Kɛ Ɔyɛle Mɔɔ Yɛnyianle Baebolo Ne La

Saa ɛnea ngyegyelɛ mɔɔ Baebolo ne ɛva nu, noko ɔtɛbɔ ɛkɛ ne badwu ɛnɛ la a, ɔyɛ nwanwane. Bɛwiele ye kɛlɛ wɔ ɛvolɛ mɔɔ bo 1,900 mɔɔ ɛze ɛhɔ la. Bɛhɛlɛle ye wɔ ninyɛne mɔɔ ɛngyɛ na yeazɛkye, le kɛ ngɛlata mɔɔ bɛvale ndɔ a bɛyɛle yɛɛ ninyɛne mɔɔ bɛvale nane nwoma a bɛyɛle la azo. Yɛɛ ɛnɛ, menli ekyi bie ala a te aneɛ mɔɔ bɛlimoale bɛvale bɛhɛlɛle Baebolo ne la a. Eza menli mɔɔ lɛ tumi le kɛ amɛnladoma yɛɛ ɛzonlenlɛ nu mgbanyima bɔle mɔdenle kɛ bɛye Baebolo ne bɛavi ɛkɛ ne bɔkɔɔ.

KƐ ƆYƐLE mɔɔ buluku ɛhye gyinlanle ngyegyelɛ ɛhye mɔ anloa na ɔrayɛle buluku mɔɔ alesama dɔɔnwo ze ye kpalɛ la ɛ? Suzu ninyɛne nwiɔ ɛhye mɔ anwo.

Bɛhɛlɛle Ye Dɔɔnwo, Ɔti Edwɛkɛ Ne Amminli

Yizilayɛma bɔle nwomamobɔleɛ mɔɔ limoa mɔɔ ɛnee Baebolo ne anu edwɛkɛ ne wɔ nu la anwo bane kpalɛ na bɛhɛlɛle bie dɔɔnwo bɛziele. Kɛ neazo la, bɛzele Yizilayɛ arelemgbunli kɛ bɛhɛlɛ ‘Mɛla ɛhye mɔɔ wɔ Livae ɛsɔfo ne mɔ ɛkɛ la bie wɔ buluku nu bɛva.’​—Ditilɔnomi 17:18.

Ɛnee Yizilayɛma dɔɔnwo anye die kɛ bɛbagenga Ngɛlɛlera ne, ɔluakɛ ɛnee bɛze kɛ ɔle Nyamenle Edwɛkɛ. Yemɔti ɛnee mɛla kilehilevolɛma mɔɔ bɛtete bɛ kpalɛ la a kɛlɛ a, amaa bɛahɛlɛ ye kpalɛ. Bɛhanle Ɛzela, mɛla kilehilevolɛ ko mɔɔ sulo Nyamenle na ɔhɛlɛle Mɛla ne bie la anwo edwɛkɛ kɛ, “ɔle kɛlɛhɛlɛvolɛ mɔɔ ɛnee yebe wɔ Mosisi Mɛla ne mɔɔ Gyihova, Yizilayɛ Nyamenle ne vale maanle bɛ la anu.” (Ɛzela 7:6) Dwuu mɛla kilehilevolɛma ekpunli bie mɔɔ bɛfɛlɛ bɛ Masoretema mɔɔ hɛlɛle Hibulu Ngɛlɛlera ne wɔ kɛyɛ ɛvoya nsia badwu ɛvoya bulu la bɔbɔ dianle ngɛlɛleramgbɔkɛ ne mɔ ngoko amaa bie anwolo bɛ sa abo. Gyima ɛsesebɛ zɔhane mɔɔ bɛyɛle la boale maanle Baebolo ne anu edwɛkɛ ne yɛle pɛpɛɛpɛ, na yemaa bɛbɔ Baebolo mumua ne anwo bane ɔnva nwo mɔdenle mɔɔ dwazotiama bɔle kɛ bɛsɛkye ye la.

Kɛ neazo la, wɔ ɛvolɛ 168 K.Y.M., Selea maanle kpanyinli Antiochus IV bɔle mɔdenle kɛ ɔsɛkye Hibulu Ngɛlɛlera biala mɔɔ wɔ Palɛsetanye maanle nu la. Dwuuma tetedwɛkɛ ko hanle kɛ: “Bɛtetele nwomamobɔleɛ biala mɔɔ bɛnwunle ye la anu na bɛyelale ye.” The Jewish Encyclopedia ne ka kɛ: “Kpolisima mɔɔ bɛvale gyima zɔhane bɛwulale bɛ sa la yɛle ye anyebolo zo . . . Ɛnee saa bɛnwu kɛ ɛlɛ buluku nwuanzanwuanza ne bie a . . . bɛku wɔ.” Noko ɛnee Dwuuma mɔɔ wɔ Palɛsetanye yɛɛ ɛleka gyɛne la tɛdɛ Ngɛlɛlera ne bie.

