Baibuli Neehindura Emitwarize Y’abantu

NIKI ekyahigire omurasita kutega eishokye rye kandi akasingura okushoroora ab’erangi erikwera? Kandi niki ekyabaasiise omutsigazi enshaarizi owaabaire naarundaana esente z’abarikuguza emibazi y’ekitabura bwongo kuhindura emitwarize ye? Yetegyereze eki abantu aba barikugamba.

“Nkasingura n’Okushoroora Kwangye.”​—HAFENI NGHAMA

EMYAKA: 34

EIHANGA RY’OBUZAARWA: ZAMBIA

EBY’ENYIMA: OMURASITA

EBI NAARABIREMU: Nkazaariirwa omu nkambi y’empungi omuri Zambia. Maawe akaba ahungire omuri Namibia omu bwire bw’orutaro kandi akaba ayegaitsire aha kibiina kya South West Africa People’s Organization (SWAPO). Ekibiina eki kikaba nikirwanisa gavumenti ya South Africa eyaabaire neetegyeka Namibia omu bwire obwo.

Nkatuura omu nkambi z’empungi nyingi kumara emyaka 15. Abaana omu nkambi za SWAPO bakaba bakuzibwa barikutendekwa kurwanirira obugabe bwabo.Tukeegyesibwa eby’obutegyeki n’okwanga ab’erangi erikwera.

Obu naabaire nyine emyaka 11, nkaba niinyenda kuhamibwa nk’Omukristaayo omu kanisa y’omu nkambi ey’Abanyakaturiki, Abaruzareeni, Abaporotesitanti, n’ezindi. Pasita ou naagambire nawe akammaramu amaani g’okukikora. Kuruga obwo, nkarekyera aho kwikiririza omuri Ruhanga. Aha myaka 15, rukundo ei naabaire nyiniire ebyeshongoro by’abarasita n’okwenda kurwanisa obutari buringaaniza obwabaire nibuhika aha bairaguju bikandeetera kwegaita aha kibiina ky’Abarasita. Nkakuza eishokye, naareetsa enjaayi, naarekyera aho okurya enyama kandi naarwanirira obugabe bw’Abairaguju. Kwonka, tindahindwire omu mitwarize yangye y’obushambani nari okurekyera aho okureeba vidiyo z’obushaarizi. Kandi nkagumizamu ninkoresa ebigambo bibi.

OKU BAIBULI YAAHINDWIRE EMITWARIZE YANGYE: Omuri 1995, obu naabaire nyine emyaka nka 20, nkatandika kuteekateeka munonga aha magara gangye. Nkaba ninshoma ebitabo by’Abarasita byona ebi naabaire nintunga. Bimwe aharibyo bikaba nibijuriza Baibuli, kwonka ebi byabaire nibishoboorora bikaba bitarikukora makuru. N’ahabw’ekyo nkacwamu kweshomera Baibuli.

Bwanyima, munywani wangye Omurasita akampa akatabo akarikushoboorora Baibuli akateirwe Abajurizi ba Yehova. Ndi nyenka, nkeeshomesa akatabo aka, na Baibuli. Bwanyima nkabugana Abajurizi ba Yehova reero baagumizamu nibanyegyesa Baibuli.

Nkateeraho munonga, naacwa okureetsa, n’amaarwa. (2 Abakorinso 7:1) Nkeeboneza, naatega eishokye ryangye, naarekyera aho okureeba ebirikwitsa enshoni na vidiyo z’obushaarizi, kandi naayetantara kukoresa ebigambo bibi. (Abaefeso 5:3, 4) Bwanyima nkarekyera aho kushoroora abarikwera. (Ebyakozirwe 10:34, 35) Okukora empinduka ezi kikaba nikimanyisa okurekyera aho kuhurikiza ebyeshongoro ebyabaire nibishagika okushoroora n’okwecwaho banywani bangye aba ira, abaabaire nibateeraho kungarura omu mitwarize yangye ey’enyima.

Bwanyima y’okukora empindahinduka ezo, nkasherura Ekyombeko ky’Obukama eky’Abajurizi ba Yehova, kandi naashaba kwegaita aha diini yaabo. Bakanyegyesa Baibuli. Ku naacwiremu kubatizibwa nk’omwe aha Bajurizi ba Yehova, ab’omuka tibarashemereirwe. Maawe akangira ngu nimbaasa kutoorana ediini endiijo “ey’Abakristaayo” kwonka etari y’Abajurizi ba Yehova. Tatento, owaabaire naamanywa munonga omu gavumenti, butoosha akaba naagamba kubi okucwamu kwangye kukwatanisa n’Abajurizi ba Yehova.

Kwonka, okwega aha muringo ogu Yesu yaatwariizemu abantu n’okugyendera aha buhabuzi bwe kikampwera kusingura okuhakanisibwa n’okujumwa. Ku naagyeragyeraniise eki Abajurizi ba Yehova baabaire nibagamba n’eki Baibuli erikugamba, nkahamiza kimwe ngu nkaba ntugire ediini ey’amazima. Nk’eky’okureeberaho, nibakuratira ekiragiro kya Baibuli eky’okubuurira abandi. (Matayo 28:19, 20; Ebyakozirwe 15:14) Kandi tibarikwejwanzya omu by’obutegyeki.—Zaaburi 146:3, 4; Yohaana 15:17, 18.

OKU NGASIIRWE: Okwega kugyendera aha mitindo ya Baibuli kimpweraire omu miringo mingi. Nk’eky’okureeberaho, okucwa okukoresa enjaayi kimpweraire kutashohoza esente nyingi buri kwezi. Tinkiroota omu ihangwe kandi ebiteekateeko byangye n’omubiri gwangye hati biri gye.

