1-4. Ngera uchul me a Paulus a mocha Jerusalem, e ngera mengiil er ngii er isei?

 A PAULUS me a Lukas er a letobed er a Miletus e ngkmal mle mekngit a rengrir tir me a remechuodel er a Efesus. Ngkmal diak lebeot er a Paulus me a Lukas a mo kebii er a remechuodel er a Efesus, el kmal mla mo betik er a rengrir! Tirka el teru el missionari a dilechor er a chelsel a diall. Ngkltmokl a deterir el kirel omerael. Te dirrek el lolab a ngeso el mora remechebuul el Kristiano er a Judea e kmal sorir el ngmai aika el sengk el mo er tir.

² A eolt a dokouii a iersel a diall, me ngtuobed er a olekerodel. Tirka el teru el odam me a reteuid el odam el dirrek el lobengterir omes a mederir a rudam el ngar er a beluu el kmal mekngit a rengrir. (Rel. 20:4, 14, 15) Te melemolem el omiroi chimorir er tir el dimerekmo lengemed el mo diak lesterir.

³ A Paulus a uluureor lobengterir a remechuodel er a Efesus el bekord el edei el rak. Engdi chelechang ngoeak a ulekrolel chedaol reng e ngmerola el mora Jerusalem. Ngika ngar ngii er a uldesuel a tekoi el mengiil er ngii er a Jerusalem. A uchei e ngdilu er tirka el mechuodel el kmo: “Ak rengodel ra Reng el mora Jerusalem, e diak kudengei el kmo ngeral tekoi chosiueklak er isei; e ngdi Chedaol Reng cholecholt er ngak ra ikel bek el mats el kmo, ‘A kelebus ma ringel a mengiil er kau.’” (Rel. 20:22, 23, BT) Me alta Paulus a medengelii a ringel el mengiil, engdi ng “rengodel ra Reng” me ng feel el kmo ngkirel loltirakl er a ulekrolel a chedaol reng e mora Jerusalem engdi ngdirrek el kmal kongei el mong. Ngdiak el soal mo chuarm engdi sel kot el klou a ultutelel er ngii a meruul er a soal a Dios.

⁴ Kau me nguaisei a feeling er kau? Sel detibir a klengar er kid el mora Jehovah e kede promise er a Jehovah el kmo kede nguu a soal el mo kot el klou a ultutelel el tekoi er a klengar er kid. Ngmo uchul a klungioled sel dorriter er a kerebai er a apostol Paulus.

 5. A Paulus me a rubengkel te uleak ker el mora Tyre?

⁵ A diall el lengilasech er ngii a Paulus me a rubengkel a ulemekall el “di melemalt.” Tia belkul a kmo ngmle ungil a eolt me ngdi mle mereched el merael el mora Kos er uriul er tia el osisiu el sils. (Rel. 21:1) A diall a mla er tiang el mo tutau e te merolang el mora Rodes e mora Patara. Ngar er a Patara el mlara dimes er a Asia Minor e tirka el rudam a ngilasech er a diall el di mle melemalt el mora Tyre el ngar er a Fenisia. Ngar omerollir el mong e te mlo engelakl er a “Siprus.” (Rel. 21:3) Ngera uchul me a Lukas el milluches er a babier er a Rellir a mesaod el kmo te mlo engelakl er a Siprus?

 6. (a) Ngera me a Paulus er a lesa Siprus e nglocha kmal silsichii? (b) Sel molatk e molebedebek a rolel e a Jehovah mla omekngeltengat e olengeseu er kau, e ngera ke mo mtebengii?

