Biko ta rẹn ame kpahen ọke wa ha ọmọvwerhe.

E vwiẹre mẹ uvuẹn Italy ẹgbukpe 1943. Mẹmẹ rhẹ imizu ehworhare ọrhẹ emẹse ye gbe lele ọsẹ ame rhirhiẹ uvuẹn ibiẹ ọko owu, ọsẹ mẹ ọghwẹrẹ ọrhẹ ikapita. Eri vwiẹre ame i yonirin ame rhẹ ẹga Catholic.

Mesoriẹ wa guọlọ rhiẹ orherẹn?

Ọke mia kamu, oma ọ merhen mẹ mi na kerhọ irherẹn na uvuẹn ishọshi. Ọ merhen mẹ oma mi na kerhọ uvwele aye ọke ame e ruẹ i mass ọrhẹ irueruo erọrọ. Omarana, ni mi vwo ẹhẹn mi ne rhiẹ orherẹn. Ọke mie te ẹgbukpe 13 ne, izu mẹ no firi mẹ rhẹ ibọdiskuru ro mwuegbe emọvwerhe hẹrhẹ iyono re ne rhiẹ orherẹn.

A ha i Baibol na ba yonuo?

Ẹjo. Ọke mia ha ẹgbukpe 15, oyono mẹ owu nọ yẹrẹ mẹ ọbe rọ ta kpahen akpenyerẹn ọrhẹ owian aghwoghwo i Jesu, ni mi se ọbe na hin ọgbọ buebun. Ọke mie te ẹgbukpe 18, ni mi riẹ Rome ye yono uvuẹn isukuru eduado ri pope e suẹn. Mi yono kpahen i Latin, Greek, ikuegbe, akpenyerẹn ihworho, uruemru ihworho, ọrhẹ ẹga. Dedevwo ame e se ekete i Baibol nẹ urhomu sa jeghwai kerhọ isese i Baibol ra haphia i Sọnde, ọrẹn ame yono kpahen i Baibol na-a.

Wẹwẹ yẹ urhomu rẹn isukuru irherẹn na. Ẹrhẹ ọrana o sekpahen owian uyono?

Owian mẹ o sekpahen ọrẹ mi na hẹrote isukuru na. Ọrẹn, mie yono iklasi ezẹko, nọyẹ eri te Second Vatican Council ne.

Mesoriẹ we vwo ẹhẹn eveva kpahen ishọshi na?

Ekwakwa esa yi lẹrhere mẹ vwo ọfiamu. Ishoshi na e vwobọrhọ isuensun oseghe. Ishọshi na o nẹro fughwẹ rẹn ekwakwa ibiobiomu rẹ irherẹn na ọrhẹ otu ishọshi na e ruẹ. Habaye, iyono i Catholic buebun a gba-a. Jerẹ udje, marhẹ Osolobrugwẹ ẹguọlọ ono ru ha oja riẹ ihworho bẹmẹdẹ aye i rhe hwu hin? Habaye, Osolobrugwẹ ọ ghini guọlọ na vwanriẹn ẹrhomo ọgbọ buebun, jeghwai ha itama ba nẹrhomo? *

Me wu ruru?

Rhẹ amioviẹ ro ghwẹ nẹ ikẹro mẹ sa, ni mi nẹrhomo vwe Osolobrugwẹ nọ ha userhumu mẹ. Ni mi ji dẹ Catholic Jerusalem Bible, re fomu rhẹ edjadjẹ i Italy ro vwo ji jiri na, ni mi tuẹn e se yi rhọ. Ọke oru, urhiọke i Sọnde ẹdẹ owu ọke mia ha ewun mi kurhọ riẹ i Mass tan, ehworhare awanva ni rhiẹ isukuru na. Nẹ aye i dje oma ha mẹ taghene aye Iseri Jehova. Ame ni ha emru ọke rọ vrẹn unọke owu ta kpahen i Baibol na, ọrhẹ oborẹ i Baibol na o ta kpahen oborẹ ene ru rhe ẹga urhomẹmro.

