Edwɛkɛsisilɛ Mɔɔ Limoa 26:1-32
26 Kɛzi bɛhyehyɛle nlenkɛ mgbole sinzavolɛma+ ne anu ekpunli ekpunli la ɛne: Kɔla abozoamra, Kola mɔɔ vi Esafe amra ne mɔ anu la ara Mɛhyɛlɛmaya.+
2 Na Mɛhyɛlɛmaya wole mralɛ mrenyia: Zɛkalaya a le belamunli ralɛ a, Gyɛdayɛle tɔ zolɛ nwiɔ, Zɛbadaya tɔ zolɛ nsa, Gyateneɛle tɔ zolɛ nna,
3 Yilam tɔ zolɛ nnu, Gyehoheenan tɔ zolɛ nsia, Ɛleɛho-yinae tɔ zolɛ nsuu.
4 Na Obɛde-yidɔm wole mralɛ mrenyia: Hyɛmaya a le belamunli ralɛ a, Gyɛhozabade tɔ zolɛ nwiɔ, Dwowaa tɔ zolɛ nsa, Seekaa tɔ zolɛ nna, Nɛtanɛle tɔ zolɛ nnu,
5 Ameɛle tɔ zolɛ nsia, Yesakaa tɔ zolɛ nsuu yɛɛ Piyɔlitae tɔ zolɛ mɔtwɛ; ɔluakɛ Nyamenle yilale ye.
6 Na ɔ ra Hyɛmaya wole mralɛ mrenyia mɔɔ yɛle mbusua mgbanyinli a, ɔluakɛ ɛnee bɛle mrenyia katakyiema mɔɔ bɛfɛta a.
7 Hyɛmaya amra ɛne: Ɔtenae, Relɛfeeyɛle, Obɛde yɛɛ Ɛlezeebade; na ɛnee ɔ mediema Ɛlaehu nee Sɛmakaya noko le mrenyia mɔɔ bɛfɛta.
8 Ɛhye mɔ amuala le Obɛde-yidɔm amra; bɛdabɛ nee bɛ mra yɛɛ bɛ mediema mrenyia, bɛle mrenyia mɔɔ bɛfɛta na bɛkola bɛyɛ gyima ne, mrenyia 62 mɔɔ bɛvi Obɛde-yidɔm anu a.
9 Na ɛnee Mɛhyɛlɛmaya+ lɛ ɔ mra nee ɔ mediema mrenyia 18 mɔɔ bɛfɛta.
10 Na Hosa mɔɔ vi Mɛlɛlae amra ne mɔ anu la wole mralɛ. Ɛnee Hyemelae a li bɛ ti a, tɛ ɔdaye a ɔle belamunli ralɛ a, noko ye papa kpale ye kɛ ɔli bɛ ti,
11 Helekaya tɔ zolɛ nwiɔ, Tɛbalaya tɔ zolɛ nsa, Zɛkalaya tɔ zolɛ nna. Hosa amra nee ɔ mediema ne mɔ amuala le 13.
12 Wɔ nlenkɛ mgbole sinzavolɛma ekpunli ekpunli ɛhye mɔ anu, ɛnee mgbanyima ne mɔ yɛ gyima ne mɔɔ bɛ mediema ne mɔ yɛ la ala bie, bɛsonle Gyihova sua nu ɛkɛ.
13 Ɔti bɛguale ma*+ bɛmaanle ngakula nee mgbanyinli kɔsɔɔti, kɛ mɔɔ bɛ mbusua ne mɔ de la, na bɛhyɛle nlenkɛ ngakyile mgbole ne mɔ bɛmaanle bɛ.
14 Akee aduduleɛ ma ɛdeɛ ne bɔle Hyɛlimaya. Na sɔlɔ ma ɛdeɛ ne mɔɔ bɛguale la bɔle ɔ ra Zɛkalaya, folɛtuvolɛ mɔɔ ze nrɛlɛbɛ la.
15 Obɛde-yidɔm nyianle nyiakɛ afoa nu ɛdeɛ ne, na bɛvale ninyɛnezielɛ ɛleka ne mɔ bɛwulale ɔ mra ne mɔ asa anu.+
16 Hyɔpem nee Hosa+ nyianle adɔleɛ afoa nu ɛdeɛ ne mɔɔ bikye Hyalɛkɛte Anlenkɛ Kpole ne mɔɔ wɔ sɔlɔ ademgbole ne anloa la, sinzavolɛma ekpunli ko gyi ɛke la ɛnee sinzavolɛma ekpunli ko noko gyi nehane;
17 Livaema nsia wɔ aduduleɛ afoa nu; kenle ko biala nna wɔ sɔlɔ yɛɛ kenle ko biala nna wɔ nyiakɛ; na wɔ ninyɛnezielɛ ɛleka+ ne mɔ anwo noko, nwiɔ wɔ ɛke la ɛnee nwiɔ wɔ nehane;
18 na sua ne anyunlu mɔɔ wɔ adɔleɛ la, nna wɔ ademgbole+ ne anu yɛɛ nwiɔ wɔ sua ne anyunlu.
