Baibuli Neehindura Emitwarize Y’abantu

“Nkaba Ndi Ntabo Yaago.”—LUKA ŠUC

OMWAKA OBU NAAZAARWA: 1975

EIHANGA RY’OBUZAARWA: SLOVENIA

EBY’ENYIMA: OKUJUMBA AMAARWA

EBI NAARABIREMU: Nkazaarirwa omuri Ljubljana, orurembo rukuru omuri Slovenia. Kuruga omu buto buri kimwe kikaba kiri gye, kuhitsya aha myaka ena. Taata akeita. Bwanyima y’okufa kwe, maawe akaba aine kukora n’amaani kutungira nyowe na mukuru wangye eky’okurya.

Ku naahikize emyaka 15, nkatandika kutuura na maawenkuru. Kikanshemeza munonga kutuura na maawenkuru, ahabw’okuba banywani bangye baingi bakaba nibatuura haihi nawe. Kandi nkaba nyine obugabe bwingi kukira obu naabaire nyine nkirikutuura omuka. Aha myaka 16, nkatandika kumara obwire n’abantu abaabaire nibanywa amaarwa aha wiikenda. Nkakuza eishokye, naatandika kujwara kubi, n’okureetsa.

N’obu ndaabe naakoreise emibazi y’ekitabura bwongo etari emwe n’emwe, nkaba ninkunda munonga kunywa amaarwa, ahabw’okuba gakaba nigashemeza. Juba nkeeshanga ntakinywa egiraasi nkye za viinyo, beitu ecupa yoona. Nkaba niimanya kushereka esindo yangye. Obumwe omwitsyo gwangye nigwo gwabaire gureetera omuntu kumanya ngu naanywa amaarwa. Kwonka nabwo, akaba atarikubaasa kumanya ebika nari obwingi bw’amaarwa agu naanywa!

Emirundi emingi, niinye naabaire nimpwera banywani bangye kugaruka omuka bwanyima y’okutsinda n’obu naabaire mba nywaire amaarwa agarikukira agaabo emirundi ebiri. Eizooba rimwe, nkahurira omwe ahari banywani bangye arikugira ngu nkaba ndi ntabo yaago, ebigambo ebyo omu omuri Slovenia nibimanyisa omuntu orikukiza abandi okunywa amaarwa. Ebigambo ebyo buzima bikanshaasha.

Nkatandika kuteekateeka aha magara gangye. Nkeehurira nk’otaine mugasho kandi buri kimwe eki naabaire ninkora kikaba kitaine kigyendererwa.

OKU BAIBULI YAAHINDWIRE EMITWARIZE YANGYE: Omu bwire obwo, nketegyereza ngu omwe aha bu ndikushoma nabo akaba ahindukire, akaba ayeyongyeire kutwaza gye. Ahabw’okwenda kumanya oku akozire empinduka ezo, nkamushaba ngu tuze kurya hamwe omu hoteeri. Ku twabaire nitugaaniira, akanshoboororera ngu akaba atandikire kwega Baibuli n’Abajurizi ba Yehova. Akangambiraho bimwe aha bi yaabaire naayega, kandi byona bikambeera bisya, ahakuba kuruga omu buto nkaba ntaine diini. Nkatandika kuza omu nteerane z’Abajurizi ba Yehova n’okwega Baibuli nabo.

Okwega Baibuli kikaigura amaisho gangye kureeba amazima makuru, kandi agarikugasira omuntu. Nk’eky’okureeberaho, nkeega ngu nitutuura omu biro ebi Baibuli erikweta ‘eby’emperu.’ (2 Timoseo 3:1-5) Kandi nkeega ngu juba Ruhanga naija kumaraho ababi omu nsi, kandi ahe omugisha abarungi kutuura omuri paradiso ebiro byona. (Zaaburi 37:29) Nkagira ekihika ky’okushemeza emitwarize yangye kugira ngu mbe omu bantuabarungi.

Nkatandika kugambira banywani bangye amazima ga Baibuli agu naabaire niinyega. Baingi bakankinika ahabw’ebi naabagambiire, kwonka ekyo kikarugamu ebirungi. Oku baatwarize kikampwera kureeba ngu ti banywani abaabuzima. Nketegyereza ngu omuze gw’okunywa amaarwa ekirenga gukaba gwine akakwate n’abanywani abu naabaire nyine. Saabiiti yoona bakaba bagimara bainiire wiikenda ekihika kugira baze kunywa bagarukye basinde.

Nkecwaho abanywani abo naatunga abanywani barungi kuruga omu Bajurizi ba Yehova. Okuba nabo kikaba nikingaruramu amaani​, ahakuba bakaba nibakunda Ruhanga kandi nibateeraho kugyendera aha mitindo ye. Mporampora, nkabaasa kucwa omuze gw’okunywa amaarwa ekirenga.

OKU NGASIIRWE: Ninsiima Yehova ahabw’okugira ngu hati tikirikunyetengyesa kunywa amaarwa kubaasa kushemererwa. Buzima tindikumanya ahu naakubaire ndi hati, ku ogire ngu nkagumizamu n’emitwarize yangye. Hati nyine obuhame ngu nyine amagara marungi.

Mmazire emyaka mushanju, ndikuheereza aha ofiisi y’eitaagi ey’Abajurizi ba Yehova omuri Slovenia. Okumanya Yehova n’okumuheereza kimbaasiise kugira ekigyendererwa.