⁶ A Paulus ke le lullutk er a Siprus e louchais er tir a dilubech el  mo er ngii er isei. Ngar er a kot el lomerollel el missionari er a bekord el etiu el rak er uchei, e ngii me a Barnabas me a Johanes Markus a mle meet er a Elimas el chad er olai el ulemtok er a berkel a klumech. (Rel. 13:4-12) A Paulus er a lesa tia el iungs e nglocha mlo melatk a tekoi el dilubech er a lengar isei el ngii ulterekokl el silsichii el kirel aike el merael el mei. Ngdirrek el kmal ungil kired sel dolatk e dolebedebek a rolel e a Dios a mla omekngeltengat er kid e ngosukid el loutekangel a ringel. Tia sebechel ngosukid el mo feel el ua David el dilu el kmo: “A ungil chad a chuarm er a betok el chelebuul, e ngdi [Jehovah] osebelii er ngii el rokui.”​—Psa. 34:19.

 7. Ngera te mirruul er ngii tirka el odam er a lebora Tyre?

⁷ A Paulus a mle medengei el kmo ngkmal klou a ultutelel a lobengterir a rudam me a rudos er ngii e kmal mle soal lobengterir. Me a Lukas a meluches el kirir er a lebora Tyre el kmo: “Aki ulsiik er a redisaiplo e miltik er tir.” (Rel. 21:4, NW) Tirka el odam a mle medengei el kmo te mla er ngii a Rekristiano er a Tyre, me te mlo osiik er tir e ulterekokl el kiliei el lobengterir. A ta er a kot el klou el klengeltengat el denguu lekid el loba klemerang a ngii di el ker de bo er ngii e ngsebeched el metik er a rudam er kid el Kristiano el mo omtechakl er kid. Tirke el betik a rengrir er a Dios e ngar er a mera el omengull a ngar ngii a resechelirir el meliuekl er a beluulechad el rokir.

 8. Ngngera belkul a Rellir 21:4 (NW)?

⁸ A Lukas a mesaod aike el euid el klebesei er a lengar er a Tyre el kmo, ngmla er ngii a tekoi el dilubech el kora mlo rrau a rengrir er ngii er a uchelel. Ngdilu el kmo: “Ngoeak a chedaol reng e [a rudam er a Tyre a] mlo betok lolekebai er a Paulus me lak lebora Jerusalem.” (Rel. 21:4, NW) A Jehovah ngmla ngodechii a uldesuel? Ngika ngmocha omekrael er a Paulus me lak lebora Jerusalem? Ngdiak. A chedaol reng ulechotii el kmo a Paulus a bo lomekcharm er ngii er a Jerusalem, ngdiak el kirel mengeroid er ngii er a mats. Ngoeak a chedaol reng e a rudam er a Tyre a mlo mtebengii el kmo ngmo duubech a ringel el mora Paulus er a Jerusalem. Me te mle suebek a rengrir el kirel a Paulus a uchul me te millekoi er ngii me lak lebong. Ngsebeched el understand er a uchul me ngmle sorir el protect er a Paulus. Me nguaisei a Paulus a rirellii er a rengul a mo meruul er a soal a Jehovah me ngmillemolem er omerollel el mora Jerusalem.​—Rel. 21:12.

9, 10. (a) A Paulus er a lorrenges er a rudam er a Tyre e ngera nglocha mlo melatk er ngii? (b) Ngera el uldasu a lobang a rebetok er chelecha el taem, e mekera kmal ngodech er a tekingel a Jesus?

 ⁹ A Paulus er a lorrenges er tirka el odam e nglocha mlo melatk el kmo a Jesus a dirrek el mlo chobengelii osisiu el teletael. A Jesus a dilu er a redisaiplo er ngii el kmo ngmora Jerusalem, e mo chuarm er a betok el ringel e te mekodir. A Petrus el di uluusbech er a rengul a dilu er a Jesus el kmo: “Rubak, lak le uaisei, ngdiak le kirel mer kau a ikal tekoi!” Me a Jesus a dilu er ngii el kmo: “Satan, bo rullek! Kau cholibesongel er ngak; le kau a diak momdasu a tekoi ra Dios, e bai omdasu a tekoi rar chad.” (Mt. 16:21-23, BT) A Jesus a rirellii er a rengul a mo meruul er a soal a Dios e tongetengii a klengar er ngii. A Paulus me ngdirrek el mle feel el uaisei. A rudam er a Tyre a ua apostol Petrus el mle ungil a moktek er tir engdi te dimlak lutebengii a soal Dios.

