Ubwanaloli buliku? Ubwamalalusyo agha abandu bikwilalusya pabumi bwabo. Lumo numwe mwilalusisyepo ukuti:

• Ngimba Kyala ikututula pabumi bwitu?

• Ngimba ubwite nu kutamiwa fikwisa kumalika?

• Findu fiki fikubombiwa linga umundu afwile?

• Ngimba abafwe bikwisa kusyuka?

• Ngimba ukuti Kyala apilike inyiputo syitu twiputeghe bulebule?

• Ngimba pabumi bwangu mbaghile ukulwagha bulebule ulusekelo?

Ngimba amansala tubaghile ukughagha kughu? Bamo bikubelenga amabuku ku layibulale. Ukuti baghaghe amansala, bikwagha ukuti amabuku ghikususania ghene. Ghamo ghikubatula, loli nkabalilo akanandi ghatikubatula kangi.

Loli ibuku lyakuti tulisubileghe lilipo. Ibuku ili lyabwanaloli. Bo ikwiputa, Yesu Kristi atile: “Ilisyu lyako bo bwanaloli.” (Yohani 17:17) Akabalilo kalino ilisyu ili lyo Baibolo. Mu kapepala aka ubwanaloli bwa malalusyo agha bulipo.

NONGWA YAFIKI TUKWILALUSYA?: Tukwitughala nkisu kyandamyo. Amachalichi ghamo ghikuti indamyo isi silipo nongwa ya bwighane bwa Kyala.

ISI IBAIBOLO LIKUTUMANYISYA: Kyala atikubomba imbibi. Jobu atile, “Kyala akabaghila ukubomba isya buniongafu!” (Job 34:10) Kyala walughano, yonongwa yake Yesu atile twiputeghe ukuti: “Tata witu wakumwanya . . . ubutwa [ubunyafyale] bwako bwiseghe; ubwighane bwako bubombiweghe, pasi apa bo kumwanya.” (Matai 6:9, 10) Nu lughano lwake ulukulumba umwene ikulonda ukubatula abandu.—Yohani 3:16.

Mukete Ubwandilo 1:26-28; Yakobu 1:13; na 1 Peteri 5:6, 7.

NONGWA YAFIKI TUKWILALUSYA?: Akabalilo kabwite abandu abingi bikutamiwa bamo bikufwa. Nanuswe tukutamiwa linga abinitu bikutamiwa nu kufwa pakabalilo ka bwite.

ISI IBAIBOLO LIKUTUMANYISYA: Kyala ikuyoba akabalilo aka kikwisa nkyeni, akabalilo kalutengano. M’bunyafyale bwake “abandu bisakupelagha ingwegho syabo ukuya sengo, abandu batisa kwandisyamo kangi ukulwa ubwite.” (Yesaya 2:4) Kyala isakusosyapo ubusita bugholofu ni ndamyo. IBaibolo likuti, “[Kyala] isakupyasilagha amasosi ghosa, bope nu bufwe nalinga bo busulumanie, nalinga pamo kokubaba fitisakuyako kangi; namanga indasi [pamo pene nubusita bugholofu ni ndamyo] syosa sikindile.”—Ubusetuli 21:3, 4.

Mukete Salimo 37:10, 11; 46:9; na Mika 4:1-4.

NONGWA YAFIKI TUKWILALUSYA?: Amachalichi ghamo ghikumanyisya ukuti linga umundu afwile, umuyi ghukukindilila ukuya nu bumi. Abandu bamo bikuti abafwe babaghile ukutufulasya. Loli bamo bikuti Kyala akocha abatulanongwa bosa m’moto.

ISI IBAIBOLO LIKUTUMANYISYA: “Abafwe batikumanya nasimo.” (Undumbilili 9:5) Abafwe bakabaghila ukubomba silisyosa nongwa yakuti batikumanya nasimo.—Salimo 146:3, 4.

Mukete Ubwandilo 3:19 na Undumbilili 9:6, 10.

NONGWA YAFIKI TUKWILALUSYA?: Twesa tukuhoboka linga tukwitughala na binitu. Tukunyonywa ukubaketa abakamu bitu aba bafwile.

