KENGAVOLƐMA BIZA KƐ . . .

Gyihova Alasevolɛ Lɛ Mraalɛ Mɔɔ Bɛkilehile Ɔ?

▪ Ɛhɛe, wɔ ewiade amuala, Gyihova Alasevolɛ lɛ mraalɛ mgbe dɔɔnwo mɔɔ bɛkilehile a. Bɛzonle kpalɛ yɛɛ bɛlɛbɔ edwɛkpa mɔɔ fale Nyamenle Belemgbunlililɛ ne anwo la nolo a. Bɛhanle bɛ nwo ngapezo bɛdole ɛkɛ wɔ Edwɛne 68:11 kɛ: “Gyihova ɛha kɛ; Mraalɛ mɔɔ ɛlɛbɔ edwɛkpa ne nolo la le ɛlɔne kpole.”

Noko ngilehilelɛ gyima mɔɔ Gyihova Alasevolɛ mraalɛ yɛ la le ngakyile fi mɔɔ mraalɛ bie mɔ yɛ ye wɔ ɛzonlenlɛ ngakyile nu la anwo bɔkɔɔ. Bɛnle ko fee, ngakyile wɔ bɛ avinli. Duzu ati a yɛkola yɛka ye zɔ a?

Menli mɔɔ bɛkilehile bɛ la le ngakyile. Mraalɛ mɔɔ wɔ Kilisienemaanle ne anu la bie mɔ sonle kɛ asɔne mgbanyima, ɔti asɔnema ne a bɛkilehile bɛ a. Noko Gyihova Alasevolɛ mraalɛ mɔɔ bɔ edwɛkpa ne nolo la kilehile menli mɔɔ bɛyia bɛ wɔ bɛ azua nu daselɛlilɛ gyima ne anu yɛɛ ɛleka gyɛne la.

Adenle bieko mɔɔ Gyihova Alasevolɛ mraalɛ mɔɔ kilehile la le ngakyile fi mraalɛ mɔɔ wɔ ɛzonlenlɛ ngakyile nu anwo la a le gyima mɔɔ bɛyɛ ye wɔ asafo ne anu la. Mraalɛ mɔɔ bɛkpa bɛ wɔ Kilisienemaanle ne anu kɛ ɛsɔfoma la di bɛ asɔnema ne anyunlu kilehile bɛ ɛzonlenlɛ ne anwo ninyɛne. Noko Gyihova Alasevolɛ mraalɛ ɛngilehile asafo ne wɔ mekɛ mɔɔ mrenyia mɔɔ bɛzɔne bɛ wɔ ɛkɛ ne la. Mrenyia mɔɔ bɛkpa bɛ la ala a kilehile a.​—1 Timote 3:2; Gyemise 3:1.

Baebolo ne ka kɛ mrenyia ala a ɔwɔ kɛ bɛyɛ neavolɛma wɔ asafo ne anu a. Yɛ neazo bie mɔɔ ɛzoanvolɛ Pɔɔlo yɛle wɔ mekɛ mɔɔ ɔkɛlɛ ɔ gɔnwo neavolɛ Taetɛse kɛlata la nzonlɛ: “Mengyakyile wɔ wɔ Kiliti amaa . . . wɔakpa mgbanyima wɔ sua biala azo.” Pɔɔlo vale bokale nwo kɛ, ɔwɔ kɛ nrenyia biala mɔɔ bɛbakpa ye la yɛ “nrenyia mɔɔ edwɛkɛ ɛnle ɔ nwo, ɔ ye kokye.” (Taetɛse 1:5, 6) Mɔɔ Pɔɔlo kɛlɛ Timote wɔ ngyehyɛleɛ mɔɔ ɔwɔ kɛ bɛfa bɛyɛ gyima wɔ asafo ne anu anwo la, ɔvale adehilelɛ ko ne ala ɔmaanle: “Saa awie kpondɛ kɛ ɔyɛ neavolɛ a, ɛnee ɔkulo gyima kpalɛ. Ɔti ɔwɔ kɛ neavolɛ yɛ awie mɔɔ edwɛkɛ ɛnle ɔ nwo, ɔ ye kokye, . . . ɔkola ɔkilehile.”​—1 Timote 3:1, 2.

Duzu ati a mrenyia ala a ɔwɔ kɛ bɛyɛ neavolɛma wɔ asafo ne anu a? Pɔɔlo hanle kɛ: “Memmaa raalɛ adenle kɛ ɔhilehile anzɛɛ ɔnyia nrenyia nwo zo tumi, emomu ɔyɛ koonwu. Ɔluakɛ bɛlimoale bɛbɔle Adam kolaa na bɛabɔ Yive.” (1 Timote 2:12, 13) Adenle ɛhye mɔɔ Nyamenle luale zo bɔle bɛ la maa yɛnwu deɛmɔti ɔvale ngilehilelɛ nee neavolɛ nwo adenle ne ɔmaanle mrenyia angomekye la.

Gyihova Alasevolɛ di bɛ Adekilevolɛ Gyisɛse Kelaese neazo ne anzi. Ɛdoavolɛ Luku hanle Gyisɛse ɛzonlenlɛ gyima ne anwo edwɛkɛ kɛ: “Ɔdule adenle ɔhɔle azuamgbole nee namunamu zo ɔhɔbɔle Nyamenle Belemgbunlililɛ ne anwo edwɛkpa ne nolo.” Nzinlii ɔzoanle ye ɛdoavolɛma ne kɛ bɛhɔyɛ gyima ko ne ala: “Bɛhɔle namunamu ne mɔ azo bɛhɔbɔle edwɛkpa ne nolo na bɛyɛle ayile wɔ ɛleka biala.”​—Luku 8:1; 9:​2-6.

Ɛnɛ, Gyihova azonvolɛ kɔsɔɔti, mrenyia nee mraalɛ fa bɛ nwo wula gyima mɔɔ Gyisɛse hanle nwolɛ edwɛkɛ dole ɛkɛ la anu: “Na bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.”​—Mateyu 24:14.