Baibuli Neehindura Emitwarize Y’abantu

NIKI ekyahigire omushaija kugarukira enyegyesa z’ediini ei yaabaire yaahabire yaarugiremu? Omutsigazi akatunga ata ishe ow’akamanyiso ou yaabaire atwire naasherura amagara ge goona? Shoma oreebe eki abantu aba baagambire.

“I needed to return to Jehovah.”​—ELIE KHALIL

OMWAKA OBU NAAZAARWA: 1976

EIHANGA RY’OBUZAARWA: CYPRUS

EBY’ENYIMA: OMWANA KIRARE

EBI NAARABIREMU: Nkazaariirwa omuri Cyprus kwonka nkakurira omuri Australia. Abazaire bangye n’Abajurizi ba Yehova, kandi bakakora kyona ekirikubaasika kumpwera kukunda Yehova n’Ekigambo kye, Baibuli. Kwonka omu bunyeeto bwangye, nkatandika kugoma. Nkaba ntoroka omu nju nyekiro kuza kubugana banywani bangye. Tukaba twiba emotoka kandi tutunga oburemeezi obundi bwingi.

Omu kubanza, nkaba ninkora ebintu ebyo bwesherekye ahabw’okutenda kugwisa kubi abazaire bangye. Kwonka mporampora okutiina okwo kukahwaho. Nkanywana abantu abaabaire nibankira obukuru abatarikuheereza Yehova, kandi emitwarize yaabo ekanshiisha. Bwanyima nkagambira abazaire bangye ngu nkaba ntarikwenda kugaruka kukwatanisa nabo omu nyikiriza yaabo. Bakateeraho kumpwera n’obugumisiriza, kwonka nkanga okuteeraho kwabo kwona. Abazaire bangye bakashaasha munonga.

Bwanyima y’okuruga omuka, nkatandika kukoresa emibazi y’ekitokooza bwongo, kandi naatandika n’okugiguza omu bwingi. Nkahinduka enshambani kandi obwire obwingi nkaba nimbumara omu baara. Nkatandika kurahuka kugira ekiniga, kandi omuntu ku yaabaire agamba nari akora ekintu eki ntarikukunda nkaba ngira engungu, obumwe ntongana nari mmuteera. Omu bugufu, nkaba ninkora buri kimwe eki baabaire baanyegyeise kutakora nk’Omukristaayo.

OKU BAIBULI YAAHINDWIRE EMITWARIZE YANGYE: Omwe aha barikukoresa emibazi y’ekitokooza bwongo owaafeerwaire ishe akiri muto akahinduka munywani wangye ow’aha mara. Obumwe tukaba tugaaniira ekiro kyona. Eizooba rimwe ku twabaire nitugaaniira akangambira oku ainiire ishe orushusho. Ahabw’okugira ngu nkakura ndikumunya ku hariyo okuzooka, nkatandika kumugambira ahari Yesu, oku yaazoire abafu, kandi naaraganisa kugaruka kukikora omu biro by’omumaisho. (Yohaana 5:28, 29) Nkamugira nti: “Teera akashushani orikugaruka kureeba sho, twena turikutuura hamwe omuri paradiso omu nsi ebiro byona.” Ebigambo ebyo bikahika munywani wangye aha mutima.

Obumwe munywani wangye ogwo akaba agamba aha bintu nk’ebiro by’emperu nari enyegyesa y’obushatu. Nkaba nkwata Baibuli ye mworeka Ebyahandiikirwe ebirikugamba ahari Yehova Ruhanga, Yesu, n’ebiro by’emperu. (Yohaana 14:28; 2 Timoseo 3:1-5) Ku naayongyeire kugaaniira na munywani wangye ahari Yehova, nkongera kuteekateeka ahari Yehova.

Mporampora, embibo ezaabaire ziri omu mutima gwangye, ezi abazaire bangye baabyairemu, zikatandika kukura. Nk’eky’okureeberaho, ku naabaire ndi aha kagyenyi ndikukoresa emibazi y’ekitokooza bwongo na banywani bangye, nkaba ntandika kuteekateeka ahari Yehova. Baingi ahari banywani bangye bakaba nibagira ngu nibakunda Yehova, kwonka bakaba batarikukyoreka omu mitwarize yaabo. Ahabw’okuntenda kuba nkabo, nketegyereza ngu nkaba nyine kugira eki naakora. Nkaba niinyenda kugarukira Yehova.

Amazima gari ngu, okumanya eki oine kukora, n’okukikora n’ebintu bibiri ebitari kushushana. Empinduka ezimwe zikaba zitagumire kukora, kwonka nkarekyera aho kukoresa emibazi y’ekitabura bwongo. Kandi naayetantara n’emikago ei naabaire nyine, naatandika kwega Baibuli n’omureeberezi omu kibiina.

