CIBALO 24
“Koba Acamba!”
Ba Juda bakanza kumujaya Paulo, waliiminina kuli Felike
Kweelana a Milimo 23:11–24:27
1, 2. Nkaambo nzi ncatagambidwe Paulo akaambo kakupenzyegwa nkwaaswaanganya mu Jerusalemu?
NAAMANA kuvwunwa kunkamu yabantu iinyemede mu Jerusalemu, Paulo lino uli muntolongo alimwi. Mwaapostolo ooyu musungu kunyina naagambwa akaambo kakupenzyegwa mu Jerusalemu nkaambo wakaambilwa limwi kuti “ntolongo amapenzi” zyakali kumulindila mumunzi ooyu. (Mil. 20:22, 23) Nokuba kuti Paulo tanaakazyi zyoonse izyakali kuyoomucitikila, wakalizyi kuti wakali kuyoozumanana kupenga akaambo kazina lya Jesu.—Mil. 9:16.
2 Nobaba Banakristo bamwi ibakali basinsimi, bakamucenjezya Paulo kuti wakali kuyakwaangwa alimwi akwaabwa “mumaanza aabantu bamasi.” (Mil. 21:4, 10, 11) Caino-ino, ba Juda bakali kuyanda kumujaya, alimwi nokwakainda buyo ciindi cisyoonto, cakalibonya mbuli kuti Paulo “inga baide kumukwamuna” bamu Nkuta Mpati Yaba Juda ciindi nobakali kukazyanya akaambo kazintu nzyaakali kwaamba. Lino mwaapostolo ooyu mwaange, uli mumaanza abasikalumamba bana Roma alimwi kuli twaambo atumwi tunji twacilangila kutamikizyigwa. (Mil. 21:31; 23:10) Masimpe kuti mwaapostolo Paulo uyandika kukulwaizyigwa!
3. Ino kuyumizyigwa kwesu tukujana kuli kutegwa tuzumanane amulimo wakukambauka?
3 Muciindi camazuba aano aamamanino, tulizyi kuti “boonse aabo bayanda kupona buumi bwakubelekela Leza cakulyaaba mukuyanzana a Kristo Jesu abalo bayoopenzyegwa.” (2 Tim. 3:12) Ciindi aciindi tuyandika kukulwaizyigwa kutegwa tuzumanane amulimo wakukambauka. Eelo kaka tulalumba akaambo kamajwi aayumya-yumya ngotutambula aciindi ceelede kwiinda mumiswaangano alimwi azyakumwaya zibambwa ‘amuzike uusyomeka alimwi uucenjede’! (Mt. 24:45) Jehova wakatusyomezya kale kuti kunyina sinkondo wamakani mabotu uuyoozwidilila. Kunyina nobayoocikonzya kunyonyoona babelesi bakwe boonse naa kuulesya mulimo wakukambauka. (Is. 54:17; Jer. 1:19) Pele, ino mbuti kujatikizya mwaapostolo Paulo? Sena kuli naakayumizyigwa kutegwa azumanane kupa bumboni cakulomya nokuba kuti wakali kukazyigwa? Ikuti naa mboobo, ino wakayumizyigwa buti, alimwi ino wakacita buti ciindi naakayumizyigwa?
‘Ikumvwana Akukonka’ Kwabo Kwaalilwa (Milimo 23:11-34)
4, 5. Ino Paulo wakayumizyigwa buti, alimwi nkaambo nzi kuyumizyigwa ooku ncokwakali aciindi ceelede?
4 Mwaapostolo Paulo wakayumizyigwa kapati mubusiku bwakatobela kuzwa naakavwunwa ku Nkuta Mpati Yaba Juda. Bbaibbele lyaamba kuti: “Mwami wakaima munsi lyakwe akwaamba kuti: ‘Koba acamba! Nkaambo mbubonya mbooli kupa bumboni cakulomya mu Jerusalemu, weelede kuyoopa bumboni mbubonya akwalo ku Roma.’” (Mil. 23:11) Majwi aakulwaizya ngaakaamba Jesu akamugwasya Paulo kubona kuti wakali kuyoovwunwa. Wakazyiba kuti wakali kuyoosika buyo kabotu ku Roma akuba acoolwe cakupa bumboni kujatikizya Jesu.
