Edwɛkɛsisilɛ Mɔɔ Limoa 13:1-14
13 Devidi nee mgbanyinli mɔɔ nea menli apenle apenle nee menli ɛya ɛya nwo zo yɛɛ adekilevolɛma kɔsɔɔti vale adwenle.+
2 Akee Devidi hanle hilele Yizilayɛ asafo ne amuala kɛ: “Saa ɔle kpalɛ ɔmaa bɛ na Gyihova yɛ Nyamenle ne die to nu a, bɛmaa yɛva nrɛlaleɛ yɛhɔmaa yɛ mediema mɔɔ ɛha mɔɔ bɛwɔ Yizilayɛ maanzinli ne mɔ amuala anu nee ɛsɔfoma ne yɛɛ Livaema mɔɔ wɔ bɛ azuamgbole+ nee nwolɛ adidileka ne mɔ azo la kɛ bɛraboka yɛ nwo.
3 Na bɛmaa yɛhɔva yɛ Nyamenle ne Ɛlɛka ne+ yɛzia yɛrɛla.” Ɔluakɛ bɛamkpo ɔ bo zo wɔ Sɔɔlo+ mekɛ zo.
4 Asafo ne amuala liele dole nu kɛ bɛbayɛ, ɔluakɛ ɛnee ɔle kpalɛ ɔmaa menli ne amuala.
5 Ɔti Devidi boɔboale Yizilayɛma kɔsɔɔti anloa, ɔvi Yigyibiti azule* ne anloa too ɔhɔdwule Libo-heemate,*+ kɛ bɛkava nɔhalɛ Nyamenle ne Ɛlɛka ne bɛavi Keleate-gyialem bɛara.+
6 Devidi nee Yizilayɛma kɔsɔɔti hɔle Beeyalaa,+ bɛhɔle Keleate-gyialem mɔɔ wɔ Dwuda la, kɛ bɛkava Gyihova, nɔhalɛ Nyamenle ne mɔɔ ɔde kyɛlɔbe ne mɔ azo*+ la Ɛlɛka ne mɔɔ bɛbɔ ye duma wɔ zolɛ la bɛara.
7 Noko bɛvale nɔhalɛ Nyamenle ne Ɛlɛka ne bɛziele ehwili fofolɛ bie azo+ na bɛyele bɛvile Abenadabe sua nu kɛ bɛfa bɛara, na ɛnee Ɛzaa nee Ahayo a li ehwili ne+ anyunlu a.
8 Devidi nee Yizilayɛma amuala vale bɛ anwosesebɛ kɔsɔɔti lile fɛlɛko wɔ nɔhalɛ Nyamenle ne anyunlu, bɛbɔle edwɛne, haape, getaa* ngakyile, akɛya,+ bulalɛ mɔɔ dielie+ yɛɛ aweɛne ndendenle.+
9 Noko mɔɔ bɛdwule ɛleka mɔɔ bɛwoso ma ne wɔ Kaedɔn la, Ɛzaa dendenle ɔ sa zɔle Ngyekyeleɛ Ɛlɛka ne anu, ɔluakɛ anrɛɛ ɛnlankɛ ne maa yeadɔ aze.
10 Na Gyihova vale Ɛzaa anwo ɛya, na Ɔbɔle ye ɔhunle ye ɔluakɛ ɔdendenle ɔ sa ɔzɔle Ɛlɛka ne anu,+ na ɔwule ɛkɛ ne wɔ Nyamenle anyunlu.+
11 Noko Devidi vale ɛya* kɛ Gyihova ɛya kpole ne rale Ɛzaa anwo zo la; na bɛvɛlɛ ɛleka zɔhane Pilɛze-ɛzaa* too a yeradwu ɛnɛ a.
12 Ɔti Devidi zulole nɔhalɛ Nyamenle ne wɔ kenle zɔhane na ɔhanle kɛ: “Kɛ ɔkɛyɛ na meahola meava nɔhalɛ Nyamenle ne Ɛlɛka ne meara ɛleka mɔɔ mewɔ la ɛ?”+
13 Devidi anva Ɛlɛka ne amba ɛleka mɔɔ ɔwɔ la wɔ Devidi Suakpole ne azo, emomu ɔmaanle bɛvale bɛhɔle Gatenli Obɛde-yidɔm sua nu.
14 Na nɔhalɛ Nyamenle ne Ɛlɛka ne hale Obɛde-yidɔm sua nu ɛkɛ ne too siane nsa, na Gyihova hɔle zo yilale Obɛde-yidɔm sua nu amra nee debie biala mɔɔ ɔlɛ la azo.+
Ɔbodwɛkɛ
^ Anzɛɛ “ɔvi Hyaehɔ.”
^ Anzɛɛ “Heemate adenle zo.”
^ Anzɛɛ ɔkola ɔkile, “avinli.”
^ Tete ɛdeɛ ne le ngakyile fi ɛnɛ mekɛ ye getaa nwo.
^ Anzɛɛ “ɔgyegyele ye.”
^ Ɔ bo kile “Ɔbule Ɔvale Ɛzaa Anwo Zo.”