19 Zɛhae a bɛhyehyɛle Kɔla amra nee Mɛlɛlae amra mɔɔ sinza nlenkɛ mgbole ne mɔ la anu ekpunli ekpunli a.
20 Mɔɔ fale Livaema ne anwo la, Ahaegya a nleanle nɔhalɛ Nyamenle ne sua nu ɛkɛ ninyɛnezielɛ ɛleka ne mɔ nee ninyɛne mɔɔ bɛyɛ bɛ nwuanzanwuanza*+ la ninyɛnezielɛ ɛleka ne mɔ azo a.
21 Leedan amra: Gɛhyɔn abozoamra mɔɔ bɛvi Leedan anu, mbusua mgbanyinli mɔɔ bɛle Gɛhyɔn abozoamra mɔɔ bɛvi Leedan anu la, Gyɛhayɛlae+
22 yɛɛ Gyɛhayɛlae amra ne mɔ, Zitam nee ɔ diema Dwowɛle. Bɛdabɛ a bɛnea Gyihova sua nu ɛkɛ ninyɛnezielɛ ɛleka ne mɔ azo a.+
23 Wɔ Amelamma, Yezehaama, Hibulɔnoma yɛɛ Ɛzeɛlema+ anu,
24 Mosisi ara Gɛhyɔm ara Hyɛbuwɛle a le kpanyinli mɔɔ nea ninyɛnezielɛ ɛleka ne mɔ azo a.
25 Mɔɔ fale ɔ mediema ne mɔ anwo la, Ɛleyizɛ+ ara a le Rilihabaya,+ ɔ ra Gyɛhyeya, ɔ ra Dwolam, ɔ ra Zekelae yɛɛ ɔ ra Hyilomɔto.
26 Hyilomɔto ɛhye nee ɔ mediema ne mɔ a ɛnee nea ninyɛne mɔɔ bɛyɛ bɛ nwuanzanwuanza,+ ninyɛne mɔɔ Belemgbunli Devidi,+ mbusua mgbanyima ne mɔ,+ mgbanyima mɔɔ bɛnea menli apenle apenle nee menli ɛya ɛya nwo zo yɛɛ ɛlɔne ne mgbanyima ɛyɛ bɛ nwuanzanwuanza la ninyɛnezielɛ ɛleka ne mɔ kɔsɔɔti azo a.
27 Bɛyɛle ninyɛne mɔɔ bɛnyianle bɛ konle nu+ nee mɔɔ bɛvenle+ la nwuanzanwuanza kɛ bɛva bɛyɛ Gyihova sua ne boɛ;
28 eza bɛvale debie biala mɔɔ ɛnyelɛzodeɛnwunlɛnli+ Samoɛle, Kehye ara Sɔɔlo, Nɛɛ ara Abenɛɛ+ yɛɛ Zɛluaya+ ara Dwowabe+ yɛle bɛ nwuanzanwuanza la bɛbokale nwo. Debie biala mɔɔ awie biala yɛle ye nwuanzanwuanza la bɛvale bɛwulale Hyɛlomete nee ɔ mediema ne mɔ asa anu.
29 Wɔ Yezehaama+ anu, bɛmaanle Kɛnanaya nee ɔ mediema ne mɔ lile ninyɛne nwo gyima wɔ alienwo ɛkɛ ne kɛ mgbanyima nee ndɛnebuavolɛma+ wɔ Yizilayɛma anwo zo.
30 Wɔ Hibulɔnoma+ anu, Hahyabaya nee ɔ mediema ne mɔ, mrenyia mɔɔ bɛfɛta la 1,700 a nleanle lile ninyɛne nwo gyima wɔ Yizilayɛ maanzinli mɔɔ wɔ Dwɔdan ne adɔleɛ la anu a. Bɛmaanle bɛyɛle Gyihova ɛzonlenlɛ gyima ne nee belemgbunli ne gyima ne amuala.
31 Wɔ Hibulɔnoma anu, ɛnee Gyilaegya+ a le Hibulɔnoma awolɛndoazo ne kpanyinli wɔ bɛ abusua ne anu a. Wɔ Devidi belemgbunlililɛ ne ɛvolɛ mɔɔ tɔ zolɛ 40 la anu,+ bɛnleɛnleanle bɛ nu, na bɛnwunle mrenyia katakyiema mɔɔ bɛfɛta la wɔ bɛ nu wɔ Gyeezɛ+ mɔɔ wɔ Geleade la.
32 Na ɛnee ɔ mediema ne mɔ dodo le mrenyia mɔɔ bɛfɛta la 2,700, bɛle mbusua mgbanyima. Ɔti Belemgbunli Devidi maanle bɛnleanle Wulubɛnema, Gaadema yɛɛ Manasɛ abusua foa ko ne anwo zo, wɔ edwɛkɛ biala mɔɔ fale nɔhalɛ Nyamenle ne nee belemgbunli ne anwo la anu.