“Baalumi Babo Ibainda Ku 40 Balimuyubilide.”—Milimo 23:21
5 Paulo wakayumizyigwa aciindi ceelede. Buzuba bwakatobela, ba Juda bainda ku 40 “bakamvwana akukonka kuti tiibakali kuyoolya nokuba kunywa cintu cili coonse mane do bakamujaye Paulo.” Ooku ‘kumvwana akukonka’ nkobakacita kwakatondezya bwini mbobakali kuyandisya kumujaya mwaapostolo ooyu. Bakali kusyoma kuti kwakali kuyooba kusinganizyigwa ikuti baalilwa kuzuzikizya makanze aabo. (Mil. 23:12-15) Basilutwe babapaizi abaalu, bakazuminizya kuti bamulete Paulo alimwi ku Nkuta Mpati Yaba Juda kutegwa cibe mbuli kuti bakali kuyanda kuulanga-langa cakulomya mulandu wakwe. Pele, basikuyanda kumujaya Paulo bakali kuyoomuyubilila munzila kutegwa bamuume akumujaya.
6. Ino mbuti makanze aakujaya Paulo mbwaakayubununwa, alimwi nciiyo nzi cibotu mazuba aano bakubusi ncobakonzya kwiiya kucibalo eeci?
6 Nokuba boobo, mujwa wa Paulo musankwa wakaamvwa makanze aabo, aboobo wakaunka kuyoomwaambila Paulo. Kumane, Paulo wakatuma mulombwana ooyu kumweendelezi wabasikalumamba muna Roma wazina lya Kilaudiyo Lusiya kutegwa akaambe nzyaakamvwa. (Mil. 23:16-22) Masimpe kuti Jehova ulabayanda bakubusi ibali mbuli mujwa wa Paulo ooyu uutaambidwe zina, balo ibabikka kumbele nzyobayandika bantu ba Leza kwiinda nzyobayanda balo alimwi ibacita kufwumbwa ncobakonzya kutegwa basumpule ziyandika zya Bwami.
7, 8. Mbubambe nzi Kilaudiyo Lusiya mbwaakabamba kutegwa amukwabilile Paulo?
7 Mbwaakamvwida buyo kuti bakanza kumujaya Paulo, cakufwambaana Kilaudiyo Lusiya iwakali kulanganya basikalumamba bali 1,000, wakalailila kuti kubambwe nkamu yabalindizi basika ku 470 ibakali kubikkilizya basikalumamba, basimasumo alimwi abasimabbiza kutegwa balibambile kuzwa mu Jerusalemu masiku aayo antoomwe a Paulo akumukwabilila ciindi naakali kuunka ku Kaisareya. Okuya wakali kuyoolanganizyigwa a Mweendelezi Felike. a Munzi wa Kaisareya wakajisi buyo ba Juda basyoonto nokuba kuti wakali munzi iwakali kubelesyegwa abana Roma kweendelezya Judaya. Bunji bwabantu mumunzi ooyu bakali Bamasi. Mbozyakali kucitwa cabulondo zintu mumunzi ooyu, kwakaliindene kapati abukkale ibwakali mu Jerusalemu, mwalo bantu banji mobakali kusalaulana kapati akaambo kakwiindana bukombi alimwi bakali kutalisya manyongwe ziindi zinji. Kaisareya alimwi wakali munzi mupati wabasikalumamba bana Roma ibakali kubelekela mu Judaya.
