•  Amasyu Ghakwanda 2

•  Ikyuma iki Kikwaghiwa Mmasyu gha Kyala 3-5

  •  Inkhani 3

  •  Ifi Tumanyile 4

  •  Ukubelenga Ibaibolo 5

•  Muno Tubaghile Ukufumukisya 6-14

  •  Pabulendo Bwakwanda 7

  •  Pabulendo Bwakughomokelako 8

  •  Ukupela Abafundiwa 9

  •  Ukulingania ifi Tukusubila 10

  •  Inkhani 11

  •  Ifi Filimo 12

  •  Injila Isyakufumukisya 13

  •  Ukubombela Amavidiyo na Mabuku 14

•  Ubumi Bwitu Bwabukristu 15-16

  •  Ukumanyila Ibaibolo kwa Pakipanga 16

•  Amasyu Ghabumalilo 17

•  Ukundaghisya Nukubika Ubulongosi 18

•  Ukusunga Akabalilo 19

•  Linga Uwakwendela Idela Isile 20

•  Sabata Walukomano lwa Dela Pamo Ulwa Kighaba 21

•  Sabata Wakukumbukila Inifwa ya Yesu 22

•  Uyu Ikuketesya Ulukomano lwa Ukufumusya nu Bumi 23

•  Cheyamani Walukomano lwa Ukufumusya nu Bumi 24

•  Untuli Wakubika Ubulongosi 25

•  Amakalasi Aghangi 26

•  Amavidiyo 27

1. Ubulongosi ubu buli mumbatiko iyi bukuya pakubatula aba bikuya pakweghagha ulubafu Palukomano lwa Ukufumusya nu Bumi Bwitu Bwabukristu. Abandu aba, bikulondiwa ukuketa kangi ubulongosi bwa Imbatiko Yangomano Syitu sya Bukristu pampene nubulongosi ubu buli nkabuku aka bo bakali ukubomba ikighaba iki bapeliwe kukipanga. Abafumusi bosa bikulondiwa ukukasiwa ukuti balembesye ingamu syabo ukuti bayobeghe inkhani isi bikupeliwa abamanyili. Kangi abandu abangi aba bikubungana nikipanga akabalilo kosa, bikukonga ifundo isi Ibaibolo likumanyisya kangi bikukonga ifundo sya Bukristu pabumi bwabo, babaghile ukulembesya ukuti bope bapeliweghe inkhani isi sikupeliwa ku bamanyili. Uyu ikuketesya Ulukomano lwa Ukufumusya nu Bumi, ikulondiwa ukuyobesania isi sikulondiwa ukuti umundu ingile musukulu ya bubombeli na aliwesa uyu akaya mfumusi loli ikulonda ukulembesya musukulu yabubombeli, pabumalilo ambule linga itikisiwe ukwingila musukulu iyi. Isi sikulondiwa ukubombiwa bo bali pampene nu mundu uyu bikumanyila nawe Ibaibolo (pamo abapapi bake aba Baketi). Ifindu ifi umundu ikulondiwa ukufwanisya ukuti ande ukwingila musukulu, sifwene itolo na isi sikulondiwa ukuti aye mfumusi unsita kosiwa.—od-TB mutu. 8 pala). 8.

2. Iminiti yimoyene. Sabata aliwesa, panyuma palwimbo nulwiputo, cheyamani wa Lukomano lwa Ukufumusya nu Bumi ayobe mbupimba isi tukuya pakumanyila. Cheyamani ikulondiwa ukuyoba ifundo inywamu isi sibaghile ukukitula fiyo ikipanga.

 3. Inkhani: Amaminiti 10. Pakighaba iki pikuya umutu wa nkhani nifundo sibili pamo sitatu isi sikufuma mu Mbatiko ya Ukufumusya nu Bumi Bwitu Bwabukristu. Inkhani iyi yikulondiwa ukuyobiwa nunkulumba pamo untuli wakifwanikisyo ikinunu. Linga twandile ukumanyila ibuku limo ilya mu Baibolo, tukuya pakuketelelagha ividiyo ya isi sili mu buku ilyo. Uyu ikuyoba inkhani iyi ikulondiwa ukuyoba ukukolelana kwa vidiyo nu mutu wa nkhani yake. Loli ikulondiwa ukuketesya ukuti ayobile ifundo isi silembiwe mu mbatiko ya ngomano. Kangi linga akabalilo kalipo, alinganie ifithuzi ifi fili munkhani yake nukubombela imbombo amalifalensi aghangi ukuti ghatule ukuti ifundo sya munkhani yake sipilikiwe kanunu.

