Baibuli Neehindura Emitwarize Y’abantu

OMWISHIKI owaakuriire omu mbeera zigumire akatunga ata ekigyendererwa ky’okubaho? Niki ekyahigire omuheekyera kuba omubuurizi w’obusingye? Shoma ebirikubakwataho kutunga eby’okugarukamu.

“Nkaba ninsherura rukundo n’okufuubwaho kifuba.”​—INNA LEZHNINA

OMWAKA OBU NAAZAARWA: 1981

EIHANGA RY’OBUZAARWA: RUSSIA

EBY’ENYIMA: EMBEERA ZIGUMIRE OMU BUTO

EBI NAARABIREMU: Nkazaarwa ndi omuteta ndikuzaarwa abazaire abateta. Emyaka mukaaga ey’obuto bwangye ekaba eri mirungi. Bwanyima abazaire bangye bakagaitururwa. N’obu ndaabe naabaire ndi muto munonga, nkaba niimanya eki okugaitururwa kirikumanyisa, kandi kikagwisa kubi munonga. Bwanyima y’abazaire baitu kugaitururwa, tata na munyaanyazi omukuru bakaguma omu rurembo Troitsk, reero nyowe na maawe twaza kutuura omuri Chelyabinsk. Bwanyima y’obwire maawe akaza omu bushwere obundi. Iba maawe akaba ari omusinzi, kandi akaba naakira kuteera maawe naanye.

Omuri 1993, munyaanyazi omukundwa akagwa omu maizi. Butandu egi ekaba akagwe aha ka yoona. Maawe nawe akatandika kunywa amaarwa, kandi yaayegaita ahari iba kunyaangaraza. Nkatandika kusherura embeera nungi. Nkaba ninsherura rukundo n’okufuubwaho kifuba. Nkatandika kuza omu makanisa gatari gamawe na gamwe, kusherura okuhuumurizibwa, kwonka tindakuboine.

OKU BAIBULI YAAHINDWIRE EMBEERA ZANGYE: Obu naabaire nyine emyaka 13, ou naabaire ninshoma nawe, owaabaire ari Omujurizi wa Yehova, akagambire ebitebyo bimwe kuruga omu Baibuli. Nkashemererwa kwega aha bantu abamwe nka Noa na Yobu, abaaheereize Ruhanga n’obu embeera zaabo ziraabe zaabaire zigumire. Ahonaaho nkatandika kwega Baibuli n’Abajurizi ba Yehova n’okuza omu nteerane zaabo.

Okwega Baibuli kukaigura amaisho gangye naamanya amazima g’omuhendo. Kikankwataho kumanya ngu Ruhanga aine eiziina. (Zaaburi 83:18) Nkasiima kureeba ngu Baibuli neegamba gye aha embeera ezaabaire niziija kubaho omu ’biro by’emperu.’ (2 Timoseo 3:1-5) Kandi kukanshemeza kwega aha matsiko g’okuzooka. Kiteekateekyeho, ngu niinyija kugaruka kureeba munyaanyazi!—Yohaana 5:28, 29.

Kwonka, ti buri omwe ngu akasiima okushemererwa kwangye oku naatungire. Maawe na iba bakaba nibaangira kimwe Abajurizi ba Yehova. Bakateeraho kungyemesereza kurekyera aho kwega Baibuli. Kwonka nkaba ninkunda ebi naabaire ninyega, kandi nkaba mmaririire kugumizamu.

Kikaba kitoorobi kwemera okuhakanisibwa kw’eka yaangye. Akagwe akandi kakagwa obu munyaanyazi omuto owaabaire naagyenda naanye omu nteerane nawe ku yaagwire omu maizi. Kwonka, Abajurizi ba yehova butoosha bakaba baba bariho kumpwera. Omuribo nkatunda rukundo n’okufuubwaho ebi naabaire ntwire ninsherura. Nkaba niimanya ngu egi eshemereire kuba niyo ediini ehikire. Omuri 1996, nkabatizibwa naabo omwe aha Bajurizi ba Yehova.

OKU NGASIIRWE: Emyaka mukaaga ehingwire, ntwire omu bushwere n’omushaija murungi orikwetwa Dmitry. Twembi nituheereza aha ofiisi y’eitaagi ey’Abajurizi ba Yehova omuri St. Petersburg. Bwanyima emiteekateekyere y’abazaire bangye aha nyikiriza zangye ekahinduka.

Ninsiima munonga ahabw’okumanya Yehova! Okumuheereza kimpweraire kumanya ekigyenderewa ky’okubaho.

“Nkaba Nyine Ebibuuzo Bingi.”​—RAUDEL RODRÍGUEZ RODRÍGUEZ

OMWAKA OBU NAAZAARWA: 1959

EIHANGA RY’OBUZAARWA: CUBA

EBY’ENYIMA: OMUHEEKYERA

EBI NAARABIREMU: Nkazaarirwa omuri Havana, Cuba, kandi nkakurira omu kicweka ekyabaire kiijwiremu obworo n’endwano nyingi. Ku naabaire ninkura nkatandika kukunda omuzaano gw’entomi n’endiijo mizaano erimu okurwana.

