Abale Wathu Wakufunidwamwe:

M’magole ya 600 AEC, mpolofeta Zakiyeri adawonesedwa masomphenya yakudabwisa kwene-kwene. Iye adawona ngolo ikulu yakupambulika kwene-kwene yomwe ikhafambisidwa na Yahova, Mulengi wa bzinthu bzense. Comwe n’cakudabwisa kwene-kwene pa ngolo imweyo, ni kuthamanga kwace. Iyo ikhathamanga kwene-kwene kuposa kupoira kwa munthu. Ndipo ikhayenda ku mbali iri-yense mwakusaya kugonyola ayai kubweza liwiro lace!—Zakiy. 1:4, 9, 12, 14, 16-27.

Masomphenyayo yambatikumbusa kuti mbali yakudzulu ya gulu la Yahova inkupitiriza kuyenda kutsogolo. Tsono tani bza mbali ya pansi pano? Basa lomwe lidaphatidwa mu gole lamali, linkuwoneseratu padeca kuti Yahova ankutsogolera wanthu wace pa dziko la pansi pano kuti apitirizembo kuyenda kutsogolo!

Kuno, ku dziko la Estados Unidos, abale azinji wa m’banja la Beteli ankufuluka ku mthambi ya Brooklyn kuti akakhale ku likulu lathu lipsa lomwe liri mu mzinda wa Warwick, ku Nova York. Tsono winango ankuyenda katumikira ku mthambi zinango, ndipo winango ankutumizidwa ku gawo. Abale wa ku mthambi zakusiyana-siyana za pa dziko la pansi pano, ankuphata basa la kumanga na kukonza nyumba zipsa, ndipo winango ankutumizidwa kuti akaphatire basa m’madziko manango thangwe ra kuphatanidzidwa kwa mthambi zawo. Kodi tani imwepombo? Pinango imwepo munkufuluka lini kuti mukatumikire ku mbuto zinango, koma mwakusaya kupenukira, mudatanganidwambo na utumiki bwakusiyana-siyana.

Bungwe Lakutonga linkulimbisidwa kwene-kwene thangwe ra kuwona kuti wanthu wa Mulungu wa pa dziko lense la pansi ankupitiriza kufambira pabodzi na gulu la Yahova. Winango abzipereka kuti akatumikire m’magawo yomwe yankufunikira thandizo. Winango ankutumikira mu njira zipsa, ninga mwa kutumikira m’gawo la cirewedwe cinango. Ndipo winango ankupalizira mu njira zomwe akhanati kuzolowerana nazo. Ndipo winango ankuthumizira utumiki bwawo mu njira zinango pomwe zakusiyana-siyana. Atumiki wense wakukhulupirika wa Yahova kuphatanidza nkhalamba na atenda ankuthamanga mwakukhulupirika kuti akatambire moyo, ndipo ankucita bzimwebzo mwa kufamba pabodzi na gululi, acilatiza kuti mpsakunama bzomwe Sathani adalewa!​—1 Wak. 9:24.

Dziwani kuti Yahova ambawona mzimu wanu wakubziperekayu. (Waheb. 6:10) Kubzipereka kwanuko kumbatikumbusa bza Abalahamu na Sara. Pomwe Abalahamu akhana magole yakupitirira 70 yakubadwa, iye na banja lace adacoka mu mzinda wa Uri, aciyenda kukakhala m’matendi ku Kanani, kwa magole 100. Abalahamu na mkazi wace adalatiza mzimu wabwino  kwene-kwene wakufuna kutumikira!—Ciy. 11:31; Mab. 7:2, 3.

Kodi imwepo munkulatizambo mzimu umweyu? Mwensenemwe, omwe munkupirira bzineso bza mu nthawe zakunesa zino, munkucita bzomwe Jezu adatiuza kuti ticite. Iye adati: ‘Ndokoni mukapfunzise wanthu wa mitundu yense, muciwabatiza m’dzina la Baba, na la Mwana, na la mzimu wakucena.’—Mat. 28:19.

Onani kuti Jezu adaphatisa basa fala lakuti ‘ndokoni,’ pakufuna kulatiza kuti tin’funika kuyenda ku mbuto inango. Mpsakukondwesa kwene-kwene kuwona bzomwe Akristau wanyongo acita pa basa limweri mu gole lamalali! Bzinkuwonekeratu kuti boko la mphanvu la Yahova linkuthandiza basa la kupalizira bzipsa bzabwino bza Umambo kwa wanthu mitundu yense.—Mar. 13:10.

Azinji ankubvuma mafala yomwe tinkuwapalizira. Mulewengo wa apalizi mu gole lamalali ukhali wa apalizi  8.340.847, ndipo tidacitisa mapfunziro ya Bibliya yakukwana 10.115.264 m’mwezi uli-wense. Bzinkuwonekeratu padeca kuti ngolo ya Yahova inkupitiriza kuyenda kutsogolo, ndipo imwepo munkucitambo bzimwebzo! Pitirizani kucita basa lanu labwinoli mu kanthawe kakucepa komwe kasalaka, pomwe Yahova akanati kufunga msuwo wace wacipulumuso.

Ndipopa njakuthemera kwene-kwene mafala ya vesi la gole lino, yakuti: ‘Khulupira Yahova, ndipo cita bzabwino!’ (Psal. 37:3) Mukambabvera mafalaya, mucicita bzomwe mpsabwino mwa kutumikira Yahova, mun’dzalatiza kuti mumbamukhulupira. Taphata minyendo, khulupirani nthawe zense kuti muli lini mwekha. Bzomwe Jezu adalewa mpsacadidi. Iye adati. ‘Dziwani kuti ine ndiri pabodzi na imwe nsiku zense mpaka ku phampha kwa mkonzedwe uno wa bzinthu.’—Mat. 28:20.

Tsimikizani kuti Yahova an’dzapitiriza kukusimbani pa basa lanu lomwe mumbalicita mwakukhulupirika. Napo mucite bzizinji ayai bzing’ono-ng’ono, Yahova an’funa kuti mucite bzomwe mungakwanise, ndipo mucibzicitambo na cakulinga cabwino. Mphaso zimwezi zimbatokonya mtima wa Yahova, acikomedwa nazo. (2 Wak. 9:6, 7) Tenepo, pitirizani kumufenderera Yahova, Baba wanu wa lufoyi, mwa kumbamupemba kawiri-kawiri, kupfunza Fala lace, kugumanika pa mitsonkhano, na kumbayenda mu utumiki mwakukhazikika.

Mu ‘kanthawe kakucepa’ komwe kasalaka, Sathani ankucita ciri-cense kuti atitazise kukhala wakukhulupirika kwa Yahova. (Cibv. 12:12) Tsono, khalani wakufendererena na Yahova, ndipo Sathani an’dzatazira kukupumpsani. (Psal. 16:8) Dziwani kuti timbakufunani kwene-kwene, ndipo tinkutenda kwene-kwene thandizo lanu kuti tipitirize kudziwisa Umambo bwa Mulungu mu nsiku zakumalizira zino.

Ndife abale wanu,

Bungwe Lakutonga la Mboni za Yahova