Edwɛkɛsisilɛ Mɔɔ Limoa 15:1-29
15 Na ɔhɔle zo ɔsisile ye azua wɔ Devidi Suakpole ne azo, na ɔzieziele ɛleka ɔmaanle nɔhalɛ Nyamenle ne Ɛlɛka ne na ɔzile ɛdanlɛsua ɔmaanle ye.+
2 Mekɛ zɔhane Devidi hanle kɛ: “Ɔnle kɛ awie biala soa nɔhalɛ Nyamenle ne ɛlɛka ne kyesɛ Livaema ala, ɔluakɛ Gyihova ɛkpa bɛ kɛ bɛzoa Gyihova Ɛlɛka ne na bɛzonle ye dahuu.+
3 Akee Devidi boɔboale Yizilayɛma kɔsɔɔti anloa wɔ Gyɛlusalɛm kɛ bɛkava Gyihova Ɛlɛka ne bɛara ɛleka mɔɔ yeziezie yemaa ye la.+
4 Devidi boɔboale Aalɔn abozoamra+ nee Livaema+ anloa:
5 Kohatema anu, Yuleɛle mɔɔ le kpanyinli la nee ɔ mediema 120;
6 Mɛlɛlaema anu, Asaya+ mɔɔ le kpanyinli la nee ɔ mediema 220;
7 Gɛhyɔmma anu, Dwowɛle+ mɔɔ le kpanyinli la nee ɔ mediema 130;
8 Ɛlezeefan+ abozoamra anu, Hyɛmaya mɔɔ le kpanyinli la nee ɔ mediema 200;
9 Hibulɔn abozoamra anu, Yileɛle mɔɔ le kpanyinli la nee ɔ mediema 80;
10 Ɛzeɛle+ abozoamra anu, Amenadabe mɔɔ le kpanyinli la nee ɔ mediema 112.
11 Eza Devidi vɛlɛle ɛsɔfoma, Zeedɔko+ nee Abayata+ yɛɛ Livaema Yuleɛle, Asaya, Dwowɛle, Hyɛmaya, Yileɛle nee Amenadabe,
12 na ɔzele bɛ kɛ: “Bɛmɛ a bɛle Livaema mbusua mgbanyinli a. Bɛmaa bɛ nwo ɛde, bɛ nee bɛ mediema ne mɔ na bɛhɔva Yizilayɛ Nyamenle Gyihova Ɛlɛka ne bɛrɛla ɛleka mɔɔ meziezie memaa ye la.
13 Kɛmɔ alimoa ne bɛanzoa la ati,+ Gyihova yɛ Nyamenle ne vale yɛ nwo ɛya,+ ɔluakɛ yeamkpondɛ adenle kpalɛ ne mɔɔ bɛdua zo bɛyɛ ye la.”+
14 Ɔti ɛsɔfoma ne nee Livaema ne maanle bɛ nwo dele kɛ bɛkava Yizilayɛ Nyamenle Gyihova Ɛlɛka ne bɛara.
15 Akee Livaema ne vale mbaka wulowulale nu na bɛzoale nɔhalɛ Nyamenle ne Ɛlɛka ne bɛ kɔme zo,+ kɛ mɔɔ Gyihova luale Mosisi anwo zo hanle la.
16 Akee Devidi zele Livae mgbanyima ne mɔ kɛ bɛkpa bɛ mediema edwɛndolɛma ne mɔ bie bɛmaa bɛva anyelielɛ bɛdo edwɛne, bɛva edwɛnebɔlɛ ninyɛne: getaa,* haape+ yɛɛ bulalɛ mɔɔ dielie.+
17 Ɔti Livaema ne kpale Dwowɛle ara Himan,+ yɛɛ ɔ mediema ne mɔ anu, Bɛlikaya ara Esafe,+ yɛɛ bɛ mediema Mɛlɛlaema ne anu, Kuhyaya ara Yitan.+
18 Bɛ nee bɛ mediema mɔɔ wɔ ekpunli ne mɔɔ tɔ zolɛ nwiɔ anu la,+ Zɛkalaya, Bɛn, Gyeezeɛle, Hyimelamɔto, Gyɛhayɛle, Ɔnae, Ɛlayabe, Bɛnaya, Meeyasaya, Matetaya, Ɛlefɛlihu nee Mekeniya yɛɛ Obɛde-yidɔm nee Gyiyayɛle mɔɔ bɛle nlenkɛ mgbole sinzavolɛma la.
