KILISIENEMA mgbe dɔɔnwo ɛkpa kɛ bɛnrɛli Bolonyia. Kɛzi bɛte nganeɛ wɔ bɛ kpɔkɛzilɛ ne anwo ɛ? Asoo bɛte nganeɛ kɛ bɛminli debie ɔ? Asoo bɛ mra ne mɔ anye ɛnlie ɔ? Nea mɔɔ Gyihova Alasevolɛ mɔɔ bɛwɔ ewiade ɛleka ngakyile la ka ye wɔ edwɛkɛ ɛhye anwo la.

Yɛkakye Gyisɛse Kelaese: “Kolaa na meayɛ Gyihova Dasevolɛ la ɛnee menda mengɔ asɔne. Ɛkanwu me wɔ asɔne sua nu la ɛnee ɔkile kɛ bɛlɛdi Bolonyia anzɛɛ Easter. Yemɔ bɔbɔ, ɛnee mendwenle Gyisɛse Kelaese anwo. Kɛkala menli Bolonyia, noko mekɔ Kilisienema ayia fane nwiɔ wɔ dapɛne ne anu yɛɛ mekilehile menli edwɛkɛ mɔɔ Baebolo ne ka ye wɔ Gyisɛse anwo la!”​—EVE, AUSTRALIA.

Anyelielɛ wɔ ɛmaanlɛ nu: “Saa awie kyɛ me debie wɔ mekɛ mɔɔ me nye ɛnla la a, me nye die nwo kpalɛ. Eza me nye die nwo kɛ mebayɛ kaade anzɛɛ mebadɔlɔ nvoninli bie na meava meahyɛ awie mɔ ɔluakɛ ɔmaa bɛ nye die ekyi na ɛhye maa medame noko me nye die.”​—REUBEN, NORTHERN IRELAND.

Yɛboa menli mɔɔ hyia moalɛ la: “Yɛ nye die nwo kɛ yɛbado aleɛ yɛamaa menli mɔɔ ɛnde kpɔkɛ la. Ɔyɛ a yɛmaa bɛ felawɔse, keeki, anzɛɛ ahyɛlɛdeɛ ekyi mɔɔ maa bɛ nye die la. Yɛ nye die ɛhye ɛyɛlɛ nwo ɔluakɛ yɛkola yɛkpɔla menli ɛhye mɔ mekɛ biala wɔ ɛvolɛ ne anu.”​—EMILY, AUSTRALIA.

Abusua koyɛlɛ: “Saa yɛ nee yɛ mbusuafoɔ yia nu a, ɔmaa ngakula ne mɔ nyia adenle kpalɛ nwu bɛ ankele, bɛ ante, bɛ nana mɔ, bɛ nenyia mɔ nee bɛ mediema gyɛne. Kɛmɔ yɛkola yɛyɛ ɛhye mekɛ biala wɔ ɛvolɛ ne anu la ati, ɔmmaa yɛ nwo ɛngyele yɛ, yɛɛ yɛ mbusuafoɔ ze kɛ yɛkulo bɛ la ati a yɛkpɔla bɛ a.”​—WENDY, CAYMAN ISLANDS.

Anzodwolɛ: “Ɔdwu Bolonyia mekɛ a, menli ɛnlɛ alagye ɔti bɛ nuhua ekyi bie ala a dwenle anzodwolɛ nwo a. Mezukoa ɛwɔkɛ mɔɔ Baebolo ne bɔ alesama la; ɛhye maa me nzo nu dwo me. Mete ɔ bo kɛ me mra ne mɔ banyia asetɛnla mɔɔ yɛ anyelielɛ la kenle bie.”​—SANDRA, SPAIN.