‘Nyamenle bakyikyi bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko. Alimoa ninyɛne ne ɛpɛ nu.’—Yekile 21:3, 4, Ewiade Fofolɛ Ngilebɛbo.

Gyima mɔɔ anyelielɛ nee ahunlundwolɛ wɔ nu.​—Ayezaya 65:21-23.

Anwodolɛ anzɛɛ amaneɛnwunlɛ biala ɛnle ɛkɛ bieko.​—Ayezaya 25:8; 33:24.

Ɛ nee wɔ abusua nee ɛ gɔnwo mɔ badɛnla aze wɔ anyelielɛ nu dahuu.​—Edwɛne 37:11, 29.

Ɛhɛe, ɔlua ninyɛne nwiɔ bie ati:

• Nyamenle kola maa ɛwɔkɛ ne ba nu. Gyihova Nyamenle angomekye a bɛfɛlɛ ye “Tumivolɛ Bedevinli” wɔ Baebolo ne anu a, ɔluakɛ ye tumi ne le kpole tɛla tumi biala. (Yekile 15:3) Ɔti ɔkola ɔdi ɛwɔkɛ mɔɔ yebɔ kɛ ɔbamaa ewiade ne ayɛ kpalɛ la azo. Baebolo ne ka kɛ, “Nyamenle ɛdeɛ ɔkola ɔyɛ debie biala.”​—Mateyu 19: 26.

• Nyamenle kulo kɛ ɛwɔkɛ ne ba nu. Kɛ neazo la, Gyihova anwo ɛlɛdɔ menli mɔɔ ɛwu la na ɔbadwazo bɛ yeara ngoane nu bieko.​—Dwobu 14:14, 15.

  Baebolo ne eza ka kɛ Nyamenle Ara ne, Gyisɛse, yɛle wuliravolɛma ayile. Duzu ati a ɔyɛle zɔ a? Ɛnee ɔkulo la ati ɔ. (Maake 1:40, 41) Gyisɛse lale ɔ Ze subane ne bie ali pɛpɛɛpɛ yemɔti ɛnee ɔkulo kɛ ɔboa menli mɔɔ ɛhyia la.​—Dwɔn 14:9.

  Yemɔti yɛbahola yɛalie yɛali kɛ Gyihova nee Gyisɛse kulo kɛ bɛboa yɛ bɛmaa yɛnyia anyelielɛ kenle bie!​—Edwɛne 72:12-14; 145:16; 2 Pita 3:9.