Edwɛkɛsisilɛ Mɔɔ Limoa 17:1-27
17 Mɔɔ Devidi hɔdɛnlanle ye sua* ne anu ala la, ɔhanle ɔhilele ngapezonli Neetan+ kɛ: “Nea mede sua mɔɔ bɛva sida mbaka+ bɛzi la anu noko Gyihova ngyekyeleɛ ɛlɛka ne gyi ɛdanlɛsua nu.”+
2 Neetan buale Devidi kɛ: “Yɛ debie biala mɔɔ wɔ wɔ ahonle nu la, ɔluakɛ nɔhalɛ Nyamenle ne nee wɔ lua.”
3 Zɔhane nɔe ne, Nyamenle zele Neetan kɛ:
4 “Kɔha kile me sonvolɛ Devidi kɛ, ‘Mɔɔ Gyihova ɛha la ɛne: “Tɛ ɛdawɔ a ɛbazi sua wɔamaa meadɛnla nu a.+
5 Ɔluakɛ ɔvi kenle mɔɔ menyele Yizilayɛma membale too mɔɔ yeradwu ɛnɛ la metɛtɛnlanle sua nu ɛlɛ, emomu mefi ɛdanlɛsua ko anu mekɔ ɛdanlɛsua fofolɛ nu yɛɛ dahuu mefi ɛleka mɔɔ mede la mekɔ ɛleka fofolɛ.+
6 Mekɛ mɔɔ me nee Yizilayɛma kɔsɔɔti luale la, asoo menganle mengilele Yizilayɛ ndɛnebuavolɛma ne mɔ mɔɔ menyele bɛ kɛ bɛnlea me menli ne la bie kɛ, ‘Duzu ati a bɛanva sida mbaka bɛanzi sua bɛammaa me a?’”’
7 Akee ka kile me sonvolɛ Devidi kɛ, ‘Mɔɔ ɛlɔne Gyihova ɛha la ɛne: “Menyele wɔ menvile adidileka ne kɛ ɛgyakyi mboane nzi ɛlilɛ na ɛrayɛ me menli Yizilayɛma adekilevolɛ.+
8 Na ɛleka biala mɔɔ ɛbahɔ la me nee wɔ balua,+ na meaye* wɔ kpɔvolɛma kɔsɔɔti meavi ɛ nyunlu;+ na mebamaa wɔalie duma kɛ azɛlɛ ye azo menli mgbole mɔɔ ɛlie duma la.+
9 Mebakpondɛ ɛleka meamaa me menli Yizilayɛma na meamaa bɛadɛnla ɛkɛ, na bɛbadɛnla ɛkɛ mɔɔ awie ɛnrɛgyegye bɛ bieko; yɛɛ atisesebɛma ɛnrɛsisi* bɛ bieko kɛ mɔɔ bɛyɛle ye wɔ dɛba ne la,+
10 ɔvi kenle mɔɔ memkpale ndɛnebuavolɛma kɛ bɛnlea me menli Yizilayɛma anwo zo la.+ Na mebali wɔ agbɔvolɛ kɔsɔɔti anwo zo konim.+ Eza meka meahile wɔ kɛ, ‘Gyihova bazi sua amaa wɔ.’*
11 “‘“Saa wɔ mekɛ dwu na ɛwu* a, mebakpogya ɛ ra* ne, ɛ mra ne mɔ ko zo,+ na mebamaa ye belemgbunlililɛ ne agyinla ɛkɛ ne kpundii.+
12 Ɔdaye a ɔbazi sua yeamaa me a,+ na mebamaa ye belemgbunli ebia ne agyinla ɛkɛ ne kpundii dahuu.+
13 Mebayɛ ye papa na yeayɛ me ra.+ Menrɛye me ɛlɔlɛ kpundii ne menrɛvi ɔ nwo zo+ kɛ mɔɔ menyele menvile ahenle mɔɔ limoale ɛ nyunlu anwo zo la.+
14 Mebava ye meazie me sua ne anu nee me belemgbunlililɛ ne azo dahuu,+ na ye belemgbunli ebia ne bagyinla ɛkɛ ne dahuu.”’”+
15 Neetan hanle edwɛkɛ ɛhye mɔ amuala nee ɛnyelɛzodeɛnwunlɛ ɛhye amuala hilele Devidi.
16 Na Belemgbunli Devidi radɛnlanle aze wɔ Gyihova anyunlu na ɔhanle kɛ: “O Gyihova Nyamenle, medame a le nwane? Yɛɛ kɛzi me sua nu de mɔɔ wɔva me wɔradwu ɛke ɛ?+
17 Noko ɛhye bɔbɔ le debie ekyi bie, O Nyamenle, eza wɔha mɔɔ wɔ sonvolɛ sua nu amra bayɛ ye kenle bie la anwo edwɛkɛ,+ na wɔbu me kɛ sonla bie mɔɔ ɔwɔ kɛ bɛkpogya ye zo* bieko a, O Gyihova Nyamenle.