 4. Ifi Tumanyile: Amaminiti 10. Inkhani iyi ya malalusyo na maansala kisita kuyoba amasyu ghakwanda pamo ghabumalilo. Inkhani iyi yikulondiwa ukuyobiwa nunkulumba pamo untuli wakifwanikisyo ikinunu. Uyu apeliwe inkhani iyi ikulondiwa ukulalusya amalalusyo ghosa mabili. Kangi abaghile ukusala ukubelenga amavesi ghosa agha apeliwe pamo hayi. Aba bikwamulapo, bayobeghe amaansala ghabo mu masekondi 30 pamo ukwika pasi.

 5. Ukubelenga Ibaibolo: Amaminiti 4. Inkhani iyi yikulondiwa ukupeliwa ku nkamu. Ummanyili ikulondiwa ukubelenga kisita kuyobapo amasyu ghakwanda pamo ghabumalilo. Cheyamani ikulondiwa ukuketa linga ummanyili ikubelenga kisita kwimakwima, ikutusya apa pikulondiwa, ikukwesya pamo ukwisya amasyu kangi ikubelenga bo muno ikuyobela bwila nukuntula apa ikulondiwa ukuchenja. Panongwa yakuti amavesi ghamo ghikuya manandi, uwakuketesya Ulukomano lwa Ukufumusya nu Bumi ikulondiwa ukwinong’onela uluso lwa bamanyili linga ikuyaba inkhani iyi.

6. Amaminiti 15. Ikighaba iki kikuntula aliwesa muno abaghile ukuyobela mubufumusi kangi nukukusya uluso lwakufumusya nukumanyisya. Linga sibaghile ukubombiwa, abakulumba babaghile ukupeliwa ifighaba ifya bamanyili. Ummanyili aliwesa ikulondiwa ukubombelapo imbombo pakimanyilo iki apeliwe ukuti abombele imbombo akabuku ka Ukumanyisya pamo akabuku ka Mubaghaneghe Abandu. Utumabuku utu tukunangisiwa mumabulaketi mumbatiko ya Mbatiko Yitu ya Ukufumusya nu Bumi Bwitu Bwabukristu. Utubalilo tumo pikuya pakutendekesiwagha imbatiko iyakuti abandu bayobesanie itolo ifundo simo. Ulubafu lwakuyobesania ulu, lukulondiwa ukupeliwa ku nkulumba pamo untuli wakifwanikisyo ikinunu.—Keta  palagilafu 15 pankhani yamuno inkhani iyakuyobesania yibaghile ukubombiwa.

 7. Pabulendo Bwakwanda: Inkhani iyi yibaghile ukupeliwa ku nkamu pamo umulumbu. Linga yipeliwe ku mulumbu, uyu ikuya pakutulana nawe yope ikulondiwa ukuya mulumbu pamo baye ba mumbumba yake. Uyu apeliwe inkhani na uyu ikutulana nawe, babaghile ukusala ukwikala pampando pamo ukwimilila.—Ukuti mumanye nyingi isyakufwana nubwighane kangi ubufumusi ubu mukulonda ukubomba pakifwanikisyo kyinu, keta i palagilafu 12 na  13.

 8. Pabulendo Bwakughomokelapo: Inkhani iyi yibaghile ukupeliwa ku nkamu pamo umulumbu. Linga yipeliwe ku mulumbu, uyu ikuya pakutulana nawe yope ikulondiwa ukuya mulumbu kangi linga yipeliwe ku nkamu, uyu ikuya pakutulana nawe yope ikulondiwa ukuya nkamu. (km-CN 5/97 p. 2) Uyu apeliwe inkhani na uyu ikutulana nawe babaghile ukusala ukwikala pampando pamo ukwimilila. Uyu apeliwe inkhani ikulondiwa ukuketesya isi abaghile ukuyoba ukuti bakindille ukuyobesania inkhani iyi bayobesenie kale numwenenyumba pabulendo bwakwanda.—Ukuti mumanye nyingi isyakufwana nubwighane kangi ubufumusi ubu mukulonda ukubomba pakifwanikisyo kyinu,  keta i palagilafu 12 na  13.

