Edwɛkɛsisilɛ Mɔɔ Limoa 27:1-34
-
Mgbanyima mɔɔ bɛsonle belemgbunli ne (1-34)
27 Yizilayɛma dodo, mbusua mgbanyima, mgbanyima mɔɔ nea menli apenle apenle nee ɛya ɛya nwo zo+ yɛɛ bɛ sogya mgbanyima mɔɔ sonle belemgbunli ne+ wɔ edwɛkɛ biala mɔɔ fale ekpunli ekpunli ne mɔ mɔɔ bɛkɔ bɛba siane biala wɔ ɛvolɛ ne anu siane ne mɔ amuala anu anwo la ɛne; menli 24,000 a wɔ ekpunli ko biala anu a.
2 Zabedeɛle ara Gyahyɔbeyam+ a nea ekpunli ne mɔɔ limoa la anwo zo wɔ siane ne mɔɔ limoa la anu a, na menli 24,000 a wɔ ye ekpunli ne anu a.
3 Pilɛze+ abozoamra ne anu, ɔdaye a ɔli ekpunli ekpunli nwo zo mgbanyima ne mɔ kɔsɔɔti mɔɔ bɛye bɛ kɛ bɛzonle wɔ siane ne mɔɔ limoa anu la ati a.
4 Ahohaenli+ Dodae+ a li ekpunli ne mɔɔ tɔ zolɛ nwiɔ wɔ siane nwiɔ ne anu la ati a, na Mekelɔto a le bɛ adekilevolɛ a, na menli 24,000 wɔ ye ekpunli ne anu.
5 Ɛsɔfo kpanyinli Gyɛhɔyada+ ara Bɛnaya+ a le ekpunli mɔɔ tɔ zolɛ nsa mɔɔ bazonle kɛ siane ne mɔɔ tɔ zolɛ nsa la anu kpanyinli a, na menli 24,000 wɔ ye ekpunli ne anu.
6 Bɛnaya ɛhye le konle nu katakyie wɔ menli abulasa ne anu yɛɛ ɔnea menli abulasa ne anwo zo, na ɔ ra Amezabade a li ye ekpunli ne ati a.
7 Mɔɔ tɔ zolɛ nna wɔ siane nna ne anu la a le Dwowabe adiema+ Asahɛle,+ na ɔ ra Zɛbadaya doa ye, na menli 24,000 wɔ ye ekpunli ne anu.
8 Yezelahayanli Hyamehɛte a le kpanyinli mɔɔ tɔ zolɛ nnu wɔ siane nnu ne anu a, na menli 24,000 wɔ ye ekpunli ne anu.
9 Mɔɔ tɔ zolɛ nsia wɔ siane nsia ne anu la a le Tɛkowanli+ Yekɛhye ara Ayela,+ na menli 24,000 wɔ ye ekpunli ne anu.
10 Mɔɔ tɔ zolɛ nsuu wɔ siane nsuu ne anu la a le Pɛlonli Hilɛze+ mɔɔ vi Yifelaemma anu la, na menli 24,000 wɔ ye ekpunli ne anu.
11 Mɔɔ tɔ zolɛ mɔtwɛ wɔ siane mɔtwɛ ne anu la a le Huhyanli Sebɛkae+ mɔɔ vi Zilama+ anu la, na menli 24,000 wɔ ye ekpunli ne anu.
12 Mɔɔ tɔ zolɛ ngɔnla wɔ siane ngɔnla ne anu la a le Anatɔtonli+ Abi-yizɛ+ mɔɔ vi Bɛngyamanema anu la, na menli 24,000 wɔ ye ekpunli ne anu.
13 Mɔɔ tɔ zolɛ bulu wɔ siane bulu ne anu la a le Nɛtɔfanli Meehalae+ mɔɔ vi Zilama+ anu la, na menli 24,000 wɔ ye ekpunli ne anu.
14 Mɔɔ tɔ zolɛ 11 wɔ siane 11 ne anu la a le Pilatɔnonli Bɛnaya+ mɔɔ vi Yifelaemma anu la, na menli 24,000 wɔ ye ekpunli ne anu.
15 Mɔɔ tɔ zolɛ 12 wɔ siane 12 ne anu la a le Nɛtɔfanli Hɛledae mɔɔ ɔvi Ɔteneɛle anu la, na menli 24,000 wɔ ye ekpunli ne anu.