¹⁰ A rebetok el chad er chelecha el taem a sorir tiakid el uldasu el kmo, kede di meruul er sel kot el beot. A rechad a sorir a klechelid el diak longerechir a betok er tir. Me nguaisei engdi a Jesus a dilu er kid el mo meruul er a kmal ngodech er tia el tiang. Ngdilu er a redisaiplo er ngii el kmo: “A lengar ngii a chad el soal lokiuellek, e lechitii a klechad er ngii e lecholngii a teluo el kerrekar er ngii e lolemolem loltirakl er ngak.” (Mt. 16:24, NW) Ngolechotel a llomeserreng e dirrek el melemalt a bo doltirakl er a Jesus, engdi ngdiak lebeot el rael.

11. Te milekerang a redisaiplo er a Tyre e ochotii a bltkil a rengrir me a support er tir el mora Paulus?

¹¹ Ngmocha temel a Paulus, Lukas, me a rubengterir el melemolem er a omerollir. Omesodel a ngederir ochotii el kmo a rudam er a Tyre a kmal mle betik a rengrir er a Paulus e mle support er ngii er a omesiungel. A resechal, redil, me a rengalek a ulebengkel a Paulus me a rubengkel el mora kederang. Te rokui el mlo outubuach e dmak el meluluuch e mlo kasmesumech. Te mlo merek e a Paulus, Lukas, me a rubengterir a ngilasech er a lmuut el ta er a bos el mora Ptolemais, e te metik er a rudam e kiliei el lobengterir el ta el sils.​—Rel. 21:5-7.

12, 13. (a) Ngera el record er a blakerreng a lulebang a Filip? (b) Ngmekera Filip e ungil kerebai el kirir a Rekristiano el chedam er chelecha el taem?

 ¹² A Lukas a melemolem el kmo, a Paulus me a rubengkel a millemolem er omerolir el mora Sesarea. Ngar isei e te “mlo kiei el obengkel a Filip el ngikel omerk er a Ebangkelio.” a (Rel. 21:8) Ngulterekokl el kmal mle ungil a rengrir el mesa Filip. Ngbekord el 20 el rak er uchei er a lengar er a Jerusalem a Filip, e a rechapostol a tiltkii el mo olengeseu el merous a kall er a kmal dirk milteketek el ongdibel er isei. A Filip a mla mo kemanget el taem el leblak a rengul lomerk er a klumech. A odechelakl er a bo luchul me a redisaiplo milterakl el mo er ker me a ker, e a Filip a mlora Samaria e ulemuchel el lomerk. Uriul e ngulemerk el mora eunuk er a Ethiopia e tochelbii. (Rel. 6:2-6; 8:4-13, 26-38) Ngmera el ungil record er a blakerreng!

¹³ A Filip a dimlak loridii a blakerreng er ngii er a berkel a klumech. Tiakid el taem el bla bo lekiei er a Sesarea e ngdirk mle blak a rengul el lomerk e le Lukas a milsaod er ngii el kmo “ngikel omerk er a Ebangkelio.” Kede dirrek el suubii el kmo ngmla mo er ngii a reteua el ngelekel el redil el ulemlaoch el belkul a kmo te ultirakl er a kerebil a demerir. b (Rel. 21:9, BT) Me a Filip ulterekokl el mle meringel loureor el lolengeseu er a telungalek er ngii el mo betik a rengul er a Jehovah e mesiou er ngii. A Rekristiano el chedam er chelecha el taem a ungil loltirakl er a kerebil a Filip. Te oked er a ureor er a berkel a klumech e olengeseu er a rengelekir el mo betik a rengrir er a ureor er a berkel a klumech.

14. Ngera ulterekokl el dilubech er a bo loldingel er a rudam me a rudos er ngii a Paulus, e ngera el osisiu el techall a ngar ngii er chelecha el taem?

