Edwɛkɛsisilɛ Mɔɔ Limoa 16:1-43
16 Ɔti bɛvale nɔhalɛ Nyamenle ne Ɛlɛka ne bɛrale na bɛvale bɛziele ɛdanlɛsua ne mɔɔ Devidi ɛzi ɛmaa ye la anu;+ na bɛbɔle ɛyelalɛ afɔle nee anzodwolɛ afɔle wɔ nɔhalɛ Nyamenle ne anyunlu.+
2 Mɔɔ Devidi bɔle ɛyelalɛ nee anzodwolɛ afɔle+ ne wiele la, ɔyilale menli ne wɔ Gyihova duma nu.
3 Eza Devidi maanle Yizilayɛma kɔsɔɔti, nrenyia nee raalɛ ko biala paano kunguma ko, arɛlɛ* keeki yɛɛ vanye ma welera.
4 Akee ɔkpale Livaema ne bie kɛ bɛzonle wɔ Gyihova Ɛlɛka ne anyunlu,+ bɛli Yizilayɛ Nyamenle Gyihova eni,* bɛyɛ ye mo na bɛye ye ayɛlɛ.
5 Esafe+ a li bɛ ti a, na Zɛkalaya tɔ zolɛ nwiɔ; yɛɛ Gyiyayɛle, Hyimelamɔto, Gyɛhayɛle,+ Matetaya, Ɛlayabe, Bɛnaya, Obɛde-yidɔm yɛɛ Gyiyayɛle bɔle getaa nee haape;+ na Esafe bɔle mbulalɛ ne mɔɔ dielie la,+
6 na ɛsɔfoma Bɛnaya nee Gyeheezayɛle bɔle aweɛne ndendenle ne mɔ anu dahuu wɔ nɔhalɛ Nyamenle ne ngyekyeleɛ ɛlɛka ne anyunlu.
7 Kenle zɔhane a Devidi limoale luale Esafe+ nee ɔ mediema ne mɔ anwo zo dole moyɛlɛ edwɛne maanle Gyihova a:
8 “Bɛyɛ Gyihova mo,+ bɛbɔ ye duma,Bɛmaa menli ɛnwu ye nyɛleɛ ne mɔ!+
9 Bɛdo edwɛne bɛmaa ye, bɛdo* ayɛlɛyelɛ edwɛne bɛmaa ye,+Bɛdwenledwenle* ye nwanwane gyima ne mɔ amuala anwo.+
10 Bɛva ye duma nwuanzanwuanza ne bɛdu bɛ nwo.+
Bɛmaa bɛdabɛ mɔɔ bɛlɛkpondɛ Gyihova la ahonle ɛli fɛlɛko.+
11 Bɛkpondɛ Gyihova+ nee ye anwosesebɛ ne.
Bɛkpondɛ ɔ nyunlu ɛlolɛ* dahuu.+
12 Bɛhakye nwanwane gyima ne mɔ mɔɔ yeyɛ la,+Ye sɛkɛlɛneɛ ne mɔ nee ndɛne ne mɔ mɔɔ yebua la,
13 Bɛmɛ ye sonvolɛ Yizilayɛ abozoamra,+Bɛmɛ Gyekɔbo amra mɔɔ yekpa nu yeye bɛ.+
14 Ɔdaye a ɔle Gyihova yɛ Nyamenle a.+
Ye ndɛnebualɛ kɔdwu azɛlɛ ye ɛleka biala.+
15 Bɛhakye ye ngyekyeleɛ ne dahuu,Ɛwɔkɛ mɔɔ ɔbɔle* awolɛndoazo apenle ne la,+
16 Ngyekyeleɛ ne mɔɔ ɔ nee Ebileham yɛle,+Nee ndane ne mɔɔ ɔhanle Ayezeke,+
17 Mɔɔ ɔvale ɔziele ɛkɛ ne kɛ mɛla ɔmaanle Gyekɔbo+Na ɔvale ɔmaanle Yizilayɛ kɛ dahuu ngyekyeleɛ la,
18 Ɔhanle kɛ, ‘Mebava Keena azɛlɛ ne meamaa bɛ+Kɛ agyapadeɛ mɔɔ bɛva bɛmaa bɛ.’+
19 Ɔhanle ɛhye wɔ mekɛ mɔɔ ɛnee bɛ nwo anzo,Ɛhɛe, bɛle ekyi bie, na bɛle nyɛvolɛ wɔ azɛlɛ ne azo la.+
20 Bɛkpɔsale bɛvile maanle ko azo bɛhɔle maanle fofolɛ zo,Bɛvile belemgbunlililɛ ko abo bɛhɔle menli gyɛne nu.+
21 Yeammaa awie biala adenle yeammaa yeansisi bɛ,+Emomu, bɛdabɛ bɛ ti ɔhwile arelemgbunli nyunlu,+
22 Ɔhanle kɛ, ‘Bɛmmafa bɛ sa bɛka me menli ne mɔɔ mekpokpa bɛ la,Yɛɛ bɛmmayɛ me ngapezoma ne ɛtane biala.’+
