1, 2. Entumwa Paulo akooreka ata ngu akaba naasiima embabazi za Ruhanga?

ENTUMWA Paulo akagira ati: “Embabazi ze [Ruhanga] ahariinye tizirabaire za busha.” (Shoma 1 Abakorinso 15:9, 10.) Paulo akaba naakimanya gye ngu Ruhanga tashemereire kumugirira embabazi, ahabw’okugira ngu Paulo omu kubanza akaba naahiiganisa Abakristaayo.

² Paulo ari haihi kufa akahandiikira Timoseo omuheereza wa Ruhanga mugyenzi we ati: “Ninsiima Kristo Yesu Mukama waitu owampaire amaani, ahabw’okuba akanteekateekaho kuba omwesigwa, yampa omurimo gw’okumuheereza.” (1 Tim. 1:12-14) Omurimo gw’okuheereza gukaba guri guuha? Paulo akagambira abareeberezi b’ekibiina kya Efeso eki obuheereza obwo bwabaire nibutwariramu ati: “Tindikuteekateeka ha magara gangye nk’ekintu kikuru eky’obuguzi; eki ndikwenda ni kimwe, n’okuheza orugyendo rwangye n’obuheereza obu  naahairwe Mukama waitu Yesu, obw’okuhamya engiri y’embabazi za Ruhanga.”​—Byak. 20:24.

3. Ni buheereza ki obw’omutaano obu Paulo yaahairwe? (Reeba ekishushani aha kutandika.)

³ Ni ‘ngiri’ ki nari makuru marungi ki agu Paulo yaabuuriire agaabaire nigooreka embabazi za Yehova? Akagambira Abakristaayo ba Efeso ati: ‘Mukahurira oku naakwatsiibwe embabazi za Ruhanga ezi naahairwe ahabwanyu.’ (Efe. 3:1, 2) Paulo akaba ahairwe obujunaanizibwa bw’okujanjaaza amakuru marungi omu batari Bayudaaya, kugira ngu nabo babaase kuba bamwe aha baraategyekye na Kristo omu gavumenti y’omu iguru. (Shoma Abaefeso 3:5-8.) Paulo akateeraho Abakristaayo ab’obunaku obu eky’okureeberaho kirungi arikubuurira n’omujinya kworeka ngu embabazi za Ruhanga ezi yaagiriirwe zikaba zitari “za busha.”

4, 5. Ahabw’enki turikubaasa kugira ngu amakuru marungi g’Obukama nikyo kimwe ‘n’embabazi za Ruhanga’?

⁴ Omu biro ebi eby’emperu, abaheereza ba Yehova bahairwe obujunaanizibwa bw’okubuurira amakuru marungi “okuba eky’okuhamya aha mahanga goona.” (Mat. 24:14) Obutumwa obu turikujanjaaza kandi nibwetwa “engiri y’embabazi za Ruhanga” nari amakuru marungi g’embabazi za Ruhanga ahabw’okugira ngu emigisha yoona ei Obukama bwa Ruhanga buraareete n’ahabw’embabazi za Ruhanga kurabira omuri Kristo. (Efe. 1:3) Mbwenu shi buri omwe ahariitwe naatooreza Paulo omu kusiima embabazi za Yehova arikwejumba omu buheereza n’obweziriki?​—Shoma Abarooma 1:14-16.

⁵ Omu kicweka ekihwaire, twegire oku itwe abasiisi turikugasirwa omu mbabazi za Yehova omu miringo mingi. N’ahabw’ekyo twine eibanja aha bantu boona, kukora kyona ekirikubaasika kubamanyisa oku Yehova arikworeka rukundo ye n’oku buri omwe aharibo arikubaasa kugigasirwamu. Nitubaasa kuhwera tuta abandi kugasirwa omu mbabazi za Ruhanga?

6, 7. Twashoboororera abantu ebirikukwata aha kitambo, nituba nitujanjaaza tuta amakuru marungi g’embabazi za Ruhanga?