Mɔɔ bɛhɛlɛle Kilisiene Giliki Ngɛlɛlera anzɛɛ “Ngyekyeleɛ Fofolɛ” ne bɛwiele la, yeangyɛ, bɛ ngɛlata ne mɔ anu edwɛkɛ, nuhua ngapezo yɛɛ nuhua tetedwɛkɛ ne mɔ dɛlɛle hɔle moa ndɛndɛ. Kɛ neazo la, Dwɔn hɛlɛle ye Edwɛkpa ne wɔ Ɛfɛsɛse anzɛɛ ɛleka bie mɔɔ bikye ɛkɛ ne la. Noko mbɔlɔba bie mɔ kile kɛ, mɔɔ Dwɔn hɛlɛle ye Edwɛkpa ne wiele la, yeandwu ɛvolɛ 50 bɔbɔ yɛɛ bɛnwunle ye foa bie mɔɔ awie hɛlɛle la wɔ Yigyibiti mɔɔ wɔ moamoa la. Ɛhye mɔɔ bɛnwunle ye la maanle ɔlale ali kɛ, ɛnee Kilisienema mɔɔ wɔ maanle gyɛne zo la lɛ edwɛkɛ ne mɔɔ bɛhɛlɛle la ɛtɛkyɛle la bie.

Nyamenle Edwɛkɛ ne mɔɔ menli dɔɔnwo asa hanle bie la a boale maanle Baebolo ne dɛnlanle ɛkɛ wɔ ɛvolɛ ɛya dɔɔnwo anu wɔ Kelaese ewule nzi a. Kɛ neazo la, wɔ February 23 nwonlomɔ mangyee wɔ ɛvolɛ 303 Y.M., Wulomu Amɛnlado Diocletian maanle ye sogyama bubule asɔnesua bie nlenkɛ na bɛyelale Ngɛlɛlera biala mɔɔ wɔ ɛkɛ ne la. Diocletian nyianle adwenle kɛ, saa ɔsɛkye Baebolo ne a, ɔbahola yeadu Kilisiene ɛzonlenlɛ bo. Wɔ ye alehyenlɛ nu, ɔlile mɛla wɔ maanle ngakyile mɔɔ wɔ Wulomu Tumililɛ bo la anu kɛ, bɛyela Baebolo biala mɔɔ bɛlɛ la wɔ bagua nu. Noko Baebolo ne bie hale ɛkɛ na nzinlii bɛnleanle zo bɛhɛlɛle dɔɔnwo. Nɔhalɛ nu, Giliki Baebolo nwiɔ mɔɔ bɛyɛle wɔ Diocletian ɛkpɔlɛ ne anzi mekɛ ekyi la foa bie mɔ tɛbɔ ɛkɛ. Ko wɔ Rome; yɛɛ ko ne mɔɔ ɛha la wɔ Britian Mbulukuzielɛleka ne mɔɔ wɔ London, England la.

Ɔwɔ nu kɛ bɛtɛnwunle tete bɛsanloangɛlɛlera Baebolo ne mɔɔ bɛlimoale bɛyɛle la bie ɛdeɛ, noko Baebolo ne amuala anzɛɛ ye foa bie mɔɔ bɛnleanle alimoa ɛdeɛ ne azo bɛhɛlɛle la bie tɛbɔ ɛkɛ ne badwu ɛnɛ. Bie mɔ ɛhyɛ kpalɛ kpalɛ. Asoo nuhua edwɛkɛ ne nee mɔɔ bɛlimoale bɛhɛlɛle la le ko? Abɔlɔba W. H. Green hanle Hibulu Ngɛlɛlera ne anwo edwɛkɛ kɛ: “Yɛbahola yɛaha ye wienyi kɛ, tetedwɛkɛ biala mɔɔ bɛhɛlɛ la ɛnli munli ɛndɛla ɛhye, ɔle pɛpɛɛpɛ.” Sir Frederic Kenyon, bɛsanloangɛlɛlera nwo abɔlɔba ko mɔɔ ɛbe kpalɛ la hɛlɛle Kilisiene Giliki Ngɛlɛlera ne anwo edwɛkɛ kɛ: “Saa ɛnea mekɛ mɔɔ bɛyɛle mɔlebɛbo ɛdeɛ ne ɔ nee mekɛ mɔɔ bɛyɛle nzinlii ɛdeɛ ne a, asɛɛ ngakyile kpole biala ɛnle nu yɛɛ bɛye ninyɛne mɔɔ maa awie adwenle nu yɛ ye kesee kɛ Ngɛlɛlera ne anu edwɛkɛ ne ɛhakyi ngyikyi ngyikyi too ɛradwu yɛ mekɛ ye azo la bɛvi nu. Kɛkala yɛkola yɛka kɛ Ngyekyeleɛ Fofolɛ ne anu edwɛkɛ ne le nɔhalɛ yɛɛ ɔdi munli.” Eza ɔhanle kɛ: “Yɛbahola yɛava anwodozo yɛaha kɛ Baebolo ne anu edwɛkɛ ne ɛtɛkakyile. . . . Yɛnrɛhola yɛnrɛha ɛhye wɔ tete mbuluku gyɛne mɔɔ ɛha wɔ ewiade la anwo.”

