1, 2. (a) Duzu ati a awie mɔɔ ɛlie duma la anwo edwɛkɛ mɔɔ ɛkɛde ala la ɛngile kɛ ɛze ye amgba ɛ? (b) Gyisɛse anwo adwenle ngakyile boni a wɔ ɛkɛ a?

MENLI dɔɔnwo ɛlie duma wɔ ewiade ye anu. Bɛze bie mɔ kpalɛ wɔ ɛleka mɔɔ bɛde, bɛ sua zo anzɛɛ bɛ maanle nu. Bɛze bie mɔ noko wɔ ewiade amuala. Noko akee awie mɔɔ ɛlie duma kpalɛ, mɔɔ ɛnwu ye duma ala la ɛngile kɛ ɛze ye amgba. Ɔngile kɛ ɛze ɔ nwo edwɛkɛ dɔɔnwo nee ye sonla holɛ mɔɔ ɔde amgba la.

² Gyisɛse Kelaese rale azɛlɛ ye azo kɛyɛ ɛvolɛ 2,000 mɔɔ ɛze ɛhɔ la anu ɛdeɛ, noko, menli mɔɔ wɔ ewiade ye la anu dɔɔnwo ɛde ɔ nwo edwɛkɛ. Noko, menli dɔɔnwo ɛnnwu sonla holɛ mɔɔ ɛnee Gyisɛse de amgba la. Bie mɔ se ɛnee ɔle sonla kpalɛ ala. Bie mɔ noko ka kɛ ɛnee ɔle ngapezonli ala. Eza bie mɔ noko die di kɛ Gyisɛse le Nyamenle na ɔwɔ kɛ bɛsonle ye. Asoo ɔwɔ kɛ bɛsonle ye ɔ?

3. Duzu ati a nwolɛ hyia kɛ ɛkɛnwu Gyisɛse anwo nɔhalɛ ne ɛ?

³ Nwolɛ hyia kɛ ɛnwu Gyisɛse anwo nɔhalɛ edwɛkɛ ne. Duzu ati ɔ? Ɔboalekɛ Baebolo ne se: ‘Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ ɛzoanle ye la.’ (Dwɔn 17:3) Ɛhɛe, Gyihova Nyamenle nee Gyisɛse Kelaese anwo nɔhalɛ ne mɔɔ ɛbanwu ye la bahola amaa wɔanyia dahuu ngoane wɔ azɛlɛ ye azo paladaese ne anu. (Dwɔn 14:6) Bieko, Gyisɛse yɛle kɛzi ɔwɔ kɛ yɛbɔ yɛ ɛbɛla nee kɛzi ɔwɔ kɛ yɛ nee awie mɔ di la anwo neazo mɔɔ tɛla biala la manle yɛ. (Dwɔn 13:34, 35) Wɔ buluku ɛhye  tile mɔɔ lumua la anu, yɛzuzule Nyamenle anwo nɔhalɛ edwɛkɛ nwo. Akee maa yɛzuzu mɔɔ Baebolo ne kilehile amgba wɔ Gyisɛse Kelaese anwo la anwo.

4. Duzu a amodinli “Mɛzaya” nee “Kelaese” kile a?

⁴ Mekɛ tendenle kolaa na bawo Gyisɛse la, Baebolo ne hanle ahenle ne mɔɔ Nyamenle bazoa ye kɛ Mɛzaya anzɛɛ Kelaese la anwo edwɛkɛ dole ɛkɛ. Amodinli “Mɛzaya” (mɔɔ vi Hibulu edwɛkɛkpɔkɛ nu) nee “Kelaese” (mɔɔ vi Giliki edwɛkɛkpɔkɛ nu) la amuala abo kile “Awie Mɔɔ Bɛkpokpa Ye.” Ɛnee  bɛbakpokpa Sonla ɛhye mɔɔ bɛbɔ ɔ nwo ɛwɔkɛ la, ɛhye kile kɛ, ɛnee Nyamenle bava ye azie gyinlabelɛ titile bie. Wɔ buluku ɛhye tile ne mɔ mɔɔ li awieleɛ la anu, yɛbazukoa Mɛzaya ne gyinlabelɛ ne mɔɔ anwo hyia amaa Nyamenle ɛwɔkɛ ne mɔ ara nu la anwo debie dɔɔnwo. Eza yɛbazukoa nyilalɛ mɔɔ Gyisɛse bahola amaa yɛanyia ye kɛkala bɔbɔ la anwo debie. Noko akee, kolaa na bawo Gyisɛse la, ɔda ali kɛ menli dɔɔnwo zuzule nwolɛ kɛ, ‘Nwane a bayɛ Mɛzaya ne a?’