Kwonka, empinduka ezimwe, zikaba zigumire kukora. Kikangumira munonga okutegyeka ekiniga kyangye. Obumwe nkaba nkora gye kwonka bwanyima ngaruka enyima. Nkeehurira kubi, naatandika kwereeba nk’oremirwe. N’ahabw’ekyo nkacwamu kugyenda kugambira omureeberezi owaabaire naanyegyesa Baibuli. Obutoosha akaba naagumisiriza kandi aine embabazi, buzima akangaruramu amaani. Eizooba rimwe akangambira kushoma ekicweka ky’Omunaara ekyabaire nikigamba aha bukuru bw’okutaruha. * Tukagaaniira aha bintu ebi ndikubaasa kukora naagira ekiniga. Ahabw’okuteekateeka aha kicweka ekyo n‘okushaba Yehova, mporampora nkabaasa kutegyeka ekiniga kyangye. Reero, omuri April 2000, nkabatizibwa naaba omwe aha Bajurizi ba Yehova. Abazaire bangye bakashemererwa munonga.

OKU NGASIIRWE: Hati nyine obusingye n’omuntu ow’omunda omurungi, ahabw’okumanya ngu tinkyeshiisha ahabw’okukoresa emibazi y’ekitabura bwongo n’obushambani. Kyona eki ndikukora, yaaba ndi aha murimo nari omu nteerane z’ekibiina nari omu by’okweshemeza nimba nshemereirwe. Nyine emiteekateekyere mirungi aha magara.

Ninsiima Yehova ahabw’abazaire bangye abatarantsigireho. Kandi ninteekateeka aha bigambo bya Yesu eby’omuri Yohaana 6:44: “Tihariho orikubaasa kwija ahariinye, Tata owantumire yaaba atamwiriize haihi.” Nikinkwataho munonga ku ndikuteekateeka ngu mbaasize kugarukira Yehova ahabw’okuba akagaruka yaanyeyiriza haihi.

“Nkaba Niinyenda Kugira Tata.”​—MARCO ANTONIO ALVAREZ SOTO

OMWAKA OBU NAAZAARWA: 1977

EIHANGA RY’OBUZAARWA: CHILE

EBY’ENYIMA: OMWESHONGOZI W’EBY’EBYESHONGORO BY’OBUSHAARIZI

EBI NAARABIREMU: :Nkakuzibwa maawe omu rurembo rurungi rwa Punta Arenas, omuri Strait of Magellan omuri South America. Abazaire bangye bakataana obu naabaire nyine emyaka etaano, eki kikandeetera kwehurira nk’otsigirweho. Nkaba niinyenda kugira tata.

Maawe akaba naayega Baibuli n’Abajurizi ba Yehova, kandi akaba antwara omu nteerane z’Ekikristaayo aha Kyombeko ky’Obukama. Kwonka, nkaba ntarikukunda enteerane, nkaba ndira ku twabaire tuba nituzayo. Ku naahikize emyaka 13, nkarekyera aho kuzayo.

Omu bwire obwo, nkaba ntandikire kukunda ebyeshongoro, kandi nketegyereza ngu nkaba nyine etalanta. Aha myaka 15, nkaba niinyenshongora ebyeshongoro by’obushaarizi aha mikoro, omu baara, n’aha bugyenyi. Okukwatanisa n’abeeshongozi abaine etalanta kikandeetera kukunda ebyeshongoro by’enzaarwa. Nkatandika kwegyera omu kicweka kyaitu ebirikukwata aha kweshongora. Ku naahikize myaka 20, nkafuruka naaza omu rurembo rukuru, Santiago, kwongyera kushoma. Nkagumizamu ninyeshongora ebyeshongoro by’obushaarizi.

Kwonka, nkaba ninyehurira nk’otaine mugasho. Kubaasa kutuubya aha nyehurira ezo, nyowe n’abeeshongozi bagyenzi bangye, abaabaire bari nk’eka yangye, tukaba tunywa amaarwa kandi tukoresa emibazi y’ekitabura bwongo. Nkaba ndi endeme, kandi eki kikaba nikimanyirwa n’aha ndeebeka yangye. Nkaba njwara emyenda erikwiragura, naakuza ekireju, kandi naakuza eishokye ryagwa enyima.

Omuringo ogu naabaire nintwazamu, butoosha gukaba gundeetera kurwana n’abandi kandi kikandetera kuhenda ebiragiro. Eizooba rimwe, ahabw’esindo, nkataahirira abarikuguza enjaayi abaabaire nibanteganisa na banywani bangye. Bakanteera kubi munonga naahendeka omushaaya.

Kwonka obusaasi oburikukirayo, bukaruga ahari bataahi bangye. Eizooba rimwe, nkakimanya ngu omwishiki ou naabaire nindiima akaba naashambana na munywani wangye ow’aha mara kandi banywani bangye abandi bakaba nibakimanya baakinshereka. Kikanshaasha munonga.

