Ahabw’enki Oine Kwehayo Ahari Yehova?

“Eki kiro haizire maraika wa Ruhanga, naanye ou ndi owe.”—BYAK. 27:23.

1. Orikuba naaza kubatizibwa aine kubanza yaakora ki, kandi nikireetaho bibuuzo ki?

 “ORIKWIHIRIRA aha kitambo kya Yesu Kristo, oyeteisize ebibi byawe kandi waayehayo ahari Yehova kukora ebi arikukunda?” Eki ni kimwe aha bibuuzo bibiri ebi abarikuza kubatizibwa baine kugarukamu aha muheru gw’orubazo rw’okubatizibwa. Ahabw’enki Abakristaayo baine kwehayo ahari Yehova? Ahabw’enki okwehayo ahari Ruhanga kirikutugasira? Ahabw’enki Ruhanga atarikubaasa kusiima okuramya kw’omuntu yaaba atehaireyo? Kubaasa kutunga eby’okugarukamu, twine kubanza kwetegyereza eki kirikumanyisa kwehayo.

2. Okwehayo ahari Yehova nikimanyisa ki?

² Okwehayo ahari Ruhanga nikimanyisa ki? Yetegyereze oku entumwa Paulo yaashobooroire omukago gwe na Ruhanga. Akaba ari omu meeri eyaabaire eri omu kabi kandi yaagambira omu maisho g’abantu baingi arikweta Yehova, “Ruhanga, naanye ou ndi owe.” (Shoma Ebyakozirwe 27:22-24.) Abakristaayo boona abaabuzima n’aba Ruhanga. Kwonka, okutwarira hamwe ‘ensi yoona eri omu butegyeki bw’omubi.’ (1 Yoh. 5:19) Abakristaayo nibaba aba Yehova baikiriza kwehayo kurabira omu kushaba. Okwehayo nk’okwo n’okukora ahabwawe. Bwanyima nihabaho okubatizibwa.

3. Okubatizibwa kwa Yesu kuba kwine makuru ki, kandi abakuratsi be nibabaasa kumutooreza bata?

³ Yesu akatuteeraho eky’okureeberaho obu yaacwamu kwehayo kukora ebi Ruhanga arikukunda. Ahabw’okugira ngu akazaarirwa omuri Israeli eihanga eryehaireyo, akaba yaayehaireyo ahari Ruhanga. Kwonka, obu yaabaire naabatizibwa akakora ekintu ekirikukira aha kworobera ebiragiro. Ekigambo kya Ruhanga nikigira kiti: ‘Ai Ruhanga, reeba, naija kukora ebi orikukunda.’ (Heb. 10:7; Luk. 3:21) N’ahabw’ekyo okwehayo kwa Yesu kukoreka ngu akaba naayenda kukora ebi Ishe arikukunda. Abakuratsi be nibamutooreza barikubatizibwa. Ekindi, okubatizibwa kwabo omu maizi nikworeka muranga ngu beehaireyo ahari Ruhanga kurabira omu kushaba.

Oku Okubatizibwa Kurikutugasira

4. Omukago gwa Daudi na Yonasaani nigutwegyesa ki aha kumariirira?

⁴ Abakristaayo nibatwara okwehayo nk’enshonga nkuru munonga. Kwonka nikukira aha kuhamira aha ki ocwiremu kukora. Mbwenu shi nitugasirwa tuta twayehayo? Ka tukigyeragyeranise n’oku abantu barikugasirwa baamariirira kuhamiranaho. Twara eky’okureeberaho ky’abanywani. Bombi kubaasa kugasirwa omu bunywani bwabo, buri omwe naaba aine kugira eki yaakora kureetera ekyo kubaho. Ekyo nikitwariramu okumariirira kuhamiranaho, kandi buri omwe naareeba ngu nikyetengyesa kufayo ahari munywani we. Omu Baibuli Daudi na Yonasaani bakaba baine omukago nk’ogwo. Nangwa bakahika n’aha kukora endagaano y’okurinda obunywani bwabo. (Shoma 1 Samueli 17:57; 18:1, 3.) N’obu okuhamiranaho kw’omuringo nk’ogwo kutakanyire munonga, emikago erikukira obwingi neekira kuhama abanywani baacwamu kuhamiranaho, nari kufanaho.—Enf. 17:17; 18:24.