5. Duzu a ɛnee Gyisɛse ɛdoavolɛma ne die di bɔkɔɔ wɔ ɔ nwo a?

⁵ Wɔ ɛvoya ne mɔɔ lumua Y.M. anu, Gyisɛse mɔɔ vi Nazalɛte la ɛdoavolɛma liele lile bɔkɔɔ kɛ yemɔ a ɔle Mɛzaya ne mɔɔ bɛhanle ɔ nwo edwɛkɛ bɛdole ɛkɛ ne la a. (Dwɔn 1:41) Ɛdoavolɛma ne anu ko, mɔɔ bɛfɛlɛ ye Saemɔn Pita la, hanle ye wienyi hilele Gyisɛse kɛ: “Wɔmɔ a ɛle Kelaese ne” a. (Mateyu 16:16) Noko akee, ɛnee kɛzi ɛdoavolɛma zɔhane mɔ yɛɛ yɛdayɛ noko, yɛkola yɛdie yɛdi kɛ Gyisɛse a amgba le Mɛzaya ne mɔɔ bɛbɔle ɔ nwo ɛwɔkɛ la ɛ?

6. Fa neazo kilehile kɛzi Gyihova ɛboa nɔhavoma amaa bɛanwu Mɛzaya ne la anu.

⁶ Nyamenle ngapezoma mɔɔ dɛnlanle aze kolaa na bawo Gyisɛse la hanle Mɛzaya ne anwo edwɛkɛ dɔɔnwo dole ɛkɛ. Ɛnee edwɛkɛ ɛhye mɔ baboa awie mɔ gyɛne amaa bɛanwu ye. Yɛbahola yɛalua adenle ɛhye azo yeahilehile nuhua: Fa ye kɛ bɛse ɛhɔ bɔɔso anzɛɛ keteke anzɛɛ anwumalɛne agyinlaleɛ na ɛhɔva awie mɔɔ ɛnze ye la ɛrɛla. Saa awie ka kɛzi ahenle ne de la anwo edwɛkɛ ekyii kile wɔ a asoo ɔnrɛboa wɔ ɔ? Zɔhane ala, yɛɛ Gyihova luale Baebolo ne anu ngapezoma anwo zo vale mɔɔ Mɛzaya ne bayɛ nee mɔɔ bado ye la anwo edwɛkɛ dɔɔnwo manle a. Ɛnee ngapezo dɔɔnwo ɛhye mɔ mɔɔ bara nu la baboa nɔhavoma amaa bɛanwu ye bɔkɔɔ.

7. Ngapezo nwiɔ mɔɔ fane Gyisɛse anwo mɔɔ rale nuhua la a le boni mɔ?

⁷ Suzu neazo nwiɔ pɛ anwo nea. Mɔɔ lumua la, ngapezonli Maeka lumua hanle dole ɛkɛ wɔ mɔɔ bo ɛvolɛ 700 la anu kɛ bɛbawo Ahenle ne mɔɔ bɛbɔ ɔ nwo ɛwɔkɛ la wɔ Bɛtelɛhɛm, mɔɔ le sua ekyi bie wɔ Dwuda maanle nu la azo. (Maeka 5:2)  Nienwu a amgba bɛwole Gyisɛse a? Zɔhane sua ne ala azo! (Mateyu 2:1, 3-9) Mɔɔ tɔ zo nwiɔ, ngapezo mɔɔ wɔ Daneɛle 9:25 mɔɔ bɛlumua bɛhanle bɛdole ɛkɛ ne wɔ ɛvoya dɔɔnwo anu la hwenle adwenle hɔle ɛvolɛ ne mɔɔ nuhua a Mɛzaya ne bala ɔ nwo ali—29 Y.M. la azo. * Ngapezo ɛhye mɔ nee ngapezo gyɛne mɔɔ rale nu la manle ɔlale ali kɛ ɛnee Gyisɛse a le Mɛzaya ne mɔɔ bɛbɔ ɔ nwo ɛwɔkɛ la.