8 Kutegwa abe masimpe kuti wautobela mulawo wabana Roma, Lusiya wakatuma lugwalo kuli Felike kupandulula kaambo mbokakabede. Wakaamba kuti wakamuvwuna Paulo kuba Juda nobakali “kuyanda kumujaya” ciindi naakazyiba kuti wakali muna Roma. Lusiya wakapandulula kuti walo tanaakamujana amulandu Paulo “iweelede kumupa kujaigwa naa kwaangwa,” pele akaambo kakuti bakali kuyanda kumujaya, wakali kumutuma kulinguwe kutegwa mbwali mweendelezi, amuswiilile alimwi akukakosola kaambo.—Mil. 23:25-30.
9. (a) Ino lwaanguluko Paulo ndwaakajisi lwakuba sicisi muna Roma lwakanyonganizyigwa buti? (b) Nkaambo nzi ncotweelede kulubelesya lwaanguluko ndotujisi lwakuba basicisi?
9 Sena zyakali zyamasimpe Lusiya nzyaakalemba? Kutali zyoonse. Kweelede kuti wakali kuyanda kulibotezya kumweendelezi. Kaambo kakapa kuti amuvwune Paulo tiikakali kakuti wakali muna Roma pe. Kuyungizya waawo, Lusiya tanaakaamba kuti wakalailide kuti Paulo “aangwe nketani zyobilo” alimwi akuti ‘wakeelede kubuzyigwa kwiinda mukumukwibbaula.’ (Mil. 21:30-34; 22:24-29) Aboobo Lusiya wakatyola mulawo wakutalemeka lwaanguluko Paulo ndwaakajisi lwakuba sicisi muna Roma. Mazuba aano, Saatani ubelesya basikuciindizya kuyandisya bukombi ibakazya, kupa kuti kupenzyegwa kwiindile alimwi balakonzya kusoleka kupa kuti lwaanguluko ndotujisi lwakukomba Leza lumane. Pele mbubwenya mbuli Paulo, bantu ba Leza babelesya lwaanguluko ndobajisi lwakuba basicisi kulomba lugwasyo alukwabililo kweelana amulawo.
“Ndilaangulukide Kuliiminina” (Milimo 23:35–24:21)
10. Milandu nzi mipati njaakatamikizyigwa Paulo?
10 Ku Kaisareya, Paulo wakali ‘kulindililwa muŋanda yabwami ya Heroda’ kutegwa basikumutamikizya basike kuzwa ku Jerusalemu. (Mil. 23:35) Nokwakainda mazuba osanwe, bakasika. Kwakali Mupaizi Mupati Hananiya, similawo wazina lya Tertulo alimwi abaalu. Tertulo wakasaanguna kumulumbaizya Felike kuzintu nzyaakali kucitila ba Juda, cakuupaupa ameso kutegwa amuyande. b Kumane, kapandulula mulandu ngwaakajisi, Tertulo wakaamba Paulo kuti “ngusikubusya manyongwe alimwi upa bantu kubukila cisi akati kaba Juda boonse munyika yoonse alimwi ngomusololi wankamu yabukombi yabana Nazareta. Alimwi wakasola kusofwaazya tempele, aboobo twakamujata.” Ba Juda mbaakali limwi “abalo bakanjilila kumulwana amajwi, kabazuminizya kuti zintu eezyi zyakali zyamasimpe.” (Mil. 24:5, 6, 9) Kubukila cisi, kuba musololi wakakamu kabyaabi kabazangi alimwi akusofwaazya tempele, yakali milandu mipati yalo iyakali kukonzya kupa kuti umwi ajaigwe.
11, 12. Ino Paulo wakaakazya buti makani ngobakamutamikizya?
11 Kumane Paulo wakazumizyigwa kwaambaula. Wakatalika kwiinda mukubelesya majwi aakuti, “Ndilaangulukide kuliiminina.” Wakaakaka makani ngobakali kumutamikizya. Mwaapostolo ooyu kunyina naakalisofwaazya tempele naa kusola kupa bantu kubukila cisi. Wakapandulula kuti ‘kwakaindide myaka minji’ kuzwa ciindi naakasikide ku Jerusalemu alimwi akuti wakasikide buyo kutegwa alete “zipego zyaluse”—nkokuti zyakusanga izyakeelede kupegwa ku Banakristo balo ibakali bacete akaambo kanzala alimwi akupenzyegwa. Paulo wakaliiminina kuti, katananjila mutempele, ‘wakasalazyigwa kweelana amulawo’ alimwi akuti wakajisi manjezyeezya aasalala “kuli Leza akubantu.”—Mil. 24:10-13, 16-18.