5. Omuhuuku akaba agasirwa ata ku yaabaire acwamu kugumira kimwe na mukama we orikutwariza gye?

⁵ Ekiragiro eki Ruhanga yaahaire Abaisraeli nikyoreka oku abantu baabaire nibagasirwa bamariirira kuhamiranaho. Omuhuuku ku yaabaire ayenda kugumira kimwe owa Mukama we orikumutwariza gye, akaba akakora nawe endagaano erikubagaita ebiro byona. Ekiragiro nikigira kiti: ‘Omuhuuku ku aryegambira butunu ati: Ninkunda mukama wangye n’omukazi wangye kandi n’abaana bangye, tindikwenda kugyenda kuruga omu buhuuku, mukama we naija kumutwara omu maisho ga Ruhanga, amwemereze aha rwigi nari aha kiti ky’omuryango, amufumure okutu n’empindu, omuhuuku ogwo agume naamukorera ebiro byona.’—Kur. 21:5, 6.

6, 7. (a) Okumariirira nikugasira kuta abantu? (b) Ekyo kiine kakwate ki n’omukago gwaitu na Yehova?

⁶ Obushwere nabwo nibwetengyesa okumariirira okurikukirayo. Oku ti kucwamu kumariirira kuhamira aha ndagaano, kureka aha muntu. Omushaija n’omukazi abagaitsirwe nibaba baine oburinzi obwabuzima, n’obu baakuba abaana baabo. Kwonka abakundaine abamaririire kuhamiranaho omu bushwere obushemeire nibaba baine enshonga zihikire kuruga omu Byahandiikirwe kuteeraho kushoboorora oburemeezi omu muringo gwa rukundo.​—Mat. 19:5, 6; 1 Kor. 13:7, 8; Heb. 13:4.

⁷ Ira abantu bakaba nibagasirwa ku baabaire bakora endagaano ey’eby’obushuubuzi n’ez’eby’obupakasi. (Mat. 20:1, 2, 8) Nikyo kimwe n’omu bunaku obu. Nk’eky’okureeberaho, nitugasirwa twakora endagaano nari twagita omu buhandiikye tutakeejumbire omu by’obushuubuzi nari kukorera ekitongore kyona. Buzima, okukora endagaano kwaba nikubaasa kuhamya obunywani, obushwere, nari kukuhwera aha murimo, noogira ngu torikwija kugasirwa munonga waamariirira kwehayo ahari Yehova! Ka tureebe oku abantu ira baabaire nibagasirwa ahabw’okwehayo ahari Yehova Ruhanga n’oku kyabaire nikikirira kimwe okuhamiranaho.

Oku Okwehayo Ahari Ruhanga kwagasiire Abaisraeli

8. Abaisraeli okwehayo ahari Yehova kikaba nikimanyisa ki?

⁸ Eihanga rya Israeli ryona rikeehayo ahari Yehova obu baakora nawe endagaano. Yehova akabateeranira haihi n’Orushozi Sinai, reero yaabagira ati: “Ku murihurira eiraka ryangye, mwarinda endagaano yangye, nimwija kuba abantu bangye ahabwangye abatoorainwe omu mahanga goona.” Abantu bakagarukamu hamwe bati: “Byona ebi Yehova yaagamba, nitwija kubikora.” (Kur. 19:4-8) Abaisraeli okwehayo kikaba nikikora amakuru maingi okukira okwemarira aha kukora ekintu. Kikaba nikimanyisa ngu baaba aba Yehova, kandi nawe akaba naija kubatwara nk’abantu be “abatoorainwe.”

9. Abaisraeli bakaba nibagasirwa bata ahabw’okwehayo ahari Ruhanga?

⁹ Abaisraeli bakagasirwa ahabw’okuba aba Yehova. Akaguma abahamiireho kandi arikubareeberera n’oku omuzaire arikufayo aha mwana we. Ruhanga akagambira Abaisraeli ati: “Omukazi naabaasa kwebwa omwana we ou arikwontsya, abure kugirira esaasi omwana orugire omu nda ye? Nangwa bo bakaabaasa kwebwa, kwonka nyowe tindikwebwa.” (Isa. 49:15) Yehova akabaha ebiragiro by’okubahabura, baanabi b’okubagumya, na baamaraika b’okubarinda. Omuhandiiki wa zaaburi akagira ati: “Amanyisa Yakobo ekigambo kye, na Israeli amumanyisa ebiragiro bye n’emicwere ye. Tihariho ihanga erindi ryona eri aragizire atyo.” (Zab. 147:19, 20; shoma Zaaburi 34:7, 19; 48:14.) Nk’oku ira Yehova yaareebereire eihanga eryabaire ryehaireyo ahariwe, naija kureeberera abarikwehayo hati.

Ahabw’enki Twine Kwehayo Ahari Ruhanga

10, 11. Nituzaarwa turi omu muka ya Ruhanga ey’omu nsi yoona? Shoboorora.