8, 9. Daselɛ mɔɔ kile kɛ ɛnee Gyisɛse a le Mɛzaya ne la boni a ralale ali wɔ ye ɛzɔnelɛ ne anu a?

⁸ Daselɛ bieko mɔɔ kile kɛ ɛnee Gyisɛse a le Mɛzaya ne la ralale ali wienyi wɔ ɛvolɛ 29 Y.M. awieleɛ ne anu. Zɔhane ɛvolɛ ne anu a Gyisɛse hɔle Dwɔn Sɔnevolɛ ne ɛkɛ kɛ ɔzɔne ye wɔ Azule Dwɔdan ne anu la. Ɛnee Gyihova ɛbɔ Dwɔn ɛwɔkɛ kɛ ɔbamaa ye sɛkɛlɛneɛ mɔɔ bamaa yeanwu Mɛzaya ne a. Dwɔn nwunle zɔhane sɛkɛlɛneɛ ne wɔ Gyisɛse ɛzɔnelɛ mekɛ ne anu. Baebolo ne ka mɔɔ zile la anwo edwɛkɛ kɛ: “Mɔɔ bɛzɔnenle Gyisɛse bɛwiele la, ɔvi azule ne anu ɔvole file zo ndɛndɛ ne ala. Anwuma bukele na ɔnwunle kɛ Nyamenle Sunsum ne ɛlɛdwu kɛ abubule la na ɔrazinzele ɔ nwo zo. Na ɛnelɛ bie vi anwuma zele kɛ, ‘Ɛhye a le me Ra mɔɔ mekulo ye la. Me nye die ɔ nwo kpole [na melie ye medo nu, NW].’” (Mateyu 3:16, 17) Mekɛ mɔɔ Dwɔn nwunle mɔɔ zile na ɔdele la, ɔliele ɔdole nuhua bɔkɔɔ kɛ Nyamenle a zoanle Gyisɛse a. (Dwɔn 1:32-34) Mekɛ mɔɔ bɛwolale Nyamenle sunsum nwuanzanwuanza anzɛɛ nyɛleɛ tumi ne bɛguale Gyisɛse anwo zo wɔ zɔhane kenle ne la, Gyisɛse rayɛle Mɛzaya anzɛɛ Kelaese ne, ahenle ne mɔɔ bɛkpa ye kɛ ɔrayɛ Adekilevolɛ nee Belemgbunli la.—Ayezaya 55:4.

⁹ Baebolo ngapezo mɔɔ rale nu nee Gyihova Nyamenle mumua ne daselɛlilɛ maa ɔda ali wienyi kɛ ɛnee Gyisɛse a le Mɛzaya ne mɔɔ bɛbɔ ɔ nwo ɛwɔkɛ la a. Noko Baebolo ne ye Gyisɛse Kelaese anwo kpuyia nwiɔ mɔɔ hyia la anloa: Ɔvi nienwu a ɔrale a, na sonla holɛ boni a ɛnee ɔde a?

10. Duzu a Baebolo ne kilehile fane aze mɔɔ ɛnee Gyisɛse de kolaa na yeara azɛlɛ ye azo la anwo a?

¹⁰ Baebolo ne kilehile kɛ ɛnee Gyisɛse wɔ anwuma kolaa na yeara azɛlɛ ye azo. Maeka hanle dole ɛkɛ ne kɛ bɛbawo Mɛzaya ne wɔ Bɛtelɛhɛm na eza ɔhanle kɛ Ɔ bo “vi tete.” (Maeka 5:2) Gyisɛse mumua ne hanle ye fane dɔɔnwo kɛ, ɛnee ɔwɔ anwuma kolaa na bawo ye kɛ dasanli. (Dwɔn 3:13; 6:38, 62; 17:4, 5) Kɛ sunsum nu abɔdeɛ mɔɔ ɛnee wɔ anwuma la, Gyisɛse nee Gyihova nyianle abusuabɔlɛ titile.