Marhẹ oma o ruruo kpahen ẹrhiọ aye?

Imwẹro rẹ aye i vwori ọrhẹ oborẹ aye e ru mẹrẹn ekete i Baibol phẹphẹrẹ uvuẹn i Baibol ọrẹ Catholic, o jeri mẹ omamọ. Ọke oru, Oseri Jehova ọrọrọ re se Mario, nọ yo bru mẹ sa. O vwo erhionrin omamọ, ọye jẹ ohworho ra hẹrosua, o bru mẹ rhiẹ isukuru na me lele mẹ yono ughwọdjọ irhinrin urhiọke i Satọde ephian, sẹ oso ọ rhọ yanghene uvo o nyomẹ.

Me yẹ irherẹn ri hẹrhẹ na i roro kpahen Iseri Jehova re bruo sa na?

Mi ha use rẹn aye nẹ aye homaba uyono ame, ọrẹn o vwo owuọwan usuẹn aye rọ guọlọ yono kpahen i Baibol na-a. Ọrẹn, mẹmẹ a dabu riamerhen uyono na. Nime mie yono ekwakwa ekpokpọ jerẹ, oborẹ ọsoriẹ Osolobrugwẹ ọ ha uphẹn rẹn irueruo ọkon ọrhẹ ojẹriọ, ọnana oborẹ mia guọlọ rhe avwagbarhe.

Ihworho eduado uvuẹn ishọshi na i damoma aye dobọji we je rhe yono kpahen i Baibol na?

Uvuẹn ẹgbukpe 1975, ni mi riẹ Rome ọgbọ buebun ya ta rẹn aye kpahen iroro mẹ. Irherẹn ri koberun ha mẹ na damoma rẹ aye ine wene iroro mẹ, ọrẹn o vwo ọrọ ha i Baibol na ruiruo-o. Obẹtaye, uvuẹn January 9, 1976, ni mi ya ọbe riẹ i Rome ji ta rẹn aye taghene mẹmẹ rhẹ onyẹ i Catholic ghwomara-an. Ẹdẹ eva ri ha kpahiẹn, ni mi tiobọnu owian mẹ uvuẹn isukuru irherẹn na, ni mi ruẹ itreni riẹ uyono Iseri Jehova ọke ọrukaro, ẹdẹ ọrana ẹdẹ omẹvwa aye rẹ Iseri Jehova buebun ri nẹ ukoko sansan rhe a nya. Ekwakwa ephian i vẹnẹ oborẹ mi rheri uvuẹn ẹga mẹ bi! Oseri Jehova owuowu o vwo i Baibol, no ni ọnẹyen ọke ọtẹmro owuowu ọ ha ẹmro ọnẹyen phia.

Me yẹ ekrun ọnọ o roro kpahen orhienbro ọnọ?

Buebun aye i kparehaso mẹ omamọ. Ọrẹn, ni mi ma mẹrẹnvwrurhe taghene omizu mẹ ọhworhare owu o ji lele Iseri Jehova yono uvuẹn i Lombardy, uvwrotọre rọ ha uvuẹn Italy. Ni mi nyarhẹn ya mẹriẹn, Iseri Jehova re rhirhiẹ avwaye ni ha userhumu mẹ guọlọ owian ọrhẹ ekete mi ne rhirhiẹ. Ọke oru uvuẹn ẹgbukpe ọrana, ni mi bromarhame rhie owuọwan usuẹn Iseri Jehova.

Wu vioja owuorowu?

Ẹjo, kakaka! Vwana, mi tu rhe taghene mi tikẹrẹ Osolobrugwẹ ne, nime oborẹ mie yono kpahiẹn a bọnriẹn kpahen i Baibol na, orhiẹ uyono ituakpọ. Vwana, mi na sabu fiudugbere yono awọrọ rhẹ imwẹro ọgbogbanhon.