ISI IBAIBOLO LIKUTUMANYISYA: Abandu abingi aba bafwile bisakusyuka. Yesu atile “aba bali m’mapumba bisakupilika ilisyu lyake, po bende nu kusoka.” (Yohani 5:28, 29) Isi Kyala ikulonda syakuti aba bisakusyuka bise baye nulusako lwakuya nu bumi mu paradaiso. (Luka 23:43) Abandu aba bikumpilikila bikwisa kwitughala kisita kubina kangi bisakuyagha nu bumi bwa bwila na bwila. IBaibolo likuti: “Abagholofu bisakukikabagha ikisu kangi, bisakwitughalagha bwila na bwila.”—Salimo 37:29.

Mukete Jobu 14:14, 15; Luka 7:11-17; na Imbombo sya Batumigwa 24:15.

NONGWA YAFIKI TUKWILALUSYA?: M’machalichi abandu bikwiputa, loli bamo bikuti inyiputo syabo sitikwamuliwa.

ISI IBAIBOLO LIKUTUMANYISYA: Yesu akanile inyiputo sya mwalwemwalwe. Umwene atile, “Bo mukwiputa mungayobagha mwalwemwalwe” pamo ukwandisania amasyu. (Matai 6:7) Ukuti Kyala apilike inyiputo syitu tusumeghe ukufwana nu bwighane bwake. Ukuti tubombe isi, tubumanye ubwighane bwake. Pa Yohani Wakwanda 5:14 tukubelenga ukuti, “Aka linga tukusuma ukufwana nu bwighane bwake [Kyala] ikutupilika.”

Mukete Salimo 65:2; Yohani 14:6, 14; na 1 Yohani 3:22.

NONGWA YAFIKI TUKWILALUSYA?: Abandu bikuti indalama, ubufumuke, nu bumoghi fibaghile ukubapa ulusekelo. Loli bikwagha ukuti ifindu ifi fitikubapa ulusekelo.

ISI IBAIBOLO LIKUTUMANYISYA: Yesu ayobile isi sibaghile ukututula ukuti tuye nu lusekelo, atile: “Basayigwa aba bimenye ubulondo mu mbepo syankati.” (Matai 5:3) Ukum’manya Kyala nu bwighane bwake bo bulondo ubu tulinabo. Linga mumanyile isya Kyala nu bwighane bwake po mwisakuyagha nulusekelo. Ubwanaloli bwa isi Kyala ikulonda buli m’Baibolo. Ubwanaloli ubu bubaghile ukubatula ukumanya inunu ni mbibi. Aba bikukonga indaghilo syake bisakusayiwa.—Luka 11:28.

Mukete Isya Mbupingamu 3:5, 6, 13-18 na 1 Timoti 6:9, 10.

 Ifindu ifi mumanyile lino finandi, ifingi filipo. Ngimba mukulonda ukuti mumanyile ifingi? Linga numwe mukulonda ukumanyila, ulusako lulipo. Lumo mukwilalusya ukuti, ‘Linga Kyala ikututula, nongwa yafiki tukutamiwa? Ngimba mbombeghe ifiki ukuti tupilikaneghe nnyumba yitu? Amalalusyo ghosa agha iBaibolo likwamula.

Abandu bamo batikulonda ukubelenga iBaibolo. Abene bikuti iBaibolo linywamu kangi likutamya ukulipilikisya. Ngimba mukulonda ubutuli ukuti mubumanye ubwanaloli? Abaketi ba Yehova babaghile ukubatula.

Ubutuli bwakwanda mubaghile ukumanyila nabo akabuku kakuti Mumpilikileghe Kyala Ukuti Mwitughaleghe Bwila na Bwila. Akabuku aka kalipo ukuti kabatule. Ubutuli ubungi bwakuti mubaghile ukumanyila iBaibolo na Baketi ba Yehova. Linga mukulonda mubaghile ukumanyila nabo sabata aliwesa kangi mutikuhomba indalama. Ikisu kyosa kyapasi abandu bikumanyila ubwanaloli na Baketi ba Yehova. Bamo bikuyoba ukuti: “Ubu bo bwanaloli!”

Ubwanaloli bununu ukukinda filifyosa. Bukutwabula ku findu ifyabutungulu ifi abandu bikusubila, nukusosya ubogha ubu butikulondiwa. IBaibolo likututula ukusubila isi likumanyisya, likutubula isyakubomba kangi likutupa ulusekelo. Yesu atile: “Kangi mwisakubumanyagha ubwanaloli, ubwene ubwanaloli bwisakubapelagha umwe ukuya babuke.”—Yohani 8:32.