Edwɛkɛsisilɛ Mɔɔ Limoa 11:1-47
11 Akee Yizilayɛma amuala boɔboale bɛ nloa hɔle Devidi anwo ɛkɛ wɔ Hibulɔn+ na bɛhanle kɛ: “Nea! Yɛle wɔ bowule nee wɔ nwonane.*+
2 Mekɛ bie mɔɔ ɛze ɛhɔ mɔɔ ɛnee Sɔɔlo a le belemgbunli la, ɛnee ɛdawɔ a ɛdi Yizilayɛma anyunlu bɛkɔ konle a.*+ Na Gyihova wɔ Nyamenle ne hanle hilele wɔ kɛ: ‘Ɛbanlea me menli Yizilayɛma anwo zo, na ɛbayɛ me menli Yizilayɛma adekilevolɛ.’”+
3 Ɔti Yizilayɛ mgbanyima kɔsɔɔti rale belemgbunli ne anwo ɛkɛ wɔ Hibulɔn, na Devidi nee bɛ yɛle ngyekyeleɛ wɔ Gyihova anyunlu wɔ Hibulɔn. Akee bɛkpokpale Devidi kɛ Yizilayɛma belemgbunli+ kɛ mɔɔ Gyihova luale Samoɛle anwo zo hanle la.+
4 Nzinlii Devidi nee Yizilayɛma amuala dule bɛ bo hɔle Gyɛlusalɛm, yemɔ a le Gyibɛse,+ ɛnee Gyibɛsema+ a de ɛkɛ ne azɛlɛ ne azo a.
5 Menli mɔɔ wɔ Gyibɛse la golole Devidi anwo kɛ: “Ɛnrɛra ɛke ɛlɛ.”+ Noko Devidi honle vale Zayɔn+ aranemgbole ne, mɔɔ ɛnɛ le Devidi Suakpole la.+
6 Ɔti Devidi hanle kɛ: “Awie mɔɔ ɔbalimoa yeahɔteta Gyibɛsema la bayɛ kpanyinli na yeali ɛlɔne ne ati.” Na Dwowabe+ mɔɔ le Zɛluaya ara la limoale hɔle na ɔrayɛle kpanyinli.
7 Akee Devidi hɔdɛnlanle aranemgbole ne anu. Ɛhye ati a bɛfɛlɛ ye Devidi Suakpole la.
8 Ɔbɔle ɔ bo ɔkyekyele suakpole ne amuala, ɔbɔle ɔ bo wɔ Boka* ne anwo ɔhɔdwule ɛleka mɔɔ zuozua ye la, na Dwowabe zieziele suakpole ne ɛleka mɔɔ hale la.
9 Ɔti Devidi hɔle zo yɛle kpole,+ na ɛnee ɛlɔne Gyihova nee ye lua.
10 Akee Devidi konle nu katakyiema mgbanyima ne mɔ mɔɔ boale ye kpalɛ wɔ ye belemgbunlililɛ ne anu la ɛne, bɛ nee Yizilayɛma amuala bɔle nu kɛ bɛsie ye belemgbunli kɛ mɔɔ Gyihova edwɛkɛ ne mɔɔ ɔhanle ye wɔ Yizilayɛma anwo kile la.+
11 Devidi konle nu katakyiema ne aluma ɛne: Hakemonaenli ara Gyahyɔbeyam,+ mɔɔ ɔgyi nsa ne ati la.+ Ɔvale ye atwɛ ne ɔhunle menli 300 wɔ mekɛ ko anu.+
12 Mɔɔ doa ye la a le Ahohaenli+ Dodo ara Ɛlieza.+ Ɔboka konle nu katakyiema nsa ne anwo.
13 Ɛnee ɔwɔ Devidi anwo ɛkɛ wɔ Pase-damem,+ ɛleka mɔɔ Filisitiama boɔboale bɛ nloa kɛ bɛkɔ konle la. Na ɛnee azɛlɛ bie mɔɔ baale dɔɔnwo wɔ zolɛ la wɔ ɛkɛ, na Filisitiama ne ati menli ne nriandile.
14 Noko ɔgyinlanle ɛya ne avinli na ɔhonle ɔbɔle nwolɛ bane, na ɔhɔle zo ɔhunle Filisitiama, yemɔti Gyihova maanle bɛlile konim* kpole.+
15 Mgbanyima 30 ne anu nsa hɔle bolɛ ne anu, wɔ Devidi anwo ɛkɛ wɔ Adulam bolɛ bɔne+ ne anu, wɔ mekɛ mɔɔ ɛnee Filisitiama ɛlɔne ne ɛyɛ bɛ azokoɛleɛ wɔ Relɛfeeyem Bɔnza*+ ne anu la.
16 Ɛnee Devidi wɔ ɛvealeka ne, yɛɛ Filisitia sogyama ekpunli bie wɔ Bɛtelɛhɛm.
17 Akee Devidi ati akunlu rale debie zo na ɔhanle kɛ: “Anrɛɛ meanyia bula ne mɔɔ wɔ Bɛtelɛhɛm+ anlenkɛ kpole ne anloa la anu nzule ne bie meanlo!”
18 Na menli nsa ne bɔle mɔdenle hɔle Filisitiama azokoɛleɛ ne na bɛhɔzale bula ne mɔɔ wɔ Bɛtelɛhɛm anlenkɛ kpole ne anloa la anu nzule ne bie na bɛvale bɛrɛlɛle Devidi; noko Devidi anno na ɔwolale ɔguale aze ɔmaanle Gyihova.