Baebolo Ngilebɛbo

Debie bieko mɔɔ ɛmaa Baebolo ne ɛrayɛ buluku mɔɔ menli dɔɔnwo ze ye la a le kɛ bɛhile ɔ bo bɛhɔ aneɛ ngakyile nu. Ɛhye ɛmaa bodane mɔɔ Nyamenle lɛ kɛ ɔmaa menli mɔɔ vi maanle, aneɛ nee mbusua ngakyile nu la anwu ye na bɛazonle ye wɔ “sunsum nee nɔhalɛ nu” la ɛra nu.​—Dwɔn 4:​23, 24; Maeka 4:2.

Septuagint ne a le Hibulu Ngɛlɛlera mɔɔ limoa mɔɔ bɛhilele ɔ bo bɛhɔle Giliki nu a. Bɛhilele ɔ bo bɛmaanle Dwuuma mɔɔ ka Giliki aneɛ mɔɔ bɛnle Palɛsetanye la, na ɔhale ɛvolɛ ɛya nwiɔ kolaa na Gyisɛse ara azɛlɛ ye azo la yɛɛ bɛwiele a. Mɔɔ bɛwiele Baebolo ne amuala mɔɔ Kilisiene Giliki Ngɛlɛlera ne boka nwo la, ɔ nzi ɛvoya ekyi, akee bɛhilele ɔ bo bɛhɔle aneɛ ngakyile nu. Noko nzinlii, arelemgbunli nee ɛsɔfoma mɔɔ anrɛɛ ɔwɔ kɛ bɛmaa menli asa ka Baebolo ne la bɔle mɔdenle kɛ bɛsi ye adenle. Bɛzile menli mɔɔ ɛnee kulo kɛ bɛkile Baebolo ne abo bɛkɔ aneɛ mɔɔ menli dɔɔnwo te anu la adenle, ɔlua zo bɛmaanle menli ne anye zinle wɔ sunsum nu.

Menli bie mɔ mɔɔ ɛnee lɛ akɛnrasesebɛ la andie mɔɔ Asɔne ne yɛɛ Maanle ne hanle la na bɛvale bɛ ngoane bɛdole esiane nu bɛhilele Baebolo ne abo bɛhɔle aneɛ mɔɔ menli dɔɔnwo ka la anu. Kɛ neazo la, wɔ 1530, William Tyndale mɔɔ ɔvi Britain na ɔzukoale nwoma wɔ Oxford la, hilele Mosisi mbuluku nnu ne mɔɔ boka Hibulu Ngɛlɛlera ne anwo la abo. Ɔnva nwo dwazotia mɔɔ ɔyiale la, ɔrayɛle awie mɔɔ limoa mɔɔ hilele Baebolo ne abo vile Hibulu aneɛ nu rale Nrelenza aneɛ nu a. Eza Tyndale a le Nrelenza edwɛbohilelɛnli mɔɔ limoa mɔɔ vale duma Gyihova lile gyima a. Baebolo nwo abɔlɔba ko mɔɔ ka Spanish aneɛ, Casiodoro de Reina hilele Baebolo ne abo hɔle Spanish aneɛ nu na Kateleke mgbanyima yɛle biala kɛ bɛku ye. Ɔdule adenle ɔhɔle England, Germany, France, Holland, yɛɛ Switzerland wɔ mekɛ mɔɔ ɔyɛ ye ngilebɛbo ne anwo gyima la. *

Ɛnɛ, bɛlɛkile Baebolo ne abo bɛahɔ aneɛ dɔɔnwo anu yɛɛ bɛpelente mgbe dɔɔnwo. Kɛzi Baebolo ne ɛdɛnla ɛkɛ too yeradwu ɛnɛ na yeyɛ buluku mɔɔ menli dɔɔnwo ze ye tɛla biala la, maa edwɛkɛ mɔɔ sunsum ne hanle ɛzoanvolɛ Pita maanle ɔhanle la yɛ nɔhalɛ bɔkɔɔ. Ɔhanle kɛ: “Ndile ne nwoso na felawɔse ne kpolo, noko Gyihova edwɛkɛ ne wɔ ɛkɛ ne dahuu.”​—1 Pita 1:24, 25.

Ɔ nyunlu nvoninli ne: National Library of Russia, St. Petersburg; mɔɔ tɔ zo nwiɔ yɛɛ nsa: Bibelmuseum, Münster; Ɔ nzi nvoninli ne: © The Trustees of the Chester Beatty Library, Dublin

[Ɔbodwɛkɛ]

[Nvoninli]

Masorete bɛsanloangɛlɛlera

[Nvoninli]

Kɛlata sinli mɔɔ Luku 12:7 wɔ zo la, “. . . bɛmmasulo; bɛsonle bolɛ bɛtɛla ngɛsanloma dɔɔnwo”