BAEBOLO NE BUA KƐ: ‘Mekɛ ɛlɛba mɔɔ mowuamra amuala bade Gyisɛse ane wɔ bɛ nla ne mɔ anu, na bɛvi bɛ nla ne mɔ anu bɛbavinde.’​—Dwɔn 5:28, 29.

Gyisɛse hanle kɛ wɔ ye Belemgbunlililɛ ne anu, Ɛbolɔ badɔ mgbane. Fernando mɔɔ yɛlimoa yɛha ɔ nwo edwɛkɛ la se, “Mekɛ mɔɔ limoa mɔɔ mengengale Dwɔn 5:28, 29 la, ɔzinle me nwo. Ɔmaanle menyianle anyelazo, na membɔle ɔ bo kɛ medwenle kenle bie anyelazo ne anwo.”

Wɔ tete ne, ɛnee nɔhavonli Dwobu anye la kɛ saa ɔwu a Nyamenle badwazo ye ara ngoane nu. Dwobu bizale kɛ: “Saa sonla wu a, ɔkɛdɛnla ngoane nu bieko ɔ?” Akee ɔvale anwodozo ɔbuale kɛ: “Wɔ me ɛzonlenlɛ mekɛ nu mebahendɛ [wɔ Ɛbolɔ], toonwo me ɛkpɔnelɛ mekɛ adwu. Ɛbavɛlɛ, na mebalie wɔ zo.”​—Dwobu 14:14, 15.

Ɛnee ewudwazo ne ɛnle debie fofolɛ ɛmmaa Lazalɛse adiema raalɛ Maata. Lazalɛse wule la anzi, Gyisɛse zele Maata kɛ: “Ɛ diema nrenya ne badwazo ara ngoane nu.” Maata buale kɛ: “Meze kɛ ɔbadwazo yeara ngoane nu wɔ mekɛ ne mɔɔ li awieleɛ la anu.” Akee Gyisɛse zele ye kɛ: “Mame a mele ewudwazo ne nee ngoane ne a. Mɔɔ kɛlie me kɛli la, saa ɔwu bɔbɔ a ɔkɛnyia ngoane.” (Dwɔn 11:23-25) Akee Gyisɛse dwazole Lazalɛse ɛkɛ ne ala rale ngoane nu! Edwɛkɛ ɛhye maa yɛnwu kɛ kenle bie bɛbadwazo menli dɔɔnwo. Fa ye kɛ ewudwazo ne ɛlɛkɔ zo wɔ ewiade amuala!

BAEBOLO NE BUA KƐ: Nyamenle Edwɛkɛ ne maa yɛnwu kɛ Gyisɛse ewudwazo ne le ngakyile fi menli mɔtwɛ ne mɔɔ bɛha bɛ nwo edwɛkɛ wɔ Baebolo ne anu la anwo. Bɛdwazole menli mɔtwɛ ne bɛmaanle bɛrale azɛlɛ ye azo. Noko yɛkenga ye wɔ Gyisɛse ewudwazo ne anwo kɛ: ‘Gyisɛse Kelaese ɛhɔ anwuma na ɔde Nyamenle asa fema zo.’ (1 Pita 3:21, 22) Asoo Gyisɛse angome a bayɛ awie mɔɔ bɛdwazo ye bɛhɔ anwuma ɔ? Ɛnee Gyisɛse ɛlimoa ɛze ye ɛzoanvolɛma ne kɛ: “Saa mekɔ na mesiezie ɛleka memaa bɛ a, mebara bieko na mearava bɛ meahɔ me nwo lɔ, amaa bɛadɛnla ɛleka mɔɔ mewɔ la.”​—Dwɔn 14:3.

Kelaese hɔle anwuma na ɔzieziele ɛleka ɔmaanle ye ɛdoavolɛma ne bie mɔ mɔɔ bara la. Menli mɔɔ bɛbadwazo bɛ bɛahɔ anwuma la dodo bayɛ  144,000. (Yekile 14:1, 3) Noko duzu a Gyisɛse ɛdoavolɛma ɛhye mɔɔ bikye ye la bayɛ a?

Bɛbayɛ gyima dɔɔnwo! Ngɛlɛlera ne ka kile yɛ kɛ: “Nyilalɛ nee anyunlunyia ɛha bɛdabɛ mɔɔ bɛboka alumua ewudwazo ne anwo la. Ewule ne mɔɔ tɔ zolɛ nwiɔ la ɛnlɛ bɛ nwo zo tumi; bɛbayɛ Nyamenle nee Kelaese sɛlɛvolɛma na bɛ nee Kelaese ali belemgbunli ɛvolɛ apenle.” (Yekile 20:6) Menli mɔɔ bɛbadwazo bɛ bɛahɔ anwuma la bayɛ arelemgbunli nee ɛsɔfoma na bɛ nee Kelaese ali tumi wɔ azɛlɛ ye azo amuala.

BAEBOLO NE BUA KƐ: Ngɛlɛlera ne ka ɛzoanvolɛ Pɔɔlo edwɛkɛ ɛhye mɔɔ ɔhanle la kɛ: “Me anyelazo mɔɔ melɛ wɔ Nyamenle anu la le kɛ mɔɔ bɛdabɛ bɛlɛ ye ala la, kɛ menli kɔsɔɔti, ɛtanevolɛma nee kpalɛyɛlɛma badwazo ara ngoane nu.”​—Gyima ne 24:15.

Nwane mɔ a boka ekpunli ne mɔɔ Pɔɔlo vɛlɛle bɛ kɛ “kpalɛyɛlɛma” la anwo a? Suzu neazo ɛhye anwo. Ɔka ekyii na nɔhavonli Daneɛle awu la bɛzele ye kɛ: “Ɛbawu, na awieleɛ mekɛ ne dwu a, ɛbagyinla ɛleka mɔɔ bɛhyehyɛ bɛmaa wɔ la.” (Daneɛle 12:13) Nienwu a bɛbadwazo Daneɛle bara a? “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.” (Edwɛndolɛ 37:29) Gyisɛse hanle kɛ: “Nyilalɛ ɛha bɛdabɛ mɔɔ bɛle bɛlɛvo la; Azɛlɛ ye bayɛ bɛ ɛdeɛ!” (Mateyu 5:5) Bɛbadwazo Daneɛle nee mrenyia nee mraalɛ nɔhavoma bɛamaa bɛadɛnla aze dahuu.

Nwane mɔ a boka ekpunli ne mɔɔ Pɔɔlo vɛlɛle bɛ kɛ “ɛtanevolɛma” la anwo a? Bɛmɛ a le alesama mgbe mgbe mɔɔ dɛnlanle aze na bɛande Baebolo ne anu nɔhalɛ ne na bɛawu la. Saa bɛdwazo bɛ a, bɛbahola bɛazukoa Gyihova * nee Gyisɛse anwo debie na bɛanyia bɛ nwo ndelebɛbo. (Dwɔn 17:3) Suzuamgba ala mɔɔ Gyihova de aze la, menli mɔɔ ɛzi kpɔkɛ kɛ bɛsonle Ye la banyia anyelazo kɛ bɛbadɛnla aze dahuu.

BAEBOLO NE BUA KƐ: Nyamenle ‘bakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko.’ (Yekile 21:4) “Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie.”​—Ayezaya 65:21.

Fa ye kɛ ɛ nee wɔ alɔvolɛ mɔɔ bɛdwazo bɛ la wɔ tɛnlabelɛ zɛhae anu! Noko yɛbabiza kɛ, Kɛ ɔkɛyɛ na wɔalie wɔali kɛ ewudwazo ne bara ɛ?