Nalinga mubaghile ughela ukuti muye nulusekelo m’nyumba yinu utubalilo tumo mukuya pakwaghana nindamio isi sibaghile ubapoka ulusekelo. (Undumbilili 9:11) Loli Kyala walughano kangi otutula linga twaghene nindamyo. Linga muya pakukonga ifundo sya m’Baibolo isi sili pasi apa, umwe na banyumba yinu mukwisa pakuya bakifu pakabalilo ka ndamyo.

ISI IBAIBOLO LIKUYOBA: ‘Syosa isi mukwiyaya nasyo syo muntaghileghe yuyo, namanga umwene ikubiyayila umwe.’ (1 Peteri 5:7) Akabalilo kosa mukumbukeghe ukuti Kyala akaya yo wakwandisya indamyo. (Yakobu 1:13) Linga muli nawe pabumanyani, akwisa pobatula. (Yesaya 41:10) ‘Muntaghile isi sili mundumbula yinu.’—Salimo 62:8.

Mukuya pakuhoboka linga mubelenga nukumanyila iBaibolo isiku lililyosa. Linga mubombile isi mukuya poketa muno Yehova ‘ikutusubikisya mbutolwe bwitu bosa.’ (2 Bakorinti 1:3, 4; Baroma 15:4) Kyala ofinga ukutupa ‘ulutengano lwake ulu lughakindile ghosa amahala.’—Bafilipi 4:6, 7, 13.

ISI MUBAGHILE UKUBOMBA:

• Mwiputeghe kwa Yehova ukuti mwikole indumbula nukuya ninyinoghono inunu

• Pa isi mulonda ubomba musalepo ichi cho chinunu fiyo

ISI IBAIBOLO LIKUYOBA: ‘Indumbula ya mundu wakupilikisya yikumanya fingi kangi imbulukutu ya wamahala yikulondesya ubumanyi.’ (Isya Mbupingamu 18:15) Muyobesanieghe nabanyumba yinu nukupilikisya kanunu linga boyoba ukuti m’manye ifi filondiwa.—Isya Mbupingamu 20:5.

Mubaghile ubomba fiki linga unkamu winu afwile? Mungayagha nisoni ukulila. Kumbuka ukuti yope Yesu “asosisye amasosi.” (Yohani 11:35; Undumbilili 3:4) Mughoneghe nukutusya mwakufwana. (Undumbilili 4:6) Ifi fibaghile ubatula ukuti inyinoghono syinu siyeghe kanunu.

ISI MUBAGHILE UKUBOMBA:

• Muyobesanieghe nabanyumba yinu akabalilo kosa. Mungalindililagha pandamyo pene. Linga mubombile isi, abanyumba yinu bakwisa kuya babuke uyobesania nanumwe linga baghene nindamyo.

• Mubaghile ukuyoba kubangi aba baghenepo nindamyo iyakufwana ni yinu

ISI IBAIBOLO LIKUYOBA: ‘Um’manyani wabwanaloli yo mundu uyu onangisya ulughano bwila, unkamu yo apapiliwe ukuti akutuleghe uwe mbutolwe.’ (Isya Mbupingamu 17:17) Abandu bamo babaghile ulonda ubatula loli batamanya ubutuli ubu mukulonda. Mubabule ubutuli ubu mukulonda. (Isya Mbupingamu 12:25) Musume ubutuli ku bangi aba bopilikisya kanunu iBaibolo. Ubulongosi bwabo bwakufuma m’Baibolo bubaghile ubatula.—Yakobu 5:14.

Mubaghile ukubwagha ubutuli linga mukwangala pampene nabandu aba bali nu lwitiko kwa Kyala nukuya nulusubilo ku isi afingile. Mukwisa kuya balusekelo linga mukubatula abandu abangi aba botamiwa. Mubabuleghe isya lwitiko lwinu kwa Yehova na isi afingile. Akabalilo kosa mubatuleghe abandu abangi kangi mungalekagha ukwangala na bandu aba babaghanile umwe.—Isya Mbupingamu 18:1; 1 Bakorinti 15:58.

ISI MUBAGHILE UKUBOMBA:

• Muyobesanieghe nunkamu wako ukuti akutule

• Yoba ifi kulonda