Mateyu Edwɛkpa 17:1-27
17 Kenle nsia pɛle nu la, Gyisɛse vale Pita nee Gyemise yɛɛ ɔ diema Dwɔn na ɔ nee bɛ hɔle boka tendenle bie azo.+
2 Na ɔhakyile wɔ bɛ nye zo; ɔ nyunlu dale kɛ sɛnzɛne, na ye tɛladeɛ aguzo ne yɛle fufule nwohyee.+
3 Na nea! Mosisi nee Yilaegya vindele bɛ nwo ɛkɛ na ɛnee bɛ nee ye ɛlɛtendɛ.
4 Akee Pita zele Gyisɛse kɛ: “Awulae, ɔle kpalɛ kɛ yɛwɔ ɛke a. Saa ɛkulo a, mebazi ɛdanlɛ azua nsa wɔ ɛke. Wɔ ɛdeɛ ko, Mosisi ɛdeɛ ko yɛɛ Yilaegya ɛdeɛ ko.”
5 Mɔɔ ɔ nloa wɔ zo ɔlɛtendɛ la, nea! amungu nwohyee bie rahedale bɛ nwo zo, na nea! ɛnelɛ bie vi amungu ne anu hanle kɛ: “Ɛhye a le me Ra mɔɔ mekulo ye, na melie ye medo nu a.+ Bɛdie ye.”+
6 Mɔɔ ɛdoavolɛma ne dele ɛhye la, bɛbutubutule bɛ nyunlu aze na ɛzulolɛ kpole hanle bɛ.
7 Akee Gyisɛse rale bɛ nwo ɛkɛ na ɔvale ɔ sa ɔhanle bɛ na ɔhanle kɛ: “Bɛdwazo. Bɛmmasulo.”
8 Mɔɔ bɛmaanle bɛ ti zo bɛnleanle la, bɛannwu awie biala kɛ Gyisɛse angomekye ala.
9 Mɔɔ bɛvi boka ne azo bɛlɛtolo bɛara la, Gyisɛse zele bɛ kɛ: “Bɛmmaka mɔɔ bɛnwu ye la bɛkile awie biala kɔkpula kɛ bɛkɛdwazo sonla Ra ne bɛkɛvi mowuamra anu la.”+
10 Na ɛdoavolɛma ne bizale ye kɛ: “Ɛnee duzu ati a mɛla kilehilevolɛma ne se ɔwɔ kɛ Yilaegya dimoa ba ɛ?”+
11 Ɔbuale kɛ: “Nɔhalɛ nu, Yilaegya ɛlɛba na ɔbatoto ninyɛne kɔsɔɔti boɛ.+
12 Noko meka meahile bɛ kɛ Yilaegya ɛra dɛbadɛba, noko bɛannwu ye, bɛyɛle ye kɛ mɔɔ bɛkulo la.+ Zɔhane ala a sonla Ra ne noko banwu amaneɛ wɔ bɛ sa nu a.”+
13 Na ɛdoavolɛma ne nwunle kɛ Dwɔn Sɔnevolɛ ne a ɔlɛka ɔ nwo edwɛkɛ yeahile bɛ a.
14 Mekɛ mɔɔ bɛrale menli dɔɔnwo ne anu la,+ nrenyia bie rale ɔ nwo ɛkɛ rahotole ye, na ɔhanle kɛ:
15 “Awulae, nwu me ra ye anwunvɔne, ɔluakɛ mgbutike wɔ ɔ nwo yɛɛ ɔnde kpɔkɛ. Ɔta ɔpɛ ye ɔto senle nee nzule nu.+
16 Menvale ye membɛlɛle wɔ ɛdoavolɛma ne noko bɛangola ye ayile yɛ.”
17 Gyisɛse buale kɛ: “O awolɛndoazo mɔɔ bɛnlɛ diedi na bɛzɛkye a,+ me nee bɛ ɛdɛnla ɔhɔkpula kenlenzu? Menyia bɛ nwo abotane ɔhɔdwu kenlenzu? Fa ye bɛlɛ me wɔ ɛke.”
18 Na Gyisɛse deanle sunsum ɛtane ne, na ɔvile ɔ nwo, na kakula ne dele kpɔkɛ ɛkɛ ne ala.+
19 Akee ɛdoavolɛma ne rale Gyisɛse anwo ɛkɛ wɔ ahane na bɛbizale kɛ: “Duzu ati a yɛangola ye tu a?”
20 Ɔzele bɛ kɛ: “Bɛ diedi le ekyi la ati ɔ. Nɔhalɛ nu meka meahile bɛ kɛ, saa bɛlɛ diedi mɔɔ ye kpole le kɛ mɛsetade ma bɔbɔ a, anrɛɛ bɛbahola bɛaha bɛahile boka ɛhye kɛ, ‘Tu kɔ nehane,’ na ɔkɛhɔ, na debie biala ɛnrɛyɛ se ɛnrɛmaa bɛ.”+
21 * ——
22 Mekɛ mɔɔ bɛyiale nu wɔ Galeli la, Gyisɛse zele bɛ kɛ: “Bɛbaye sonla Ra ne bɛawula menli sa nu,+
23 na bɛbahu ye, na ye kenle nsa ne azo bɛbadwazo ye.”+ Na alɔbɔlɛ kpole hanle bɛ.
24 Mɔɔ bɛdwule Kapɛnayɛm la, menli mɔɔ die delakema nwiɔ* adwule ne la rale Pita anwo ɛkɛ rabizale kɛ: “Asoo bɛ kilehilevolɛ ne tua delakema nwiɔ adwule ne?”+
25 Ɔbuale kɛ: “Ɛhɛe.” Noko ɔhɔle sua nu la, Gyisɛse limoale dendɛle na ɔbizale ye kɛ: “Saemɔn, kɛzi ɛdwenle nwo ɛ? Nwane mɔ a azɛlɛ ye azo arelemgbunli maa bɛtua adwule anzɛɛ ninyɛne nwo adwule a? Bɛ mra anzɛɛ nyɛvolɛ?”
26 Mɔɔ ɔhanle kɛ: “Nyɛvolɛ ɔ” la, Gyisɛse zele ye kɛ: “Ɛnee ɔnle kɛ mralɛ ne mɔ tua adwule.
27 Noko amaa bɛanva ɛya la,+ kɔ nyevile ne anu kɔdo koba, na fɛlɛ ne mɔɔ ɛkɛlimoa ɛkɛhye ye la, saa ɛbuke ɔ nloa anu a, ɛbanwu dwɛtɛ fufule hyikɛle ko.* Ye maa bɛ fa tua me nee wɔ yɛ ɛdeɛ ne.”