12 Nokuba boobo, Paulo wakazumina kuti wakali kucita mulimo uusetekene kuli Leza wabamausyi “kweelana anzila eeyo njibaamba kuti ‘nkamu.’” Pele wakaamba kuti wakali kuzisyoma “zintu zyoonse zyaambidwe mu Mulawo.” Alimwi mbubwenya mbuli basikumutamikizya, wakalijisi bulangizi bwakuti kuyooba “bubuke bwabantu baluleme abataluleme.” Kumane Paulo wakabagama basikumutamikizya kuti balete bumboni naakati: “Ibaalumi aaba mbabonya baliko abaambe beni mulandu ngobakandijanina nindakaimvwi kumbele lya Nkuta Mpati Yaba Juda, kunze lyakaambo komwe aaka nkindakoompolola nindakaimvwi akati kabo kuti: ‘Ndilabetekwa aano sunu kumbele lyanu akaambo kabulangizi bwakubuka kwabafwu!’”—Mil. 24:14, 15, 20, 21.
13-15. Nkaambo nzi ncotukonzya kwaamba kuti Paulo wakatusiila cikozyanyo cibotu cakukambauka kubeendelezi cabusicamba?
13 Paulo wakatusiila cikozyanyo cibotu ncotweelede kutobela mazuba aano ikuti twatolwa kumbele lyabeendelezi akaambo kabukombi bwesu alimwi akutamikizyigwa makani aakubeja mbuli aakuba basikunyonganya, basikubukila cisi naa basikuzulilwa ‘mukakamu kabyaabi kabazangi.’ Paulo tanaakasola kupa kuti ayandwe amweendelezi kwiinda mukumulumbaizya mbuli bwakacita Tertulo. Paulo wakazumanana kukkazika moyo alimwi akutondezya bulemu. Cabupampu, wakaamba twaambo twamasimpe alimwi munzila iilimvwisya. Paulo wakaamba kuti “ba Juda bamwi bazwa kucooko ca Asiya” ibakamutamikizya kuti wasofwaazya tempele, tiibakaliko abusena aawo alimwi akuti wakeelede kubonana ambabo kutegwa alimvwide buya ntongola matwi kutamikizya kwabo.—Mil. 24:18, 19.
14 Ciinda kukkomanisya ncakuti, Paulo kunyina naakaleka kupa bumboni kujatikizya zintu nzyaakali kusyoma. Cabusicamba, mwaapostolo wakainduluka kwaamba lusyomo ndwaakajisi mububuke, makani aalo aakaleta manyongwe ciindi naakali mu Nkuta Mpati Yaba Juda. (Mil. 23:6-10) Ciindi naakali kuliiminina, Paulo wakakankaizya kapati kujatikizya bulangizi bwabubuke. Nkaambo nzi? Akaambo kakuti Paulo wakali kukambauka kasimpe kajatikizya Jesu alimwi akubusyigwa kwakwe kuzwa kubafwu—cintu basikumutamikizya ncobakali kukazya. (Mil. 26:6-8, 22, 23) Mubwini, akali makani aabubuke, ikwaambisya makani aakusyoma Jesu alimwi akubusyigwa kwakwe aakapa kuti kube manyongwe.
15 Mbubwenya mbuli Paulo, tulakonzya kukambauka cabusicamba alimwi tulakonzya kuyumizyigwa amajwi aa Jesu ngaakaambila basikwiiya bakwe aakuti: “Muyoosulwa abantu boonse akaambo kazina lyangu. Pele ooyo uuliyumya kusikila kumamanino uyoofwutulwa.” Sena tweelede kulibilika kujatikizya nzyotweelede kwaamba? Peepe, nkaambo Jesu wakasyomezya kuti: “Nobamutola kunkuta, mutalibiliki kuti muyakwaamba nzi; pele kufwumbwa ncomuyoopegwa aciindi eeco, amukaambe, nkaambo tamuli ndinywe mwaambaula pe, pele muuya uusalala nguwaambaula.”—Mk. 13:9-13.