9. Ukupela Abafundiwa: Inkhani iyi yibaghile ukupeliwa ku nkamu pamo umulumbu. Linga yipeliwe ku mulumbu, uyu ikuya pakutulana nawe yope ikulondiwa ukuya mulumbu kangi linga yipeliwe ku nkamu, uyu ikuya pakutulana nawe yope ikulondiwa ukuya nkamu. (km-CN 5/97 p. 2) Uyu apeliwe inkhani na uyu ikutulana nawe babaghile ukusala ukwikala pampando pamo ukwimilila. Inkhani iyi yinangisyeghe ukuti bandileko kale ukumanyila Ibaibolo. Uyu apeliwe inkhani atikulondiwa ukuyoba amasyu ghakwanda pamo ghabumalilo pene linga ikimanyilo iki apeliwe kikulonda ukuti abombe isi. Kukaya kwakulondiwa ukubelenga amapalagilafu ghosa loli utubalilo tumo mo muno babaghile ukubombela.

 10. Ukulingania ifi Tukusubila: Linga yikuya pakuyobiwa bo muno tukubombela pakuyoba inkhani, yikulondiwa ukupeliwa ku nkamu. Loli linga yikuya pakubombiwa ukuya kifwanikisyo, yibaghile ukupeliwa ku mulumbu pamo unkamu. Linga yipeliwe ku mulumbu, uyu ikuya pakutulana nawe yope ikulondiwa ukuya mulumbu kangi linga yipeliwe ku nkamu, uyu ikuya pakutulana nawe yope ikulondiwa ukuya nkamu. Uyu apeliwe inkhani iyi ikulondiwa ukwamula mwakupilikiwa kanunu mwamahala linga ikwamula ilalusyo lya mutu wankhani yake mwakubombela amalifalensi agha apeliwe. Uyu apeliwe inkhani abaghile ukusala ukuyoba ilifalensi iyi abombile imbombo pakufufuza pamo hayi pakabalilo aka ikuyoba inkhani yake.

 11. Inkhani: Inkhani iyi yikulondiwa ukupeliwa ku nkamu kangi yiyobiwe bo muno abakamu bikuyobela inkhani pakipanga. Linga inkhani yifumile ku Ifyakongelelapo A mu kabulosha ka Mubaghaneghe Abandu, uyu apeliwe inkhani ikulondiwa ukulingania muno tubaghile ukughabombela amavesi agha ghali munkhani yake linga tuli mubufumusi. Mwakifwanikisyo, abaghile ukuyoba akabalilo aka ilemba ilyo libaghile ukubomba imbombo, isi likusanusya kangi muno tubaghile ukubombesyela imbombo linga tukuyobesania numundu. Linga inkhani yake yifumile pakimanyilo iki kili mu buku lya Mubaghaneghe Abandu, ubwighane bwake buyeghe fiyo pamuno tubaghile ukubombesyela ifundo isyo mubufumusi. Abaghile ukulingania ikifwanikisyo iki kili pafundo yakwanda pakimanyilo ikyo pamo abaghile ukulingania amalemba aghakongelela pakimanyilo iki apeliwe linga ukubomba isi kwakutula.

   12. Ifi Filimo: Ifundo isi sili papalagilafu iyi naghangi, sikuyoba fiyo muno tubaghile ukubombela “Pabulendo Bwakwanda” na “Pabulendo Bwakughomokelako.” Ubwighane bwa bamanyili bukulondiwa ukuya bwakulingania ifundo mbupimba isya bwanaloli bwa mu Baibolo kumundu uyu ikuyobesania nawe kangi ikulondiwa ukuketesya ukuti andekile umwenenyumba ifundo iyakuti basayobesanie pabulendo bwakughomokelako. Uyu apeliwe inkhani ikulondiwa ukusala inkhani iyakuti bayobesanie iyi yibaghile ukubafika pandumbula abandu nkighaba kyabo kangi iyi yibaghile ukuya yapakabalilo kake. Mmalo mwakusungila itolo ifundo isyakuyoba, aba apeliwe inkhani bikulondiwa ukongelela uluso lwabo ulwakuyobesania nabandu pakuyoba inkhani syabo ukufuma pasi pandumbula.