Nkafuruka naagaruka Punta Arenas, naatandika kwegyesa abandi okweshongora kandi naaba omuteezi w’enanga. Nkagumizamu ninyeshongora n’abandi kandi turikukwata ebyeshongoro byaitu omu maraka. Nkabugana omwishiki murungi orikwetwa Sussan, kandi tukatandika kutuura hamwe. Eizooba rimwe, Sussan akamanya ngu nyina akaba naikiririza omu nyegyesa y’obushatu kwonka nyowe ntarikugikiririzamu. Akambuuza ati: “Mbwenu, ekihikire niki?” Nkamugarukamu ngu nkaba niimanya ngu enyegyesa y’obushatu egwire kwonka nkaba ntarikubaasa kukihamya omu Byahandiikirwe. Kwonka nkaba niimanya abarikubaasa kumuhwera. Nkamugira ngu Abajurizi ba Yehova bakaba nibabaasa kumworeka amazima kuruga omu Baibuli. Reero nkakora ekintu eki naabaire mmazire emyaka ntarikukora​, nikyo okushaba Ruhanga obuhwezi.

Bwanyima y’ebiro bikye, nkareeba omushaija orikushusha ou ndikumanya, naamubuuza yaaba naamanya Abajurizi ba Yehova. N’obu araabe yaabaire atiinire akagarukamu ebi naamubuurize ebirikukwata aha nteerane z’aha Kyombeko ky’Obukama. Nkahamiza kimwe ngu okubona omushaija ogwo kukaba kuri okugarukwamu kw’okushaba kwangye. Nkaza aha Kyombeko ky’Obukama naashutama enyima munonga kugira ngu hatagira owaandeeba. Kwonka, baingi bakaba nibakiinyijuka ahakuba nkaba niinyizaho nkiri muto. Bakanyakiira kandi baanyoreka rukundo eyaandeeteire kugira obusingye bwingi. Okaba nooshusha ngu naagaruka omuka. Ku naareebire omushaija owaabaire naanyegyesa Baibuli nkiri muto, nkamushaba kugaruka kunyegyesa.

OKU BAIBULI YAAHINDWIRE EMITWARIZE YANGYE: Eizooba rimwe, nkashoma Enfumu 27:11, aharikugira ngu: “Mwana wangye, gira obwengye, oshemeze omutima gwangye.” Kikanshemeza munonga kumanya ngu omuntu buntu naabaasa kushemeza Omuhangi w’ensi n’eiguru. Kikandeetera kwetegyereza ngu Yehova niwe tata ou naabaire niinyenda obwire obu bwona!

Nkaba niinyenda kushemeza tata ow’omu iguru kandi nkore ebi arikukunda, kwonka nkaba mmazire emyaka mingi ndi omuhuuku w’amaarwa n’emibazi y’ekitabura bwongo. Nketegyereza ebigambo bya Yesu ebiri omuri Matayo 6:24, ebirikugira biti: “Tihariho muntu orikubaasa kuheereza abakama babiri.” Omu kuteeraho kukora empindahinduka, hariho omusingye ogwampweraire oguri omu 1 Abakorinso 15:33 ogurikugira guti: “Ekigombe kibi kishiisha emicwe mirungi.” Nkamanya ngu tindikubaasa kucwa emize mibi naaba ninza omu myanya niyo emwe kandi ndikukwatanisa n’abantu nibo bamwe. Obuhabuzi bwa Baibuli bukaba nibwetegyerezibwa gye. Nkaba nyine kukora empindahinduka ahonaaho kweihaho ebintu ebyabaire nibindetera kushiisha.—Matayo 5:30.

Ahabw’okugira ngu nkaba ninkunda okweshongora, kikangumira munonga kurekyera aho kweshongora ebyeshongoro by’obushaarizi. Kwonka, ahabw’obuhwezi bw’abanywani b’omu kibiina, nkabaasa kurekyera aho. Nkacwa n’omuze gw’okunywa amaarwa ekirenga n’okukoresa emibazi y’ekitabura bwongo. Nkatega eishokye ryangye n’ekireju, kandi naarekyera aho kujwara emyenda erikwiragura yonka. Ku naagambiire Sussan ngu nkaba niinyenda kutega eishokye ryangye, akagira ekihika ky’okumanya ahabw’enki. Akangira ati: “Tugyendane ndeebe ekirikuba aha Kyombeko ky’Obukama!” Akakunda ebi yaareebireyo, kandi nawe akatandika kwega Baibuli. Bwanyima, nyowe na Sussan tukagaitwa. Omu 2008, tukabatizibwa nk’Abajurizi ba Yehova. Nitushemererwa kuheereza Yehova turi hamwe na maawe.

OKU NGASIIRWE: Mbaasize kuruga omu nsi erimu okushemererwa okutari kwabuzima kandi erimu abanywani babi. Ninkikunda ebyeshongoro, kwonka hati nintooranamu ebirungi. Ninkoresa ebi naarabiremu kuhwera ab’eka yangye n’abandi, okukira munonga eminyeeto. Niinyenda kubahwera kureeba ngu bingi ebi barikubaasa kutunga omu nsi n’obu birikureebeka nk’ebirungi, omuheru gwabyo ni “nk’eshaabo.”​—Abafilipi 3:8.

Ntungire abanywani abaabuzima omu kibiina Ekikristaayo, ekirimu rukundo n’obusingye. Okukira byona, ahabw’okwirira haihi Yehova, ntungire tata.

[Obugambo obw’Ahansi]

[Ekishushani]

“Mbaasize kugarukira Yehova ahabw’okunyeyiriza haihi”