“Felike Wakayoowa” (Milimo 24:22-27)
16, 17. (a) Ino Felike wakacita buti kumulandu ngwaakatamikizyigwa Paulo? (b) Ncinzi cakapa kuti Felike ayoowe, alimwi nkaambo nzi ikakapa kuti azumanane kubonana a Paulo?
16 Eeci tiicakali ciindi cakusaanguna Mweendelezi Felike naakamvwa zintu nzyobasyoma Banakristo. Bbaibbele lyaamba kuti: “Felike wakalaazyi kabotu makani aajatikizya Nzila eeyi [eeli ndebbala ilyakali kubelesyegwa kwaamba basikutobela Kristo kabatanatalika kwiitwa kuti Banakristo], wakawiimika mulandu akwaamba kuti: ‘Ndiyoomukosweda makani aanu aaya kufwumbwa aakusika Lusiya imweendelezi wabasikalumamba.’ Alimwi wakalailila silutwe wabasikalumamba kuti Paulo abikkwe muntolongo, pele kalyeendelela, akuti beenzinyina bazumizyigwe kumukutaukila”—Mil. 24:22, 23.
17 Nokwakainda mazuba, Felike antoomwe amukaintu wakwe mu Juda wazina lya Durusila, bakatuma mulomo kwiita Paulo eelyo ‘bakamuswiilila kujatikizya makani aakusyoma muli Kristo Jesu.’ (Mil. 24:24) Nokuba boobo, ciindi Paulo naakaamba makani aajatikizya ‘bululami, kulilesya alimwi alubeta luboola, Felike wakayoowa,’ andiza makani aali boobu akali kupenzya manjezyeezya aakwe akaambo kazintu zibyaabi nzyaakacita mubuumi bwakwe. Aboobo wakaambila Paulo kuti: “Mbubo koya lino, pele ndaakujana ciindi cibotu ndiyookutumina mulomo alimwi.” Kuzwa ciindi eeco, Felike wakali kubonana a Paulo ziindi zinji, ikutali akaambo kakuyanda kwiiya kasimpe, pele wakali kulangila kuti ambweni Paulo ulamupa cisinka mulomo.—Mil. 24:25, 26.
18. Ino nkaambo nzi Paulo ncaakaambila Felike amukaintu wakwe makani aajatikizya ‘bululami, kulilesya alimwi alubeta luboola’?
18 Ino nkaambo nzi Paulo ncaakaambila Felike amukaintu wakwe makani aajatikizya ‘bululami, kulilesya alimwi alubeta luboola’? Kamuyeeya kuti, bakali kuyanda kuzyiba ncaakeelede kucita muntu ‘mumakani aakusyoma muli Kristo Jesu.’ Mbwaanga Paulo wakalibazyi kabotu mbobakabede caboola kumakani aakutalilemeka, lunya alimwi akutalulama, wakali kubapanduluda icakali kuyandika kumuntu iwakali kuyanda kuba sikutobela Jesu. Nzyaakaamba Paulo zyakatondezya zyeelelo zya Leza zilondokede mbozyakasumpukide kapati twazyeezyanisya abuumi mbwaakali kupona Felike amukaintu wakwe. Eeci nicakamugwasya Felike kubona kuti bantu boonse baleelede kulyaambilila kuli Leza akaambo kazintu nzyobayeeya, nzyobaamba alimwi akucita. Cintu cimwi cipati icakali kukonzya kumugwasya nkuzyiba kuti lubeta lwa Leza lwakali lupati kwiinda loolo Felike ndwaakali kubeteka Paulo. Nkakaambo kaako Felike “wakayoowa”!