Nkaba ndi omwegi murungi, n’ahabw’ekyo abazaire bangye bakampiga kuza aha yunivasite. Ku naabaire ndi aha yunivasite, nkatandika kureeba ngu eby’obutegyeki omu ihanga ryaitu bikaba biine kuhinduka. Nkacwamu kuba omuheekyera. Nyowe n’ou naabaire ninshoma nawe, tukataahirira omuserukare turikwenda kumwibaho embundu ye. Okutaahirira kwaitu kukareetera omuserukare ogwo kugira obuhuta bw’amaani aha mutwe gwe. Nyowe n’ou naabaire ninshoma nawe tukateebwa omu kihome kandi baatucwera ogw’okufa turikuteerwa amasasi. Nkaba nyine emyaka 20 yonka, kwonka nkaba ndiyo ninza kufa!

Ku naabaire ndi nyenka omu kihome, nkegyezamu oku ndatwaze batankateire amasasi. Nkaba ntarikwenda kworeka ngu ntiinire. Kwonka, nkaba nyine ebibuuzo bingi. Nkeebuuza nti: ‘Ahabw’enki ensi eijwiiremu obutari buringaaniza? Aga nigo magara gonka?’

OKU BAIBULI YAAHINDWIRE EMITWARIZE YANGYE: Ekifubiro ky’okwitwa eki baabaire batuhaire bakakihindura baatuha eky’okumara emyaka 30 omu kihome. Omu bwire obwo, nibwo naabugana bamwe aha Bajurizi ba Yehova, abaabaire bakomirwe ahabw’enyikiriza zaabo. Obumanzi bwabo n’omuringo gw’obusingye ogu baabaire nibatwazamu gukantangaaza. N’obu baraabe baabaire bakomirwe omu buryo butahiikire, bakaba bataine kiniga nari barikutwaza kubi.

Abajurizi ba Yehova bakanyegyesa ngu Ruhanga ainiire abantu ekigyendererwa. Bakanyoreka omu Baibuli ngu naija kuhindura ensi paradiso eraabe etarimu bihagaro nari obutari buringaaniza. Bakanyegyesa ngu ensi neija kuba eijwiire abantu barungi, abaratungye omugisha gw’okutuuraho ebiro byona omu kuhikiirira.—Zaaburi 37:29.

Nkankunda ebi Abajurizi ba Yehova baabaire nibanyegyesa, kwonka emitwarize yangye ekaba etarikushushana n’eyaabo. Nkaba nindeeba ngu tikirikumbasikira okutagwera orubaju omu by’obutegyeki nari kutaho okundi omushaya omuntu yaatwariza kubi. N’ahabw’ekyo nkacwamu kweshomesa Baibuli. Ku naaherize, nketegyereza ngu Abajurizi ba Yehova nibo bantu bonka abaabaire nibatwaza nk’Abakristaayo aba ira.

Ku naayegire Baibuli, nketegyereza ngu nkaba nyine kuhindura emitwarize yangye. Nk’eky’okureeberaho, nkaba nyine kuboneza emigambire yangye, ahabw’okugira ngu nkaba nyine omuze gw’okukoresa ebigambo by’okukyeena. Nkaba nyine n’okurekyera aho okureetsa. Kandi nkaba nyine n’okurekyera aho kugwera orubaju omu by’obutegyeki. Kikaba kitoorobi kukora empindahinduka ezi zoona, kwonka ahabw’obuhwezi bwa Yehova, mporampora nkazikora.

Kimwe aha byabaire bingumiire n’okwega kutarahuka kugira ekiniga. Na hati ninshaba Yehova kumpwera omu nshonga egi. Mpwerairwe munonga ebyahandiikirwe nk’Enfumu 16:32, aharikugira hati: “Otarikurahuka kugira ekiniga naakira emanzi, kandi orikutegyeka omutima gwe naakira okwatsire orurembo.”

Omu gwa 1991, nkabatizibwa nk’omwe aha Bajurizi ba Yehova. Nkabatirizibwa omu duraamu y’amaizi omu kihome. Omwaka ogwakuratsireho, nyowe na bamwe aha bu naabaire nkomirwe nabo tukarekurekurwa kandi twayoherezibwa Spain ahakuba niho abanyabuzaare baitu baabaire bari. Ku twahikireyo, ahonaaho nkaza omu nteerane z’Abajurizi ba Yehova. Bakanyakiira orikushushana ngu mbaire ndi naabo kumara emyaka, kandi bakampwera kutandika embeera nsya.

OKU NGASIIRWE: Ndi omuntu orikukunda kushemererwa, kandi nyowe n’omukazi wangye na bahara baitu nituheereza hamwe Ruhanga. Nyine omugisha gw’okumara obwire bwangye ndikuhwera abandi kwega Baibuli. Obumwe ninteekateeka aha bwire obu naabaire ndi mutsigazi muto owaabaire ari haihi kwitwa, reero nsiima byona ebi ntungire kuruga obwo. Nyine amagara kandi nyine n’amatsiko. Nyiniire ekihika paradiso eyaaraganisiibwe​, obwire obu haraabe hariho oburingaaniza kandi n’okufa kutakiriho.—Okushuuruurwa 21:3, 4.

[Ekishushani]

“Nkakwatwaho kumanya ngu Ruhanga aine eiziina”

[Ekishushani]

Nyowe na ibanyi nitukunda kuha abateta ebitabo by’orurimi rw’abateta