⁶ Obunaku obu, abantu baingi tibarikweshiinja baaheza kushiisha, n’ahabw’ekyo tibarikwetegyereza ahabw’enki abantu nibeetenga ekitambo. Kandi nabwo, abandi baingi nibareeba ngu emitwarize mibi yaabo terikubareetera okushemererwa okwabuzima. Abantu baingi ku barikuba batakagambireho na Abajurizi ba Yehova, nibaba batarikumanya eki ekibi kirikumanyisa, oku kirikubakwataho, n’eki twine kukora kubaasa kucungurwa kuruga omu buhuuku bw’ekibi. Abacureezi nibatunga oburuhuuko ku barikwega ngu Yehova akoohereza Omwana we omu nsi kutucungura ekibi n’okufa, arikwihirira ahari rukundo ye mpango n’embabazi ze.​—1 Yoh. 4:9, 10.

⁷ Paulo arikugamba aha Mwana wa Yehova omukundwa, akahandiika ati: “Omuri ogwo [Yesu] tuheebwa okucungurwa ahabw’eshagama ye, okusaasirwa eby’okushiisha byaitu, nk’obutungi bw’embabazi ze oku buri.” (Efe. 1:7) Ekitambo kya Kristo nibwo buhame oburikukirayo oburikworeka rukundo ei Ruhanga atwiniire, kandi nikyoreka n’embabazi ze nyingi ezi yaatugiriire. Ka nikituhuumuriza kumanya ngu twaikiriza ngu eshagama ya Yesu ekasheesheka, nitwija kusaasirwa ebibi byaitu kandi  n’emitima yaitu neija kuba eshemeire! (Heb. 9:14) Aga buzima ka n’amakuru marungi g’okugambiraho abandi!

8. Ahabw’enki abantu abasiisi nibeetenga kugarukana na Ruhanga?

⁸ Twine obujunaanizibwa bw’okugambira abantu oku barikubaasa kugira omukago murungi n’Omuhangi waabo. Abantu baaba batakaikiririize omu kitambo kya Yesu, Ruhanga naaba naabatwara nk’abazigu be. Entumwa Yohaana akahandiika ati: “Orikwikiriza Omwana aine amagara agatahwaho; kwonka otarikworobera Mwana, taribona magara; kureka ekiniga kya Ruhanga kiguma ahariwe.” (Yoh. 3:36) Ekirikushemeza, ekitambo kya Kristo nikibaasisa omuntu kugarukana na Ruhanga. Paulo akongyeraho ati: “Naimwe abaabaire bataanisiibwe ira na Ruhanga, kandi abazigu omu biteekateeko byanyu nimukora ebibi, mbwenu Yesu abagarukaniise na Ruhanga omu mubiri gwe ogw’obuntu ahabw’okufa kwe.”​—Kol. 1:21, 22.

9, 10. (a) Ni bujunaanizibwa ki obu Kristo yaahaire beene Ishe abashukirweho amajuta? (b) ‘Ab’entaama ezindi’ nibahwera bata ab’eishe-emwe bagyenzi baabo abashukirweho amajuta?

⁹ Kristo ahaire beene Ishe abashukirweho amajuta abakiri omu nsi eki Paulo yaayetsire “omurimo gw’okugarukanisa abantu na Ruhanga.” Paulo arikushoboorora eki, akahandiikira Abakristaayo abashukirweho amajuta ab’omu kyasha ky’okubanza ati: ‘Byona biruga ahari Ruhanga, owaatwegaruririire omuri Kristo, akatuha omurimo gw’okugarukanisa abantu na Ruhanga; ekirikushoboororwa ngu Ruhanga akaba naayegarurira abari omu nsi kurabira omuri Kristo, atakibabarira by’okushiisha byabo, kandi naitwe yaatukwatsa ekigambo ky’okugarukanisa okwo. Mbwenu turi entumwa omu mwanya gwa Kristo, Ruhanga naashusha nk’orikweshengyereza abantu omuriitwe. Naitwe nitubeeshengyereza omu iziina rya Kristo, mugarukane na Ruhanga.’​—2 Kor. 5:18-20.

¹⁰ ‘Ab’entaama ezindi’ nibagureeba nk’omugisha kuhwera ab’eishe-emwe abashukirweho amajuta omu buheereza obu. (Yoh. 10:16) Ab’entaama ezindi barikukora nk’abatumirwe Kristo, nibakora kihango omu kwegyesa abantu amazima n’okubahwera kugira omukago murungi na Yehova. Ogu n’omurimo mukuru omu kubuurira amakuru marungi g’embabazi za Ruhanga.