23 Azɛlɛ ye kɔsɔɔti, bɛdo edwɛne bɛmaa Gyihova!
Bɛbɔ ye ngoanelielɛ ne nolo alehyenlɛ biala!+
24 Bɛha ye anyunlunyia ne anwo edwɛkɛ wɔ maanle maanle ne mɔ anu,Bɛha ye nwanwane gyima ne mɔ anwo edwɛkɛ wɔ menli kɔsɔɔti avinli.
25 Ɔluakɛ Gyihova le bedevinli yɛɛ ɔfɛta bɔkɔɔ kɛ bɛye ye ayɛlɛ.
Ɔ nwo yɛ ɛzulolɛ kpalɛ tɛla nyamenle mɔɔ ɛha la amuala.+
26 Maanle maanle ne mɔ nyamenle ne mɔ amuala le nyamenle mɔɔ nvasoɛ ɛnle bɛ nwo zo,+Noko ahenle mɔɔ bɔle anwuma la a le Gyihova.+
27 Kpoleyɛlɛ* nee anyunlunyia ɛbɔ ye ɛyia;+Anwosesebɛ nee anyelielɛ wɔ ɛleka mɔɔ ɔde la.+
28 Bɛmɛ maanle maanle kɔsɔɔti anu mbusua, bɛva mɔɔ fɛta Gyihova la bɛmaa ye,Bɛva anyunlunyia nee anwosesebɛ mɔɔ fɛta Gyihova la bɛmaa ye.+
29 Bɛva anyunlunyia mɔɔ fɛta Gyihova duma ne la bɛmaa ye;+Bɛva ahyɛlɛdeɛ bɛrɛla na bɛrɛla ɔ nyunlu.+
Bɛva anwoziezielɛ nwuanzanwuanza* bɛbutu bɛ nyunlu aze bɛmaa Gyihova.*+
30 Azɛlɛ ye kɔsɔɔti, bɛmaa bɛ nwo ɛwoso bɛ wɔ ɔ nyunlu!
Bɛva azɛlɛ* ne bɛzie ɛkɛ ne kpundii; bɛnrɛhola ɔ bo tu* ɛlɛ.+
31 Bɛmaa anwuma ɛli fɛlɛko, na bɛmaa azɛlɛ ne anye ɛlie;+Bɛha ye wɔ maanle maanle ne mɔ anu kɛ: ‘Gyihova ɛrayɛ Belemgbunli!’+
32 Bɛmaa nyevile ne nee debie biala mɔɔ wɔ nu la ɛhulu;Bɛmaa kpɔkɛ nee debie biala mɔɔ wɔ nu la ɛli fɛlɛko.
33 Eza bɛmaa ɛhoayelɛ nu mbaka ɛva anyelielɛ ɛdeɛdea nu wɔ Gyihova anyunlu,Ɔluakɛ ɔlɛba yearabua* azɛlɛ ye ndɛne.
34 Bɛyɛ Gyihova mo, ɔluakɛ ɔle kpalɛ;+Ye ɛlɔlɛ kpundii ne wɔ ɛkɛ ne dahuu.+
35 Na bɛha kɛ, ‘O yɛ ngoanedievolɛ Nyamenle, die yɛ,+Boɔboa yɛ nloa na die yɛ fi maanle maanle ne mɔ asa anu,Amaa yɛayɛ wɔ duma nwuanzanwuanza ne mo+Na yɛava fɛlɛkolilɛ yɛaye wɔ ayɛlɛ.*+
36 Ayɛlɛyelɛ ɛha Gyihova,Yizilayɛ Nyamenle ne dahuu.’”*
Na menli ne amuala hanle kɛ, “Amen!”* na bɛyele Gyihova ayɛlɛ.
