Olive Ororona ai Iesu ese ena aposetolo 4 edia henanadai, ena noho negana bona nega oromana ena dokona totona ia haerelaia.

Nisan 11 ai idia bisi bada! Reana Betania dekenai idia giroa lou noho lalonai, Iesu ese ena aposetolo taudia ia hamaoroa: “Umui diba, dina rua murinai Pasova do ia vara, bona unai nega ai taunimanima ena Natuna be ena inai taudia dekenai do idia henia, au dekenai idia kokoa kau totona.”​—Mataio 26:2.

Murina dinana, Wednesday ai, Iesu be ena aposetolo taudia ida ia laga-ani. Tuesday ai ia ese tomadiho gunalaia taudia ia gwau henia bona taunimanima vairanai edia kerere ia hahedinaraia. Idia ura ia idia hamasea. Unai dainai, Nisan 12 ai taunimanima vairanai ia hedinarai lasi, badina ia ura lasi, Thursday dina ia diho neganai, Nisan 14 ena matamanai, Pasova Aria be ena aposetolo ida do ia karaia dala idia koua.

To Pasova aria do lasi neganai, dubu biagudia bona tau badadia be idia laga-ani lasi. Idia be hahelaga tauna badana, Kaiapa, ena ruma dekenai idia haboua. Dahaka dainai? Idia badu badina Iesu ese edia kerere ia gwauraia hedinarai. Unai dainai palani idia karaia, “Iesu do idia dogoatao bona idia hamasea totona.” Edena dala ai bona edena nega ai unai do idia karaia? Idia gwau: “Aria dekenai do ita dogoatao lasi, dika taunimanima huanai heiriheiri ia vara.” (Mataio 26:4, 5) Idia gari badina momo be Iesu idia ura henia.

To ta be tomadiho gunalaia taudia dekenai ia lao. Idia hoa badina ia be Iesu ena aposetolo tauna, Iuda Iskariote. Satani ese lalohadai ia henia ena Biaguna ia samania totona! Iuda ese ia nanadaidia: “Bema ia be umui dekenai lau henia, lau dekenai dahaka do umui henia?” (Mataio 26:15) Idia moale dainai, “idia lalotamona  ia dekenai siliva moni do idia henia.” (Luka 22:5) Hida do idia henia? Idia lalotamona siliva moni 30 do idia henia. Unai be igui hesiai tauna ena davana. (Esodo 21:32) Unai ese ia hahedinaraia tomadiho gunalaia taudia be Iesu idia ura henia lasi, idia dekenai ia be anina lasi. Iuda be “nega namona ta ia tahua Iesu be idia dekenai ia henia totona. To ia ura lasi hutuma vairanai unai ia karaia.”​—Luka 22:6.

Nisan 13 be Wednesday dina ia diho neganai ia matamaia, bona inai be Iesu ena hanuaboi ginigabena Betania dekenai ia noho. Murinai dinana ai, hahediba taudia be Pasova totona gau oredia idia hegaegaelaia be namo. Nisan 14 ia do matamaia lasi neganai, edeseniai Pasova do idia karaia, bona daika ese mamoe natuna do ia alaia bona gabua? Iesu be unai ia gwauraia lasi. Unai dainai Iuda ese dubu biagudia dekenai unai ia gwauraia lasi.

Reana Thursday adorahi ai, Betania amo Iesu ese Petero bona Ioane ia siaia, ia gwau: “Umui lao, Pasova umui hegaegaelaia ita ania totona.” Idia haere: “Oi ura edeseniai Pasova do ai hegaegaelaia?” Iesu ia gwau: “Siti lalonai umui vareai neganai, hodu mai ena ranu ia huaia tauna ta ese umui do ia hedavari henia. Ia do umui badinaia bona ia vareai rumana ai do umui vareai. Bona ruma biaguna do umui hamaoroa, ‘Hadibaia Tauna be oi dekenai ia gwau: “Lau bona egu hahediba taudia be edena daiutu ai Pasova do ai ania?”’ Bena ia ese umui dekenai ia hegaegaelaia ataiai daiutu badana ta do ia hahedinaraia. Unuseniai Pasova do umui hegaegaelaia.”​—Luka 22:8-12.

Unai ruma biaguna be Iesu ena hahediba tauna ta. Bona reana ia diba Iesu ese do ia noia iena ruma ai unai aria badana ia karaia totona. Unai aposetolo rua be Ierusalema dekenai idia ginidae neganai, Iesu ese idia ia hamaoroa hegeregerena ia vara. Unai dainai mamoe bona Pasova aria ai do idia gaukaralaia gaudia ibounai idia hegaegaelaia, Iesu bona iena aposetolo 12 totona.