Ebibuuzo kuruga omu bashomi

Baibuli terikugamba butunu aha kwereeza amagiraasi, mbwenu shi ahabw’enki Abajurizi ba Yehova batarikwejumba omu kikorwa eki?

Okwereeza amagiraasi ga viinyo (nari ekirikusinza ekindi kyona) n’omucwe gutwireho kandi ogujanjaire munonga, n’obu ebirikutwarirwamu birikutaana kurugiirira aha mwanya. Obumwe abarikwereeza amagiraasi nibagahoondanisa. Kandi orikubanza kwereeza egiraasi naagira eki yaashaba nari naayeendeza omuntu ondiijo okushemererwa, amagara marungi, okuhaangara n’ebindi nk’ebyo. Abandi nabo nibabaasa kwereeza amagiraasi gaabo kworeka ngu nibaikirizana nakyo. Kumara emyaka mingi, ogu gutwire guri omugyenzo ogutarimu kabi koona, kwonka hariho enshonga ahabw’enki Abajurizi ba Yehova batarikwejumba omu kwereeza amagiraasi.

Ti ahabw’okugira ngu Abakristaayo tibarikwendeza abandi okushemererwa nari amagara marungi. Omu baruha ei akakiiko akareebeerezi omu kyasha ky’okubanza kaahandiikiire ebibiina bakahendera n’ekigambo ekirikubaasa kuvunuurwa nka “gira amagara marungi,” “mugume muri gye,” nari “mugumeho muri buhooro.” (Ebyakozirwe 15:29) Kandi bamwe aha baheereza ba Ruhanga ab’amazima bakagambira abagabe b’abantu bati: “Mukama wangye . . . naakaramaare” nari ‘Omugabe agumeho ebiro byona.’—1 Abagabe 1:31; Nehemia 2:3.

Mbwenu shi, okwereeza amagiraasi kukakoomooka nkahi? Watchtower eya January 1, 1968, ekajuriza ekitabo The Encyclopædia Britannica (1910), Ekya 13, orupapura 121: “Omucwe gw’okunywa orikwendeza ‘amagara marungi’ abahuriire nigubaasa kuba gwakomookire omu migyenzo y’ediini eya ira ey’okunywera baruhanga n’abafu. Abagriika n’Abarooma bakaba nibashuukira baaruhanga eby’okunywa aha biihuuro byabo kandi n’aha bugyenyi bakaba banywa ahabwabo n’abafu.” Ekitabo ekyo nikyongeraho kiti: “Akashonshorekye akaabaire nikatwarirwamu omu mugyenzo gw’okuhongera eby’okunywa baaruhanga n’abafu, n’okwendeza abantu abahuuriire amagara marungi.”

Na hati nikwo kiri? Ekitabo ekya 1995 International Handbook on Alcohol and Culture nikigira kiti: “[Okwereeza amagiraasi] nikyeshushaniriza n’omugyenzo gwa ira ogw’okutambira baaruhanga eby’okunywa ebirikwera nk’eshagama nari viinyo reero okashaba omu bugufu orikukoresa ebigambo ‘karamaare!’ nari ‘gira amagara marungi!’”

Amazima gari ngu, n’obu ekintu, nari omuringo ogu kikozirwemu, nari omugyenzo gwakuba gwine akakwate n’ediini z’ebishuba eza ira tikirikumanyisa ngu obutoosha omuheereza wa Ruhanga ow’amazima tarikubaasa kugwejumbamu. Ka tutware eky’okureeberaho ky’amakomamahanga. Kashoboorozi emwe ya Baibuli neegira ngu: “Amakomamahanga nigabaasa kuba gaabaire nigakoresibwa nk’akamanyiso k’okuramya omu diini ezimwe ezitarikumanywa.” Kwonka nabwo, Ruhanga akaragiira ngu amakomamahanga gateebwe aha mukugiro gw’ekijwaro ky’omuyamurwa omukuru, kandi gakakoresibwa kuhunda n’enyomyo z’omuringa omu hekalu ya Sulemaani. (Okuruga 28:33; 2 Abagabe 25:17) Nangwa, n’empeta nazo zikaba nizikoresibwa omu migyenzo y’ediini. Kwonka hati baingi ekyo tibarikukimanya, nibazireeba nk’obuhame ngu omuntu ari omu bushwere obuhikire.