16 Ɛhye mɔ a le Yizilayɛ mbusua ne mɔ adekilevolɛma a: Wulubɛnema anu, Zekelae ara Ɛleyizɛ le adekilevolɛ; Semɛyɔnoma anu, Meeyaka ara Hyɛfataya;
17 Livae anu, Kɛmuwɛle ara Hahyabaya; Aalɔn anu, Zeedɔko;
18 Dwuda anu, Ɛlaehu,+ ɔle Devidi amediema ne mɔ anu ko; Yesakaa anu, Maekeɛle ara Ɔmelae;
19 Zɛbulɛn anu, Obadaya ara Yehyemeeya; Nafetalae anu, Azeleɛle ara Gyɛlimɔto;
20 Yifelaemma anu, Azazaya ara Hohyia; Manasɛ abusua foa ko ne anu, Pɛdaya ara Dwowɛle;
21 Manasɛ abusua foa ko ne mɔɔ wɔ Geleade la anu, Zɛkalaya ara Yedo; Bɛngyaman anu, Abenɛɛ+ ara Gyasayɛle;
22 Dan anu, Gyɛloham ara Azaleɛle. Ɛhye mɔ a le Yizilayɛ mbusua ne mɔ mgbanyima a.
23 Devidi andia menli mɔɔ bɛli ɛvolɛ 20 nee mɔɔ ba aze la, ɔluakɛ Gyihova bɔle ɛwɔkɛ kɛ ɔbamaa Yizilayɛma anwo azo kɛ nwɔlɔra mɔɔ wɔ anwuma la.+
24 Zɛluaya ara Dwowabe bɔle ɔ bo kɛ ɔtia menli ne noko yeanwie; na ɛhye ati Nyamenle vale Yizilayɛma anwo ɛya,*+ na bɛangɛlɛ bɛ dodo ne wɔ Belemgbunli Devidi mekɛ zo tetedwɛkɛ kɛlɛtokɛ ne anu.
25 Adeɛle ara Azemeevɛte a ɛnee nea belemgbunli ne ninyɛnezielɛ ɛleka ne+ mɔ azo a. Yuzaya ara Dwɔnatan a ɛnee nea ninyɛnezielɛ ɛleka* ne mɔ mɔɔ wɔ ɛya ne mɔ anu, azuamgbole ne mɔ azo, namunamu ne mɔ azo yɛɛ tawa ne mɔ anu la azo a.
26 Kilɛbe ara Ɛzelae a ɛnee nea menli mɔɔ yɛ gyima wɔ ɛya nu na bɛdua aleɛ la anwo zo a.
27 Releemanli Hyemɛyae a ɛnee nea vanye egyinli ne mɔ azo a; Sefemɔtonli Zabedae a ɛnee nea ɛleka mɔɔ bɛfa vanye egyinli nu ma mɔɔ bɛfa bɛyɛ nwanye la bɛsie la azo a.
28 Gidɛnli Beeyale-heenan a ɛnee nea ɔlivi ma nee sikamɔ mbaka+ mɔɔ wɔ Hyifɛla+ la azo a; Dwowahye a ɛnee nea ɛleka mɔɔ bɛfa nwole ne bɛsie la azo a.
29 Hyɛlɔnonli Hyɛtae a ɛnee nea nyɛmoa mɔɔ didi Hyɛlɔn+ la azo a, yɛɛ Adeleeyae ara Hyeefate a ɛnee nea nyɛmoa mɔɔ wɔ mbɔnza ne mɔ anu* la azo a.
30 Yehyemɛlenli Obele a ɛnee nea afunlumu ne mɔ azo a; Mɛlononli Gyɛdiya a ɛnee nea asoaso* ne mɔ azo a.
31 Hagelaenli Gyeezeze a ɛnee nea mboane ne mɔ azo a. Menli ɛhye mɔ amuala le mgbanyima mɔɔ bɛnea Belemgbunli Devidi agyapadeɛ zo.
32 Ɛnee Devidi adiema nrenyia ara Dwɔnatan+ le folɛtuvolɛ, sonla mɔɔ lɛ ndelebɛbo yɛɛ ɔle kɛlɛhɛlɛvolɛ, na Hakemonae ara Gyɛhayɛle nleanle belemgbunli ne amra ne mɔ anwo zo.+
33 Ahetɔfɛle+ le belemgbunli ne folɛtuvolɛ, yɛɛ Akaenli Huhyae+ le belemgbunli ne agɔnwo.*
34 Saa Ahetɔfɛle ɛnle ɛkɛ a, Bɛnaya+ ara Gyɛhɔyada nee Abayata+ a wɔ ɛkɛ a; yɛɛ Dwowabe+ a le belemgbunli ne ɛlɔnema ne kpanyinli a.
Ɔbodwɛkɛ
^ Hibulu aneɛ nu, “na ɛya rale Yizilayɛ anwo zo.”
^ Anzɛɛ “gya.”
^ Anzɛɛ “azɛlɛ sɛsɛ ne mɔ azo.”
^ Hibulu aneɛ nu, “asoaso mbelɛ.”
^ Anzɛɛ “ɔka ye fealeranu edwɛkɛ ɔkile ye.”