19 Ɔhanle kɛ: “Ɔnrɛra ye zɔ ɛlɛ kɛ mekɛyɛ ɛhye wɔ me Nyamenle ne anyunlu! Ɔwɔ kɛ meno menli ɛhye mɔ mɔɔ vale bɛ ngoane* dole esiane nu la mogya ɔ?+ Ɔluakɛ bɛvale bɛ ngoane* bɛdole esiane nu a bɛhɔzale bɛrale a.” Ɔti yeanno. Ninyɛne ɛhye mɔ a ye konle nu katakyiema nsa ne yɛle a.
20 Dwowabe+ adiema Abehyae+ ragyinlanle menli nsa bieko ati; ɔvale ye atwɛ ne ɔhunle menli 300, na ɔliele duma kɛ nsa ne la.+
21 Wɔ nsa zɔhane anu, ɛnee ɔle titili ɔfi nwiɔ ne anwo, na ɛnee ɔle bɛ kpanyinli; noko yeandwu nsa ne mɔɔ limoa la gyinlabelɛ ne.
22 Gyɛhɔyada ara Bɛnaya+ le sonla mɔɔ lɛ akɛnrasesebɛ* mɔɔ ɔyɛle ninyɛne mgbole wɔ Kabezeɛle+ a. Ɔhunle Aleɛle mɔɔ vi Mowabe la amra mrenyia nwiɔ ne, yɛɛ ɔdwule kuma bie mɔɔ nzule wɔ nu la anu wɔ kenle ko bie mɔɔ ezukɔtweaba ɛlɛtɔ la na ɔhunle awenade.+
23 Eza ɔhunle Yigyibitinli kakanyinli bie—ye tendenle le kubit* nnu.+ Ɛnee Yigyibitinli ne lɛ atwɛ mɔɔ ɔle kɛ ndanlɛnwolɛma mgbunla+ la wɔ ɔ sa nu ɛdeɛ, noko ɔvale baka ɔhɔle ɔ nwo zo na ɔliele atwɛ ne ɔvile Yigyibitinli ne asa anu na ɔvale ye atwɛ ne ɔhunle ye.+
24 Ninyɛne ɛhye mɔ a Gyɛhɔyada ara Bɛnaya yɛle a, yɛɛ ɔliele duma kɛ konle nu katakyiema nsa ne la.
25 Ɛnee ɔle sonla titili ɔtɛla abulasa ne ɛdeɛ, noko yeandwu menli nsa ne gyinlabelɛ ne.+ Noko Devidi maanle ɔnleanle ye sinzavolɛma ne anwo zo.
26 Sogyama ne anu konle nu katakyiema ne mɔ a le Dwowabe adiema Asahɛle,+ Dodo mɔɔ vi Bɛtelɛhɛm la ara Ɛleheenan,+
27 Heelonli Hyamɔto, Pɛlonli Hilɛze,
28 Tɛkowanli Yekɛhye ara Ayela,+ Anatɔtonli Abi-yizɛ,+
29 Huhyanli Sebɛkae,+ Ahohaenli Ayelaye,
30 Nɛtɔfanli Meehalae,+ Nɛtɔfanli Beeyanaa ara Hilɛde,+
31 Relaebeeyae mɔɔ vi Bɛngyamanema+ sua Gebeya azo la ara Yetae, Pilatɔnonli Bɛnaya,
32 Hulae mɔɔ vi Geeyahye+ azudenle* ne anu, Alebatenli Abayɛle,
33 Azemeevɛte mɔɔ vi Bahulem, Yilayaaba mɔɔ vi Hyeeyalebem,
34 Gaezonli Hahyɛm amra ne mɔ, Hɛlanli Hyeegi ara Dwɔnatan,
35 Hɛlanli Seekaa ara Ahayam, Ɛɛle ara Yilaefale,
36 Mɛkilatenli Hifɛ, Pɛlonli Ahaegya,
37 Kamɛlenli Hɛzelo, Ɛzebae ara Neeyalae,
38 Neetan adiema Dwowɛle, Hagelae ara Mebeha,
39 Amɔnonli Zilɛke, Biyɛlɔtonli Neehalae mɔɔ ɔsoa Zɛluaya ara Dwowabe konle ninyɛne la;
40 Yetelanli Ayela, Yetelanli Geelɛbe,
41 Hɛtenli Yulaya,+ Aalae ara Zeebade,
42 Wulubɛnenli Hyaeza ara Adina, ɔli Wulubɛnema ati yɛɛ menli 30 boka ɔ nwo;
43 Meeyaka ara Heenan, Metenenli Dwohyafate,
44 Ahyetalɔtonli Yuziya, Hyeema nee Gyiyayɛle, Alowɛnli Hotam amra ne mɔ;
45 Hyemelae ara Gyɛdayɛle nee ɔ diema Taezaenli Dwoha;
46 Meehavanli Yileɛle, Ɛleneeyam amra Gyɛlebae nee Dwɔhyavaya yɛɛ Mowabenli Yetema;
47 Yileɛle, Obɛde yɛɛ Mɛzobayenli Gyasayɛle.
Ɔbodwɛkɛ
^ Anzɛɛ “wɔ mbusuafoɔ.”
^ Hibulu aneɛ nu, “awie mɔɔ fa Yizilayɛma finde na ɔfa bɛ ɔba a.”
^ Anzɛɛ “Millo.” Ɔle Hibulu edwɛkɛkpɔkɛ mɔɔ kile “kuma ɛdualɛ.”
^ Anzɛɛ “maanle bɛ ngoanelielɛ.”
^ Anzɛɛ “Azɛlɛ Sɛsɛ.”
^ Anzɛɛ “ɛkɛla.”
^ Anzɛɛ “ɛkɛla.”
^ Hibulu aneɛ nu, “nrenyia akɛnrasesebɛ bie ara.”
^ Nea Edwɛkɛbohilelɛ.