¹⁰ Abakristaayo abarikwenda kwehayo kandi bakatizibwa nibabaasa kwebuuza bati: ‘Ahabw’enki ntarikubaasa kuramya Ruhanga omu muringo ogu arikusiima naaba ntehaireyo?’ Ijuka ngu ahabw’ekibi kya Adamu, twena nituzaarwa tutari muka ya Ruhanga. (Rom. 3:23; 5:12) N’ahabw’ekyo okwehayo ahariwe ni kikuru munonga kubaasa kwegaita aha ka ye ey’omu nsi n’omu iguru. Ka tureebe ahabw’enki.

¹¹ Titwine muzaire orikubaasa kutureetera kugira amagara agahikiriire. (1 Tim. 6:19) Titurazairwe turi abaana ba Ruhanga ahabw’okugira ngu abazaire baitu b’okubanza bakashiisha, abantu boona bakeetaanisa ahari Tataitwe owa rukundo kandi Omuhangi. (Gyeragyeranisa Eky’Ebiragiro 32:5.) Kuruga obwo, abantu omu nsi batwire batari omu ka Ruhanga, kandi bamwetaaniiseho.

12. (a) Abantu abatahikiriire nibahinduka bata ab’omuka ya Ruhanga? (b) Twine kukora ki tutakabatiziibwe?

¹² Kwonka, abantu nibabaasa kushaba Ruhanga kubaikiriza kuba omu ka ye ey’abaheereza be abarikusiimwa. * Ekyo nikibaasika kita kandi obwo turi abasiisi? Entumwa Paulo akahandiika ati: ‘Tukiri abazigu be, mbwenu okukira munonga, nk’oku tuherize kugarukana [na Ruhanga], amagara ga [Kristo] nigaija kutukiza.’ (Rom. 5:10) Aha kubatizibwa nitushaba Ruhanga kugira omutima ogutarikweshinja kubaasa kutwakiira. (1 Pet. 3:21) Kwonka okubatizibwa kutakabaireho, hariho ebintu bishatu ebi twine kukora. Twine kuteeraho kumanya Ruhanga, kwega kumwesiga, kweteisa, kandi tukahindura omu mitwarize yaitu. (Yoh. 17:3; Byak. 3:19; Heb. 11:6) Kwonka hariho ekintu ekindi eki twine kukora tutakataahire omu ka ya Yehova. Nikyo kiiha?

13. Ahabw’enki kiri kikuru omuntu kwehayo arikuraganisa Ruhanga kubaasa kuba omwe aha b’eka ye abu arikusiima okuramya kwabo?

¹³ Omuntu oyetaaniise ahari Ruhanga atakeegaitsire aha ka y’abaheereza be, naaba aine kubanza kukora endagaano na Yehova. Kubaasa kwetegyereza ahabw’enki, kiri kityo, teekateeka aha muzaire ow’ekitiinisa orikufayo kureeberera omwana efuuzi kandi orikwenda kumutwara kwegaita aha ka ye omu bwijwire. Omuzaire ogwo naamanywa nk’omushaija murungi. Kwonka nabwo, atakaikiriize kutwara efuuzi egyo, naayenda kukora endagaano n’omwojo ogwo. N’ahabw’ekyo naagambira omwojo ogwo ati: “Ntakakwikiriize kuba mutabani wangye, niinyenda kumanya yaaba noija kunkunda nka Sho kandi ompe ekitiinisa.” Omunyeeto ogwo ku arikwikiriza kurahira kukikora, nibwo omushaija ogwo arikumwikiriza omu ka ye. Ekyo buzima t’eky’oburyo? Nikyo kimwe, Yehova naayakiira omu ka ye abo bonka baikirize kwehayo ahariiwe. Baibuli neegira ngu: “Mweheyo ahariiwe: nk’ebitambo ebihuriire, ebirikwera kandi ebirikusiimwa.”—Rom. 12:1, The New English Bible.

Ekikorwa kya Rukundo n’Okwikiriza

14. Okwehayo nikworeka kuta Rukundo?

¹⁴ Okurahira kwehayo ahari Ruhanga n’ekikorwa ekirikworeka rukundo mpango ei oiniire Yehova. Eki nikishushana n’endahiro y’okugaitwa. Omushaija Omukristaayo naayoreka ngu naakunda omugore we arikurahira kuguma amuhamiireho n’obu haakubaho ki. Oku n’okumariirira kuhamira aha muntu beitu kutari kuragaanisa kukora ekintu. Omugore Omukristaayo naayetegyereza ngu tarikubaasa kutuura n’omukundwa we yaaba atagaitsirwe nawe. Nikyo kimwe, titurikubaasa kugasirwa omu bwijwire omu migisha y’okuba bamwe aha b’eka ya Yehova twaba tutehaireyo. N’ahabw’ekyo nitucwamu kwehayo ahari Ruhanga, n’obu twakuba tutahikiriire, twine ekihika ky’okuba abe n’okumariirira kumuhamiraho, n’obu haakubaho ki.—Mat. 22:37.