37 Akee Devidi gyakyile Esafe+ nee ɔ mediema ne mɔ wɔ Gyihova ngyekyeleɛ ɛlɛka ne anyunlu ɛkɛ ne kɛ bɛhɔ zo bɛzonle wɔ Ɛlɛka ne anyunlu,+ kɛ mɔɔ ɔwɔ kɛ bɛyɛ ye alehyenlɛ biala la.+
38 Obɛde-yidɔm nee ɔ mediema ne mɔ lua 68, na ɛnee Gyɛdutɛn ara Obɛde-yidɔm nee Hosa le nlenkɛ mgbole sinzavolɛma;
39 yɛɛ ɛnee ɛsɔfo Zeedɔko+ nee ɔ gɔnwo mɔ ɛsɔfoma ne wɔ Gyihova ɛdanlɛsua ne anyunlu wɔ ɛleka mɔɔ bɛsonle la wɔ Gebɛyɔn+
40 kɛ bɛbɔ ɛyelalɛ afɔle bɛamaa Gyihova dahuu wɔ ɛyelalɛ afɔlemokyea ne azo nwonlomɔ nee nɔsolɛ, na bɛayɛ mɔɔ bɛhɛlɛ ye wɔ Gyihova Mɛla ne mɔɔ ɔvale ɔmaanle Yizilayɛma la anu la amuala.+
41 Ɛnee Himan nee Gyɛdutɛn+ yɛɛ mrenyia mɔɔ bɛkpa bɛ mɔɔ bɛbobɔle bɛ aluma kɛ bɛyɛ Gyihova mo+ mɔɔ hale la boka bɛ nwo, ɔluakɛ “ye ɛlɔlɛ kpundii ne wɔ ɛkɛ ne dahuu”;+
42 na ɛnee Himan+ nee Gyɛdutɛn wɔ bɛ nwo ɛkɛ ne kɛ bɛbɔ aweɛne ndendenle, mbulalɛ mɔɔ dielie nee edwɛnebɔlɛ ninyɛne mɔɔ bɛfa bɛye nɔhalɛ Nyamenle ne ayɛlɛ* la; na Gyɛdutɛn+ amra ne mɔ zinzale anlenkɛ kpole ne.
43 Akee menli ne amuala hɔle bɛ azua nu, na Devidi hɔyilale ɔdaye mumua ne ye sua nu amra.
Ɔbodwɛkɛ
^ Bɛdua arɛlɛ ɛhye wɔ Palesetanye.
^ Hibulu aneɛ nu, “bɛhakye ye.”
^ Anzɛɛ “bɛbɔ.”
^ Anzɛɛ ɔkola ɔkile, “Bɛha.”
^ Anzɛɛ “ɔ nyunlu.”
^ Hibulu aneɛ nu, “Edwɛkɛ mɔɔ ɔhanle ɔhilele.”
^ Anzɛɛ “Enililɛ.”
^ Anzɛɛ ɔkola ɔkile, “Ɔlua ye nwuanzanwuanzayɛlɛ anyunlunyia ne ati.”
^ Anzɛɛ “bɛzonle ye.”
^ Anzɛɛ “ewiade.”
^ Anzɛɛ “ye woso.”
^ Anzɛɛ “yera kɛ ɔbabua.”
^ Anzɛɛ “Na yɛ nye alie wɔ wɔ ayɛlɛyelɛ ne anu.”
^ Anzɛɛ “ɔvi mekɛ mɔɔ ɛnlɛ awieleɛ kɔdwu mekɛ mɔɔ ɛnlɛ awieleɛ.”
^ Anzɛɛ “Ɔyɛ ɛkɛ!”
^ Anzɛɛ “ninyɛne mɔɔ bɛfa bɛbɔ edwɛne.”