11. Kɛzi Baebolo ne kile kɛ Gyisɛse le Gyihova Ara mɔɔ sonle bolɛ tɛla biala ɛ?

¹¹ Gyisɛse le Gyihova Ara mɔɔ sonle bolɛ tɛla awie biala, na ɛhye fɛta bɔkɔɔ. Bɛfɛlɛ ye “abɔdeɛ muala anu belamunli ralɛ,” ɔluakɛ yemɔ a Nyamenle lumua bɔle ye a. * (Kɔlɔsaema 1:15) Debie bieko wɔ ɛkɛ ne mɔɔ maa Ralɛ ɛhye yɛ ngakyile a. Yemɔ a ɔle ‘Ralɛ mɔɔ ɔwole ye kokye a.’ (Dwɔn 3:16) Ɛhye kile kɛ Gyisɛse ala a le awie mɔɔ Nyamenle angomekye bɔle ye a. Gyisɛse angomekye noko ala a Nyamenle luale ɔ nwo zo bɔle ninyɛne gyɛne mɔɔ ɛha la kɔsɔɔti a. (Kɔlɔsaema 1:16) Akee, eza bɛfɛlɛ Gyisɛse “Edwɛkɛ ne.” (Dwɔn 1:14) Ɛhye maa yɛnwu ye kɛ ɔle Nyamenle kpɔmavolɛ, na ɔda ali kɛ ɔfa nrɛlaleɛ nee adehilelɛ ɔmaa Selɛ ne amra gyɛne mɔɔ ɛha, mɔɔ le anwumabɔvolɛ ne mɔ nee menli la.

12. Kɛzi yɛkola yɛnwu ye kɛ belamunli Ralɛ ne nee Nyamenle ɛnzɛ ɛ?

¹² Asoo belamunli Ralɛ ne nee Nyamenle sɛ, kɛmɔ bie mɔ die di la? Baebolo ne ɛngilehile zɔ. Kɛmɔ yɛnwunle ye wɔ ɛdendɛkpunli ne mɔɔ li ɛhye anyunlu la anu la, bɛbɔle Ralɛ ne. Ɛhye maa ɔda ali wienyi kɛ, ɔnyianle ye mɔlebɛbo, wɔ mekɛ mɔɔ Gyihova Nyamenle ɛnlɛ ye mɔlebɛbo anzɛɛ ye awieleɛ la. (Edwɛndolɛ 90:2) Ɔ Ra mɔɔ ɔwole ye kokye ne la bɔbɔ ambɔ  mɔdenle anzuzu nwolɛ ɛlɛ kɛ ɔ nee ɔ Ze ne kɛzɛ. Baebolo ne kilehile nuhua wienyi kɛ Selɛ ne le kpole tɛla Ralɛ ne. (Dwɔn 14:28; 1 Kɔlentema 11:3) Gyihova angomekye a le ‘Tumivolɛ Bedevinli Nyamenle’ a. (Mɔlebɛbo 17:1) Ɛhye ati awie biala nee ye ɛnzɛ. *

13. Saa Baebolo ne fɛlɛ Ralɛ ne kɛ “Nyamenle ne mɔɔ ɛnyelɛ ɛnnwu ye la sɔhovolɛ” a duzu a ɔkile a?

¹³ Gyihova nee ye belamunli Ralɛ ne nyianle abusuabɔlɛ mɔɔ anu yɛ se la wɔ ɛvolɛ mgbe mgbe dɔɔnwo anu—mekɛ tendenle kolaa na babɔ anwuma mɔɔ nwɔlɔra ɛyi ye tɛkɛɛ nee azɛlɛ ye. Nea kɛzi ɔbayɛ kɛ bɛhulole bɛ nwo a! (Dwɔn 3:35; 14:31) Ɛnee kulovolɛ Ralɛ ɛhye le kɛ ɔ Ze ne pɛpɛɛpɛ. Ɛhye ati a Baebolo ne ka Ralɛ ne anwo edwɛkɛ kɛ “Nyamenle ne mɔɔ ɛnyelɛ ɛnnwu ye la sɔhovolɛ” la. (Kɔlɔsaema 1:15) Ɛhɛe, kɛmɔ dasanli ralɛ bie bahola azɔho ɔ ze kpalɛ kpalɛ wɔ ndenle dɔɔnwo azo la, zɔhane ala yɛɛ anwuma Ralɛ ɛhye lale ɔ Ze subane ne mɔ nee ye sonlazule ali a.