Kandi shi okukoresa viinyo omu mikoro y’ediini? Nk’eky’okureeberaho, eizooba rimwe abashaija ba Shekemu abarikuramya Baali “ [bakataaha] omu nju ya ruhanga waabo, baarya, baanywa, baajuma Abimeleki,” mutabani wa Gideoni. (Abaramuzi 9:22-28) Nooteekateeka ngu omuntu owaabaire ari omwesigwa ahari Yehova akaba naija kwejumba omu kunywa okwo, obundi arikukyeena Abimeleki? Amosi arikugamba aha bwire obu Abaisraeli baagomiire Yehova, akagira ati: “Nibabyama aha rubaju rwa buri itambiro, beeyariire ebijwaro by’omukwato, Kandi nibanywera omu nju ya ruhanga waabo viinyo y’abahongyesiibwe.” (Amosi 2:8) Mbwenu shi abarikuramya Yehova ab’amazima nibabaasa kwejumba omu kikorwa ekyo, yaaba viinyo yaabaire ehongyeirwe baaruhanga nari barikuginywa ahabw’enshonga egyo? (Yeremia 7:18) Nari, omuheereza wa Ruhanga ow’amazima akaba naabaasa kwereeza egiraasi ya viinyo reero ashabire omuntu ondiijo omugisha?

Ekirikutangaaza, abaheereza ba Yehova obumwe bakaba baimutsya emikono yaabo bashaba ekintu kirungi kubaho. Emikono yaabo bakaba bagiimukiza Ruhanga ow’amazima. Baibuli neegira eti: ’Sulemaani yaayemerera omu maisho g’eitambiro rya [Yehova], eihanga ryona ery’Abaisraeli riri aho, yaimutsya emikono ye ahaiguru, yaagira ati: Ai [Yehova] Ruhanga wa Israeli, tihariho ruhanga omu iguru ahaiguru n’omu nsi ahansi orikushushana naiwe. ogume ohurire ori omu iguru, omu mwanya gwawe ogu otuuramu; kandi ku oraahurire, osaasire.’ (1 Abagabe 8:22, 23, 30) Nikyo kimwe, “Ezera akasiima [Yehova] . . . n’abantu boona baikiriza nibaimutsya emikono yaabo, nibagira bati: Amiina, Amiina; bainika emitwe yaabo, baaramya [Yehova] bajuumaire ahansi.” (Nehemia 8:6; 1 Timoseo 2:8) Buzima, abantu abo abeesigwa bakaba batarikwimutsya emikono yaabo kushaba omugisha ruhanga w’emigisha.—Isaaya 65:11.

Abantu baingi abarikwereeza amagiraasi obunaku obu nibabaasa kutateekateeka ngu bariyo nibashaba obuhwezi nari omugisha kuruga ahari Ruhanga, kwonka nabwo tibarikubaasa kushoboroora ahabw’enki nibeereeza amagiraasi gaabo. N’ahabw’ekyo, ahabw’okugira ngu abandi tibarikuteekateeka munonga aha nshonga egi tikishemereire kureetera Abakristaayo aba mazima kuteekateeka ngu baine kutooreza ekikorwa eki.

Nikimanywa gye ngu n’omu nshonga ezindi, Abajurizi ba Yehova nibeetantara okukora ebintu ebi abantu abaingi barikukora. Nk’eky’okureeberaho, baingi nibaramya obumanyiso bw’eihanga nk’ebendera; Abakristaayo ab’amazima tibarikuzibira abarikukora ebikorwa nk’ebyo, kwonka bo tibarikubyejumbamu. Abajurizi ba Yehova baamanya obu biraabeho nibateeraho kutwaza omu muringo ogutaragwise kubi abandi. Omu buri mbeera yoona nibateeraho kwetantara ebikorwa ebitarikuhikaana n’ebiri omu Baibuli. (Okuruga 20:4, 5; 1 Yohaana 5:21) Baingi obunaku obu nibabaasa kuba batarikureeba okwereeza amagiraasi nk’omugyenzo gw’ediini. Kwonka nabwo hariho enshonga ahabw’enki Abakristaayo batarikwejumba omu kikorwa ekyo, ekiine obukomooko omu diini z’ebishuba kandi kirikureebwa nk’okushaba eiguru omugisha nari obuhwezi kuruga aha bihangirwe by’amaani.—Okuruga 23:2.