   13. Injila Isyakufumukisya: Abamanyili bikulondiwa ukubombela injila iyakufumukisya iyi bapeliwe ukufwana nifindu muno fiyilie kukighaba kyabo. Mwakifwanikisyo:

1.  (1) Ukufumusya Kunyumba ni Nyumba: Ubufumusi ubu bukongelelapo ukufumusya kunyumba ni nyumba, ukwaghanila nabandu, ukwimba ifoni pamo ukulemba abakalata.

2.  (2) Ukufumusya Ndusako: Ubufumusi ubu bukongelelapo ukwanda ukufumusya kubandu ukwendela munkhani isi tukwangala nabo pabumalilo tukwanda ukubabula ifundo sya bwanaloli bwa mu Baibolo.

3.  (3) Ukufumusya Kuno Kukwaghiwa Abandu Bingi: Ubufumusi ubu bukongelelapo ukufumusya mwakubombela utumashelefu, ukufumusya kuno abandu bikubomba ibizinesi, munsebo, kumapaki, kuno bikwimika amagalimoto pamo kulikosa kuno kukwaghiwa abandu bingi.

 14. Ukubombela Amavidiyo na Mabuku: Ukufwana namuno ifindu fiyilile, ummanyili abaghile ukusala linga ighanile ukuketesya amavidiyo pamo ukuyabila amabuku. Linga inkhani yammanyili yikulondiwa ukuketelela ividiyo pamo umwene abaghile ukusala ukubombela imbombo ividiyo, ikulondiwa ukundingania umundu nukuyobesania nawe isya vidiyo loli bangaketelelagha.

15. Linga twimbile ulwimbo, kikuya pakuyangapo ikighaba kya maminiti 15 iki kili ni nkhani yimoyene pamo sibili isi sikulingania muno tubaghile ukubombela ifundo isya mu Baibolo. Abakulumba na batuli abakifwanikisyo ikinunu bo aba bikulondiwa ukupeliwa inkhani isi. Loli linga yilipo inkhani iya ifi fikulondiwa pakipanga, unkulumba mwene yo uyu ikupeliwa. Linga inkhani yakuyobesania kangi yifumile mu Mbatiko ya Ukufumusya nu Bumi Bwitu Bwabukristu, unkamu uyu apeliwe inkhani iyi abaghile ukulalusya amalalusyo aghakongelelapo ukuti ifundo inywamu isi sili munkhani yake sipilikiwe. Linga inkhani iyi yakubalusya amalalusyo abandu, kwakulondiwa ukuti aba bikuya pakwamula amalalusyo babuke papulatifomu mmalo mwakwikala pampando apa bikele’

  16. Ukumanyila Ibaibolo kwa Pakipanga: Amaminiti 30. Unkulumba uyu ikumanyisya kanunu yo uyu abaghile ukupangisya ikighaba iki. (Ifipanga ifi fili na bakulumba banandi, abatuli abakifwanikisyo ikinunu bope babaghile ukupeliwa ikighaba iki, linga kwakulondiwa.) Akabughatila kabakulumba kikulondiwa ukusala abakulumba abakifwanikisyo ikinunu ukuti balongosyeghe pa Kumanyila Ibaibolo kwa Pakipanga. Aba basaliwe bikulondiwa ukulongosya ikighaba iki nubwighane bwakuti aba bikupilikisya bakasiwe, bakete ukulondiwa kwa fundo isi bamanyile, basimanye ifundo inywamu isya Mmalemba kangi baketesyeghe ukuti ikighaba iki kikumalika pakabalilo kake. Abakamu aba basaliwe ukuti balongosyeghe pakighaba iki bikulondiwa ukubelenga nukukonga ifundo isya gulu pankhani yamuno tubaghile ukubombela ninkhani ya malalusyo na maansala. (w23.04 p. 24, ibokosi) Linga mumalile ukuyobesania ifundo syosa isya nkhani yasabata iyo, pakaya ikifukwa ikyakuti mongelele ubutali bwa kimanyilo ikyo. Linga sibaghile ukubombiwa, abakamu aba bikulongosya pakimanyilo iki na aba bikubelenga papalagilafu, bikulondiwa ukuchenjanagha sabata aliwesa. Linga cheyamani wa Lukomano lwa Ukufumusya nu Bumi ayobile ukuti ikimanyilo kiye kyakudumula, unkamu uyu ikuya pakulongosya ikulondiwa ukumanya mwene muno abaghile ukubombela ukuti abombe mbupimba. Umwene abaghile ukusala ukuti amapalagilafu ghamo ghangabelengiwagha.