14. Kɛzi bɛwole Gyihova Ara kokye ne kɛ dasanli ɛ?

¹⁴ Gyihova Ara kokye ne vile ye ɛhulolɛ nu vi anwuma radɛnlanle azɛlɛ ye azo kɛ dasanli. Noko bie a ɛbabiza kɛ, ‘Kɛzi ɔyɛle mɔɔ bɛholale bɛwole sunsum nu abɔdeɛ kɛ dasanli a?’ Amaa ɛhye ayɛ boɛ la, Gyihova yɛle nwanwane debie. Ɔyele ye belamunli Ralɛ ne ngoane ɔvile anwuma na ɔvale ɔwulale Dwuunli raalɛ mɔɔ ɛnee ɔnze nrenya mɔɔ bɛfɛlɛ ye Mɛle la awodeɛ nu. Ɛnee dasanli selɛ biala ɛmboka nwolɛ. Ɛhye ati Mɛle wole ralɛ nrenya mɔɔ di munli na ɔdole ye duma Gyisɛse.—Luku 1:30-35.

15. Duzu ati a yɛkola yɛka kɛ yɛdua Gyisɛse anwo zo yɛnwu Gyihova kpalɛ ɛ?

¹⁵ Mɔɔ Gyisɛse hanle nee mɔɔ ɔyɛle wɔ mekɛ mɔɔ ɔwɔ azɛlɛ ye azo la boa yɛ maa yɛnwu ye kpalɛ. Mɔɔ tɛla ɛhye la, yɛdua  Gyisɛse anwo zo yɛbanwu Gyihova kpalɛ. Duzu ati ɔ? Kakye kɛ Ralɛ ɛhye da ɔ Ze subane ne ali bɔkɔɔ. Ɛhye ati a Gyisɛse hanle hilele ye ɛdoavolɛma ne anu ko kɛ: ‘Awie mɔɔ ɛnwu me la ɛnwu Selɛ ne noko.’ (Dwɔn 14:9) Baebolo ne anu mbuluku nna ne mɔɔ bɛfɛlɛ bɛ Edwɛkpa ne, mɔɔ le Mateyu, Maake, Luku nee Dwɔn la, ka Gyisɛse Kelaese asetɛnla, ye gyima nee ye subane nwo edwɛkɛ dɔɔnwo kile yɛ.

16. Edwɛkɛ titile boni a Gyisɛse hilehilele a, na ɛnee nienwu a ye ngilehilelɛ ne vi a?

¹⁶ Ɛnee bɛze Gyisɛse kpalɛ kpalɛ kɛ “Kilehilevolɛ.” (Dwɔn 1:38; 13:13) Duzu a ɔhilehilele a? Ye titile ne, ɛnee ye edwɛkɛ ne a le ‘edwɛkpa ne mɔɔ fane belemgbunlililɛ ne’—Nyamenle Belemgbunlililɛ, mɔɔ yemɔ a le anwuma arane ne mɔɔ bazie azɛlɛ ye amuala na yeamaa alesama mɔɔ yɛ tieyɛ la anyia nyilalɛ dahuu la. (Mateyu 4:23) Ɛnee nwane edwɛkɛ a le ɛhye? Gyisɛse mumua ne hanle kɛ: “Mɔɔ mekilehile la ɛnle me ti anwo ngilehilelɛ. Ɔvi Nyamenle ne mɔɔ zoanle me la ɛkɛ,” mɔɔ yemɔ a le Gyihova la. (Dwɔn 7:16) Ɛnee Gyisɛse ze kɛ ɔ Ze kpondɛ kɛ alesama te Belemgbunlililɛ ne anwo edwɛkpa ne. Yɛbazukoa Nyamenle Belemgbunlililɛ ne nee mɔɔ ɔbayɛ la anwo ninyɛne dɔɔnwo wɔ Tile 8 ne anu.

