EDWƐKƐ TITILE | ADALƐ MƆƆ MAA BƐDWENLE KƐ NYAMENLE ƐNLƐ ƐLƆLƐ LA
Adalɛ Mɔɔ Bɛbɔ Kɛ Nyamenle Ɛnlɛ Duma
MƆƆ MENLI DƆƆNWO DIE DI LA “Yɛ nloa ɛtɛsɛle yɛ nwo kɛ yɛbalie yɛado nu bɔbɔ kɛ Nyamenle lɛ duma, yɛɛ saa ɔlɛ bie a, kɛzi zɔhane duma ne bayɛ la.”—Benleravolɛ David Cunningham, Theological Studies.
BAEBOLO NE ANU NƆHALƐ NE Nyamenle hanle kɛ: “Medame a mele Gyihova a. Me duma ɛne.” (Ayezaya 42:8, NW) Gyihova le Hibulu duma mɔɔ kile “Mɔɔ Maa Ɔyɛ Ɛkɛ” la.—Mɔlebɛbo 2:4.
Gyihova kulo kɛ yɛbɔ ye duma. Baebolo ne ka kɛ, ‘bɛbɔ ye duma, bɛmaa ye nyɛleɛ ne mɔ ɛla ali wɔ maanle maanle avinli, bɛbɔ ye kpoleyɛlɛ ne nolo bɛhile bɛ.’—Ayezaya 12:4.
Gyisɛse bɔle Nyamenle duma. Gyisɛse hanle ye wɔ asɔneyɛlɛ nu hilele Gyihova kɛ: “Wɔ duma nwo ɛde.” (Mateyu 6:9) Gyisɛse bɔle Nyamenle duma hilele ye ɛdoavolɛma. Duzu ati a ɔyɛle zɔ a? Ɔhanle kɛ: “Amaa ɛhulolɛ ne mɔɔ ɛlɛ ye me nwo la adɛnla bɛ nu, na medame noko meadɛnla bɛ nu.”—Dwɔn 17:26.
DEƐMƆTI ƆHYIA LA Ɛzonlenlɛ nwo sukoavo Walter Lowrie hɛlɛle kɛ, “Awie mɔɔ ɛnze Nyamenle duma la ɛnze ye kpalɛ, yɛɛ saa ɔbu ye kɛ tumi bie mɔɔ bɛnnwu ye la a ɔnrɛhola ɔnrɛnyia ɔ nwo ɛlɔlɛ.”
Bɛfa Nyamenle duma bɛfea anzɛɛ bɛfa debie bɛsie ɔ gyakɛ anu a ɔle kɛ bɛlɛye bɛavi Baebolo ne anu la
Bɛfa Nyamenle duma bɛfea anzɛɛ bɛfa debie bɛsie ɔ gyakɛ anu a ɔle kɛ bɛlɛye bɛavi Baebolo ne anu la
Ɛnee nrenya bie mɔɔ bɛfɛlɛ ye Victor la kɔ asɔne dapɛne biala, noko ɛnee ɔte nganeɛ kɛ ɔnze Nyamenle kpalɛ. Ɔka kɛ, “Mekɛ mɔɔ menwunle kɛ Nyamenle duma a le Gyihova la, ɛnee ɔle kɛ bɛlɛfa ye bɛahile me la. Akee mendele nganeɛ kɛ me nee Ahenle mɔɔ mede ɔ nwo edwɛkɛ dɔɔnwo la ɛyia. Menwunle ye kɛ Awie mɔɔ wɔ ɛkɛ la na menvale ye agɔnwolɛ.”
Gyihova noko bikye menli mɔɔ bɔ ye duma la. Nyamenle ɛbɔ “bɛdabɛ mɔɔ bɛdwenle ɔ nwo la” ɛwɔkɛ kɛ: “Mebanwu bɛ anwunvɔne, kɛmɔ sonla nwu ɔ ra mɔɔ sonle ye la anwunvɔne la.” (Malakae 3:16, 17) Nyamenle eza yila bɛdabɛ mɔɔ bɛbɔ ye duma la. Baebolo ne ka kɛ: ‘Awie biala mɔɔ kɛbɔ Gyihova duma la kɛnyia ngoane.’—Wulomuma 10:13.