17. Amaminiti matatu. Cheyamani wa Lukomano lwa Ukufumusya nu Bumi aghomokelemo ifundo inywamu isya palukomano. Ayobeghe kangi mbupimba ifundo isi tukuya pakumanyila sabata wakilabo. Linga akabalilo kalipo, ayobe ingamu sya bamanyili aba bapeliwe inkhani mwasabata wakukongapo. Linga bukayapo ubulongosi bulibosa, mmasyu ghabumalilo, cheyamani ayobe ifimanyisyo ifi fyakulondiwa pamo abakalata aba bikulondiwa ukubelengiwa. Ifimanyisyo fya tubalilo tosa bo imbatiko ya kwingila mubufumusi, ukutendekesya pa Nyumba ya Bunyafyale, fitikulondiwa ukuyobiwa. Loli fikulondiwa ukubikiwa pabolodi lya fimanyisyo. Linga ifimanyisyo fingi pamo kalata ntali fiyo kangi mukabaghila ukufwanisya ukubelenga pakighaba iki, cheyamani ikulondiwa ukubasuma abakamu aba bali ninkhani pakighaba kya Ubumi Bwitu Bwabukristu ukuti bapungusyeko akabalilo ka nkhani syabo. (Keta  amapalagilafu 16 na  19.) Pabumalilo bwa lukomano, mumalisye nulwimbo nulwiputo.

18. Linga ummanyili amalile ukuyoba inkhani yake, cheyamani wa Lukomano lwa Ukufumusya nu Bumi ali niminiti yimoyene ukubika ubulongosi ku mmanyili ukufuma mu bulosha lya Kumanyisya ukufwana nikimanyilo iki apeliwe. Linga cheyamani ankolile ummanyili ukuti ayobe inkhani yake, angayobagha ikimanyilo iki apeliwe. Loli linga amalile inkhani yake na panyuma pakundaghisya, cheyamani ayobe ikimanyilo iki apeliwe nukuyoba isi ummanyili abombile kanunu pakimanyilo iki apeliwe pamo mwalughano ayobe inongwa iyi ikulondiwa ukutendekesya isi asobile ukufwana nikimanyilo iki apeliwe. Cheyamani abaghile ukuyobapo panandi itolo muno ummanyili abombile ikighaba iki apeliwe linga ikuketa ukuti fikuya pakuntula ummanyili pamo abandu. Kumbali ummanyili abaghile ukupeliwa ubulongosi ubwakongelelapo ukufuma mu bulosha lya Mubaghaneghe Abandu, ibulosha lya Kumanyisya pamo mu buku lya Sangani Chandulo linga ulukomano lumalike pamo akabalilo akangi. Ubulongosi ubu bubaghile ukufwana nikimanyilo iki apeliwe pamo ikimanyilo ikingi, keta  amapalagilafu 19,  24, na  25.

19. Yingayangapo inkhani iyi yikukinda pakabalilo kake pamo amasyu gha cheyamani wa Lukomano lwa Ukufumusya nu Bumi. Nalinga ukuti imbatiko ya Ukufumusya nu Bumi Bwitu Bwabukristu yikunangisya akabalilo pakighaba kilikyosa loli kikayapo ikifukwa ikyakukindilila ukuyoba inkhani linga ifundo syosa siyobiwe nalinga akabalilo kalipo. Linga abakamu balile akabalilo bo bikuyoba inkhani simo, cheyamani pamo unkamu uyu ikubika ubulongosi bwapadela, aghane nabo kumbali nukubatula. (Keta  amapalagilafu 24 na  25.) Ulukomano losa lukulondiwa ukubombiwa kwa awala limolyene namaminiti 45 ukongelelapo inyimbo ninyiputo.

