LESENI 15
Iesu be Daika?
Iesu be histori lalonai momo ese idia dibaia tauna ta. Idia momo be iena ladana sibona idia diba, to ia idia diba namonamo lasi, bona momo ese Iesu idia laloa dalana be idauidau. To Baibel ese Iesu be edena bamona ia herevalaia?
1. Iesu be daika?
Iesu be guba ai ia noho siahu bada aneru ta. Iehova Dirava ese gau ibounai ia do karaia lasi neganai, Iesu ia havaraia guna. Unai dainai, “havaraia gaudia ibounai amo ia be ginigunana.” (Kolose 1:15) Baibel ese Iesu ia gwauraia Dirava ena “Natuna korikorina” badina Dirava sibona ese Iesu ia havaraia. (Ioane 3:16) Iesu be iena Tamana, Iehova ida ia gaukara hebou gau ibounai idia karaia totona. (Aonega Herevadia 8:30 duahia.) Iesu be Iehova tura henia karana ia do moalelaia noho. Ia be Dirava ia hesiai henia gwaukau tauna, “Hereva,” bona Dirava ena sivarai bona hakaua herevadia ia halasia.—Ioane 1:14.
2. Dahaka dainai Iesu be tanobada dekenai ia mai?
Lagani 2,000 bamona gunanai, Iehova ese hoa dalanai ena lauma helaga ia gaukaralaia Iesu ena mauri be guba amo ia abia, bona haneulato ta ladana Maria ena bogana lalonai ia atoa. Unai dala amo Iesu be taunimanima ta bamona ia vara. (Luka 1:34, 35 duahia.) Iehova ese Iesu ia siaia mai tanobada dekenai gwauhamata Mesiana, eiava Keriso ai ia lao totona bona taunimanima do ia hamauria. a Baibel ese Mesia totona ia perovetalaia herevadia ibounai be Iesu dekenai idia guguru, unai amo taunimanima do idia diba ia be “Keriso, mauri Diravana ena Natuna.”—Mataio 16:16.
3. Hari Iesu be edeseniai ia noho?
Iesu ena mauri tanobada ai ia doko murinai, Dirava ese lauma tauanina ai ia hatorea isi lou bona guba dekenai ia giroa lou. Unuseniai, “Dirava ese ia dekenai dagi hereadaena ia henia.” (Filipi 2:9) Hari Iesu be siahu bada aneru ta. To Iehova ena siahu sibona ese Iesu ena siahu ia hereaia.
DIBA MA HAIDA ABIA
Oi tahua Iesu be daika, bona dahaka dainai ia oi dibaia karana be mai anina bada.
4. Iesu be Siahu Ibounai Diravana lasi
Baibel ese ita ia hadibaia Iesu be siahu bada aneru ta guba ai, to iena Tamana, Iehova Dirava henunai ia noho. Dahaka dainai unai bamona ita hereva diba? VIDIO itaia Baibel ese Iesu ena dagi be siahu ibounai Diravana ena amo ia idau karana ia herevalaia dalana oi itaia.
Inai Baibel siridia ese ita do idia durua Iehova bona Iesu edia hetura karana ita lalopararalaia totona. Siri ta ta duahia, bena henanadai herevalaia.
Luka 1:30-32 duahia.
-
Edena dala ai aneru ese Iesu bona “Ataiai Momokani” Diravana Iehova, huanai ia noho hetura karana ia herevalaia?
Mataio 3:16, 17 duahia.
-
Iesu ia bapatiso neganai guba amo ia mai gadona ta ese dahaka hereva ia gwauraia?
-
Oi laloa unai be daika ena gadona?
Ioane 14:28 duahia.
-
Daika be bada bona ena siahu danu be bada? Tamana eiava natuna?
-
Iesu ese Iehova ia gwauraia ena Tamana neganai, ena hereva anina be dahaka?
Ioane 12:49 duahia.
-
Iesu ia laloa ia bona ena Tamana be tamona, a? Dahaka oi laloa?
5. Dahaka ese ia hamomokania Iesu be Mesia?
Baibel lalonai idia noho peroveta herevadia momo ese taunimanima ia durua, Mesia—Dirava ese ia abia hidi taunimanima do ia hamauria tauna, idia diba totona. VIDIO itaia Iesu be tanobada dekenai ia mai neganai, ia hagugurua peroveta herevadia haida oi diba totona.
Baibel ena peroveta herevadia duahia, bena inai henanadai herevalaia:
Mika 5:2 duahia, Mesia do ia vara gabuna oi dibaia totona. b
-
Iesu ena vara ese unai peroveta herevana ia hagugurua, a?—Mataio 2:1.
Salamo 34:20 bona Sekaraia 12:10 duahia, Mesia ena mase idia perovetalaia dalana oi dibaia totona.
-
Unai peroveta herevadia idia guguru, a?—Ioane 19:33-37.
-
Oi laloa Iesu be gau haida ia karaia ia dekenai idia guguru peroveta herevadia ia biagua totona, a?
-
Unai ese oi dekenai dahaka ia hamomokania?
6. Iesu dibaia karana amo namo ita abia
Baibel ese ia hahedinaraia Iesu bona ena gaukara ita dibaia be mai anina bada. Ioane 14:6 bona 17:3 duahia, bena inai henanadai herevalaia:
-
Dahaka dainai Iesu dibaia karana be mai anina bada?
Iesu ese dala ia kehoa Dirava ena turana ai ita lao totona. Iehova ena hereva momokani ia hadibaia, bona ia amo mauri hanaihanai ita abia diba
HAIDA IDIA GWAU: “Iehova ena Witnes taudia be Iesu idia abidadama henia lasi.”
-
Edena bamona do oi haere?
POINT BADANA
Iesu be siahu bada lauma ta. Ia be Dirava ena Natuna bona Mesia.
Riviu
-
Dahaka dainai Iesu idia gwauraia “havaraia gaudia ibounai amo ia be ginigunana”?
-
Iesu be tanobada dekenai ia do mai lasi neganai dahaka ia karaia?
-
Edena bamona ita diba Iesu be Mesia?
REFERENS ITAIA
Iesu be Mesia ai ia lao ena gaukara dekenai diba ma haida oi abia.
“Mesia Totona Idia Perovetalaia Herevadia ese Idia Hamomokania Iesu be Mesia, A?” (Websait atikol)
Baibel ai oi tahua edena dala ai Dirava be Iesu ena tamana.
“Dahaka Dainai Iesu Idia Gwauraia Dirava Ena Natuna?” (Websait atikol)
Oi tahua dahaka dainai Toi Tamona be Baibel ena hahediba herevana lasi.
Hahine ta ese Baibel ai Iesu ena sivarai ia tahua murinai ena mauri ia haidaua dalana oi duahia.
“Jewish Hahine Ta ese Ena Abidadama Ia Sekea Lou Ena Badina Ia Herevalaia” (Noga!, May 2013)
a Leseni 26 bona 27 ai dahaka dainai ta ese taunimanima ia hamauria be namo, bona edena dala ai Iesu ese ita ia hamauria ena badina do ita herevalaia.
b Iesu be tanobada dekenai do ia mai idia perovetalaia ena nega korikorina oi diba totona Hereva Ma Haida 2 itaia.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