17. Nienwu a Gyisɛse yɛle ye ngilehile gyima ne a, na duzu ati a ɔbɔle mɔdenle biala ɔhilehilele awie mɔ ɛ?

¹⁷ Nienwu a Gyisɛse yɛle ye ngilehilelɛ gyima ne a? Ɛleka biala mɔɔ ɔnwunle menli la—namunamu ne mɔ anu yɛɛ azuamgbole zo, azua ngyikyi zo, gua zo nee menli azua nu. Gyisɛse ammaa ɔ nye anla kɛ menli ne bara yemɔ ɔ nwo ɛkɛ. Emomu ɔdaye a ɔhɔle bɛ nwo ɛkɛ ne a. (Maake 6:56; Luku 19:5, 6) Duzu ati a Gyisɛse bɔle mɔdenle biala na ɔvale ye mekɛ dɔɔnwo ɔhanle edwɛkɛ ne na ɔhilehilele a? Ɔboalekɛ ɛnee zɔhane ɛyɛlɛ le Nyamenle ɛhulolɛdeɛ. Gyisɛse yɛle ɔ Ze ɛhulolɛdeɛ dahuu. (Dwɔn 8:28, 29) Noko ɛnee debie bieko wɔ ɛkɛ mɔɔ ɔti ɔhanle edwɛkɛ ne a. Ɔzele menli dɔɔnwo ne mɔɔ rale ɔ nwo ɛkɛ ne la anwuvɔne. (Mateyu 9:35, 36) Ɛnee bɛ ɛzonlenlɛ nu adekilevoma, mɔɔ ɔwɔ kɛ kilehile bɛ Nyamenle nee ye atiakunlukpɔkɛ ne mɔ anwo nɔhalɛ edwɛkɛ ne la ɛbu bɛ nye ɛgua bɛ nwo zo. Ɛnee Gyisɛse  ze kɛzi nwolɛ hyia kɛ menli ne kɛde Belemgbunlililɛ ne anwo edwɛkɛ ne la.

18. Gyisɛse subane ne mɔ boni a ɛ nye die nwolɛ kpalɛ a?

¹⁸ Ɛnee Gyisɛse le sonla mɔɔ lɛ ahunlunyele na ɔse anwunvɔne a. Ɛhye ati menli bie mɔ nwunle ye kɛ ɔ ti akunlu le kɛnlɛma na bɛkola bɛbikye ye. Ɛnee ngakula bɔbɔ anye die kɛ bɛkɛhɔ ɔ nwo. (Maake 10:13-16) Ɛnee Gyisɛse ɛnnea sonla nyunlu. Ɔhyile bɛsabowulalɛ nee nzisi. (Mateyu 21:12, 13) Wɔ mekɛ mɔɔ ɛnee bɛmbu mraalɛ na bɛnlɛ ninyɛne dɔɔnwo anwo adenle bɔbɔ la, ɔlile bɛ eni. (Dwɔn 4:9, 27) Ɛnee Gyisɛse bɛlɛ ɔ nwo aze kpalɛ. Mekɛ bie anu, ɔwowole ye ɛzoanvolɛma ne agyakɛ anwo, ɛnee akɛlɛ mɔɔ bɛmbu ye bie la a yɛ gyima ɛhye a.

19. Neazo boni a kile kɛ ɛnee Gyisɛse dwenle awie mɔ ngyianlɛ nwo kpalɛ a?

¹⁹ Ɛnee Gyisɛse dwenle awie mɔ ngyianlɛ nwo kpalɛ. Ɛhye da ali titile, wɔ mekɛ mɔɔ ɔluale Nyamenle sunsum ne azo ɔmanle menli dele kpɔkɛ wɔ nwanwane adenle zo la anu. (Mateyu 14:14) Kɛ neazo la, kokobɛvolɛ bie rale Gyisɛse anwo ɛkɛ ne na  ɔhanle kɛ: “Saa ɔyɛ wɔ ɛhulolɛ a, ɛkola ɛmaa me nwo sa.” Gyisɛse bule ɔ nwo kɛ ɔdaye a ɔle nrenya ɛhye mɔɔ ɛlɛnwu amaneɛ ne la. Gyisɛse nwunle ye anwunvɔne, na ɔvale ɔ sa ɔhanle ye ɔzele kɛ: “Mekulo, ɛ nwo ɛza!” Na nrenya kokobɛvolɛ ne dele kpɔkɛ! (Maake 1:40-42) Asoo ɛbahola wɔayɛ kɛzi zɔhane nrenya ne dele nganeɛ la anwo nvoninli wɔ wɔ adwenle nu ɔ?

