kandi amazire obwire ari omubuurizi otabatiziibwe? Mbwenu shi niki ekimuremeise kwehayo akabatizibwa? Ahabw’enki naayeziringa? Aine okubangaanisa kwona? N’obu omuntu nk’ogwo araabe atarikubarwa nk’otarikwikiriza, nabwo naaba atari “omuri Mukama.”

Obuhabuzi bwa Paulo oburikukwata aha bushwere nibutugasira. (Isaaya 48:17) Bombi abarikwenda kutaaha omu bushwere baaba beehaireyo ahari Yehova, nikimanyisa ngu obushwere bwabo nibwija kuhama ahabw’okugira omusingye guhami omu by’omwoyo. Ebi barikutwara nka bikuru n’ebigyendererwa byabo nibiba nibishushana. Eki nikiija kureetera obushwere bwabo kubamu okushemererwa. Kandi, ‘okushwera omuri Mukama,’ nikyoreka Yehova ngu ori omwesigwa, kandi eki nikiija kurugamu emigisha ey’obutwire, ahakuba omuntu orikuhamira ahari Yehova nawe naamuhamiraho.—Zaaburi 18:25.

[Obugambo obw’Ahansi]

[Ekishushani]

Omuntu orikuhamira ahari Yehova nawe naamuhamiraho