Edwɛkɛsisilɛ Mɔɔ Tɔ Zo Nwiɔ 16:1-14
16 Wɔ Esa tumililɛ ne ɛvolɛ mɔɔ tɔ zolɛ 36 la anu, Yizilayɛ Belemgbunli Beeyahya+ rale Dwuda anwo zo na ɔbɔle ɔ bo kɛ ɔkyekye Releema+ kpalɛ* amaa awie biala annyia adenle angɔ Dwuda Belemgbunli Esa ɛkɛ anzɛɛ anvi ye ɛkɛ amba.*+
2 Yemɔti Esa vale dwɛtɛ fufule nee nvutuke vile Gyihova sua nu+ nee belemgbunli sua nu ninyɛnezielɛ ɛleka ne mɔ na ɔmaanle bɛvale bɛhɔmaanle Selea Belemgbunli Bɛne-heedade+ mɔɔ de Damasekɛse la, na ɔhanle kɛ:
3 “Me nee wɔ ɛyɛ ngyekyeleɛ kɛ mɔɔ me papa nee wɔ papa yɛle la. Melɛfa dwɛtɛ fufule nee nvutuke mearɛlɛ wɔ. Bɛla bapɛ ngyekyeleɛ mɔɔ ɛ nee Yizilayɛ Belemgbunli Beeyahya ɛyɛ la anu, na ɔhwe ɔ nwo ɔvi me nwo.”
4 Bɛne-heedade diele Belemgbunli Esa na ɔzoanle ye sogya mgbanyima ne mɔ ɔmaanle bɛhɔle Yizilayɛ azuamgbole ne mɔ azo, na bɛhonle bɛvale Ayedwɔn,+ Dan,+ Ebɛle-meeyem yɛɛ Nafetalae azuamgbole mɔɔ bɛfa ninyɛne bɛsie ɛkɛ ne la amuala.+
5 Mɔɔ Beeyahya dele la, ɛkɛ ne ala ɔgyakyile Releema ɛkyekyelɛ* na ɔyele ɔ sa ɔvile gyima mɔɔ ɔlɛyɛ ye wɔ nwolɛ la anwo.
6 Akee Belemgbunli Esa vale Dwudama amuala maanle bɛhɔzoale awolɛ nee mbaka mɔɔ wɔ Releema+ mɔɔ ɛnee Beeyahya ɛlɛfa akyekye sua ne la bɛhɔle,+ na ɔvale ɔhɔkyekyele Giba+ nee Mezepa.*+
7 Mekɛ zɔhane ɛnyelɛzodeɛnwunlɛnli Haneenae+ hɔle Dwuda Belemgbunli Esa ɛkɛ na ɔzele ye kɛ: “Kɛmɔ ɛvale ɛ nwo ɛdole Selea belemgbunli ne anwo zo* na wɔanva ɛ nwo wɔando Gyihova wɔ Nyamenle ne anwo zo* la ati, Selea belemgbunli ɛlɔnema ne ɛvi ɛ sa.+
8 Asoo ɛnee Yiteyopeama nee Lebeama ɛnlɛ ɛlɔnema dɔɔnwo kpalɛ mɔɔ bɛlɛ ehwili nee mgbɔnwɔkavoma dɔɔnwo ɔ? Noko kɛmɔ ɛvale ɛ nwo ɛdole Gyihova anwo zo la ati, ɔvale bɛ ɔwulale ɛ sa nu.+
9 Ɔluakɛ Gyihova anye bɔ mgbɔlɔka wɔ azɛlɛ ye azo amuala+ kɛ ɔda ye anwosesebɛ ne ali yeahile* menli mɔɔ bɛ ahonle di munli wɔ ɔ nwo* la.+ Wɔli ngoaseasɛm wɔ edwɛkɛ ɛhye anu; ɔvi ɛnɛ mɔɔ kɔ la konle bara ɛ nwo zo.”+
10 Noko Esa vale ɛnyelɛzodeɛnwunlɛnli ne anwo ɛya na ɔdole ye efiade* ɔluakɛ ɔvale ɔ nwo ɛya kpole wɔ ɛhye anwo. Eza ɔvi mekɛ zɔhane, Esa bɔle ɔ bo kɛ ɔyɛ menli ne bie mɔ asa.
11 Na Esa anwo tetedwɛkɛ ne, ɔvi mɔlebɛbo kɔdwu awieleɛ, bɛhɛlɛ ye wɔ Dwuda nee Yizilayɛ Arelemgbunli Buluku ne anu.+
12 Wɔ Esa tumililɛ ne ɛvolɛ mɔɔ tɔ zolɛ 39 la anu, ewule bie yɛle ɔ gyakɛ na ɔmaanle ɔ nwo dole ye kpole bie; na wɔ ye anwodolɛ ne anu bɔbɔ, yeamkpondɛ Gyihova abo zo, emomu ɔhɔle ayileyɛvoma ɛkɛ.
13 Akee Esa nee ye nenyia mɔ hɔlale na bɛziele ye bɛbokale bɛ nwo;+ ɔwule wɔ ye tumililɛ ne ɛvolɛ mɔɔ tɔ zolɛ 41 la anu.
14 Ɔti bɛziele ye wɔ ye nla kpole ne mɔɔ ɔpɛle ye wɔ Devidi Suakpole zo la anu,+ na bɛdole ye wɔ ɛkpa bie mɔɔ balesam nwole nee nwole evuanlɛ titili bie mɔɔ bɛvale ninyɛne ngakyile bɛfonlɔfonlanle ye a bɛyɛle ɛyi zolɛ tɛkɛɛ la azo.+ Eza bɛwudale senle kpole bie bɛmaanle ye wɔ ye ɛzɛne ne abo.*
Ɔbodwɛkɛ
^ Anzɛɛ “ɔmiemia nu; ɔkyekye ye bieko.”
^ Anzɛɛ “anvi azɛlɛsinli ne anu anzɛɛ anwolo ɛkɛ.”
^ Anzɛɛ “yeammiemia nu; yeankyekye ye bieko.”
^ Anzɛɛ “ɔmiemianle nu; ɔkyekyele bɛ bieko.”
^ Hibulu aneɛ nu, “ɛhisale ye.”
^ Hibulu aneɛ nu, “wɔangisa ye.”
^ Anzɛɛ “bɛdu bɛ nwo bɛmaa ye bɔkɔɔ.”
^ Anzɛɛ “ɔboa.”
^ Hibulu aneɛ nu, “ɔvale ye ɔhɔdole sua ne mɔɔ bɛfa baka bɛbɔ awie mɔ agyakɛ anu wɔ ɛkɛ la anu.”
^ Ɔda ali kɛ, tɛ Esa funli ne a bɛyelale ye a, emomu bɛyelale nyile evuanlɛ.