Mateyu Edwɛkpa 16:1-28
16 Falasiima nee Sadusiima rale ɔ nwo ɛkɛ ne, na kɛmɔ bɛkulo kɛ bɛsɔ ye bɛnea la ati, bɛhanle kɛ ɔyɛ sɛkɛlɛneɛ bie mɔɔ vi anwuma la ɔmaa bɛnlea.+
2 Ɔbuale bɛ kɛ: “Ɔdwu nɔsolɛ a, bɛka kɛ, ‘Maanle nu bayɛ kɛnlɛma, ɔluakɛ anwomanyunlu ɛbolo,’
3 nwonlomɔ noko bɛka kɛ, ‘Ezule badɔ, ɔluakɛ anwomanyunlu ɛbolo na yelu.’ Bɛkola bɛkilehile kɛzi anwomanyunlu de la anu noko mekɛ ne anwo sɛkɛlɛneɛ ne yemɔ bɛngola bɛngile ɔ bo.
4 Awolɛndoazo amumuyɛ mɔɔ bɛsɛkye agyalɛ* la kɔ zo kpondɛ sɛkɛlɛneɛ, noko bɛnrɛmaa bɛ sɛkɛlɛneɛ biala+ kyesɛ Dwona sɛkɛlɛneɛ ne ala.”+ Na ɔgyakyile bɛ ɛkɛ ne ɔhɔle.
5 Akee ɛdoavolɛma ne pɛle azule ne hɔle ɔ nzi lɔ noko bɛ rɛle vile kɛ bɛkɛva paano.+
6 Gyisɛse zele bɛ kɛ: “Bɛmaa bɛ nye ɛla ɛkɛ na bɛnlea boɛ wɔ Falasiima nee Sadusiima mgbɔvonle ne anwo.”+
7 Yemɔti bɛbɔle ɔ bo bɛzuzule nwolɛ na bɛhanle kɛ: “Yɛanva paano biala.”
8 Gyisɛse nwunle ye zɔ la, ɔhanle kɛ: “Duzu ati a bɛlɛsuzu nwolɛ kɛ bɛanva paano biala ɛ? Bɛmɛ mɔɔ bɛ diedi le ekyi a!
9 Bɛtɛtele ɔ bo ɔ, anzɛɛ bɛngakye paano nnu ne mɔɔ bɛvale bɛmaanle mrenyia 5,000 ne nee ahɛndɛne dodo ne mɔɔ bɛsesale la ɔ?+
10 Anzɛɛ paano nsuu ne mɔɔ bɛvale bɛmaanle mrenyia 4,000 ne nee ahɛndɛne mgbole dodo ne mɔɔ bɛsesale la ɔ?+
11 Duzu ati a bɛnde ɔ bo kɛ tɛ paano nwo edwɛkɛ a melɛka meahile bɛ ɛ? Emomu, bɛnlea bɛ nwo boɛ wɔ Falasiima nee Sadusiima mgbɔvonle ne anwo.”+
12 Akee bɛdele ɔ bo kɛ tɛ paano mgbɔvonle a ɔse bɛnlea boɛ wɔ nwo a, na emomu, Falasiima nee Sadusiima ngilehilelɛ nwo ɔ.
13 Mekɛ mɔɔ Gyisɛse rale Sizalia Felepae maanzinli nu la, ɔbizale ye ɛdoavolɛma ne kɛ: “Menli se sonla Ra ne a le nwane?”+
14 Bɛhanle kɛ: “Bie mɔ se Dwɔn Sɔnevolɛ ne,+ bie mɔ noko se Yilaegya,+ yɛɛ bie mɔ noko se Gyɛlɛmaya anzɛɛ ngapezoma ne anu ko.”
15 Ɔzele bɛ kɛ: “Na bɛdabɛ noko ɛ, bɛse mele nwane?”