20, 21. Kɛzi Gyisɛse yɛle nɔhalɛlilɛ mɔɔ bɛfa bɛtie Nyamenle la anwo neazo ɛ?

²⁰ Gyisɛse yɛle nɔhalɛlilɛ mɔɔ bɛfa bɛtie Nyamenle la anwo neazo kɛnlɛma mɔɔ tɛla biala la. Ɔhɔle zo ɔlile nɔhalɛ ɔmanle ye anwuma Selɛ ne wɔ gyinlabelɛ ngakyile nu mɔɔ dwazotia nee amaneɛnwunlɛ kɔsɔɔti anvane nwolɛ a. Gyisɛse gyinlanle kpundii na ɔlile konim wɔ Seetan sɔnea ne mɔ anu. (Mateyu 4:1-11) Wɔ mekɛ bie anu, Gyisɛse anwo amra bie mɔ anlie ye anli, na bɛhanle bɔbɔ kɛ “Yezɛ.” (Maake 3:21) Noko Gyisɛse ammaa bɛangakyi ye adwenle; ɔhɔle zo ɔyɛle Nyamenle gyima ne. Ɔnvane nwolɛ kɛ bɛyɛle ye aholoba na bɛgolole ɔ nwo la,  Gyisɛse homole ɔ nwo zo, na yeambɔ mɔdenle kɛ ɔkɛyɛ menli mɔɔ dwazo tia ye la bie.—1 Pita 2:21-23.

²¹ Gyisɛse lile nɔhalɛ hɔle ewule nu—ewule mɔɔ yɛ nyane wɔ ye kpɔvolɛma asa nu. (Felepaema 2:8) Suzu mɔɔ dole ye wɔ ye dasanli ngoane mekɛ mɔɔ li awieleɛ la anwo nea. Bɛhyele ye, dasewiama dole ye ɛzonle, ndɛnebuavolɛma mɔɔ ɛnga nɔhalɛ la buale ye fɔlɛ, basabasayɛlɛma golole ɔ nwo, na sogyama yɛle ye amumuyɛ. Mekɛ mɔɔ bɛbɔle ye baka ne anu la, ɔgule ɛnwomenle mɔɔ li awieleɛ, na ɔdeanle nuhua kɛ: “Yewie!” (Dwɔn 19:30) Noko akee, Gyisɛse wule la, ye kenle nsa ne azo ye anwuma Selɛ ne dwazole ye rale ngoane nu kɛ sunsum nu abɔdeɛ. (1 Pita 3:18) Ye kenle 40 anzi, ɔziale ɔhɔle anwuma. Wɔ ɛkɛ ne, “ɔhɔdɛnlanle Nyamenle asa fema zo” na ɔhendɛle kɛ bɛkɛva belemgbunlililɛ tumi ne bɛkɛwula ɔ sa nu.—Hibuluma 10:12, 13.

22. Duzu a Gyisɛse luale nɔhalɛ mɔɔ ɔlile ɔhɔle ewule nu la azo yɛle a?

²² Duzu a Gyisɛse luale nɔhalɛ mɔɔ ɔlile ɔhɔle ewule nu la azo yɛle a? Nɔhalɛ nu, Gyisɛse ewule ne a ɛbuke dahuu ngoane wɔ paladaese azɛlɛ zo, mɔɔ nee Gyihova mɔlebɛbo atiakunlukpɔkɛ ne le ko la anwo adenle ɛmaa yɛ a. Yɛbazuzu kɛzi Gyisɛse ewule ne bamaa ɛhye ayɛ boɛ la anwo wɔ tile ne mɔɔ doa zolɛ la anu.