Pya a bɛɛ gbɛnɛ-edo barasī bu yube nyɔuwe ekɔa kɔ pya nɛɛ aa biiya kpaɛ̄ ziī sa ɔbɛ dɛ̄dɛɛ̄ gbaa bɔŋana. Pya Ekeebee Jɛhova ebiarafii lo egbaɛ̄tɔ̄loo nu pya bɛbɛɛ kɔ ama, kerewo ba naa lɔɛ e’ɛrɛ wa enɔānu. Lokwa ba dap si wa enɔānu, dɛ̄dɛɛ̄ bɔŋanaloo gaa gbaa si wa enɔānu tɛ̄maloo Zoom.

Lokwa ba dap ɛrɛ enɔānu dɛ̄dɛɛ̄ sɔ̄ sa a naa lɔɔga, Eku A Baɛbee ebiira bahtɛ̄ kɔ a lu esu pya kpugi a bee lu etura nyaa Zoom nɛ bɔŋanaloo. Lo ama eyerebah nɛ gbɛnɛ-edo bɔŋanaloo lo ba naale ebee dap ɛrɛ $15-$20 ale eewo esu nyaa lo Zoom. Tua sɔ̄ dɛ̄dɛɛ̄ bɔŋanaloo wee le gaa su lo Zoom a naa lu ekpɛ kpugi loo a daā nu, kerewo, lo aba naa dap nɛ dee kɔ gbɛnɛ-edo nɛɛ a yii lo enɔānu sa ye kpega naa aganage tɛ̄. Dɛ̄dɛɛ̄ bɔŋanaloo a su lo Zoom alu eyaɛ ama muɛ̄ kɔ a waɛ sa ɛrɛnage kpega, e a dap nɛ dee kɔ gbɛnɛ-edo nɛɛ a dap si lo enɔānu aā keekee kɛ̄. Mmɛ ni’ee, nu a yeeloo65,000 bɔŋanaloo ba le nu a eeloo 170 edo gaa su lo Zoom bɔŋanaloo bee yaɛ daānu.

Bɔŋanaloo Kairagi, a le Manado, li North Sulawesi, Indonesia, e ina gaa su lo Zoom bɔŋanaloo bee yaɛ siā enɔānu tɛ̄maloo Zoom. Wuga NɛɛdamHadi Santoso baatɛ̄ kɔ: “Kere pya wuga nɛɛdam le nɛɛwa ba naa aadee para ebigi fon le kɔmputa dapnage si enɔānu tɛ̄maloo lo Zoom ama nyɔɔbee naale ekura kɔ o wee ɛm o bee gbɛnɛkpo sɔ̄, sɔ̄ lo enɔānu lege nyɔɔ sa a fura.”

Ziī nɛɛ kanɛɛ a le bɔŋanaloo Guayacanes Oeste li Guayaquil, Ecuador a kura Lester Jijón,Jr., kɔ: “Nyɔɔbee gbɛnɛ-edo pya i wuga nɛɛdam le nɛɛwa lu kporoa, naale ebee dap waɛ kɔ i bɔŋanaloo a dap yaɛ lo Zoom dɛ̄dɛɛ̄ nɛɛ a le bu bɔŋanaloo edap su siā enɔānu. Mɛ nyɔɔbee lo Zoom bɔŋanaloo yaɛ nɛ dee gbɛnɛ-edo nɛɛa, i dap aadee wee kue pya nɛɛ nua enɔānu bu Zoom sa bɔɔ naa le e’aa i kɔ pio nɛɛ naale edapna yii.”

Ziī nɛɛ kanɛɛ a le bɔŋanaloo Ngwerere North li Lusaka, Zambia, a kura Johnson Mwanza, kɔ: “Gbɛnɛ-edo pya wuga nɛɛdam le nɛɛwa ekɔa kɔ, ‘naale aba bee si enɔānu tɛ̄maloo Zoom doo kɔ i tɔɔ̄ waɛ loo pya i wuga mɛ a doonage kɔ i suā kɔ Jɛhova were i loo sa gaa i kuūdɛɛ̄loo.’”

Kpugi bɔŋanaloo su nyaa lo Zoom na kpugi a bee lu ekɔ a lu esi yeābah nɛ pya nu bugia sira loo. Pya lo kpugi lu dɔɔ̄nu le beenyiɛ lo eyerebah nɛ esiatam zue ue bu yube nyɔuwe. Lu edoo gbɛnɛ-edo lo turanu tɛma donate.pr418.com. Bui yaage loo bui dɔɔ̄nu, lo a yerenage bah nɛ pya nu bugi sira loo bu yube nyɔuwe.—2Pya Kɔrint 8:14.