16 Saemɔn Pita buale kɛ: “Wɔmɔ a ɛle Kelaese ne,+ tease Nyamenle ne Ara ne a.”+
17 Gyisɛse buale ye kɛ: “Dwona ara Saemɔn, anyelielɛ a le wɔ, ɔluakɛ tɛ nwonane nee mogya* a yele hilele wɔ a, emomu me Ze mɔɔ wɔ anwuma la ɔ.+
18 Bieko, meka meahile wɔ kɛ: Wɔmɔ a ɛle Pita a,+ na bodane+ ɛhye azo a mebazi me asafo ne a, na Nla* nlenkɛ ɛnrɛli zolɛ konim.
19 Mebava anwuma Belemgbunlililɛ ne sanvɛ ne mɔ meamaa wɔ, na debie biala mɔɔ ɛkɛkyekye ye wɔ azɛlɛ ye azo la, ɛnee bɛkyekye ye wɔ anwuma, yɛɛ debie biala mɔɔ ɛkɛtulu ye wɔ azɛlɛ ye azo la, ɛnee bɛtulu ye wɔ anwuma.”
20 Akee ɔbɔle ɛdoavolɛma ne anloa ɛsesebɛ kɛ bɛmmaka bɛkile awie biala kɛ ɔdaye a ɔle Kelaese ne a.+
21 Ɔvi zɔhane mekɛ ne, Gyisɛse bɔle ɔ bo hilehilele nu hilele ye ɛdoavolɛma ne kɛ ɔwɔ kɛ ɔkɔ Gyɛlusalɛm na ɔnwu amaneɛ dɔɔnwo wɔ mgbanyima nee ɛsɔfo mgbanyinli nee mɛla kilehilevolɛma ne mɔ asa anu na bɛku ye, na ye kenle nsa ne azo badwazo ye.+
22 Ɛhye maanle Pita vale ye hɔle ahane na ɔbɔle ɔ bo kɛ ɔtwi ɔ nyunlu kɛ: “Awulae, mmaka ye zɔ; ɛhye ɛnrɛdo wɔ ɛlɛ.”+
23 Na ɔhakyile ɔ nye ɔzele Pita kɛ: “Se di me nzi, Seetan! Ɛle azedolɛ bolɛ ɛmaa me, ɔluakɛ wɔ adwenle ne ɛnle Nyamenle adwenle, emomu sonla adwenle.”+
24 Akee Gyisɛse zele ye ɛdoavolɛma ne kɛ: “Saa awie kulo kɛ ɔtoa me a, maa ɔkpo ɔ nwo na ɔva ye amaneɛnwunlɛ baka* ne na ɔhɔ zo ɔdoa me.+
25 Ɔluakɛ awie biala mɔɔ kulo kɛ ɔbɔ ye ngoane* nwo bane la ɔbavi ɔ sa, noko awie biala mɔɔ medame ti ye ngoane* kɛvi ɔ sa la asa baha ye.+
26 Nɔhalɛ nu, saa sonla nyia ewiade ye amuala na ɔminli ye ngoane* a, nvasoɛ boni a ɔbanyia a?+ Anzɛɛ duzu a sonla kɛva kɛzenza ye ngoane* a?+
27 Ɔluakɛ sonla Ra ne bara ɔ Ze anyunlunyia nu mɔɔ ye anwumabɔvolɛma boka ɔ nwo, na akee yeadua awie biala kakɛ kɛ mɔɔ ye nyɛleɛ de la.+
28 Nɔhalɛ nu meka meahile bɛ kɛ, bɛdabɛ mɔɔ bɛgyigyi ɛke la anu bie mɔ ɛnrɛwu kɔkpula kɛ bɛkɛnwu kɛ sonla Ra ne ɛlɛba ye Belemgbunlililɛ ne anu la.”+
Ɔbodwɛkɛ
^ Anzɛɛ “bɛnli nɔhalɛ.”
^ Anzɛɛ “tɛ sonla.”
^ Anzɛɛ “Hades,” ɛhye kile, alesama nla. Nea Edwɛkɛbohilelɛ.
^ Nea Edwɛkɛbohilelɛ.
^ Anzɛɛ “ye ɛkɛla.”
^ Anzɛɛ “ye ɛkɛla.”
^ Anzɛɛ “ye ɛkɛla.”
^ Anzɛɛ “ye ɛkɛla.”