15. Okwehayo n’ekikorwa ky’okwikiriza mu muringo ki?

¹⁵ Okwehayo ahari Ruhanga, n’ekikorwa ky’okwikiriza. Ahabw’enki kiri kityo? Okwikiririza omuri Yehova nikitureetera kugira obwesigye ngu okwirira haihi Ruhanga nikitugasira. (Zab. 73:28) Nitumanya ngu tikirikwija kutworobera kugyenda na Ruhanga aha gati “y’ab’obusingye obukiikami oburikwehabagiza,” kwonka nitwesiga Ruhanga ngu naija kutushagika omu kuteeraho kwaitu. (Fil. 2:15; 4:13) Nitumanya ngu tituhikiriire, kwonka twine obwesigye omuri Ruhanga ngu naija kutugirira embabazi twakora enshobe. (Shoma Zaaburi 103:13, 14; Abarooma 7:21-25.) Nitwikiriza ngu Yehova naija kutuha ebihembo ahabw’okumariirira kuguma turi abeesigwa.—Yob 27:5.

Okwehayo Ahari Ruhanga Nikituhitsya aha Kushemererwa

16, 17. Ahabw’enki okwehayo ahari Yehova nikureeta okushemererwa?

¹⁶ Okuba omuheereza wa Yehova ayehaireyo nikireeta okushemererwa ahakuba nikitwariramu okuhayo byona ebi twine. Yesu akagamba amazima makuru ati: ‘Okugaba nikureeta okushemererwa okukira okuheebwa.’ (Byak. 20:35) Yetegyereza gye oku okuha kwareeteire Yesu okushemererwa omu buheereza bwe omu nsi. Obumwe, akaba abura obwire bw’okuhuumuraho, kurya, nari kukora ebi arikwenda kubaasa kuhwera abandi kuza omu muhanda ogurikuhitsya omu magara. (Yoh. 4:34) Yesu akaba asherura oburyo bw’okureetera omutima gwa Ishe kushemererwa. Akagira ati: ‘Obutoosha ninkora ebirikumushemeza.’—Yoh. 8:29; Enf. 27:11.

¹⁷ N’ahabw’ekyo, Yesu akeegyesa abakuratsi be omuringo gw’okuheereza gurikureeta okumarwa arikugira ati: “Omuntu weena ku araayende kunkuratira, ayeyangise.” (Mat. 16:24) Twakikora nitwirira haihi Yehova. Mbwenu shi hariho omuntu weena ou turikubaasa kweta omu mikono ye orikutufaho munonga okukira Yehova?

18. Ahabw’enki okukora ebirikuhikaana n’okwehayo kwaitu ahari Yehova kirikureeta okushemererwa okukira ebindi byona?

¹⁸ Okwehayo ahari Yehova kandi tukahamira aha kucwamu kwaitu turikukora ebi arikukunda nikireeta okushemererwa kwingi okukira okwehayo aha kintu ekindi kyona. Nk’eky’okureeberaho, bantu baingi abarikuta omutima aha kusherura eby’obugaiga tibarikutunga okushemererwa n’okumarwa okwabuzima. Kwonka, abarikwehayo ahari Yehova nibatunga okushemererwa okw’obutwire. (Mat. 6:24) Ekitiinisa ‘ky’okukora nawe’ nikibareetera okushemererwa, kandi okwehayo kwabo tikirikumanyisa okuba abahuuku, kureka nibakikora kworeka okusiima. (1 Kor. 3:9) Niwe arikukirayo kusiima okwefeerereza kwabo okukira omuntu ondiijo weena. Naija kuha abaheereza be abeesigwa amagara g’obunyeeto kugira ngu babaase kugumizamu nibagasirwa omu migisha ye ebiro byona.—Yob. 33:25; shoma Abaheburaayo 6:10.

¹⁹Waayehayo ahari Yehova noogira omukago guhami nawe. Baibuli neegira eti: “Mwirire haihi Ruhanga, nawe abone kubairira haihi.” (Yak. 4:8; Zab. 25:14) Omu kicweka ekirikukurataho, nituza kureeba ahabw’enki nitubaasa kwesiimira omu kucwamu kwaitu kwehayo kuba aba Yehova.

[Obugambo obw’Ahansi]

Noobaasa Kugarukamu Ota?

• Okwehayo ahari Ruhanga nikimanyisa ki?

• Okwehayo ahari Yehova nikitugasira kita?

• Ahabw’enki Abakristaayo baine kwehayo ahari Yehova?

[Ebibuuzo by’obucweka]

19. Abarikwehayo ahari yehova nibatunga mugisha ki?

[Ekishushani]

Okukora ebirikuhikaana n’okwehayo kwaitu nikutureetera okushemererwa okwabuzima