20. Linga uwakwendela idela isile, ulukomano lukulondiwa ukubombiwa ukufwana namuno yilembeliwe Imbatiko ya Ukufumusya nu Bumi Bwitu Bwabukristu loli Ukumanyila Ibaibolo kwa Pakipanga kutikuya pakubombiwagha. Mmalo mwake, yikuyapo inkhani yabubombeli ya maminiti 30 iya wakwendela idela. Bo inkhani iya wakwendela idela yikali ukwanda, cheyamani wa Lukomano lwa Ukufumusya nu Bumi aghomokelemo ifundo isi tumanyile, isi twisakumanyila sabata wakukongapo, ayobe ifimanyisyo ifi fyakulondiwa pamo amakalata agha ghikulondiwa ukubelengiwa kangi pabumalilo ayobe umutu wa nkhani iya wakwendela idela kangi ankolele. Linga uwakwendela idela amalile ukuyoba inkhani yake, mukwimba ulwimbo ulu umwene asalile. Abaghile ukunsuma unkamu yumo ukuti ighalile nulwiputo. Pakabalilo aka uwakwendela idela isile pakipanga, ghatikuyapo amakalasi aghangi gha bamanyili. Igulu lya njobelo iyingi libaghile ukubomba ingomano syake nalinga ukuti ikipanga iki kikulilongosya kili nuwakwendela idela. Loli linga uwakwendela idela andile ukuyoba inkhani ya bubombeli, igulu ili likulondiwa ukwisa ukuti lipilikisye inkhani yabubombeli iya wakwendela idela.

21. Mwasabata walukomano lwa dela pamo lwa kighaba, ingomano sya kipanga sitikuyako. Ikipanga kikulondiwa ukukumbusiwa ukuti aliwesa ikulondiwa ukumanyila pamwene pamo nimbumba yake inkhani isya mu sabata iyo.

22. Linga ulukomano lwa kukumbukila inifwa ya Yesu lukuya pakubombiwa nkati mwa sabata, Ulukomano lwa Ukufumusya nu Bumi lutikuya pakubombiwa.

23. Akabughatila kabakulumba kikusala unkulumba ukuti aye wakuketesya Ulukomano lwa Kufumusya nu Bumi. Unkamu uyu, ikulondiwa ukuketesya ukuti ulukomano lukubombiwa ndubatiko lwake ukufwana nubulongosi. Ikulondiwa ukuyobesania nu nkamu uyu ikubika ubulongosi bwapadela. Linga imbatiko ya Ukufumusya nu Bumi Bwitu Bwabukristu yisile itolo, uyu ikuketesya ulukomano lwa Ukufumusya nu Bumi ayabile ngani inkhani syosa isya ngomano sya nkati mwasabata kwa myesi mibili. (Keta  amapalagilafu 3-16 na  24.) Ifundo iyi yikongelelapo inkhani syosa isya ngomano sya nkati mwa sabata ukongelelapo ukubasala abacheyamani pa bakulumba aba bitikisiwe na kabughatila kabakulumba. Inkhani yiliyosa yikulondiwa ukuyabiwa bo kusyele abasabata batatu ukuti lifike isiku ili yisakuyobiwa. Pakuyaba inkhani sya bamanyili mubombeleghe ifomu Yakugaŵila Nkhani mu Ungano wa Uteŵeti na Umoyo Wachikhristu (S-89-TB) Uyu ikuketesya Ulukomano lwa Ukufumusya nu Bumi ikulondiwa ukuketesya ukuti imbatiko yosa ya ngomano sya nkati mwa sabata yikubikiwa pabolodi lya fimanyisyo. Akabughatila kabakulumba kasale unkulumba uyungi pamo untuli nkipanga ukuti atulaneghe nawe ukuyaba inkhani isi. Loli bene abakulumba bo aba bikulondiwa ukuyaba inkhani isi sitikupeliwa ku bamanyili.