11, 12. Ahabw’enki gari amakuru marungi abantu kwegyesibwa ngu nibabaasa kushaba Yehova?

¹¹ Abantu baingi nibashaba ahakuba nikibareetera kwehurira gye, kwonka tibarikwikiriza ngu Ruhanga naahurira okushaba kwabo. Baine kumanya ngu Yehova niwe ogwo “ohurira okushaba.” Omuhandiiki wa Baibuli Daudi akahandiika ati: “Iwe ohurira okushaba, abantu boona baryaija ah’ori. Eby’okutahikiirira n’obu biraabe nibituremesa, kwonka Iwe otusaasira eby’okushiisha byaitu.”​—Zab. 65:2, 3.

¹² Yesu akagambira abeegi ati: “Ku murishaba ekintu kyona omu iziina ryangye, ndakikora.” (Yoh. 14:14) Buzima, “ekintu kyona” nikimanyisa kyona ekirikuhikaana n’ebi Yehova arikukunda. Yohaana naatuhamiza ati: “Obu nibwo bumanzi obu twine omuriwe, ngu ku tushaba ekintu kyona nk’oku akunda, atuhurira.” (1 Yoh. 5:14) Ka ni kirungi kwegyesa abandi ngu okushaba nikuhwera abantu kwirira haihi “n’ekitebe ky’embabazi” ekya Ruhanga, omu  mwanya gw’okubahwera kwehurira gye kyonka! (Heb. 4:16) Twabeegyesa kushaba Ruhanga ohikire, kandi bakashaba n’ebintu ebihikire, nikibaasa kubahwera kwirira haihi na Yehova, reero batungye okuhuumurizibwa baaba baine obujune.​—Zab. 4:1; 145:18.

13, 14. (a) Abashukirweho amajuta nibaija kutunga bujunaanizibwa ki omu biro by’omumaisho? (b) Ni murimo ki ogw’omutaano ogu abashukirweho amajuta barikwija kukorera abantu?

¹³ Yehova naija kugumizamu naatworeka embabazi ze kuraba omu nsi egi embi. Paulo akahandiika aha mugisha gw’omutaano ogu Ruhanga ahaire 144,000, abarikuza kutegyeka na Kristo omu Bukama bw’omu iguru ati: ‘Ruhanga ahabw’okuba omutungi w’embabazi, omu kukunda kwe kwingi oku yaatukunzire, n’obu twabaire turi abafu omu by’okushiisha byaitu, akatuhindura abahuriire hamwe na Kristo, yaatuzoora hamwe nawe, yaatushutamya nawe omu myanya y’omu iguru omuri Kristo Yesu, ngu omu busingye oburiija ayorekye obutungi bw’embabazi ze obutarikugyerwa omu birungi ebi yaatukoreire omuri Kristo Yesu.’​—Efe. 2:4-7.

¹⁴ Nitubaasa kutebeereza emigisha ei Yehova ainiire Abakristaayo abashukirweho amajuta ku baraashutame aha bitebe byabo kutegyeka na Kristo omu iguru. (Luk. 22:28-30; Fil. 3:20, 21; 1 Yoh. 3:2) Yehova naija kubooreka “obutungi bw’embabazi ze obutarikugyerwa.” Nibaija kuba nibeetwa “Yerusaalemu orusya,” niwe omugore wa Kristo. (Kush. 3:12; 17:14; 21:2, 9, 10) Nibaija kukora hamwe na Yesu ‘kutambira amahanga,’ barikuhwera abantu kuruga omu mwaga gw’ekibi n’okufa bakaba abahikiriire.​—Shoma Okushuuruurwa 22:1, 2, 17.

15, 16. Yehova naija kworeka ata embabazi ze ab’entaama ezindi omu biro by’omumaisho?