Hati niimanya ekigyendererwa ky’okubaho eki naabaire niinyenda kuruga omu bunyeeto bwangye. Kandi okukira byona, hati nimpurira ndi haihi na Ruhanga.—Yakobo 4:8.

“Nyegire Kutegyeka Ekiniga Kyangye.”​—MARTINO PEDRETTI

EMYAKA: 43

EIHANGA RY’OBUZAARWA: AUSTRALIA

EBY’ENYIMA: ORIKUGUZA EMIBAZI

EBI NAARABIREMU: Eka yaitu ekaba neefuruka munonga obu twabaire tukiri bato. Nkatuura omu tauni, endembo mpango, kandi kumara obwire nkatuuraho omu kyaro hare n’etauni. Ninkiijuka gye obwire burungi obwo obu naabaire ndi na n’abanyabuzaare bangye na baatatento​ turikujuba eby’enyanja, turikuhiiga, turikukora enjungu, n’ebindi ebibaizirwe.

Tata akaba ari omuteezi w’ebikonde kandi akatandika kunyegyesa kurwana nkiri muto munonga. Obushaarizi bukahinduka ekya butoosha ahariinye. Omu bunyeeto bwangye, nkaba niimara obwire bwingi ndikunywa amaarwa omu baara. Nyowe na banywani bangye tukaba nitusherura ab’okurwana nabo. Tukaba tukoresa ebisyo n’emihini kurwanisa abantu nka 20 nari n’okukiraho.

Nkaba ntuga esente ndikuguza emibazi, n’ebintu ebi abakozi b’aha mwaro baabaire nibaiba. Nkaba ninshorooza esente z’abarikuguza emibazi y’ekitabura bwongo, kandi bakaba bantuma kutiinatiinisa abantu ndikukoresa embundu. Ekigyendererwa kyangye kikaba kiri okuba omwitsi rugambwa. Nkaba nyine engamba ngu, yita ninga oyitwe.

OKU BAIBULI YAAHINDWIRE EMITWARIZE YANGYE: Nkahurira ebirikukwata aha Bajurizi ba Yehova obu naabaire nkiri muto. Ku naabaire nyine emyaka nka 20, nkaijuka obu naabuuza maawe ku araabe naamanya ahu Abajurizi ba Yehova baabaire bari. Bwanyima y’ebiro bibiri Omujurizi wa Yehova orikwetwa Dixon akaiguza aha rwigi rwangye. Ku twaherize kugaaniira akanyeta omu nteerane z’Abajurizi ba Yehova. Nkazayo, kandi ntwire ninza omu nteerane ezo kumara emyaka nka 20. Buri kibuuzo eki naabaire nyine, Abajurizi ba Yehova bakakigarukamu barikukoresa Baibuli.

Kikanshemeza kumanya ngu Yehova naafayo aha bantu boona, nangwa n’ababi. (2 Petero 3:9) Nketegyereza ngu ni Tata owa rukundo orikwija kundeeberera, n’obu haakubura ow’okundeeberera. Nkaruhuuka ku naamanyire ngu naaza kunsaasira ebibi byangye, kandi ahindure emitwarize yangye. Emishororongo eri omu Abaefeso 4:22-24 ekankwataho munonga. Ekampiga “[kujuura] omuntu owa ira” reero “[nkajwara] omuntu ondiijo omusya, owaahangirwe omu nshusha ya Ruhanga.”

Kikantwarira obwire kuhindura emitwarize yangye. Nkaba mmara saabiiti yoona ntarikukoresa emibazi y’ekitabura bwongo, kwonka aha wiikenda, nkaba ngikoresa ahabw’okugyemeserezibwa banywani bangye. Nketegyereza ngu nkaba nyine kwecwaho banywani bangye naaba niinyenda kuba oshemeire, n’ahabw’ekyo nkafuruka naaza omu kicweka ekindi. Banywani bangye abamwe bakeehayo kunshendekyereza aha rugyendo rwangye, kandi nkaikiriza. Aha rugyendo, bakatandika kureetsa enjaayi kandi naanye baangimpa. Nkabagambira ngu nkaba ndekire emize egyo, kandi tukataanira aha nsharo. Bwanyima nkahurira ngu banywani bangye bakaiba banka, barikukoresa embundu.

OKU NGASIIRWE: Ku naaherize kwecwaho banywani bangye, kikaba kyorobi kukora empinduka ezaabaire nizeetengyesa. Omuri 1989, nkabatizibwa nk’omwe aha Bajurizi ba Yehova. Ku naaherize kubatizibwa, munyaanyazi, maawe, na tata boona bakanyegaitaho omu kuheereza Yehova.

Hati mmazire emyaka 17 omu bushwere kandi nyine abaana bashatu barungi. Nyegire kutegyeka ekiniga kyangye, n’obu naakutwarizibwa kubi. Kandi nyegire kukunda abantu abarikuruga ‘omu mahanga goona n’enganda zoona, n’endimi zoona.’ (Okushuuruurwa 7:9) Ningira ngu ebigambo bya Yesu bihikiriire ahariinye. Akagira ati: ‘Ku muraahamire aha kigambo kyangye, nimuba muri abeegi bangye buzima, kandi nimwija kumanya amazima, n’amazima nigaija kubahindura ab’obusingye.’—Yohaana 8:31, 32.

[Ekishushani]

Okukora empinduka kikaba nikitwariramu okweyihaho ebyeshongoro ebyabaire nibishagika okushoroora

[Ekishushani]

Nyowe na banywani bangye tukaba nitusherura ab’okurwana nabo. Tukaba nitukoresa ebisyo n’emihini kurwanisa abantu nka 20 nari n’okukiraho