24. Sabata aliwesa, unkulumba yumo ikuya yo cheyamani wa Lukomano lwa Ukufumusya nu Bumi. (Linga abakulumba balipo banandi pakipanga, akababughatila ka bakulumba kabaghile ukusala abatuli abakifwanikisyo ikinunu linga kwakulondiwa. Cheyamani ikulondiwa ukwitendekesya amasyu ghakwanda na ghabumalilo. Yo yuyo ikubakolela abandu bosa aba bikuya pakuyoba inkhani palukomano ulu kangi linga abakulumba balipo banandi yope abaghile ukuyoba inkhani simo. Atikulondiwa ukuyoba nyingi linga umundu amalile ukuyoba inkhani. Akabughatila kabakulumba kikulondiwa ukusala kanunu abakulumba aba babaghile ukuya cheyamani. Abakulumba aba bo aba bikuchenjanagha utubalilo tosa. Ukufwana namuno ifindu fiyilile pakipanga, uwakuketesya Ulukomano lwa Ukufumusya nu Bumi, yo ikulondiwa ukuya cheyamani utubalilo twingi ukukinda abakulumba abangi. Linga unkulumba abaghiliwe ukulongosya Ukumanyila Ibaibolo kwa Pakipanga kokuti abaghile ukuya kangi cheyamani. Mungibwagha ukuti unkulumba uyu yo cheyamani ikulondiwa ukubika ubulongosi ku bamanyili aba bayobile inkhani. Bo budindo bwa cheyamani ukuketesya ukuti ingomano simalike pakabalilo kake. (Keta  amapalagilafu 17 na  19.) Linga cheyamani ikulonda abaghile ukubika mayikolofoni ku pulatifomu linga amalo ghaliko ukuti uwakuyoba inkhani imengeko bo akali ukwanda ukuyoba inkhani yake. Kangi linga cheyamani ikulonda, abaghile ukwikala pampando ku pulatifomu pakabalilo aka ummanyili ikubelenga Ibaibolo na pakighaba ikyakuti Muno Tubaghile Ukufumukisya. Ukubomba isi kukutula ukusunga akabalilo.

25. Sibaghile ukuya kanunu ukumpa imbombo iyi unkulumba uyu ikuyoba kanunu inkhani. Unkamu uyu ikubika ubulongosi bwapadela, ali nubudindo bwakumpa ubulongosi unkulumba pamo untuli uyu ikuyoba inkhani Palukomano lwa Ukufumusya nu Bumi, inkhani ya mu Baibolo, uyu ikulongosya Ikimanyilo kya Ingasya ya Ndindilili pamo Ukumanyila Ibaibolo kwa Pakipanga. (Keta  ipalagilafu 19.) Linga pakipanga balipo abakulumba bingi aba bikumanyisya nukuyoba kanunu inkhani, ikyinja kilikyosa mubaghile ukunsala unkulumba uyungi ukuti abikeghe ubulongosi bwapadela. Loli ikulondiwa ukubika ubulongosi pene apa pikulondiwa.

26. Linga abamanyili balipo bingi pakipanga, mubaghile ukupanga amakalasi aghangi. Ikalasi lililyosa likulondiwa ukuya na uyu ikubika ubulongosi, fiyofiyo unkulumba. Linga kwakulondiwa untuli wakifwanikisyo ikinunu abaghile ukulongosya ikalasi lya bamanyili. Akabukaghatila kabakulumba kikulondiwa ukusala unkamu uyu abaghile ukulongosya ikalasi lya bamanyili nukuketa linga kwakulondiwa ukuti bachenjaneghe. Unkamu uyu ikubika ubulongosi ikulondiwa ukukonga isi silembiwe mu  palagilafu 18. Linga muli na makalasi aghangi, abamanyili bikulondiwa ukubuka ku kalasi lyabo linga kimalike ikighaba ikyakuti Ifi Tumanyile iki kili pa Ikyuma Ikyuma iki Kikwaghiwa Mmasyu gha Kyala. Bikulondiwa ukusokako linga bamalile ukumanyila ikighaba ikyakuti Muno Tubaghile Ukufumukisya. Bikulondiwa ukughomokela ukwakwikala pampene nabangi panyuma pankhani iyabumalilo iyammamyili.

27. Palukomano ulu ghikuyangapo amavidiyo agha tukuya pakuketelelagha. Amavidiyo ghalukomano lwa nkati mwa sabata ghikuya pakubikiwagha pa JW Library® kangi ghikuya pakwaghiwagha napafibombelo ifingi ifyakukindanakindana.

© 2023 Watch Tower Bible and Tract Society of Pennsylvania

S-38-NKN 11/23