¹⁵ Omu Abaefeso 2:7, nihooreka ngu Ruhanga naija kworeka embabazi n’omu “busingye oburiija.” Hatariho kubanganisa, omu bunaku obwo buri omwe omu nsi naija kubaasa kureeba obwingi “bw’embabazi ze obutarikugyerwa.” (Luk. 18:29, 30) Kimwe aha bintu bikuru ebirikwija kukirayo kworeka embabazi za Yehova, n’okuzoora abantu kuruga omu “bituuro.” (Yob. 14:13-15; Yoh. 5:28, 29) Abashaija n’abakazi abeesigwa abaafiire Yesu atakafiire akaba ekitambo, otwariiremu n’ab’entaama ezindi abarikufa bari abeesigwa omu biro ebi eby’emperu, nibaija kuzoorwa bagumizemu nibaheereza Yehova.

¹⁶ Abantu nyamwingi abarikufa batakamanyire Ruhanga nabo nibaija kuzoorwa. Nibaija kuheebwa omugisha gw’okworobera Yehova ohikire kutegyeka byona. Yohaana akahandiika ati: “Naareeba abafu, abakuru n’abato, beemereire omu maisho g’ekitebe ky’obukama, ebitabo byashuuruurwa. N’ekitabo ekindi kyashuuruurwa, nikyo eky’amagara. Abafu baacwerwa emanja z’ebyahandiikirwe omu bitabo nk’ebi baakozire oku biri. Enyanja yaagarura abafu abaabaire bagirimu, na Rufu n’Okuzimu byagarura abafu abaabaire bariyo; boona baacwerwa emanja ez’ebi baakozire.” (Kush. 20:12, 13) Abo abaraazoorwe nikiija kubeetengyesa kwega emisingye ya Ruhanga eri omu Baibuli n’okugigyenderaho. Okwongyera ahari ekyo, nibaija kwega obuhabuzi busya oburaabe buri omu mizingo oburikworeka ebi Yehova arikwenda ngu abaraatuure omu nsi ensya bakore. Yehova okubaikiriza kumanya ebiri omu mizingo egi, nakyo nikyoreka embabazi ze.

17. Tushemereire kuguma nitwijuka ki twaba nitwejumba omu kubuurira?

¹⁷ Kukira obundi bwona, obu emperu eri haihi ekigyendererwa kyaitu kishemereire kuba eky’okubuurira amakuru marungi! (Mak. 13:10) Hatariho kubanganisa, amakuru marungi nigooreka embabazi za Yehova. Tushemereire kuguma nitwijuka eki twaba nitubuurira. Ekigyendererwa kyaitu twaba nitubuurira n’okuhaisa Yehova ekitiinisa. Nitubaasa kukora eki turikworeka abantu ngu emigisha yoona ei turikwija kutunga omu nsi ensya, neeyoreka embabazi za Yehova ez’omutaano.

18, 19. Nitworeka tuta ngu nitutwara embabazi za Yehova nk’ez’omuhendo?

¹⁸ Twaba nitubuurira abandi, nitubaasa kubashoboororera ngu Kristo ku araabe naategyeka, abantu nibaija kutunga emigisha y’ekitambo mporampora babe abahikiriire. Baibuli neegira eti: “Ebihangirwe ebyo nabyo biryacungurwa, birekye kuba eby’okujunda, kureka biheebwe obusingye bw’abaana ba Ruhanga obw’ekitiinisa.” (Rom. 8:21) Eki nikiija kubaasika ahabw’embabazi za Yehova ez’omutaano.

¹⁹ Twine omugisha gw’okugambira boona abarikuhurikiza, ebirungi ebi Ruhanga arikuraganisa omu Okushuuruurwa 21:4, 5: “[Ruhanga] aryaragaza amarira goona aha maisho gaabo; tiharibaho kufa bundi, n’obu kwakuba okucura nari okurira nari obusaasi, ahakuba ebya ira biryaba bihweireho.” Kandi Yehova, ogwo oshutami aha ntebe naagira ati: “Reeba nimpindura byona bisya kandi yaangira ati: Handiika, ahakuba ebigambo ebi n’eby’okwesigwa kandi eby’amazima.” Ku turikubuurira abandi amakuru marungi aga n’omuhimbo, nitworeka ngu nitutwara embabazi za Yehova nk’ez’omutaano!