 ¹⁴ Me a bek el beluu el leblo er ngii a Paulus e ngulsiik er a rekldemel er a klemerang e milengoit a taem el lobengterir. A rudam er aika el beluu a ulterekokl el kmal mle dmeu a rengrir e sorir el lomtechakl er ngii me a rubengkel. Aika el odngelel a ulterekokl el mlo uchul a ‘klasisiich.’ (Rom 1:11, 12, BT) Tia el osisiu el techall a ngar ngii er chelecha el taem. Alta blim a diak lungil uangerang me a lechub e ngdi simple, ngkmal mo uchul a klou el omelisiich sel momtechakl er a circuit overseer me a bechil.​—Rom 12:13.

15, 16. Ngera el klumech a lulebang a Akabus, e ngera ngrirellii el mo er tirke el rirengesii?

¹⁵ A Paulus er a lekiei lobengkel a Filip e ngmle duum a Akabus. Tirke el mle kldibel er a blil a Filip a mle medengei el kmo a Akabus a profet. Ngika ngike el ulemlaoch el kirel a meringel el bosech er a kall el mlo er ngii er a temel omengederederel a Klaudius. (Rel. 11:27, 28) Te locha mlo melatk el kmo: ‘Ngera uchul me a Akabus a mla mei? Ngera el klumech a lobang?’ Te kmal mle blak a rengrir el lomes er ngii. Ngngiluu a olekesengelel a Paulus, el ngii a kemanget el mamed el sebeched el lotuu a udoud me a lmuut el bebil er a klalo er a chelsel, el nguu el di ngii el remenged ochil me a chimal. E mocha mengedecheduch el kmal oberaod a tekingel: “A Chedaol Reng a melekoi el kmo: Ngikel ouelekesongel er tiang a mo ua isei el mo merenged er a re chad er a Judea el ngar a Jerusalem, e sola e tir a nguu el mo mesterir a re Chisentael.”​—Rel. 21:11.

¹⁶ A ulaoch a mera el ulterekeklii el kmo a Paulus a mora Jerusalem. Ngdirrek el lochotii el kmo a Rechijudea er isei a mo nguu el mesterir a “re Chisentael.” A rechad el rirengesii tiang a kmal mlo bekikl. A Lukas a kmo: “Ser a kim renges ngiil tekoi, e kemam me tirkel bebil er a re chad a kmal ullengit er a Paulus me lak le bor a Jerusalem. Ngdi ngii a dilu el kmo, ‘Ngera me kom ua isei el lmangel el mengam er a renguk? Ngak a diak di kkldmokl el mo merenged er a Jerusalem e le merekong, ak dirrek el kldmokl el mo mad er sei el kirel a Rubak el Jesus.’”​—Rel. 21:12, 13.

17, 18. Ngmilekera Paulus e ochotii el kmo ngmla rullii er a rengul el mo meruul er a soal a Jehovah, me a rudam te milekerang?

¹⁷ Kam imagine er tir. Tirka el odam el luldimukl er a Lukas a mengeluch er a Paulus me lak lebora Jerusalem. A rebebil er tir a lmangel. Me a Paulus a mesa el kmo te kmal betik a rengrir er ngii e bekikl el kirel. Me ngdula er tir el kmo “kom . . . mengam er a renguk.”  Me nguaisei engdi ngika mla meruul a rengul. Ngua lurruul er ngii el mora rudam er a Tyre, ngdiak bo lebechei a ongterir me a lengelir me leterebengii. Ngbai smodii el mo er tir er a uchul me ngkirel el merael. Ngika ulechotii a klou el blekeu! Ngua Jesus, a Paulus a rirellii er a rengul a mora Jerusalem. (Heb. 12:2) A Paulus a dimlak el soal el mad, engdi lsekum tiang a mo duubech e ngomes er ngii el chetengakl el techall el mad el ta er a disaiplo er a Kristus Jesus.