19 Edwɛndolɛma Himan,+ Esafe+ yɛɛ Yitan a babɔ kɔbele mbulalɛ ne mɔ mɔɔ dielie la a;+
20 na Zɛkalaya, Ezeɛle, Hyimelamɔto, Gyɛhayɛle, Ɔnae, Ɛlayabe, Meeyasaya yɛɛ Bɛnaya a bɔle getaa ne wɔ Alamɔto*+ zo a;
21 na Matetaya,+ Ɛlefɛlihu, Mekeniya, Obɛde-yidɔm, Gyiyayɛle yɛɛ Azazaya a bɔle haape ne wɔ Hyɛmenete*+ zo na bɛnleanle menli ne anwo zo a.
22 Kɛnanaya+ mɔɔ le Livaema ne kpanyinli la a nleanle maanle bɛzoale a, ɔluakɛ ɛnee yebe kpalɛ,
23 yɛɛ Bɛlikaya nee Ɛlekeena a zinzale Ɛlɛka ne a.
24 Ɛsɔfoma Hyɛbanaya, Dwohyafate, Nɛtanɛle, Ameesae, Zɛkalaya, Bɛnaya yɛɛ Ɛleyizɛ bɔle aweɛne ndendenle ne mɔ anu kpole wɔ nɔhalɛ Nyamenle ne Ɛlɛka ne anyunlu,+ yɛɛ Obɛde-yidɔm nee Gyihaya noko zinzale Ɛlɛka ne.
25 Akee Devidi nee Yizilayɛ mgbanyima yɛɛ mgbanyinli mɔɔ nea menli apenle apenle nwo zo la vale fɛlɛkolilɛ+ luale nwo hɔle kɛ bɛkava Gyihova ngyekyeleɛ ɛlɛka ne bɛavi Obɛde-yidɔm+ sua nu bɛara.
26 Mɔɔ nɔhalɛ Nyamenle ne boale Livaema mɔɔ zoale Gyihova ngyekyeleɛ ɛlɛka ne la, bɛvale nlankɛ mralɛ nyinli nsuu yɛɛ mboane nyinli nsuu bɛbɔle afɔle.+
27 Ɛnee Devidi wula ɛdanlɛ tɛladeɛ kɛnlɛma bie mɔɔ ɛnlɛ ɔ sa la, na ɛnee Livaema mɔɔ zo Ɛlɛka ne la amuala, edwɛndolɛma ne nee Kɛnanaya, kpanyinli ne mɔɔ nea ɛlɛka ne ɛzoalɛ zo nee edwɛndolɛma ne anwo zo la noko wula bie; ɛnee Devidi eza wula lenen yifɔdo.+
28 Ɛnee Yizilayɛma amuala ɛlɛfa fɛlɛkolilɛ ava Gyihova ngyekyeleɛ ɛlɛka ne ara,+ bɛbɔle ɛweɛne, aweɛne ndendenle,+ mbulalɛ mɔɔ dielie, na bɛbɔle getaa nee haape+ ne mɔ kpole kpalɛ.
29 Noko mɔɔ Gyihova ngyekyeleɛ ɛlɛka ne radwule Devidi Suakpole ne azo+ la, Sɔɔlo ara raalɛ Maekale+ nleanle nvɛnzɛlɛ ne anu na ɔnwunle kɛ Belemgbunli Devidi ɛlɛwuluwulu na ɔ nye ɛlie; na yeambu ye bie wɔ ye ahonle nu.+
Ɔbodwɛkɛ
^ Tete ɛdeɛ ne le ngakyile fi ɛnɛ mekɛ ye getaa nwo.
^ Nea Edwɛkɛbohilelɛ.
^ Nea Edwɛkɛbohilelɛ.
