Tukukonga fiyo isi Ibaibolo likuyoba pa nkhani ya bweghi nu kumasya inyegha. Kyala yo alyandisye ubweghi, kangi alondagha ukuti unnyambala nu nkikulu bikaleghe pampene ubumi bwabo bosa. Ibaibolo likuyoba ukuti ubweghi bubaghile ukumalika pene linga yumo abombile ubulowe.​—Matai 19:​5, 6, 9.

 Ena, ukwendela mu njila isi:

•   Amabuku. Utubalilo twingi amabuku ghitu ghikuya ni nkhani isi sibaghile ukubatula aba bali pabweghi nalinga ubweghi bwabo bukuboneka ukuti bukabaghila ukwenda kanunu. Mwakifwanikisyo, keta inkhani iyakuti “Uleŵi,” “Kasi Mungaphepiska Wuli?,” na “Kwambaso Kugomezgana.”

•   Ingomano. Ku ngomano syitu isya kipanga, isya padela ni sya kighaba tukumanyila ubulongosi ubwakufuma mu Baibolo pankhani ya bweghi.

•   Abakulumba. Abakulumba ba kipanga bikubatula abandu aba bikwaghana nindamyo mbweghi bwabo, mwakubombela ubulongosi ubu buli pa Baefesi 5:​22-​25.

 Hayi. Linga abakulumba ba kipanga bikubatula abandu ba pabweghi aba bikwaghana nindamyo, batikulondiwa ukubasalila ifyakubomba. (Bagalatia 6:5) Loli linga umundu yumo amasisye ubweghi bwake pa fifukwa ifi fitikukolelana ni Baibolo, atikwitikisiwa ukubomba fimo nkipanga kangi atikwitikisiwa ukwegha pamo ukweghiwa ku bungi.​—1 Timoti 3:​1, 5, 12.

 Ibaibolo likubakasya abandu aba beghene ukuti bikulondiwa ukukindilila ukwikala pampene nalinga ifindu fitikwenda kanunu. (1 Bakorinti 7:​10-​16) Indamyo nyingi sibaghile ukumalika linga tukwiputa ukufumila pasi pandumbula, ukubombela ubulongosi bwa mu Baibolo nu kunangisania ulughano.​—1 Bakorinti 13:​4-8; Bagalatia 5:​22.

 Loli Abakristu bamo bikusala ukulekana linga bikwaghana nindamyo simo inywamu bo isi:

•   Ukuleka ukuyipwelelela imbumba mwamatingo.​—1 Timoti 5:8.

•   Inkhaza.​—Salimo 11:5.

•   Linga ubumi bwa mwambepo buli pangozi. Mwakifwanikisyo, linga unnyambala pamo unkikulu uyu akaya Nketi ikumfimbilisya umwinake wa mbweghi uyu yo Nketi ukuti abombe ifindu fimo ifi fitikukolelana nindaghilo sya Kyala kubaghile ukuya kanunu ukuti uyu ikufimbilisiwa asoke kangi ukubomba isi yo njila iyakunangisya ukuti “ikuntila Kyala komma abandu.”​—Imbombo Sya Batumiwa 5:​29.