19, 20. (a) Ciindi notuli mumulimo wamumuunda, mbuti mbotweelede kubeendelezya aabo balibonya kuba aluyandisisyo kakuli mubwini tabalibambilide kucinca buumi bwabo kutegwa bweendelane akasimpe? (b) Ino tuzyi buti kuti Felike tanaakali mulongwe mwini-mwini wa Paulo?
19 Ciindi notuli mumuunda, tulakonzya kujana bantu bali mbuli Felike. Kumatalikilo balakonzya kulibonya mbuli kuti balaaluyandisisyo kukasimpe, kakuli mubwini tabalibambilide kucinca buumi bwabo kutegwa bweendelane akasimpe nkobaiya. Tweelede kucenjela ciindi notusola kubagwasya. Pele, mbubwenya mbuli Paulo, cabupampu tulakonzya kubaambila ncobeelede kucita kutegwa bamukkomanisye Leza. Ambweni kasimpe kalakonzya kubasika aamoyo. Nokuba boobo, ikuti calibonya kuti tabalibambilide kucinca bukkale bwabo bubyaabi, tatweelede kubasinikizya pe, pele tweelede kuunka akuyooyandaula baabo ibakayanda ncobeni kasimpe.
20 Kujatikizya Felike, bube bwakwe bwancobeni bulayubununwa amajwi aakuti: “Nokwakainda myaka yobilo, Felike wakalidwa cuuno a Porikiyo Fesito; alimwi akaambo kakuti Felike wakayanda kukkomaninwa aba Juda, wakamusiya muntolongo Paulo.” (Mil. 24:27) Felike tanaakali mulongwe mwini-mwini wa Paulo. Wakalizyi kabotu kuti basikutobela “Nzila Eeyi” tiibakali basikubukila cisi naa basimanyongwe. (Mil. 19:23) Alimwi Felike wakalizyi kuti kunyina mulawo wabana Roma Paulo ngwaakatyola. Nokuba boobo, wakamusiya muntolongo mwaapostolo kutegwa ‘akkomaninwe aba Juda.’
21. Ino ncinzi cakacitika kuli Paulo ciindi Porikiyo Fesito naakaba mweendelezi, alimwi ncinzi cakazumanana kumuyumya-yumya Paulo?
21 Mbubonya mbokutondezyedwe mukapango kamamanino kubbuku lya Milimo caandaano 24, Paulo wakacili muntolongo ciindi mweendelezi Felike naakalidwa cuuno a Porikiyo Fesito. Aboobo kwakatalikwa buya alimwi kuulanga-langa mulandu. Paulo wakeelede kubetekwa abeendelezi baindene-indene. Masimpe, ooyu mwaapostolo sicamba ‘wakatolwa kubami akubeendelezi.’ (Lk. 21:12) Mbubonya mbotuyoobona, wakapa bumboni kumweendelezi ulaanguzu kapati wakuciindi ncaakali kupona. Kuzintu zyoonse izyakamucitikila, Paulo kunyina naakazungaana mulusyomo. Tacidoonekwi kuti majwi aa Jesu akazumanana kumuyumya aakuti: “Koba acamba!”
a Amubone kabbokesi kakuti “ Felike—Mweendelezi wa Judaya.”
b Tertulo wakalumba Felike akaambo kakupa kuti kube ‘luumuno kapati’ mucisi. Nokuba boobo, masimpe ngakuti kwakanyina luumuno mu Judaya ciindi Felike naakali mweendelezi tweezyanisya aciindi nokwakali beendelezi bamwi mane kusikila ciindi nobwakabukilwa bulelo bwa Roma. Alimwi makani amwi aatali amasimpe ngaakaamba ‘ngakulumba kapati’ nkobakacita ba Juda akaambo kazintu zibotu zyalusumpuko Felike nzyaakacita. Mubwini, Felike wakali kusulwa aba Juda banji akaambo kakubayumizyila buumi alimwi akaambo kalunya lutaambiki ndwaakali kubacitila.—Mil. 24:2, 3.