18 Duzu bieko a wɔ sonvolɛ Devidi bahola aha ahile wɔ wɔ kɛzi wɔli me eni la anwo wɔ mekɛ mɔɔ ɛze wɔ sonvolɛ kpalɛ la ɛ?+
19 O Gyihova, ɔlua wɔ sonvolɛ ati yɛɛ kɛmɔ ɛdie ɛto nu wɔ wɔ ahonle nu* la ati a, wɔyɛ ninyɛne mgbole ɛhye mɔ na wɔla wɔ kpoleyɛlɛ ne ali a.+
20 O Gyihova, awie biala nee wɔ ɛnzɛ,+ yɛɛ Nyamenle biala ɛnle ɛkɛ ne kɛ ɛdawɔ ala;+ debie biala mɔɔ yɛde ye yɛ nzo nu la di ɛhye anwo daselɛ.
21 Na azɛlɛ ye azo maanle boni bieko a le kɛ wɔ menli Yizilayɛma a?+ Nɔhalɛ Nyamenle ne hɔliele bɛ kɛ ye menli.+ Ɛyɛle ninyɛne mgbole mɔɔ yɛ ɛzulolɛ la ɛvale ɛliele duma ɛmaanle ɛ nwo,+ ɛvoanle maanle maanle ɛvile wɔ menli ne mɔɔ ɛliele bɛ ɛvile Yigyibiti la anyunlu.+
22 Ɛvale wɔ menli Yizilayɛma ɛyɛle wɔ menli dahuu;+ na wɔmɔ, O Gyihova, ɛyɛle bɛ Nyamenle.+
23 O Gyihova, akee maa ɛwɔkɛ mɔɔ wɔbɔ wɔ sonvolɛ nee ye sua nu amra* la ɛyɛ nɔhalɛ dahuu, na yɛ mɔɔ wɔbɔ nwolɛ ɛwɔkɛ la.+
24 Maa wɔ duma ɛdɛnla ɛkɛ* na bɛkpogya ye zo+ dahuu, amaa menli aha kɛ, ‘Ɛlɔne Gyihova, Yizilayɛ Nyamenle ne le Nyamenle maa Yizilayɛma,’ na maa wɔ sonvolɛ Devidi sua ne ɛgyinla kpundii wɔ ɛ nyunlu.+
25 Ɔluakɛ wɔmɔ, me Nyamenle, wɔye wɔ bodane mɔɔ kile kɛ ɛbazi sua wɔamaa wɔ sonvolɛ* la wɔhile ye. Ɛhye ati a wɔ sonvolɛ ɛnyia anwodozo kɛ ɔfa asɔneyɛlɛ ɛhye yeado ɛ nyunlu la.
26 Noko O Gyihova, ɛdawɔ a ɛle nɔhalɛ Nyamenle ne a, yɛɛ wɔva ninyɛne mgbalɛ ɛhye mɔ wɔbɔ wɔ sonvolɛ ɛwɔkɛ.
27 Yemɔti maa ɛ nye ɛlie nwo na yila wɔ sonvolɛ sua ne, na maa ɔdɛnla ɛkɛ ne dahuu wɔ ɛ nyunlu, ɔluakɛ wɔmɔ, O Gyihova, wɔyila ye, yɛɛ bɛyila ye dahuu.”
Ɔbodwɛkɛ
^ Anzɛɛ “ye belemgbunli sua.”
^ Hibulu aneɛ nu, “meapɛ.”
^ Hibulu aneɛ nu, “ɛnrɛtete.”
^ Anzɛɛ “bamaa ɛ bo zo amra ali belemgbunli.”
^ Hibulu aneɛ nu, “ɛkɔboka wɔ nenyia mɔ anwo.”
^ Hibulu aneɛ nu, “wɔ ma.”
^ Anzɛɛ “bɛmaa ye dibilɛ kpole.”
^ Anzɛɛ “ɔ nee wɔ ɛhulolɛdeɛ le ko.”
^ Hibulu aneɛ nu, “ye sua ne.”
^ Anzɛɛ “ɛyɛ nɔhalɛ.”
^ Anzɛɛ “ɛbamaa ɔ bo zo amra ali belemgbunli.”