¹⁸ Me te milekerang a rudam? Te mle respect er a omelilt er ngii. Kede menguiu el kmo: “Me a lekea el sebecham el simngii a uldesuel e aki mlo stob e dilu ku el kmo, ‘Sel soal a Jehovah bo letaut.’” (Rel. 21:14, NW) Tirke el millasem el olekebai er a Paulus me lak lebora Jerusalem a dimlak lolemolem er a uldesuir. Te rirengesii a Paulus e kilengei a tekingel. Te dirrek el mlo mtebengii el kmo ngkirir el kongei er a soal a Jehovah el kirel a Paulus, mo lmuut me a lemlak el sorir ngii el tekoi. A Paulus a mla mechelii a omerollel el ulebengelel ngii el omerael e ngmo okodall. Ngmo beot el kirel a Paulus a lsekum tirke el betik a rengrir er ngii a diak lolasem el simesmengii.

19. Ngera el klou a ultutelel el tekoi a desuubii er a tekoi el dilubech el mora Paulus?

 ¹⁹ Kede suubii er a dilubech el mora Paulus a kmal klou a ultutelel el tekoi: Ngkmal diak bo dolmesim er a rebebil el kongei el ngar ngii a loriid el mo mesiou er a Dios. Ngsebeched loltaut er tiang er a chelsel a betok el blekeradel, ngdiak di el aike el melutk er a klengar me a kodall. El ua tiang, a rebetok el Kristiano loungalek a meringel er tir omes er a rengelekir el tuobed er a blai e mo mesiou er a Jehovah er a cheroid el beluu, engdi ngkmal diak bo longitechut er tir. A Phyllis el kiei er a England, a melatk er sel taem el di ta el ngelekel el redil a mirrael el mo missionari er a Africa. Ngmelekoi el kmo: “Ngmera el mle meringel el taem. Ngkmal mo mekngit a renguk sel kudengei el kmo ngmo kiei er cheroid. Ngmekngit a renguk engdi osisiu el taem a kmal proud. Ngmle betok el taem el kululuuch el kirel. Engdi ngmle omelilt er ngii e kmal dirkak a ta el kulasem el meruul er ngii el mo ngodechii a uldesuel. Ak mle blechoel lolsisechakl er ngii el kmo lenguu a Renged el mo kot! Ngmla mesiou a betok el ngodech el beluu er aika el mereko el 30 el rak e bek el sils kuureng a sulel a Jehovah el kirel a blakerreng er ngii.” Ngmera el lungil sel dolisiich er tirke el kongei el ngar ngii a bo loriid me bo lsebechir el mesiou er a Jehovah!

20, 21. Ngera ochotii el kmo a Paulus a mle soal lobengterir a rudam er ngii, e ngera uchul me ngmle soal lobengterir a rechad el osisiu a klaumerang er tir me ngii?

²⁰ Me a Paulus a kiltmeklii e millemolem er a omerollel ngii me a rudam lulebengkel, el tir ulechotii el kmo te kmal loba rengrir el rokir el support er ngii. Ngar tia el rokir el omerollir e a Paulus me a rubengkel ulsiik a techall el mo obengterir a rudam me a rudos er tir el Kristiano. Sera lebora Tyre e te miltik er a redisaiplo e kiliei lobengterir el euid el klebesei. Ngar er a Ptolemais e te uluuetkeu er a rudam me a rudos er tir e milengoit er a ta el sils el lobengterir. Ngar er a Sesarea e te kiliei el betok el klebesei lobengkel a Filip. Ongingil e a rebebil er a redisaiplo er a Sesarea ulebengterir el mora Jerusalem me te mlo kiei lobengkel a Mnason, el ta er a dimla mo oumerang. E sera lebocha er a Jerusalem e a Lukas a kmo “ar udam a dileu a rengrir el ngoikemam.”​—Rel. 21:17, BT.

²¹ Me ngbleketakl el kmo a Paulus a mle soal lobengterir a rechad el mle osisiu a klaumerang er tir me ngii. Ngngilai omelisiich er a rudam me a rudos er ngii, el di uaikid er chelecha el taem. Aika el omelisiich a ulterekokl el silsichii a Paulus el loutekangel a odechelakl er a rumtok el kmal mle kesib a rengrir e sorir el lomekoad er ngii.